ຈັບຍົກແກ້ງ ເຊົ່າເຮືອນເປັນບ່ອນຈຳໜ່າຍ ແລະ ມົ້ວສຸມຢາເສບຕິດ

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ບໍລິ ຄຳໄຊ ສົມທົບກັບກໍາລັງວິຊາສະເພາະເມືອງທ່າພະບາດ ເຂົ້າກວດ ຄົ້ນ ເຮືອນເຊົ່າຢູ່ບ້ານທ່າບົກ ເມືອງທ່າພະບາດ ແຂວງບໍລິຄຳໄຊ ພົບ ເຫັນ ຢາເສບຕິດປະເພດຢາບ້າ ຈຳນວນ 12.400 ເມັດ, ກັນຊາອັດ ແທ່ງ 2 ກ້ອນ 1 ກັບນ້ອຍ ພ້ອມອາວຸດ ແລະ ກັກຕົວຜູ້ຖືກຫາ 10 ຄົນ. ໃນຂະ ນະທີ່ພວກກ່ຽວກໍາລັງມົ້ວສຸມຢາ ເສບ ຕິດໃນນີ້ມີຊາວຕ່າງງຊາດ 4 ຄົນ.

ເຈົ້າໜ້າທີ່ ປກສ ເປີດເຜີຍວ່າ: ພາຍຫຼັງໄດ້ຮັບແຫຼ່ງຂ່າວຈາກພົນລະ ເມືອງດີ ວ່າ: ມີກຸ່ມຄົນບໍ່ດີຈໍານວນໜຶ່ງລັກລອບເຄື່ອນໄຫວຄ້າຂາຍ ແລະ ມົ້ວສຸມຢາເສບຕິດປະເພດຢາບ້າ ຢູ່ເຮືອນເຊົ່າ ເຂດບ້ານທ່າບົກ ເມືອງທ່າພະບາດ ຈຶ່ງໄດ້ນຳກຳລັງລົງເກັບກຳຂໍ້ມູນພິສູດແຫຼ່ງຂ່າວເຫັນ ວ່າມີມູນຄວາມຈິງ ພ້ອມໄດ້ສົມທົບກັບເຈົ້າໜ້າທີ່ ປກສ ເມືອງ ທ່າພະ ບາດ ສ້າງເປັນລາຍຄະດີສະເພາະ. ຮອດວັນທີ 21 ມີນາ 2017, ຈຶ່ງໄດ້ນໍາ ກໍາລັງວິຊາສະເພາະເຂົ້າປິດລ້ອມ ແລະ ກວດຄົ້ນເຮືອນເຊົ່າຫຼັງດັ່ງກ່າວ, ກວດພົບຢາບ້າຈຳນວນ 6 ມັດ ກັບ 2 ຖົງ ເທົ່າກັບ 12.400 ເມັດ, ກັນ ຊາອັດແທ່ງ 2 ກ້ອນ 1 ກັບນ້ອຍ, ປືນສັ້ນ 2 ສະບອກ, ປືນດັດແປງຍິງ ລູກແວັງ 1 ກະບອກ, ລູກປືນແວັງ 27 ລູກ, ໂທລະສັບ 5 ໜ່ວຍ, ມີດ 1 ດວງ, ເງິນກີບ 640.000 ກີບ, ເງິນບາດໄທ 2.000 ບາດ, ວັດຖຸຄ້າຍ ຄືຄໍາຈໍານວນໜຶ່ງ ພ້ອມລົດຈັກ 4 ຄັນ, ກັກຕົວຜູ້ຖືກຫາໄດ້ 10 ຄົນ.

ຜູ້ຖືກຫາຈໍານວນດັ່ງກ່າວມີ ທ້າວ ນັດທະພົງ ອາຍຸ 22 ປີ ຢູ່ບ້ານ ໜອງແສງ. ທ້າວ ນັນທະວັດ ອາຍຸ 19 ປີ ຢູ່ບ້ານ ຄໍາແສນ. ທ້າວ ພົງເທບ ອາຍຸ 22 ປີ ບ້ານ ນາຈະເລີນ. ນາງ ກິລາຄອນ (ປາ) ອາຍຸ 17 ປີ ບ້ານໂນນສະຫວ່າງ ທັງ 4 ຄົນແມ່ນຢູ່ເມືອງບຶງການ, ແຂວງບຶງການ ປະເທດໄທ. ທ້າວ ບຸນມາ ແກ້ວບົວບານ ອາຍຸ 37 ປີ ຢູ່ບ້ານເລົ່າ, ເມືອງທ່າແຂກ, ແຂວງຄໍາມ່ວນ. ທ້າວ ດາລານີ ອາຍຸ 25 ປີ ຢູ່ບ້ານ ສີວິໄລ ເມືອງໂພນໂຮງ ແຂວງວຽງຈັນ. ນາງ ມຸກ ອາຍຸ 18 ປີ ຢູ່ບ້ານໂພນສີ, ເມືອງນາຊາຍທອງ, ນະຄອນຫຼວງວຽງຈັນ. ທ້າວ ລໍາເງິນ ອາຍຸ 50 ປີ ບ້ານທ່າບົກ ເມືອງທ່າພະບາດ. ນາງ ຄູນຄໍາ ອາຍຸ 17 ປີ ຢູ່ບ້ານ ຄໍາບອນ, ເມືອງປາກຊັນ ແລະ ນາງ ນິ້ມ ອາຍຸ 19 ປີ ຢູ່ບ້ານ ສົມສະໜຸກ ເມືອງປາກກະດິງ ທັງ 3 ແມ່ນຢູ່ ແຂວງບໍລິຄໍາໄຊ.

ທີ່ມາ: ນສພ ຄວາມສະຫງົບ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.