ສະເຫຼີມສະຫຼອງສຽງແຄນລາວເຂົ້າເປັນມໍລະດົກໂລກຢ່າງຍິ່ງໃຫຍ່

    ວັນທີ 11 ເມສາຜ່ານມາ ທີ່ນະ ຄອນຫຼວງວຽງຈັນ ໄດ້ມີພິທີສະເຫຼີມສະ ຫຼອງສຽງແຄນເຊື້ອຊາດລາວເຂົ້າເປັນມໍ ລະດົກໂລກດ້ານວັດທະນະທຳນາມມະ ທຳຂອງມວນມະນຸດໂລກ ຂຶ້ນຢ່າງສົມ ກຽດທີ່ຫໍວັດທະນະທຳແຫ່ງຊາດ ນະ ຄອນຫຼວງວຽງຈັນ ໂດຍໃຫ້

ກຽດເຂົ້າ ຮ່ວມຂອງທ່ານ ທອງລຸນ ສີສຸລິດ ນາຍົກ ລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ບັນດາທ່ານຜູ້ ນຳພັກ-ລັດ ຂັ້ນສູນກາງ ແລະທ້ອງຖິ່ນ, ບັນດາທ່ານທູຕານຸທູດ, ແຂກທີ່ມີກຽດ ທັງພາຍໃນ ແລະຕ່າງປະເທດ ແລະຊາວ ນະຄອນຫຼວງວຽງຈັນເຂົ້າຮ່ວມ.

   ທ່ານ ບໍ່ແສງຄຳ ວົງດາລາ ລັດຖະ ມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ ກ່າວວ່າ: ສຽງແຄນລາວເປັນມູນມໍລະດົກວັດທະນະທຳອັນ ລ້ຳຄ່າຂອງປວງຊົນລາວເຮົາມາແຕ່ບູຮານນະການ, ສຽງແຄນໄດ້ຕິດພັນຢ່າງ ສະໜິດແໜ້ນກັບການດຳລົງຊີວິດຂອງ ຄົນລາວເຮົາໃນທຸກພາກ, ທຸກເຂດແຂວງ ໃນທົ່ວປະເທດ, ໄດ້ຮ່ວມໃຈ, ຮ່ວມທາງ ແລະຮ່ວມຄຽງຂ້າງກັບຄົນລາວເຮົາໄປ ທົ່ວທຸກຫົນແຫ່ງໃນທຸກມຸມໂລກ, ສຽງ ແຄນໄດ້ຝັງເລິກຢູ່ໃນດວງຈິດດວງໃຈ ຂອງຄົນລາວເຮົາໃນທຸກສະຖານະພາບ ແລະສຽງແຄນກໍ່ຮ່ວມກັບເຊື້ອຊາດລາວ ເຮົາເດີນຜ່ານເສັ້ນທາງອັນຍາວໄກ, ລະ ອິດລະອ້ຽວ ແລະສະຫງ່າລາສີແຫ່ງປະ ຫວັດສາດຫຼາຍພັນປີຂອງຊາດລາວເຮົາ ຈົນມີຄຳເວົ້າສືບຕໍ່ກັນມາວ່າ: “ຢູ່ບ່ອນ ໃດມີສຽງແຄນແລ້ວບ່ອນນັ້ນມີຄົນ ລາວ” ຫຼື ຍັງເວົ້າກັນອີກວ່າ “ຜູ້ໃດຢູ່ ເຮືອນຮ້ານ, ກິນເຂົ້າໜຽວ, ເປົ່າແຄນ ຜູ້ນັ້ນແມ່ນຄົນລາວ”.

