ກວດ​ພົບ​ພະ­ນັກ­ງານ​ການ​ເງິນ 20 ຄົນ ເກັບ​ລາຍຮັບ​ບໍ່​ມອບ​ເຂົ້າ​ງົບ

ສະ­ຫວັນ​ນະ​ເຂດ ກວດ​ພົບ​ເຫັນພະ­ນັກ­ງານ​ໃນ​ຂະ­ແໜງ­ການ​ເງິນ​ເກັບລາຍ​ຮັບ​ບໍ່​ມອບ​ເຂົ້າ​ງົບ­ປະ­ມານ ໂດຍເອົາ​ເງິນ​ໄປ​ໃຊ້​ສ່ວນ​ຕົວ​ໃນ​ໄລ­ຍະ​ຜ່ານມາ​ຈຳ­ນວນ 5,8 ຕື້​ກວ່າ​ກີບ, ມີ​ຜູ້​ຮັບຜິດ​ຊອບ 20 ຄົນ, ເກັບ​ກູ້​ຄືນ​ໄດ້ 5,3 ຕື້​ກວ່າ​ກີບ, ຍັງ​ຄ້າງ 50 ລ້ານ​ກີບ ແລະ​ຍັງ​ບໍ່​ມີ​ຜູ້​ຮັບ­ຜິດ­ຊອບ 410 ລ້ານກີບ ໂດຍ​ຊັດ​ທອດ​ເຖິງ​ພະ­ນັກ­ງານ 3 ຄົນ ແຕ່​ພວກ​ກ່ຽວ​ປະ­ຕິ­ເສດ, ປະ­ຈຸ​ບັນ​ພະ​ແນກ​ກວດ­ກາ​ລັດ​ຍັງ​ສືບ­ຕໍ່​ດຳ­ເນີນ​ການ​ສືບ­ສວນ-ສອບ​ສວນ​ຕາມ​ຂັ້ນ​ຕອນ​ຂອງກົດ­ໝາຍ.

ກອງ​ປະ­ຊຸມ​ເຊື່ອມ​ຊຶມມະ­ຕິ​ເລກ​ທີ 22/ຄບສພ ແລະ ​ສະ­ຫຼຸບວຽກ​ງານ​ກວດ­ກາ​ທົ່ວ​ແຂວງ​ສະ­ຫວັນນະ​ເຂດ​ປີ 2016 ໄດ້​ຈັດ​ຂຶ້ນ​ທີ່​ສະ​ໂມ ສອນ​ຫ້ອງ​ວ່າ­ການ​ປົກ­ຄອງ​ແຂວງ​ໃນລະ­ຫວ່າງ​ວັນ​ທີ 28-29 ມີ­ນາ​ນີ້ ໂດຍການ​ເປັນ​ປະ­ທານ​ຂອງ​ທ່ານ ໂພ​ໄຊ ໄຊ​ຍະ​ສອນ ຮອງ​ເຈົ້າ­ແຂວງ​ສະ­ຫວັນ​ນະ​ເຂດ, ທ່ານ ວັນ​ໄຊ ຊົງ​ຢາ​ຢູ ຮອງ​ປະທານ​ກວດ­ກາ​ລັດ­ຖະ­ບານ, ທ່ານ ນາງ ບຸນ​ເຍື້ອນ ທິດ​ພຸດ​ທະ​ວົງ ປະ­ທານກວດ ກາ​ພັກ-ລັດ​ແຂວງ, ຈາກ​ນີ້​ກໍ​ມີ​ຄະ­ນະ​ປະຈຳ​ພັກ​ແຂວງ, ກຳ­ມະ­ການ​ພັກ​ແຂວງ, ພະ­ແນກ­ການ, ກົມ​ກອງ​ອ້ອມ​ຂ້າງ​ແຂວງ,  ການ​ນຳ 15 ຕົວ​ເມືອງ ແລະ​ພາກ­ສ່ວນກ່ຽວ­ຂ້ອງເຂົ້າ​ຮ່ວມ.

