ຄຶກ­ຄື້ນ​ບັ້ນ​ສອບ­ເສັງ​ນັກ­ຮຽນ​ເກັ່ງ​ທົ່ວ​ປະ­ເທດ

ນັບ​ວ່າ​ເປັນ​ບັນ­ຍາ­ກາດ​ທີ່​ຫ້າວ­ຫັນ ແລະ​ຕື່ນ­ເຕັ້ນ​ຂອງ​ນ້ອງ​ນັກ­ຮຽນ​ຈຳ ນວນ 142 ນ້ອງ​ທີ່​ເປັນ​ຕົວ​ແທນ​ເຂົ້າ​ຮ່ວມ​ແຂ່ງ­ຂັນ​ສອບ­ເສັງ​ນັກ­ຮຽນ​ເກັ່ງ​ລະ­ດັບ​ຊາດ ເພື່ອ​ຍາດ​ເອົາ​ຜົນ­ສຳ­ເລັດ​ຂອງ​ຕົນ ໂດຍ​ສະ­ເພາະ ເພື່ອ​ສ້າງ​ຊື່​ສຽງ​ໃຫ້​ແກ່​ແຂວງ​ກໍ່​ຄື​ໂຮງ­ຮຽນ ແລະ​ຄອບ­ຄົວ.

ພິ­ທີ​ເປີດ​ບັ້ນ​ສອບ­ເສັງ​ນັກ­ຮຽນ​ເກັ່ງ ທົ່ວ​ປະ­ເທດ​ສົກ­ຮຽນ 2016-2017 ຈັດ​ຂຶ້ນ​ວັນ​ທີ 25 ເມ­ສາ ຜ່ານ​ມາ ທີ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໂດຍ​ໃຫ້​ກຽດ​ເຂົ້າ​ຮ່ວມ​ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ​ກະ ຊວງ​ສຶກ​ສາ​ທິ​ການ ແລະ​ກີ­ລາ​ພ້ອມ​ດ້ວຍ ພາກ​ສວນ​ກ່ຽວ­ຂ້ອງ​ຄູ​ອາ­ຈານ ແລະ​ນ້ອງ​ນັກ­ຮຽນ​ເຂົ້າ​ຮ່ວມ.

