ກັກຕົວເປົ້າໝາຍ ພົບຢາບ້າ 326 ເມັດ

ໃນວັນທີ 28 ມິຖຸນາ 2017 ໜ່ວຍງານສະກັດກັ້ນ-ຕ້ານຢາເສບຕິດ ປກສ ເມືອງໂພນໂຮງ ແຂວງວຽງຈັນ ລົງແກ້ໄຂປາກົດການຫຍໍ້ທໍ້ທີ່ມີການ ເຄື່ອນໄຫວຊື້-ຂາຍຢາເສບຕິດປະເພດຢາບ້າຢູ່ຂອບເຂດບ້ານແສນຊຸມ ໂດຍສົມ ທົບກັບອຳນາດການປົກຄອງບ້ານແສນຊຸມ ສາມາດກັກຕົວ ທ້າວ ນີວັນ ອາຍຸ 26 ປີ ອາຊີບວ່າງງານ ຢູ່ບ້ານແສນຊຸມ ເມືອງໂພນໂຮງ ແຂວງວຽງຈັນ ພ້ອມຂອງກາງຢາບ້າຈຳນວນ 326 ເມັດ ມາດຳເນີນການສືບສວນ-ສອບສວນ.

ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ນີວັນ ໄດ້ຮັບສາລະພາບວ່າ: ຢາບ້າຈຳນວນດັ່ງກ່າວແມ່ນເປັນ ຂອງຕົນເອງແທ້ ໂດຍເວລາ 11:00 ໂມງ ວັນທີ 27 ມິຖຸນາ 2017 ຜູ້ກ່ຽວແມ່ນໄດ້ ໂທລະສັບສັ່ງຊື້ຢາບ້າ ຈຳນວນ 2 ຖົງ ເທົ່າກັບ 400 ເມັດ ໃນລາຄາ 2,8 ລ້ານກີບ ນໍາຄົນບໍ່ຊາບຊື່ຢູ່ບ້ານນາບອນ ເມືອງໂພນໂຮງ ພາຍຫຼັງໄດ້ຢາບ້າແລ້ວກໍ່ເອົາໄປຂາຍໃຫ້ກຸ່ມມົ້ວສຸມຢາເສບຕິດຢູ່ບ້ານ ແສນຊຸມ ແລະບ້ານໃກ້ຄຽງຈຳນວນ 74 ເມັດ ຂາຍໃນລາຄາ ເມັດໜຶ່ງ 20 ພັນກີບ ຕົກມາຮອດວັນທີ 28 ມິຖຸນາ 2017 ຜູ້ ກ່ຽວຈິ່ງໄດ້ນຳເອົາຢາບ້າຈຳນວນ 326 ເມັດ ໄປຂາຍໃຫ້ກຸ່ມມົ້ວສຸມຢາເສບຕິດຢູ່ບ້ານຂາມ ພໍມາຮອດທາງຊອຍບ້ານຂາມ ຈື່ງຖືກເຈົ້າໜ້າທີ່ຈັບຕົວ ພ້ອມຂອງກາງຢາບ້າ 326 ເມັດ ທີ່ຜູ້ກ່ຽວຊຸກເຊື່ອງໄວ້ຢູ່ຖົງໂສ້ງຫຸ້ມຫໍ່ດ້ວຍຖົ່ງຢາງສີຂ່າວ ຈາກນັ້ນເຈົ້າໜ້າທີ່ຈຶ່ງໄດ້ນຳຕົວຜູ້ກ່ຽວໄປສອບປາກຄຳເພື່ອຂະຫາຍຜົນຊອກຫາກຸ່ມແກ້ງຜູ້ຮ່ວມຂະບວນການເພີ່ມເຕີມ.

ເຈົ້າໜ້າທີ່ຍັງໃຫ້ຮູ້ຕື່ມອີກວ່າ: ຜ່ານມາ ທ້າວ ນີວັນ ໄດ້ເຄື່ອນໄຫວຊື້-ຂາຍຢາເສບຕິດປະເພດຢາບ້າມາແລ້ວຫຼາຍຄັ້ງຈົນນັບບໍ່ຖ້ວນ ຊຶ່ງເຈົ້າໜ້າທີ່ໄດ້ຕິດຕາມເປັນເວລາຫຼາຍເດືອນໃນທີ່ສຸດກໍ່ສາມາດຈັບຕົວຜູ້ກ່ຽວໄດ້, ການກະທຳດັ່ງກ່າວ ແມ່ນໄດ້ສ້າງຄວາມບໍ່ສະຫງົບ ແລະຄວາມບໍ່ເປັນລະບຽບຮຽບຮ້ອຍໃຫ້ແກ່ ສັງຄົມທັງຜິດຕໍ່ກົດໝາຍອາຍາໃນມາດຕາ 146 ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ປະຈຸບັນເຈົ້າໜ້າທີ່ ໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງໂພນໂຮງ ຍັງສືບຕໍ່ດຳເນີນການສືບສວນ-ສອບສວນຜູ້ກ່ຽວ ເພື່ອຂະຫຍາຍຜົນຫາຜູ້ຮ່ວມຂະບວນ ການມາລົງໂທດຕາມລະບຽບກົດໝາຍ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.