ໃນ​ກອງ​ປະ­ຊຸມ, ທ່ານ ນາງ ບຸນ​ເຍື້ອນ ທິດ​ພຸດ​ທະ​ວົງ ປະ­ທານ​ກວດ­ກາ​ພັກ-ລັດ ແຂວງ​ສະ­ຫວັນ​ນະ​ເຂດ ກໍ​ໄດ້​ຂຶ້ນ​ກ່າວ ເປີດ​ກອງ​ປະ­ຊຸມ ພ້ອມ​ທັງ​ຜ່ານ​ຮ່າງ​ບົດສະ­ຫຼຸບ​ການ­ເຄື່ອນ­ໄຫວ​ວຽກ​ງານ​ກວດກາ​ປີ 2016 ແລະ​ທິດ​ທາງ​ແຜນ­ການ​ປີ 2017 ຊຶ່ງ​ໃຫ້​ຮູ້​ວ່າ: ທົ່ວ​ແຂວງ​ສະ­ຫວັນນະ​ເຂດ ມີ​ໜ່ວຍ​ພັກ​ທັງ​ໝົດ 1.666 ໜ່ວຍ ໃນ​ນີ້​ໄດ້​ຕີ​ລາ­ຄາ​ຈັດ​ແບ່ງ​ປະ­ເພດຄຸ­ນະ­ພາບ​ການ­ຈັດ­ຕັ້ງ​ພັກ ແລະ​ສະ­ມາ­ຊິກ ພັກ​ຕາມ​ການ​ເກັບ​ກຳ​ທົ່ວ​ແຂວງ​ໄດ້​ເປັນໜ່ວຍ​ເຂັ້ມ­ແຂງ-ຮູ້​ນຳ­ພາ​ຮອບ­ດ້ານ​ມີ 797 ໜ່ວຍ, ກວມ 47,11%, ໜ່ວຍ​ພັກ ແຂງ 691 ໜ່ວຍ, ໜ່ວຍ​ພັກ​ກາງ 205 ໜ່ວຍ, ບໍ່​ໄດ້​ຈັດ​ປະ­ເພດ 11 ໜ່ວຍ​ພັກ, ໃນ​ສົກ​ປີ­ຜ່ານ­ມາ, ຄະ­ນະ​ກວດ­ກາ​ພັກ-ລັດ​ແຂວງໄດ້​ຕິດ­ຕາມ, ກວດ­ກາ​ເກັບ​ກຳບັນ­ຊີ​ພາ­ຫະ­ນະ​ນຳ​ເຂົ້າ​ບໍ່​ຖືກ­ຕ້ອງ ແລະ ການ​ແຈ້ງ​ເສຍ​ພາ­ສີ​ປ່ຽນ​ກຳ­ມະ­ສິດ​ພາຫະ​ນະ​ທີ່​ນຳ​ເຂົ້າ​ໃນ​ລະ­ບອບ​ຍົກ­ເວັ້ນ ແລະ​ງົດ​ເກັບ​ພາ­ສີ​ທົ່ວ​ແຂວງ​ສະ­ຫວັນ​ນະເຂດ​ປະ­ເພດ​ກະ­ບະ, ເກັງ, ຈິບ ມີ​ຈຳ­ນວນ ທັງ​ໝົດ 1.296 ຄັນ, ມາ​ຮອດ​ວັນ​ທີ 16 ມີ­ນາ 2017 ແກ້​ໄຂ​ແລ້ວ 508 ຄັນ, ກວມ 39,20%, ເປັນ​ເງິນ 17 ຕື້​ກວ່າ​ກີບ ແລະ​ຍັງ​ສືບ­ຕໍ່​ອີກ​ຈຳ­ນວນ 788 ຄັນ.

ຕິດ­ຕາມ ກວດ­ກາ​ການ­ຈັດ­ຕັ້ງ​ປະ­ຕິບັດ​ຄຳ​ສັ່ງ 15/ນຍ, ວ່າ​ດ້ວຍ​ການ​ເພີ່ມທະ­ວີ​ຄວາມ​ເຂັ້ມ​ງວດ​ໃນ​ການ​ຄຸ້ມ​ຄອງ ແລະ​ກວດ­ກາ​ການ​ຂຸດ​ຄົ້ນ​ໄມ້ ແລະ​ທຸ­ລະກິດ​ໄມ້, ມາ​ຮອດ​ປະ­ຈຸ​ບັນ ໄດ້​ຈັດ​ຕັ້ງ​ປະຕິ​ບັດ​ວຽກ​ງານ​ດັດ­ສົມ​ໂຮງ­ງານ​ປຸງແຕ່ງ​ໄມ້ ແລະ​ກວດ­ກາ​ບັນ­ຊີ​ໄມ້​ສະ­ໜາມ II, III ແມ່ນ​ໄດ້​ສຳ­ເລັດ, ລວມ​ມີ​ໄມ້​ຄ້າງສະ­ໜາມ​ກວ່າ 58 ພັນ​ແມັດ​ກ້ອນ, ໄດ້ດຳ­ເນີນ​ການ​ກວດ­ກາ​ຕາມ​ຜົນ​ການ​ກວດສອບ​ໃນ​ການ​ຊຳ­ລະ​ໜີ້​ສິນ​ດ້ວຍ​ຮູບ​ແບບມີ​ສ່ວນ​ຫຼຸດ 20%, 30% ແລະ​ພັນ­ທະບັດ​ໃນ​ໄລ­ຍະ​ຜ່ານ​ມາ​ທົ່ວ​ແຂວງ​ລວມມີ 5 ບໍ­ລິ­ສັດ, 9 ໂຄງ­ການ, ມູນ​ຄ່າ​ຊຳ­ລະຊ້ຳ​ຊ້ອນ 2 ຕື້​ກວ່າ​ກີບ, ໃນ​ນັ້ນ ກູ້​ຄືນ​ໄດ້ 4 ບໍ­ລິ­ສັດ, ເປັນ​ເງິນ 4 ຕື້​ກວ່າ​ກີບ ແລະ​ຍັງ​ຄ້າງ 1 ບໍ­ລິ­ສັດ, ເປັນ​ເງິນ 350 ລ້ານ​ກີບ, ມາ​ຮອດ​ປະ­ຈຸ​ບັນ ແຂວງ​ສະຫວັນ​ນະ​ເຂດ ສຳ­ເລັດ​ການ​ແຈ້ງ​ຊັບ​ສິນຄັ້ງ​ທີ I ແລ້ວ 100%.