ທ່ານ​ນາງ ສີ​ສຸກ ວົງ​ວິ­ຈິດ ຫົວ­ໜ້າ​ກົມ​ມັດ­ທະ­ຍົມ​ສຶກ​ສາ​ກະ­ຊວງ​ສຶກ​ສາ​ທິ​ການ ແລະ​ກີ­ລາ​ກ່າວ​ວ່າ ສຳ­ລັບ​ການ​ຈັດ​ສອບ­ເສັງ​ນັກ­ຮຽນ​ເກັ່ງ​ຊັ້ນ​ມັດ­ທະ­ຍົມ​ສຶກ​ສາ​ລະ­ດັບ​ຊາດ​ແຕ່​ລະ​ສົກ­ຮຽນ ແມ່ນ​ເພື່ອ​ເຮັດ​ໃຫ້​ນັກ­ຮຽນ​ໄດ້​ສະ­ແດງ​ອອກ​ຄວາມ​ຮູ້​ຄວາມ​ສາ­ມາດ ແລະ​ພອນ​ສະ­ຫວັນ​ຂອງ​ຕົນ​ເອງ​ໃນ​ວິ­ຊາ​ທີ່​ຈະ​ມາ​ເສັງ, ເພື່ອ​ສຸກ​ຍູ້​ສົ່ງ­ເສີມ​ຂະ​ບວນ​ການ​ສອນ​ດີ-ຮຽນ​ເກັ່ງ​ຂອງ​ກະ­ຊວງ​ສຶກ​ສາ​ທິ​ການ ແລະ​ກີ­ລາ, ຍ້ອງ­ຍໍ ແລະ​ໃຫ້​ໂອ­ກາດ​ແກ່​ນັກ­ຮຽນ​ຜູ້​ທີ່​ສອບ­ເສັງ​ໄດ້​ອັນ​ດັບ​ທີ 1 ແຕ່​ລະ­ວິ​ຊາ, ຊຶ່ງ​ຈະ​ໄດ້​ຮັບ​ທຶນ​ການ​ສຶກ​ສາ​ເພື່ອ​ຮຽນ​ຕໍ່​ວິ­ຊາ​ຊີບ​ຕາມ​ວິ­ຊາ​ທີ່​ຕົນ​ເອງ​ມັກ​ໃນ​ມະ­ຫາ­ວິ­ທະ­ຍາ­ໄລພາຍ​ໃນ​ປະ­ເທດ​ໄດ້, ອີກ​ຢ່າງ​ເພື່ອ​ວັດ​ຄວາມ​ຮູ້ ແລະ​ປະ​ເມີນ​ຜົນ​ດ້ານ​ການ​ຮຽນ​ຂອງ​ນັກ­ຮຽນ ແລະ​ການ​ສິດ­ສອນ​ຂອງ​ຄູ​ຢູ່​ໃນ​ໂຮງ­ຮຽນ, ເພື່ອ​ຄັດ​ເລືອກ ແລະ​ສົ່ງ­ເສີມ​ນັກ­ຮຽນ​ເກັ່ງ​ທີ່​ມີ​ພອນ​ສະ­ຫວັນ​ໃນ​ແຕ່​ລະ­ວິ​ຊາ ເປັນ​ຕົວ​ແທນ​ພາຍ​ໃນ​ປະ­ເທດ​ເຂົ້າຮ່ວມ​ການ​ແຂ່ງ­ຂັນ​ໃນ​ລະ­ດັບ​ພາກ​ພື້ນ ແລະ​ສາ­ກົນ​ທີ່​ສ້າງ​ໂອ­ກາດ​ໃຫ້​ຄູ​ນຳ­ພາ ແລະ​ນັກ­ຮຽນ​ຈາກ​ແຕ່​ລະ​ແຂວງ​ໄດ້​ພົບ​ປະ, ຖອດ​ຖອນ​ບົດ­ຮຽນ​ເຊິ່ງ​ກັນ ແລະ​ກັນ​ໃນ​ການ​ຈັດ­ການ​ຮຽນ-ການ​ສອນ.

ສຳ­ລັບ​ສົກ­ຮຽນ​ນີ້​ ມີ​ການ​ຈັດ­ການສອບ­ເສັງ​ນັກ­ຮຽນ​ເກັ່ງ​ຂັ້ນ​ ມ.4 ແລະ ມ.7 ແມ່ນ​ຈະ​ສອບ­ເສັງ​ຢູ່​ໃນ 4 ວິ­ຊາ ຄື: ວິ­ຊາ​ພາ­ສາ​ລາວ-ວັນ­ນະ­ຄະ­ດີ, ຄະ­ນິດ­ສາດ, ເຄ​ມີ​ສາດ ແລະ​ຟິ​ຊິກ​ສາດ, ຊຶ່ງ​ແຕ່​ລະ­ວິ​ຊາ​ສອບ­ເສັງ​ໃຊ້​ເວ­ລາ 120 ນາ­ທີ, ມີ​ນັກສອບ­ເສັງ​ທັງ​ໝົດ 142 ຄົນ, ຍິງ 57 ຄົນ. ໃນ​ນັ້ນ, ມ.4 ມີ 72 ຄົນ, ຍິງ 29 ຄົນ ແລະ ມ.7 ມີ 70 ຄົນ, ຍິງ 28 ຄົນ.

