ງວດ​ທຳ​ອິດ​ທົ່ວ​ປະ­ເທດ​ມີ​ລາຍ​ຮັບ​ເຂົ້າ​ງົບ­ປະ­ມານ 4,6 ພັນ​ກວ່າ​ຕື້​ກີບ

ການ­ຈັດ­ຕັ້ງ​ປະ­ຕິ­ບັດ​ການ​ຈັດ​ເກັບລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ​ປີ 2017 ລັດ­ຖະ­ບານ ກໍ​ຄື​ກະ­ຊວງ​ການເງິນ​ຕັ້ງ​ເປົ້າ​ໄວ້ 23.941 ຕື້​ກວ່າ​ກີບ, ໃນ​ນີ້​ລາຍ​ຮັບ​ພາຍ​ໃນ 21.463 ຕື້​ກວ່າ ກີບ, ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງງວດ​ທຳ​ອິດ​ຂອງ​ປີ 2017 ສາ­ມາດ​ປະ ຕິ​ບັດ​ໄດ້ 4,6 ພັນ​ກວ່າ​ຕື້​ກີບ, ເທົ່າ​ກັບ 19,30%, ຂອງ​ແຜນ​ກາງ​ປີ, ສ່ວນ​ແຜນ 6 ເດືອນ​ຈະ​ໃຫ້​ໄດ້ 10.027 ຕື້​ກີບ.

ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ​ລາຍ​ງານ​ຕໍ່​ກອງ​ປະ­ຊຸມ​ກະ­ກຽມ​ບົດ​ລາຍ​ງານທີ່​ຈະ​ໄປ​ລາຍ​ງານຕໍ່​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 3 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ທີ່​ຈະ ຈັດ​ຂຶ້ນ​ໃນ​ມໍ່ໆ, ຊຶ່ງ​ກອງ​ປະ­ຊຸມ​ດັ່ງ­ກ່າວຈັດ​ຂຶ້ນ​ໃນ​ວັນ​ທີ 6 ເມ­ສາ 2017 ທີ່​ກະຊວງ​ການ​ເງິນ​ໂດຍ​ທ່ານ ວິ­ໄລ​ວົງ ບຸດ ດາ​ຄຳ ປະ­ທານ​ກຳ­ມາ​ທິ​ການ​ແຜນ­ການການ​ເງິນ ແລະ​ກວດ​ສອບ​ສະ­ພາ​ແຫ່ງຊາດ, ພ້ອມ​ດ້ວຍ​ບັນ­ດາ​ກົມ, ຫົວ­ໜ້າ​ກົມ, ຮອງ​ກົມ​ອ້ອມ​ຂ້າງ​ກະ­ຊວງ​ການ​ເງິນເຂົ້າ​ຮ່ວມ.