ສະ­ເພາະ​ໃນ​ຂະ­ແໜງ­ການ​ເງິນໄດ້ກວດ­ກາ​ພົບ​ເຫັນ​ການ​ເກັບ​ລາຍ​ຮັບ​ບໍ່ມອບ​ເຂົ້າ​ງົບ­ປະ­ມານ​ເອົາ​ເງິນ​ໄປ​ໃຊ້ສ່ວນ​ຕົວ​ ໃນ​ໄລ­ຍະ​ຜ່ານ​ມາ​ຈຳ­ນວນ 5,8 ຕື້​ກວ່າ​ກີບ, ມີ​ຜູ້​ຮັບ­ຜິດ­ຊອບ 20 ຄົນ, ເກັບ​ກູ້​ຄືນ​ໄດ້ 5,3 ຕື້​ກວ່າ​ກີບ, ຍັງ​ຄ້າງ 50 ລ້ານ​ກີບ ແລະ​ຍັງ​ບໍ່​ທັງ​ມີຜູ້​ຮັບ­ຜິດ­ຊອບ 410 ລ້ານ​ກີບ ໂດຍ​ຊັດ​ທອດ​ເຖິງ​ພະ­ນັກ­ງານ 3 ຄົນ ແຕ່​ພວກກ່ຽວ​ປະ­ຕິ­ເສດ, ປະ­ຈຸ​ບັນ ພະ​ແນກ​ກວດກາ​ລັດ​ຍັງ​ສືບ­ຕໍ່​ດຳ­ເນີນ​ການ​ສືບ­ສວນ-ສອບ​ສວນ​ຕາມ​ຂັ້ນ​ຕອນ​ຂອງ​ກົດ­ໝາຍ ນອກ​ນີ້ ທາງ​ດ້ານ​ວຽກ​ງານ​ອື່ນໆ​ກໍ​ໄດ້​ມີການ­ຈັດ­ຕັ້ງ​ເຄື່ອນ​ໄຫວ ແລະ​ມີ​ຜົນ​ສຳເລັດ​ໄດ້​ຕາມ​ລຳ­ດັບ.

ໂອ­ກາດ​ນີ້, ທ່ານ ໂພ​ໄຊ ໄຊ​ຍະສອນ ຮອງ​ເຈົ້າ­ແຂວງ​ສະ­ຫວັນ​ນະ​ເຂດ ກໍ​ໄດ້ໃຫ້​ກຽດ​ຂຶ້ນ​ເຜີຍ­ແຜ່​ເຊື່ອມ​ຊຶມ​ມະ­ຕິ​ເລກ ທີ 22/ຄບສພ, ວ່າ​ດ້ວຍ​ການ​ແກ້​ໄຂ​ພະຍາດ​ອາດ­ຍາ​ສິດ, ສະ­ກັດ​ກັ້ນ ແລະ​ຕ້ານການ​ສໍ້​ລາດ​ບັງ​ຫຼວງ, ຈາກ​ນັ້ນ ໃນ​ພິ­ທີ​ກໍໄດ້​ມີ​ການ​ເຜີຍ­ແຜ່​ບົດ​ແນະ­ນຳ​ເລກ​ທີ 46/ອກລ, ການ­ຈັດ­ຕັ້ງ​ປະ­ຕິ­ບັດ​ດຳ­ລັດ​ ວ່າດ້ວຍ​ການ​ແຈ້ງ​ຊັບ​ສິນ (ສະ­ບັບ​ປັບ­ປຸງ) ແລະ​ຜ່ານ​ຄຳ​ສັ່ງ​ເລກ​ທີ 15/ນຍ ແລະ​ຄຳ ສັ່ງ​ເລກ​ທີ 1892/ຈຂ.ສຂ ນຳ​ອີກ.

ຂ່າວ: ນສພ ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.