     ນອກຈາກນັ້ນໃນສະພາບການເຊື່ອມໂຍງສາກົນຂອງ ຍຸກໂລກາພິວັດນີ້ ສຽງແຄນລາວຍັງໄດ້ ຮັບຄວາມສົນໃຈ ແລະນິຍົມຊົມຊອບ ຈາກເພື່ອນມິດຊາວຕ່າງປະເທດອີກດ້ວຍຈົນບາງຄົນໄດ້ມາຮຽນເປົ່າແຄນ ແລະໄດ້ກາຍເປັນໝໍແຄນສະໝັກຫຼິ້ນໄປ ແລ້ວ, ຍ້ອນແນວນັ້ນສຽງແຄນຈິ່ງກາຍ ເປັນມູນມັງມໍລະດົກວັດທະນະທຳອັນ ລ້ຳຄ່າຢ່າງແທ້ຈິງຂອງປວງຊົນຊາວ ລາວພວກເຮົາ ຊຶ່ງພັກ ແລະລັດເຮົາໄດ້ມີ ນະໂຍບາຍມາແຕ່ເບື້ອງຕົ້ນວ່າ ໃຫ້ຖະ ນຸຖະໜອມປົກປັກຮັກສາ, ຟື້ນຟູ, ເສີມ ຂະຫຍາຍມູນເຊື້ອວັດທະນະທຳອັນດີ ງາມຂອງຊາດໃຫ້ຍືນຍົງຢູ່ຄຽງຄູ່ກັບ ຊາດລາວເຮົາຕະຫຼອດດຊົ່ວກາລະນານ.

     ໂດຍປະຕິບັດຕາມແນວທາງນະໂຍ ບາຍຂອງພັກ ແລະການຊີ້ນຳຢ່າງໃກ້ຊິດ ຕິດແທດຂອງລັດຖະບານ, ກະຊວງຖະ ແຫຼງຂ່າວ, ວັດທະນະທຳ ແລະທ່ອງ ທ່ຽວ ຈິ່ງໄດ້ພາກພຽນພະຍາຍາມເອົາ ໃຈໃສ່ຄົ້ນຄວ້າ, ຟື້ນຟູອະນຸລັກຮັກສາ ແລະເສີມຂະຫຍາຍມູນເຊື້ອວັດທະນະ ທຳອັນດີງາມຂອງຊາດຂອງບັນດາເຜົ່າ ໃນທົ່ວປະເທດເຮົາ ແລະໄດ້ສູ້ຊົນສະເໜີ ໃຫ້ອົງການອຸຍແນສ໌ໂກ ຊຶ່ງເປັນອົງການ ທີ່ດູແລຂົງເຂດການສຶກສາ, ວິທະຍາ ສາດ ແລະວັດທະນະທຳຂອງສະຫະປະ ຊາຊາດ ພິຈາລະນາຮັບຮອງເອົາມໍລະ ດົກວັດທະນະທຳຂອງຊາດເຮົາ ເຂົ້າເປັນ ມໍລະດົກໂລກຕາມລະບຽບການ. ຜ່ານ ການຄົ້ນຄວ້າສ້າງເອກະສານນຳສະເໜີ ແລະພາກພຽນຕິດຕາມອະທິບາຍໃນ ກອງປະຊຸມຕ່າງໆມາຫຼາຍເດືອນປີ, ພະ ນັກງານນັກຮົບວັດທະນະທຳພວກເຮົາ ໄດ້ຄ່ອຍໆຊີ້ແຈງໃຫ້ຄະນະກຳມະການທີ່ ກ່ຽວຂ້ອງໄດ້ຮັບຊາບຄວາມເປັນຈິງ ຕ່າງໆກ່ຽວກັບມໍລະດົກວັດທະນະທຳ ແຕ່ລະຢ່າງ ແຕ່ລະປະເພດຂອງຊາດລາວ ເຮົາ ຈົນໃນທີ່ສຸດມາເຖິງວັນທີ 7 ທັນວາ 2017 ກອງປະຊຸມຄະນະກຳມະການ ລະຫວ່າງຊາດ ວ່າດ້ວຍການອະນຸລັກມໍ ລະດົກວັດທະນະທຳນາມມະທຳຂອງ ອົງການອຸຍແນສ໌ໂກ ທີ່ຈັດຂຶ້ນຢູ່ແຂວງ ເຈຈຸ ປະເທດ ສ.ເກົາຫຼີ ຈິ່ງໄດ້ຕົກລົງໃຫ້ ອົງການອຸຍແນສ໌ໂກຮັບຮອງເອົາສຽງ ແຄນລາວເຂົ້າເປັນມໍລະດົກວັດທະນະ ທຳນາມມະທຳຂອງມວນມະນຸດໂລກ ແລະໃນວັນທີ 14 ມີນາ 2018 ນີ້ ຄະນະ ຜູ້ແທນລາວເຮົານຳໂດຍທ່ານຮອງນາ ຍົກລັດຖະມົນຕີ ທ່ານ ສອນໄຊ ສີພັນ ດອນ ກໍ່ໄດ້ໄປຮັບເອົາໃບຢັ້ງຢືນດັ່ງກ່າວ ຈາກ ທ່ານ ນາງ ໂອໄດຣ ອາຊູໄລ ຜູ້ອຳ ນວຍການໃຫຍ່ອົງການອຸຍແນສ໌ໂກຢ່າງ ເປັນທາງການທີ່ນະຄອນຫຼວງປາຣີ.

