ການປ່ອຍຕົວພາງແມ່ນຫຍັງ? ຕ້ອງມີເງື່ອນໄຂແນວໃດຈິ່ງສາມາດປ່ອຍຕົວພາງໄດ້?

     ເນື່ອງ​ຈາ​ກວ່າ ຫຼັກ​ກົດ­ໝາຍອາ­ຍາ​ແມ່ນ​ໃຫ້​ສິດ​ຕໍ່­ສູ້​ຄະ­ດີ​ແກ່ທຸກໆ​ຄົນ ຊຶ່ງ​ບໍ່​ຈຳ­ແນກ​ເຊື້ອ​ຊາດ, ສັນ­ຊາດ, ສາສະ­ໜາ, ເພດ, ອາ­ຍຸ, ຖາ­ນະ​ທາງ​ດ້ານ​ສັງ­ຄົມ ແລະ​ຖານະ​ທາງ​ດ້ານ​ເສດ­ຖະ­ກິດ ແລະ​ທີ່​ສຳຄັນ​ໄປ​ກວ່າ​ນັ້ນ​ແມ່ນ​ກົດໝາຍ​ຍັງໃຫ້​ສັນ­ນິ­ຖານ​ໄວ້​ວ່າ​ຈຳ­ເລີຍ​ຄື​ຜູ້​ບໍລິ​ສຸດ​ຈົນ​ກວ່າ​ຈະ​ຖືກ​ສານ​ຕັດ­ສິນລົງ­ໂທດ​ວ່າ​ເປັນ​ຜູ້​ກະ­ທຳ​ຜິດ​ແທ້​ດັ່ງນັ້ນ​ໃນ​ຂະ​ບວນ​ການ ຫຼື ໃນ​ຂັ້ນ​ຕອນໃນ​ການ​ດຳ­ເນີນ​ຄະ­ດີ​ອາ­ຍາ​ບໍ່​ວ່າ ຈະ​ຢູ່​ໃນ​ຂັ້ນ​ຕອນ​ຂອງ​ການ​ສືບສວນ​ສອບ​ສວນ​ຂອງ​ເຈົ້າ​ໜ້າ­ທີ່​ຕຳຫຼວດ, ຂັ້ນ​ຕອນ​ຂອງ​ການ​ສັ່ງ​ຟ້ອງຄະ­ດີ​ຂອງ​ໄອ​ຍະ​ການ, ຂັ້ນ​ຕອນຂອງ​ການ​ໄຕ່​ສວນ​ຄະ­ດີ​ໃນ​ທີ່​ປະຊຸມ​ສານ​ຂັ້ນ​ຕົ້ນ, ສານ​ອຸ­ທອນ ແລະສານ​ຂັ້ນ​ລົບ​ລ້າງ​ກໍ​ຕາມ​ຖ້າ​ຫາກຄະ­ດີ​ຍັງ​ບໍ່​ສິ້ນ​ສຸດ​ກໍ​ຍັງ​ໃຫ້​ຖື​ວ່າ​ຈຳເລີຍ​ຄື​ຜູ້​ບໍ­ລິ­ສຸດ ດັ່ງ­ນັ້ນ ເຖິງ​ແມ່ນວ່າ​ບາງ​ຄະ­ດີ​ຜູ້​ຖືກ​ຫາ​ຈະ​ຖືກ​ຈັບຕົວ ຫຼື ກັກ​ຕົວ​ໃນ​ລະ­ຫວ່າງ​ການ​ດຳເນີນ​ຄະ­ດີ​ກໍ​ຕາມ ແຕ່​ຜູ້ກ່ຽວ​ຕ້ອງ​ປະຕິ​ບັດ​ແຕກ​ຕ່າງ​ກັນ​ກັບ​ນັກ­ໂທດ​ທົ່ວໄປ​ທີ່​ຖືກ​ຕັດ­ສິນ​ແລ້ວ ແລະ​ນອກຈາກ​ນີ້​ຜູ້ກ່ຽວ​ຍັງ​ມີ​ສິດ​ໃນ​ການ​ຕໍ່ສູ້​ຄະ­ດີ​ເພື່ອ​ພິ­ສູດ​ຄວາມ​ບໍ­ລິ­ສຸດຂອງ​ຕົນ​ເຊັ່ນ​ສິດ​ໃນ​ການ​ໄດ້​ຮັບ​ທະນາຍ​ຄວາມ ແລະ​ຜູ້​ປົກ​ປ້ອງ ແລະອື່ນໆ.

