ຄຄຊ ປັບປຸງການຈັດຕັ້ງ ແລະ ນິຕິກຳລຸ່ມກົດໝາຍ

  ກອງປະຊຸມຄະນະກໍາມະການຄຸ້ມຄອງຫຼັກຊັບ (ຄຄຊ) ຄັ້ງທີ II ປະຈໍາປີ 2019 ໄດ້ສຳເລັດລົງດ້ວຍໝາກຜົນອັນຈົບງາມໃນວັນທີ 13 ມິຖຸນາ 2019 ທີ່ ນະຄອນຫຼວງວຽງຈັນພາຍໃຕ້ການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ປະທານ ຄຄຊ; ພ້ອມນີ້ຍັງມີ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ຮອງປະທານ ຄຄຊ ແລະບັນດາຄະນະກໍາມະການຄຸ້ມຄອງຫຼັກຊັບເຂົ້າຮ່ວມ.

  ຊຶ່ງກອງປະຊຸມເທື່ອນີ້ເປັນຄັ້ງທໍາອິດພາຍຫຼັງທີ່ ຄຄຊ ໄດ້ມີການປັບປຸງຄະນະກໍາມະການ ຄຄຊ ຊຸດໃໝ່ຕາມການປັບປຸງກົງຈັກການຈັດຕັ້ງຂອງລັດຖະ ບານຊຸດໃໝ່ໂດຍມີ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ນາງ ທິບພະກອນ ຈັນທະວົງສາ ຮອງລັດ ຖະມົນຕີກະຊວງການເງິນເປັນຄະນະກໍາມະການຄຸ້ມຄອງຫຼັກຊັບຄົນໃໝ່.

  ສຳລັບ ຄຄຊ ພາຍຫຼັງທີ່ຜົນສຳເລັດກອງປະຊຸມ ຄຄຊ ຄັ້ງທີ I ປະຈໍາປີ 2019 ທີ່ຜ່ານມາໄດ້ຈັດຕັ້ງປະຕິບັດການເຄື່ອນໄຫວວຽກງານຄຸ້ມຄອງຫຼັກຊັບຢ່າງຕັ້ງໜ້າໃນນັ້ນຜົນສໍາເລັດອັນພົ້ນເດັ່ນໄດ້ສຳເລັດການສ້າງ ແລະປັບປຸງນິຕິກຳລຸ່ມກົດໝາຍ ແລະສຳເລັດການຄົ້ນຄວ້າອະນຸຍາດໃຫ້ 1 ບໍລິສັດອອກຈຳໜ່າຍຮຸ້ນໃຫ້ແກ່ມວນຊົນຄັ້ງທຳອິດ, ແຕ່ຢ່າງໃດກໍ່ຕາມຍັງຕ້ອງໄດ້ສືບຕໍ່ເອົາໃຈໃສ່ພັດທະນາຕະຫຼາດທຶນລາວໃຫ້ມີປະສິດທິພາບ, ມີຄວາມໜ້າເຊື່ອຖື ແລະມີມາດ ຕະຖານສາກົນ.

  ກອງປະຊຸມຍັງໄດ້ມີການລາຍງານຜົນການຈັດຕັ້ງປະຕິບັດມະຕິກອງປະຊຸມ ຄຄຊ ຄັ້ງທີ I ປີ 2019; ຮັບຮອງນິຕິກຳໃຕ້ກົດໝາຍວ່າດ້ວຍຫຼັກຊັບຈຳນວນ 2 ສະບັບໃນນີ້ມີລະບຽບວ່າດ້ວຍການອອກຈຳໜ່າຍຮຸ້ນກູ້ (ສະບັບປັບປຸງ) ແລະ ລະບຽບວ່າດ້ວຍການຮັບຮອງທະນາຄານດູແລຊັບສິນ (ສະບັບປັບປຸງ); ໃນ ຂະນະດຽວກັນນີ້, ຍັງໄດ້ຮັບຮອງເອົາການສະເໜີຂໍອອກຈຳໜ່າຍຮຸ້ນໃຫ້ແກ່ມວນຊົນຄັ້ງທຳອິດຂອງບໍລິສັດເປົ້າໝາຍ 1 ແຫ່ງ; ຮັບຮອງເອົາການສະເໜີ ຂາຍຮຸ້ນເພີ່ມຕື່ມຂອງບໍລິສັດຈົດທະບຽນ 1 ແຫ່ງ ແລະການລາຍງານສະພາບການເຄື່ອນໄຫວວຽກງານຂອງຕະຫຼາດຫຼັກຊັບລາວ.

 ທ່ານຮອງນາຍົກລັດຖະມົນຕີ, ປະທານ ຄຄຊ ໄດ້ຊີ້ນຳໃຫ້ຜູ້ແທນກອງປະຊຸມຈົ່ງພ້ອມກັນສືບຕໍ່ຈັດຕັ້ງປະຕິບັດວຽກງານຄຸ້ມຄອງຫຼັກຊັບໃຫ້ໜັກແໜ້ນເຂັ້ມແຂງກວ່າເກົ່າ ແລະມອບໃຫ້ທ່ານຜູ້ວ່າການ, ຮອງປະທານ ຄຄຊ ຜູ້ປະຈຳການ ແລະສໍານັກງານ ຄຄຊ ຊຶ່ງເປັນກົງຈັກຊ່ວຍວຽກຂອງ ຄຄຊ ໃນການພັດທະ ນາຕະຫຼາດທຶນຈົ່ງຮີບຮ້ອນປະສານສົມທົບກັບຂະແໜງການກ່ຽວຂ້ອງຕ່າງໆຜັນຂະຫຍາຍເນື້ອໃນຈິດໃຈກອງປະຊຸມຄັ້ງນີ້ເປັນໜ້າວຽກລະອຽດ ແລະ ຈັດຕັ້ງເຊື່ອມຊຶມໃຫ້ເປັນເອກະພາບກັນ, ພ້ອມທັງຈັດຕັ້ງປະຕິບັດຕາມເນື້ອໃນຈິດໃຈກອງປະຊຸມໃຫ້ເປັນຮູບປະທໍາດ້ວຍຈິດໃຈເປັນເຈົ້າການ ແລະ ຄວາມຮັບຜິດ ຊອບສູງ.

ຜູ້ຂຽນ: ຣັດສະໝີ ດວງສັດຈະ                                                                                             

ພາບ ແລະ ຂ່າວໂດຍ: ໜັງສືພິມເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.