ຄຳ​ວຽງ​ງາມ ຈະ​ລົງ­ມື​ສຶກ​ສາ​ສ້າງ​ເຂື່ອນ 2 ແຫ່ງຢູ່​ສະ­ຫວັນ​ນະ​ເຂດ

ບໍ­ລິ­ສັດ ຄຳ​ວຽງ​ງາມ​ຈຳ­ກັດ ຜູ້ດຽວ​ໄດ້​ຕັດ­ສິນ​ໃຈ​ຈົກ​ທຶນ​ດຳ­ເນີນ​ການສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ພັດ​ທະ ນາ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ­ຕົກຂະ­ໜາດ​ນ້ອຍ​ຢູ່​ສາຍ​ນ້ຳ​ເຊ​ກອກ​ເຂດ ເມືອງ​ວິ­ລະ​ບູ​ລີ ແລະ​ຫ້ວຍ​ເບລິ້ມ​ເຂດ ເມືອງ​ນອງ ແຂວງ​ສະ­ຫວັນ​ນະ​ເຂດ ຊຶ່ງ​ຂະ­ນະ​ນີ້​ແມ່ນ​ໄດ້​ຮັບ​ການ​ຕົກ­ລົງ​ເຫັນ​ດີຈານ​ນຳ​ແຂວງ​ເປັນ​ທີ່​ຮຽບ​ຮ້ອຍ​ແລ້ວ​ໃນ​ການ​ເຂົ້າ​ສຳ​ຫຼວດ.

ວັນ​ທີ 9 ມີ­ນາຜ່ານ​ມາ ທີ່​ພະ​ແນກແຜນ­ການ ແລະ​ການ​ລົງ­ທຶນ​ແຂວງ​ສະຫວັນ​ນະ​ເຂດ​ກໍ​ໄດ້​ມີ​ພິ­ທີ​ເຊັນ​ບົດ​ບັນ­ທຶກຄວາມ​ເຂົ້າ­ໃຈ (MOU) ໃນ​ການ​ດຳ­ເນີນສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ­ຕົກ​ຂະ­ໜາດ​ນ້ອຍ ທັງ2 ແຫ່ງ​ໂດຍ​ມີ ທ່ານ ພູ​ຂົງ ນາມ​ມະ​ຈັກ ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ແຂວງ, ທ່ານ ບຸນ​ຕາ ຈິມ​ມາ­ລາ ຮອງ​ຫົວ­ໜ້າ​ພະແນກ​ພະ­ລັງ­ງານ ແລະ​ບໍ່​ແຮ່, ທ່ານ ວາລິ​ຍະ ສີ​ຈັນ​ທອງ​ທິບ ຮອງ​ຫົວ­ໜ້າ​ພະແນກ​ແຜນ­ການ ແລະ​ການ​ລົງ­ທຶນ​ແຂວງ ແລະ​ທ່ານ ປາ​ຈິດ ຄຳ​ວຽງ​ງາມ ຜູ້​ອຳນວຍ​ການບໍ­ລິ­ສັດ

ຄຳ​ວຽງ​ງາມ ຈຳ­ກັດ​ຜູ້​ດຽວ ຮ່ວມ​ກັນ​ລົງນາມ​ໃນ​ບົດ​ບັນ­ທຶກ​ຄວາມ​ເຂົ້າ­ໃຈ​ໃນ​ສະບັບ​ດັ່ງ­ກ່າວ ໂດຍ​ເຂົ້າ​ຮ່ວມ​ເປັນ​ພະ­ຍານ​ມີທ່ານ ທ່ອນ​ແກ້ວ ພຸດ​ທະ​ໄກ​ຍະ​ລາດ ຮອງເຈົ້າ­ແຂວງໆ​ສະ­ຫວັນ​ນະ​ເຂດ, ທ່ານ​ເຈົ້າເມືອງ​ນອງ, ຮອງ​ເຈົ້າ­ເມືອງ​ວິ­ລະ​ບູ​ລີ, ຄະ­ນະ​ພະ­ແນກ­ການ ແລະ​ວິ­ຊາ​ການ​ຈາກພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ປາ​ຈິດ ຄຳ​ວຽງ​ງາມ ໃຫ້​ສຳພາດ​ວ່າ: ຕົນ​ມີ​ຄວາມພ້ອມ​ແລ້ວ​ທີ່​ຈະດຳ­ເນີນ​ການ​ສຶກ​ສາ​ຄວາມ​ເປັນ​ໄປ​ໄດ້​ທີ່ ຈະ​ສ້າງ​ເຂື່ອນ​ໄຟ­ຟ້າ​ນ້ຳ­ຕົກ​ຂະ­ໜາດ ນ້ອຍ​ເຂດ​ເມືອງ​ວິ­ລະ​ບູ​ລີ ແລະ​ເມືອງ​ນອງ ແຂວງ​ສະ­ຫວັນ​ນະ​ເຂດ ສຳ­ຄັນ​ແມ່ນ​ສຶກສາ​ຄວາມ​ເປັນ​ໄປ​ໄດ້​ທາງ​ດ້ານ​ເສດ​ຖະກິດ-ເຕັກ­ນິກ ແລະ​ຫຼີກ­ເວັ້ນ​ຜົນ​ກະ­ທົບ​ຕໍ່ສິ່ງ­ແວ­ດລ້ອມ-ສັງ­ຄົມ ແລະ​ຊີ­ວິດ​ການເປັນ​ຢູ່​ຂອງ​ປະ­ຊາ­ຊົນ​ທີ່​ດຳ­ລົງ​ຊີ­ວິດ​ໃນຂອບ​ເຂດ​ຂອງ​ໂຄງ­ການ​ຮັບ­ປະ­ກັນ​ໄດ້ການ​ພັດ­ທະ­ນາ​ແບບ​ຍືນ​ຍົງ​ຕາມ​ທິດ​ສີຂຽວ​ຂອງ​ແຂວງ​ກໍ​ຄື​ຂອງ​ລັດ­ຖະ­ບານ ເຮັດ​ໃຫ້​ສາ­ມາດ​ກ້າວ​ໄປ​ເຖິງ​ການ​ສະ­ເໜີຂໍ​ການ​ລົງ­ທຶນ​ໃນ​ຂັ້ນ​ຕໍ່​ໄປ.