ແນວ­ໃດ​ກໍ່​ຕາມ​ສຳ­ລັບ​ມາດ­ຖານ​ການ​ຕັດ­ສິນ​ຜົນ​ການ​ສອບ­ເສັງ​ໄດ້​ກຳ­ນົດ​ຄະ­ແນນ​ໃນ​ວິ­ຊາ​ສອບ­ເສັງ​ຕ້ອງ​ໄດ້ 7 ຂຶ້ນ ໄປ​ຈຶ່ງ​ຈະ​ຖືກ​ຮອງ​ຮັບ​ເປັນ​ນັກ­ຮຽນ​ເກັ່ງ​ລະ­ດັບ​ຊາດ. ສຳ­ລັບ​ລາ­ງວັນ​ສອບ­ເສັງ ໄດ້​ຈັດ​ໃຫ້​ລາ­ງວັນ​ທີ 1,2,3 ແລະ​ລາ­ງວັນ​ຊົມ­ເຊີຍ​ໃນ​ແຕ່​ລະ­ວິ​ຊາ ແລະ​ການ​ຍ້ອງ­ຍໍ​ນັກ­ຮຽນ​ເກັ່ງ​ລະ­ດັບ​ຊາດ​ທີ່​ໄດ້​ອັນ​ດັບ​ທີ 1,2, ແລະ 3 ນອກ­ຈາກ​ໄດ້​ຮັບ​ໃບ­ຢັ້ງ­ຢືນ, ໃບ​ຍ້ອງ­ຍໍ ແລະ​ທຶນ​ການ​ສຶກ​ສາ​ແລ້ວ​ຍັງ​ຮັບ​ຫຼຽນ​ນັກ­ຮຽນ​ເກັ່ງ​ນຳ​ອີກ.

ຫຼັງ​ຈາກ​ສຳ­ເລັດ​ການ​ສອບ­ເສັງ​ນັກ­ຮຽນ​ເກັ່ງ​ແລ້ວ, ໃນ​ມື້​ທີ່​ຄະ­ນະ​ກຳ­ມະ­ການ​ກຳ­ລັງ​ກວດ​ບົດ​ສອບ­ເສັງ​ຢູ່​ນັ້ນ, ທາງ​ຄະ­ນະ​ຮັບ­ຜິດ­ຊອບ​ຈັດ​ງານ​ຈະ​ໄດ້​ມີ​ແຜນ​ນຳ­ພາ​ນ້ອງ​ນັກ­ຮຽນ​ເກັ່ງ​ແຕ່​ລະ​ແຂວງ​ໄປ​ທັດ­ສະ­ນະ​ສຶກ​ສາ​ຢູ່​ຫໍ​ພິ​ພິ​ຕະ​ພັນ​ທີ່​ເປັນ​ມູນ­ເຊື້ອ​ຂອງ​ຊາດ​ລາວ ໂດຍ​ສະ­ເພາະ​ແມ່ນ ຫໍ​ພິ​ພິ​ຕະ​ພັນ​ໄກ­ສອນ​ພົມ­ວິ­ຫານ, ຫໍ​ພິ​ພິ​ຕະ​ພັນ​ກະ­ຊວງ​ປ້ອງ​ກັນ​ຄວາມ​ສະ­ຫງົບ, ຫໍ​ພິ​ພິ​ຕະ​ພັນ​ກະ­ຊວງ​ປ້ອງ​ກັນ​ປະ­ເທດ, ທາດ­ຫຼວງ​ແລະ ສະ­ຖານ­ທີ່​ຕ່າງໆ​ພາຍ​ໃນ​ນະ­ຄອນ­ຫຼວງ​ວຽງ​ຈັນ ແລະ​ໃນ​ວັນ​ທີ 27 ເມ­ສາ​ກໍ່​ຈະ​ໄດ້​ມີ​ການ​ຈັດ​ກິດ­ຈະ­ກຳ​ຖາມ-ຕອບ​ວິ­ທະ­ຍາ­ສາດ​ທີ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໂດຍ​ຈະ​ຈັດ​ເປັນ​ແຕ່​ລະ​ແຂວງ ແລະ​ວັນ​ທີ 28 ເມ­ສາ ຖື​ວ່າ​ໄດ້­ຜົນ​ການ​ສອບ­ເສັງ ແລະ​ມີ​ວິ­ທີ​ສະ­ຫຼຸບ​ຢ່າງ​ເປັນ​ທາງ​ການ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.