ທ່ານ ອາດ​ສະ­ພັງ​ທອງ ສີ​ພັນ​ດອນ ລາຍ​ງານ​ວ່າ: ສຳ­ລັບ​ແຜນ​ງົບ­ປະ­ມານແຫ່ງ​ລັດ​ປີ 2017 ເລີ່ມ​ຈັດ​ຕັ້ງ​ປະ­ຕິ­ບັດນັບ​ແຕ່​ວັນ​ທີ 1 ມັງ­ກອນ 2017 ຕາມ​ປີປະ­ຕິ­ທິນ​ທີ່​ກົດ­ໝາຍ​ວ່າ​ດ້ວຍ​ງົບ­ປະ­ມານສະ­ບັບ​ປັບ­ປຸງ ແລະ​ເປັນ​ປີ​ທີ​ສອງ​ຂອງການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII (2016-2020), ຜ່ານ​ການ­ຈັດ­ຕັ້ງ​ປະ ຕິ​ບັດ​ໃນ​ງວດ​ທີ 1 ນັບ​ແຕ່​ວັນ​ທີ 1 ມັງ ກອນ​ຫາ​ວັນ​ທີ 31 ມີ­ນາ 2017 ສາ­ມາດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ໄດ້​ທັງ​ໝົດ 4.621,58 ຕື້​ກີບ, ເທົ່າ​ກັບ 77,89% ຂອງ​ແຜນ​ງວດ ຫຼື ເທົ່າ​ກັບ 19,30% ຂອງ​ແຜນ­ການ​ປີ, ໃນ​ນັ້ນ​ມີ ລາຍ​ຮັບພາຍ​ໃນ 4.183,37 ຕື້​ກີບ, ເທົ່າ​ກັບ 77,78% ຂອງ​ແຜນ​ງວດ 1 ຫຼື ເທົ່າ​ກັບ 19,49% ຂອງ​ແຜນ­ການ​ປີ, ລາຍ​ຮັບຈາກ​ການ​ຊ່ວຍ­ເຫຼືອ​ລ້າ​ຂອງ​ຕ່າງ​ປະເທດ 438,20 ຕື້​ກີບ, ເທົ່າ 78,87% ຂອງ​ແຜນ­ການ​ງວດ 1 ຫຼື ເທົ່າ​ກັບ 17,68% ຂອງ​ແຜນ­ການ​ປີ.

ດ້ານ​ລາຍ​ຈ່າຍ​ງົບ­ປະ­ມານ​ທັງ​ໝົດປະ­ຕິ­ບັດ​ໄດ້​ຈຳ­ນວນ 5.579,32 ຕື້​ກີບ, ເທົ່າ​ກັບ 75, 69% ຂອງ​ແຜນ​ງວດ 1 ຫຼື ເທົ່າ​ກັບ 17,22% ຂອງ​ແຜນ­ການ​ປີ, ໃນ​ນີ້​ສະ­ເພາະ​ລາຍ​ຈ່າຍ​ທີ່​ສຳ­ຄັນ​ປະ­ກອບ​ມີ: ເງິນ­ເດືອນ ແລະ​ເງິນ​ອຸດ​ໜູນ​ປະ­ຕິ­ບັດ​ໄດ້ 58,86% ຂອງ​ແຜນ­ການ​ງວດ 1 ລາຍ​ຈ່າຍ​ລົງ­ທຶນ​ພາຍ​ໃນ​ປະ­ຕິ­ບັດ​ໄດ້ 49,78% ຂອງ​ແຜນ­ການ​ງວດ 1, ລາຍ ຈ່າຍ​ລົງ­ທຶນ​ຕ່າງ­ປະ­ເທດ​ປະ­ຕິ­ບັດ​ໄດ້ 55,07% ຂອງ​ແຜນ​ງວດ 1.

ດ້ານ​ການ​ດຸ່ນ​ດ່ຽງ​ອີງ­ໃສ່​ການ­ຈັດ­ຕັ້ງ​ປະ­ຕິ­ບັດ​ລາຍ​ຮັບ-ລາຍ​ຈ່າຍ​ງວດ ຂອງ​ປີ 2017 ເຫັນ​ວ່າ​ຈະ​ມີ​ການ​ຂາດ ດຸນ​ງົບ­ປະ­ມານ​ຈຳ­ນວນ 957,73 ຕື້​ກີບ, ແຕ່​ໃນ​ນີ້​ເນື່ອງ​ຈາກ​ລາຍ​ຈ່າຍ​ຈຳ­ນວນ 860,55 ຕື້​ກີບ​ແມ່ນ​ໄດ້​ຢືມ​ເງິນ​ຍອດ ເຫຼືອ​ງົບ­ປະ­ມານ​ສົກ​ປີ­ຜ່ານ­ມາ ເພື່ອ​ຊຳລະ​ລ່ວງ​ໜ້າ​ແລ້ວ ຈິ່ງ​ເຮັດ​ໃຫ້­ການ​ຂາດ ດຸນ​ງົບ­ປະ­ມານ​ໃນ​ງວດ 1 ຍັງ​ເຫຼືອ​ພຽງ ແຕ່​ຈຳ­ນວນ 97,18 ຕື້​ກີບ, ພ້ອມ​ນີ້​ກໍ​ຍັງ ມີ​ລາຍ​ຈ່າຍ​ອື່ນໆ​ທີ່​ນອນ​ໃນ​ພາກ​ດຸ່ນ​ດ່ຽງ ທີ່​ຈຳ­ເປັນ​ຕ້ອງ​ປະ­ຕິ­ບັດ​ຄື: ການ​ຊຳ­ລະ​ຕົ້ນ ທຶນ​ເງິນ​ກູ້​ຢືມ​ຕ່າງ­ປະ­ເທດ​ຈຳ­ນວນ 1.269,76 ຕື້​ກີບ ແລະ​ລາຍ​ຈ່າຍ​ຊຳ­ລະພັນ­ທະ­ບັດ​ຄັງ​ເງິນ​ຈຳ­ນວນ 193,22 ຕື້ ກີບ ລວມ​ທັງ​ໝົດ 1.559,76 ຕື້​ກີບ.