ເບື້ອງ​ຕົ້ນ​ຄາດ​ວ່າ ເຂື່ອນ​ຫ້ວຍ​ເບລິ້ມ ເມືອງ​ນອງ ມີ​ກຳ­ລັງ​ຕິດ​ຕັ້ງ​ປະ­ມານ 8 ເມ​ກາ​ວັດ ແລະ​ນ້ຳ​ສາຍ​ເຊ​ກອກ​ມີ​ກຳ­ລັງ ຕິດ​ຕັ້ງ​ບໍ່​ຕ່ຳ​ກວ່າ 12 ເມ​ກາ​ວັດ ຊຶ່ງ​ໃນການ​ສຶກ​ສາ​ເບື້ອງ​ຕົ້ນ​ຖ້າ​ຫາກ​ມີ​ຄວາມເປັນ​ໄປ​ໄດ້​ໃນ​ການ​ກໍ່­ສ້າງ​ເຂື່ອນ​ໄຟ­ຟ້ານ້ຳ­ຕົກ​ຢູ່​ຈຸດ​ດັ່ງ­ກ່າວ​ຈະ​ເຮັດ​ໃຫ້​ມີ​ຄວາມສາ­ມາດ​ຜະ­ລິດ​ກະ­ແສ​ໄຟ­ຟ້າ​ສະ­ໜອງຄວາມ​ຕ້ອງ­ການ​ຂອງ​ການ​ຊົມ­ໃຊ້​ພາຍໃນ​ບ້ານ​ເຮືອນ ແລະ​ບັນ­ດາ​ຫົວ­ໜ່ວຍ​ທຸລະ​ກິດ​ພາຍ​ໃນ​ທັງ​ສອງ​ເມືອງ​ໄດ້​ຕາມ ແນວ­ທາງ​ນະ­ໂຍ­ບາຍ​ຂອງ​ພັກ-ລັດ.

ບໍ­ລິ­ສັດ​ຄຳ​ວຽງ​ງາມ​ຈຳ­ກັດ​ແມ່ນ ເປັນ​ບໍ­ລິ­ສັດ​ໜຶ່ງ​ທີ່​ມີ​ຄວາມ​ສາ­ມາດ ແລະ ປະ­ສົບ​ປະ­ການ​ຫຼາຍ​ເປັນ­ຕົ້ນ​ກໍ​ແມ່ນ​ເປັນທີ່​ປຶກ­ສາ​ໂຄງ­ການ​ກໍ່­ສ້າງ​ໄຟ­ຟ້າ​ນ້ຳ­ຕົກໃນ​ຫຼາຍ​ແຂວງ​ຂອງ​ລາວ ໃນ​ນີ້​ແມ່ນ​ເປັນທີ່​ປຶກ­ສາ​ດ້ານ​ສິ່ງ­ແວ­ດລ້ອມ​ໃຫ້ 50 ໂຄງການ​ໃນ​ນີ້​ມີ 85% ແມ່ນ​ວຽກ​ງານ​ໂຄງການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ­ຕົກ ຊຶ່ງ​ລ້າສຸດ​ແມ່ນ​ເປັນ​ທີ່​ປຶກ­ສາ​ໂຄງ­ການ​ກໍ່ສ້າງ​ເຂື່ອນ​ໄຟ­ຟ້າ​ນ້ຳ​ທາ​ຂອງ​ບໍ­ລິ­ສັດ ສປ ຈີນ ແລະ​ເປັນ​ທີ່​ປຶກ­ສາ​ໂຄງ­ການ​ກໍ່ສ້າງ​ກໍ່­ສ້າງ​ສາຍ​ສົ່ງ​ໄຟ­ຟ້າ​ຢູ່​ແຂວງ​ບໍ​ລິຄຳ​ໄຊ​ຕື່ມ​ອີກ ແລະ​ໄດ້​ສຶກສາ​ໂຄງ­ການ​ກໍ່ສ້າງ​ເຂື່ອນ​ໄຟ­ຟ້າ​ຢູ່​ເຊ​ໂປນ​ຕື່ມ​ອີກ.

ຂ່າວ: ນສພ ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.