     ການ​ປ່ອຍ​ຕົວ​ພາງ​ໃນ​ລະ­ຫວ່າງການ​ດຳ­ເນີນ​ຄະ­ດີ​ແມ່ນ​ອີກ​ໜຶ່ງ​ສິດ ທີ່​ຜູ້​ຖືກ​ຫາ ຫຼື ຈຳ­ເລີຍ​ຈະ​ໄດ້​ຮັບຕາມ​ກົດໝາຍ​ຫາກ​ຜູ້­ກ່ຽວ​ມີ​ເງື່ອນໄຂ​ທີ່​ຄົບ​ຖ້ວນ​ຕາມ​ທີ່​ໄດ້​ກຳ­ນົດ​ໄວ້ໃນກົດ­ໝາຍ ຖາມ​ວ່າ­ການ​ປ່ອຍ​ຕົວພາງ​ແມ່ນ​ຫຍັງ? ການ​ປ່ອຍ​ຕົວພາງ​ແມ່ນ​ການ​ທີ່​ຜູ້​ຖືກ​ຫາ ຫຼື ຈຳເລີຍ​ຖືກ​ປ່ອຍ​ຕົວ​ຈາກ​ການ​ຄຸມ​ຂັງ ໃນ​ເວ­ລາ​ດຳ­ເນີນ​ຄະ­ດີ​ເພື່ອ​ອອກມາ​ຕໍ່­ສູ້​ຄະ­ດີ ແລະ​ຄົ້ນ​ຫາ​ຄວາມ​ຈິງເພື່ອ​ພິ­ສູດ​ຄວາມ​ບໍ­ລິ­ສຸດ​ຂອງ​ຕົນ ແລ້ວ​ມີ​ຄຳ​ຖາມ​ຕໍ່​ໄປ​ວ່າ​ຜູ້​ຖືກ​ຫາ  ຫຼື ຈຳ­ເລີຍ​ທຸກໆ​ຄົນ ຫຼື ທຸກໆ​ຄະດີ​ບໍ່​ທີ່​ສາ­ມາດ​ປ່ອຍ​ຕົວ​ພາງ​ໄດ້? ຄຳ​ຕອບ​ກໍ​ຄື​ບໍ່​ແມ່ນ​ທຸກໆ​ຄະ­ດີ​ທີ່​ສາມາດ​ປ່ອຍ​ຕົວ​ພາງ​ຜູ້​ຖືກ​ຫາ ຫຼື ຈຳເລີຍ​ໄດ້​ຜູ້​ຖືກ​ຫາ ຫຼື ຈຳ­ເລີຍ​ຕ້ອງ​ມີເງື່ອນ­ໄຂ​ທີ່​ພຽງ­ພໍ​ໃນ​ການ​ປ່ອຍຕົວ​ພາງ​ຈິ່ງ​ຈະ​ມີ​ສິດ​ຖືກ​ປ່ອຍ​ຕົວພາງ ຊຶ່ງ​ເງື່ອນ­ໄຂ​ກໍ​ມີ​ຢູ່​ວ່າ​ຈະ​ຕ້ອງເປັນ​ການ​ກະ­ທຳ​ທີ່​ມີ​ໂທດ​ຕັດ​ອິດສະ­ຫຼະ​ພາບ​ບໍ່​ເກີນ 3 ປີ​ແຕ່​ຖ້າ​ເປັນ ການ​ກະ­ທຳ​ຜິດ​ທີ່​ມີ​ໂທດ​ໜັກ​ເຊັ່ນ: ການ​ຄາ­ຕະ­ກຳ, ການ​ໂຈລະ​ກຳ, ການ​ຄ້າ­ຂາຍ​ຢາ​ເສບ​ຕິດ ແລະອື່ນໆ ​ທີ່​ເປັນ​ອັນ­ຕະ­ລາຍ​ຮ້າຍ​ແຮງຕໍ່​ກັບ​ສັງ­ຄົມ ຫຼື ປະ­ເທດ​ຊາດແລ້ວຜູ້​ຖືກ​ຫາ ຫຼື ຈຳ­ເລີຍ​ກໍ​ບໍ່​ສາ­ມາດຮ້ອງ​ຂໍ​ໃຫ້​ປ່ອຍ​ຕົວ​ພາງ​ໄດ້ ແລະນອກ­ຈາກ​ນັ້ນ​ຕ້ອງ​ບໍ່​ແມ່ນ​ຜູ້​ກະ­ທຳຜິດ​ທີ່​ບໍ່​ເຂັດ​ຫຼາບ ຫຼື ເປັນ​ອາ­ຈີນ ນັ້ນ​ກໍ​ໝາຍ​ຄວາມ​ວ່າ​ຈະ​ບໍ່​ແມ່ນ​ຜູ້ ທີ່​ເຄີຍ​ກະ­ທຳ​ຜິດ​ທາງ​ອາ­ຍາ​ມາຫຼາຍ​ຄັ້ງ​ແລ້ວ.

