ກະຊວງການເງິນ ຊີ້ນຳຄຳມ່ວນຊຸກຍູ້ທຸລະກິດຕື່ນຕົວມອບພັນທະເຂົ້າງົບລັດຖະບານ

ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ພ້ອມດ້ວຍຄະນະໄດ້ລົງເຄື່ອນໄຫວຊຸກຍູ້ການຈັດເກັບລາຍຮັບເຂົ້າງົບປະມານຢູ່ແຂວງຄຳມ່ວນ ທັງນີ້ ທ່ານໄດ້ຊີ້ນຳໜ່ວຍງານກ່ຽວຂ້ອງຂອງແຂວງເອົາໃຈໃສ່ຊຸກຍູ້ບັນດາຫົວໜ່ວຍທຸລະກິດມີຄວາມຕື່ນຕົວປະກອບສ່ວນມອບພັນທະໃຫ້ແກ່ລັດຖະບານ ຂະນະທີ່ 2 ເດືອນຕົ້ນປີມານີ້  ການຈັດຕັ້ງປະຕິບັດຕົວຈິງຢູ່ແຂວງດັ່ງກ່າວຍັງປະເຊີນກັບບັນຫາຄວາມຫຍຸ້ງຫຼາຍຢ່າງໂດຍສະເພາະແມ່ນຂອດເກັບ ລາຍຮັບເຂົ້າພູດຂອງທ້ອງຖີ່ນ.

ການລົງຊຸກຍູ້ໃນຄັ້ງນີ້ຂອງຄະນະ ແມ່ນມີຂຶ້ນໃນວັນທີ 14 ມີນາ 2017 ໂດຍມີທ່ານ ບຸນມີ ພິມມະສອນ ຮອງເຈົ້າແຂວງໆຄຳມ່ວນ ພ້ອມດ້ວຍບັນດາຫົວໜ້າພະແນກການອ້ອມຂ້າງຕະຫຼອດຮອດພະນັກງານວິຊາການທີ່ກ່ຽວຂ້ອງໃຫ້ການຕ້ອນຮັບ.

ທ່ານ ບຸນເລັ່ງ ກຸນອາວົງ ຫົວໜ້າພະແນກການເງິນແຂວງໄດ້ລາຍງານສະພາບການຈັດຕັ້ງປະຕິບັດແຜນງົບປະມານແຫ່ງລັດ 2 ເດືອນຕົ້ນປີ 2017, ຄາດຄະເນໃນການຈັດຕັ້ງປະຕິບັດງວດ I ປີ 2017 ແລະຄາດຄະເນ 6 ເດືອນຕົ້ນປີ 2017 ຊຶ່ງແຂວງຄຳມ່ວນໄດ້ຮັບມອບໝາຍທັງສູນກາງ ແລະທ້ອງຖິ່ນມີທັງໝົດ 559,96 ຕື້ກີບ, ໃນນີ້ພູດຂອງສູນກາງ (ພາສີ) 282,66 ຕື້ກີບທຽບໃສ່ແຜນສົກປີ 2015-2016 ຫຼຸດລົງ 8,85%, ລາຍຮັບທ້ອງຖິ່ນ 277,30 ຕື້ກີບ, ຫຼຸດລົງ 5,90%, ດ້ານແຜນລາຍຈ່າຍງົບປະມານແມ່ນມີ 554,90 ຕື້ກີບ.

ຜ່ານການຈັດຕັ້ງປະຕິບັດຕົວຈິງ ທ່ານຫົວໜ້າພະແນກການເງິນ ແຂວງເຫັນໄດ້ວ່າ ມີຄວາມຫຍຸ້ງຍາກຫຼາຍພໍສົມຄວນໃນຂອດການຂຸດຄົ້ນ ລາຍຮັບເຂົ້າງົບປະມານ ໂດຍສະເພາະພູດລາຍຮັບຂອງທ້ອງຖິ່ນ, ປະຕິບັດໄດ້ 26,95 ຕື້ກີບ ເທົ່າກັບ 9,72% ແຜນການປີທຽບໃສ່ ສົກປີ 2015-2016 ຫຼຸດລົງ 1,48% ຫຼື ເທົ່າ ກັບ 400 ລ້ານກວ່າກີບ, ສ່ວນລາຍຮັບພູດສູນກາງປະຕິບັດໄດ້ຕາມແຜນກຳນົດສ່ວນລາຍຈ່າຍແມ່ນປະຕິບັດໄດ້ 77,33 ຕື້ກີບ ເທົ່າກັບ 14,01% ແຜນການປີ.

ສຳລັບວຽກງານການສຳຫຼວດຖານຂໍ້ມູນລາຍຮັບງົບປະມານຄືນໃໝ່ ປະຈຸບັນ ແຂວງຄຳມ່ວນແມ່ນສຳເລັດການເອົາສະຖິຕິຖານຂໍ້ມູນທຸກຫົວໜ່ວຍທຸລະກິດຈາກພະແນກອຸດສາຫະກຳ ແລະການຄ້າແຂວງເຂົ້າແບບຟອມມີທັງໝົດ 5.299 ຫົວໜ່ວຍ, ສຳເລັດການແຍກຫົວໜ່ວຍທຸລະກິດທີ່ມີທຶນຈົດທະບຽນແຕ່ 400 ລ້ານກີບຂຶ້ນໄປມີ 903 ຫົວ ໜ່ວຍ, ສຳເລັດການເອົາສະຖິຕິຖານຂໍ້ມູນຫົວໜ່ວຍທຸລະກິດຈາກ 5 ພະແນກການທີ່ກ່ຽວຂ້ອງທ່ານ ບຸນເລັ່ງ ກຸນອາວົງ ກ່າວ.

ແນວໃດກໍດີ ໃນໂອກາດດຽວກັນທ່ານ ບຸນໂຈມ ອຸບົນປະເສີດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ແຕ່ຄຽງຄູ່ກັນນັ້ນຄະນະພັກ, ຄະນະພະແນກຕະຫຼອດຮອດພະນັກງານວິຊາການຕ້ອງມີຄວາມສາມັກຄີ ເຮັດວຽກເປັນໝູ່ຄະນະ, ມີການປະສານ ສົມທົບກັນລະຫວ່າງຂັ້ນລຸ່ມ ແລະຂັ້ນເທິງ, ມີຄວາມຮັບຜິດຊອບສູງ ພ້ອມນັ້ນຍັງຈະໄດ້ເອົາໃຈໃສ່ຕື່ມເບິ່ງຄືນໃນການຊຸກຍູ້ວຽກງານຈັດເກັບລາຍຮັບ ໂດຍສະເພາະແມ່ນແຜນຄາດຄະເນປະຕິບັດງວດ I ແລະ 6 ເດືອນຕົ້ນປີ 2017, ສືບຕໍ່ເກັບກຳສຳຫຼວດຖານຂໍ້ມູນລາຍຮັບເພື່ອເຮັດແນວໃດໃນການເພີ່ມຊອກຂຸດຄົ້ນແຫຼ່ງລາຍຮັບເຂົ້າງົບປະມານ, ເອົາໃຈໃສ່ຊຸກຍູ້ເກັບກຳບັນດາທຸລະກິດທີ່ເຄື່ອນໄຫວພາຍໃນແຂວງຄຳມ່ວນໃຫ້ມາມອບພັນທະ ທັງນີ້ກໍເພື່ອເປັນການເກັບລາຍຮັບເຂົ້າງົບປະມານໃຫ້ໄດ້ຕາມກຳນົດທີ່ລັດຖະບານມອບໝາຍໃຫ້.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.