      ນີ້ເປັນເຫດການປະຫວັດສາດ ທີ່ໜ້າ ປະທັບໃຈ ແລະເປັນກຽດອັນສູງສົ່ງທີ່ ໜ້າເອກອ້າງທະນົງໃຈຂອງປວງຊົນ ລາວທັງຊາດ ຕະຫຼອດເຖິງເຊື້ອຊາດລາວ ເຊື້ອສາຍລາວທີ່ຢູ່ທຸກມຸມໂລກອີກດ້ວຍ. ໃນແງ່ວິຊາການເຫດການນີ້ໄດ້ປະກາດ ຢັ້ງຢືນໃຫ້ທົ່ວໂລກໄດ້ຮັບຊາບຢ່າງເປັນ ທາງການວ່າ ສຽງແຄນຂອງຊາດລາວ ເຮົາໄດ້ຮັບການຂຶ້ນທະບຽນຮັບຮອງ ຈາກອົງການອຸຍແນສ໌ໂກ ຂອງສະຫະປະ ຊາຊາດ ເປັນມໍລະດົກຂອງມວນມະນຸດ ໂລກແລ້ວ ຊຶ່ງຈະຍືນຍົງຢູ່ຄຽງຄູ່ກັບ ມວນມະນຸດທົ່ວໂລກຢ່າງຖາວອນຕະ ຫຼອດໄປ.

      ເຫດການອັນເປັນປະຫວັດສາດນີ້ ເປັນໝາກຜົນແຫ່ງການຈັດຕັ້ງປະຕິບັດ ແນວທາງນະໂຍບາຍ ອັນຖືກຕ້ອງສ່ອງ ໃສຂອງພັກ-ລັດເຮົາ ໂດຍສະເພາະແມ່ນ ນະໂຍບາຍວ່າດ້ວຍວັດທະນະທຳ ຊຶ່ງ ຍາມໃດພັກເຮົາກໍ່ໄດ້ຊີ້ນຳໃຫ້ເອົາໃຈໃສ່ ປົກປັກຮັກສາ ແລະເສີມຂະຫຍາຍມູນ ເຊື້ອວັດທະນະທຳອັນດີງາມຂອງຊາດ ພ້ອມທັງຮັບເອົາສິ່ງຍອດຍິ່ງຈາກວັດທະ ນະທຳຂອງສາກົນ ເພື່ອສືບຕໍ່ພັດທະນາ ວັດທະນະທຳແຫ່ງຊາດໃຫ້ມີລັກສະນະ ຊາດ, ມະຫາຊົນ ແລະກ້າວໜ້າ ຕິດພັນ ກັບການພັດທະນາເສດຖະກິດ-ສັງຄົມ ຂອງປະເທດຊາດ, ຍືນຍົງຄົງຢູ່ຄຽງຄູ່ ກັບຊາດລາວເຮົາຕະຫຼອດໄປ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