ໂດຍ​ລວມ​ແລ້ວ​ໃນ​ງວດ 1 ຂອງ​ແຜນ ປີ 2017 ຍັງ​ມີ​ຄວາມ​ຕ້ອງ­ການ​ແຫຼ່ງເງິນ​ຕົວ​ຈິງ​ເພື່ອ​ມາ​ດຸ່ນ​ດ່ຽງ​ງົບ­ປະ­ມານ ຈຳ­ນວນ 1.559,76 ຕື້​ກີບ, ຊຶ່ງ​ປະ­ຈຸ​ບັນ ມີ​ແຫຼ່ງ​ດຸນ​ແລ້ວ​ຈຳ­ນວນ 2.442,32 ຕື້​ກີບ​ຈາກ​ເງິນ​ກູ້​ຢືມ​ຕ່າງ­ປະ­ເທດ​ເປັນ ໂຄງ­ການ (ຈົດ​ຮັບ-ຈົດ​ຈ່າຍ) ຈຳ­ນວນ 592,34 ຕື້​ກີບ,  ພັນ­ທະ­ບັດ​ຄັງ​ເງິນ 850 ຕື້​ກີບ ແລະ​ທະ­ນາ­ຄານ​ແຫ່ງ ສປປ ລາວ 1.000 ຕື້​ກີບ, ເຮັດ​ໃຫ້​ຍອດ​ເຫຼືອ​ງົບ ປະ­ມານ​ໃນ​ງວດ 1 ຈຳ­ນວນ 882,56 ຕື້​ກີບ, ຊຶ່ງ​ຈະ​ສາ­ມາດ​ຮອງ​ຮັບ​ແຜນ​ລາຍຈ່າຍ​ໃນ​ງວດ 2 ປີ 2017 ທ່ານ​ຮອງ​ລັດຖະ​ມົນ­ຕີ​ກະ­ຊວງ​ການ​ເງິນ​ກ່າວ.

ທ່ານ ອາດ​ສະ­ພັງ​ທອງ ສີ​ພັນ​ດອນ ເນັ້ນ​ຕື່ມ​ວ່າ: ເພື່ອ​ໃຫ້​ບັນ­ລຸ​ເປົ້າ​ໝາຍ​ທີ່​ລັດ­ຖະ­ບານ​ວາງ​ໄວ້​ການ​ຈັດ​ເກັບ​ລາຍ ຮັບ​ເຂົ້າ​ງົບ­ປະ­ມານ​ແຫ່ງ​ລັດ​ໃນ​ປີ 2017 ໃຫ້​ໄດ້​ທັງ​ໝົດ 23.941 ຕື້​ກີບ, ໃນ​ນີ້ ລາຍ​ຮັບ​ພາຍ​ໃນ 21.463 ຕື້​ກີບ ແລະ ແຜນ​ລາຍ​ຈ່າຍ​ງົບ­ປະ­ມານ ທັງ​ໝົດຈຳນວນ 32,402 ຕື້​ກີບ, ຄາດ​ຄະ­ເນ​ເງິນຂາດ​ດຸນ​ທັງ​ໝົດ 8.461 ຕື້​ກີບ.