ນອກ­ຈາກ​ນີ້ ຕາມ​ກົດ­ໝາຍ​ກໍຍັງ​ໄດ້​ລະ­ບຸ​ເຖິງ​ເງື່ອນ­ໄຂ​ອື່ນ​ເພີ່ມຕື່ມ​ເພື່ອ​ເປັນ​ການ​ຮັບ­ປະ­ກັນ​ໃຫ້​ແກ່ການ​ແກ້​ໄຂ​ຄະ­ດີ​ຢ່າງ​ຍຸ­ຕິ​ທຳ, ແຈ້ງຂາວ ແລະ​ຄົບ​ຖ້ວນ​ໂປ່ງ​ໃສ​ເພື່ອໃຫ້​ຄວາມ​ເປັນ​ທຳ​ແກ່​ທຸກໆ​ຝ່າຍ​ບໍ່ວ່າ​ຈະ​ເປັນ​ຝ່າຍ​ທີ່​ເສຍ​ຫາຍ ຫຼື ຈຳເລີຍ​ກໍ​ຕາມ ຊຶ່ງ​ການ​ພິ­ຈາ­ລະ­ນາປ່ອຍ​ຕົວ​ພາງ​ນັ້ນ​ກໍ​ຕ້ອງ​ເບິ່ງ​ອີກວ່າ­ການ​ປ່ອຍ​ຕົວ​ດັ່ງ­ກ່າວ​ຈະ​ບໍ່​ສົ່ງຜົນ​ກະ­ທົບ​ທີ່​ບໍ່​ດີ​ໃຫ້​ແກ່​ຄະ­ດີ​ເຊັ່ນ: ໝັ້ນ​ໃຈ​ວ່າ​ຜູ້​ຖືກ​ຫາ ຫຼື ຈຳ­ເລີຍ​ຈະ​ບໍ່ເອົາ​ຕົວ​ຫຼົບ­ໜີ​ຈາກ​ຄະ­ດີ, ບໍ່​ທຳ­ລາຍ ຫຼັກ​ຖານ, ບໍ່​ທຳ­ຮ້າຍ ຫຼື ນາບ​ຂູ່ ຫຼື ເຮັດ​ໃຫ້​ຜູ້​ເສຍ​ຫາຍ ຫຼື ພະ­ຍານ​ຕົກ ຢູ່​ໃນ​ສະ­ພາບ​ທີ່​ເປັນ​ອັນ­ຕະ­ລາຍ ຫຼື ຜູ້​ຖືກ​ຫາ ຫຼື ຈຳ­ເລີຍ​ເອງ​ຈະ​ບໍ່​ຕົກ ໃນ​ສະ­ພາບ​ທີ່​ເປັນ​ອັນ­ຕະ­ລາຍ​ແລ້ວກໍ​ສາ­ມາດ​ພິ­ຈາ­ລະ­ນາ​ປ່ອຍ​ຕົວພາງ​ໄດ້​ແຕ່​ມີ​ຫຼາຍໆ​ຄົນ​ອາດ​ຈະເຂົ້າ­ໃຈ​ຜິດ​ວ່າ​ຖ້າ​ຜູ້​ຖືກ​ຫາ ຫຼື ຈຳເລີຍ​ຫາກ​ປ່ອຍ​ຕົວ​ພາງ​ແລ້ວ​ຜູ້ກ່ຽວ​ຈະ​ພົ້ນ​ຈາກ​ຄວາມ​ຜິດ ຫຼື ພົ້ນ ຈາກ​ຄວາມ​ຮັບ­ຜິດ­ຊອບ​ທາງ​ອາ ຍາ​ແຕ່​ໃນ​ຄວາມ​ເປັນ​ຈິງ​ແລ້ວ​ຫາກຜ່ານ​ການ​ດຳ­ເນີນ​ຄະ­ດີ​ເປັນ​ທີ່​ສິ້ນສຸດ​ແລ້ວ ແລະ​ເຫັນ​ວ່າ​ຜູ້­ກ່ຽວ​ມີຄວາມ​ຜິດ​ຈິງ​ຕາມ​ຂໍ້​ກ່າວ​ຫາ​ຜູ້ ກ່ຽວ​ກໍ​ຈະ​ຕ້ອງ​ປະ­ຕິ­ບັດ​ໂທດ​ຢ່າງຫຼີກ­ເວັ້ນ​ບໍ່​ໄດ້.

ທີ່ມາ: ເສດຖະກິດ-ສັງຄົມ, ພາບປະກອບຈາກອິນເຕີເນັດ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.