ກະ­ຊວງ​ການ​ເງິນ​ຈິ່ງ​ໄດ້​ຕັ້ງ​ເປົ້າ ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ 6 ເດືອນ​ຕົ້ນ​ປີ 2017 ຕ້ອງ​ບັນ­ລຸ 10.027 ຕື້​ກີບ, ເທົ່າ​ກັບ 41,88% ຂອງ​ແຜນ­ການ​ປີ, ໃນ​ນັ້ນ​ລາຍ​ຮັບ​ພາຍ ໃນ 9.118 ຕື້​ກີບ​ເທົ່າ​ກັບ 42,50% ຂອງ​ແຜນ­ການ​ປີ, ລາຍ​ຮັບ​ຊ່ວຍ­ເຫຼືອ​ລ້າ 909 ຕື້​ກີບ​ເທົ່າ​ກັບ 36,69% ຂອງ​ແຜນ ການ​ປີ.

ດ້ານ​ລາຍ​ຈ່າຍ​ທັງ​ໝົດ​ຄາດ​ຈະ​ປະ ຕິ​ບັດ​ໄດ້ 14.474 ຕື້​ກີບ ເທົ່າ​ກັບ 44,67% ຂອງ​ແຜນ­ການ, ການ​ດຸ່ນ​ດ່ຽງ​ອີງ­ໃສ່ການ​ຄາດ​ຄະ­ເນ​ຈັດ​ຕັ້ງ​ປະ­ຕິ­ບັດ​ລາຍ​ຮັບ- ລາຍ​ຈ່າຍ 6 ເດືອນ​ຕົ້ນ​ປີ 2017 ຈະ​ມີ​ການ​ຂາດ​ດຸນ​ລວມ​ທັງ​ການ​ຊຳ­ລະ ຕົ້ນ​ທຶນ​ເງິນ​ກູ້​ຢືມ​ຕ່າງ­ປະ­ເທດ ແລະ ລາຍ​ຈ່າຍ​ຊຳ­ລະ​ພັນ­ທະ­ບັດ​ຄັງ​ເງິນ​ຈຳ ນວນ ລວມ​ທັງ​ໝົດ 7.624,09 ຕື້​ກີບ, ຊຶ່ງ​ລັດ­ຖະ­ບານ​ມີ​ຄວາມ​ຈຳ​ຕ້ອງ​ໄດ້​ເອົາ­ໃຈ­ໃສ່​ລະ­ດົມ​ແຫຼ່ງ​ທຶນ​ມາ​ດຸ່ນ​ດ່ຽງ​ງົບປະ­ມານ​ໃນ 6 ເດືອນ​ຕົ້ນ​ປີ​ໃຫ້​ພຽງພໍ​ກັບ​ຄວາມ​ຮຽກ­ຮ້ອງ​ຕ້ອງ­ການ, ເພື່ອຮັບ­ປະ­ກັນ​ໃຫ້​ບັນ­ດາ​ວຽກ​ງານ​ສຳ­ຄັນ ແລະ​ການ­ເຄື່ອນ­ໄຫວ​ຂອງ​ອົງ­ການ​ຈັດຕັ້ງ​ພັກ-ລັດ​ສາ­ມາດ​ດຳ­ເນີນ​ໄປ​ໄດ້​ຢ່າງຄ່ອງ​ຕົວ ແລະ​ບັນ​ລຸ​ຸ​ຕາມ​ແຜນ­ການ.

ໂດຍ: ຈັນ​ດາ­ລາ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.