ຊີເຄແອລ ຜະລິດເກີບຍີ່ຫໍ້ຊັ້ນນຳຂອງໂລກຢູ່ລາວ

Dr.MarTens ເກີບຍີ່ຫໍ້ທີ່ມີຊື່ສຽງລະດັບໂລກເປັນອີກໜຶ່ງຜະລິດຕະພັນທີ່ຜະລິດຂຶ້ນດ້ວຍສີມືຄົນລາວຢູ່ປະເທດລາວ ໂດຍບໍລິສັດ CKL ຈໍາກັດ ປະຈຸບັນມີກໍາລັງການຜະລິດ 8.500 ຄູ່ຕໍ່ອາທິດ ເພື່ອສົ່ງອອກໂດຍມີຕະຫຼາດຫຼັກຢູ່ກຸ່ມປະເທດຢູໂຣບ.

ໃນທ້າຍອາທິດຜ່ານມານີ້ ທ່ານ ອະດິດເລກ ຫົງພູນພິພັດ ປະທານສະພາອຸດສາຫະກໍາຈັງຫວັດຂອນແກ່ນປະເທດໄທ, ທ່ານ ເຂັມຊາດ ສົມໃຈວົງ ປະທານສະພາການຄ້າຈັງ ຫວັດດຽວກັນ ພ້ອມດ້ວຍນັກທຸລະກິດຂະແໜງການຕ່າງໆຂອງປະເທດໄທໄດ້ເດີນທາງເປັນຄະນະມາຢ້ຽມຊົມການດໍາເນີນງານ ແລະຂັ້ນຕອນການຜະລິດເກີບຊັ້ນນໍາລະດັບໂລກຂອງບໍລິສັດ CKL ຈໍາກັດ ທີ່ບໍລິສັດດັ່ງກ່າວ ນະຄອນຫຼວງວຽງຈັນ ຊຶ່ງມີຄະນະຝ່າຍລາວນໍາໂດຍທ່ານ ມະໂນຮັກ ລາຊະຈັກ ຫົວໜ້າກົມອຸດສາຫະກໍາ ແລະຫັດຖະກໍາກະຊວງ ອຸດສະຫະກໍາ ແລະການຄ້າ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ສຸເມດ ກອງພັດທະນາກູນ ປະທານກໍາ ມະການບໍລິຫານກຸ່ມບໍລິສັດ CK Zo ປະເທດໄທ, ທັງເປັນປະທານກໍາມະການບໍລິສັດ CKL ຈໍາກັດ ສປປ ລາວ ໄດ້ລາຍງານໃຫ້ຮູ້ວ່າ: ບໍລິສັດ CKL ຈໍາກັດ

ສປປ ລາວ ປະກອບກິດຈະການຄັ້ງທໍາອິດຢູ່ລາວໃນປີ 2012 ທີ່ບ້ານວັງຊາຍ ເມືອງໄຊເສດຖາ ນະຄອນຫຼວງວຽງຈັນ ໃນເນື້ອທີ່ປະມານ 3,2 ພັນຕາແມັດ ມີພະນັກງານເລີ່ມຕົ້ນ 280 ຄົນ, ໂດຍເປັນການຜະລິດສ່ວນເທີງຂອງເກີບ ເພື່ອສົ່ງກັບບໍລິສັດ CK-KK ຈັງຫວັດຂອນແກ່ນ ປະກອບເປັນເກີບສໍາເລັດຮູບເພື່ອສົ່ງ ອອກໄປຕ່າງປະເທດ.

ໂດຍການເລີ່ມດໍາເນີນກິດຈະການຢູ່ ສປປ ລາວ ນັ້ນ, ບໍລິສັດພວກເຮົາໄດ້ມີການຫາລືຮ່ວມກັບຫໍການຄ້າ ຂອນແກ່ນ ແລະກຸ່ມບໍລິສັດ ພົງສະຫວັນ ຈົນເກີດ ການຮ່ວມມືຮ່ວມລະຫວ່າງໜ່ວຍງານຂຶ້ນວ່າດ້ວຍການຄ້າ ແລະການລົງທຶນຕາມນະໂຍບາຍຂອງລັດຖະບານແຫ່ງ ສປປ ລາວ, ຈາກນັ້ນ ໃນປີ 2015 ບໍລິສັດໄດ້ຂະຫຍາຍກໍາລັງການຜະລິດດ້ວຍການຍ້າຍ ໂຮງງານມາຕັ້ງຢູ່ບ້ານຫົວຂົວເມືອງ ແລະແຂວງດຽວກັນໃນເນື້ອທີ່ປະມານ 23 ພັນຕາແມັດ ແລະເພີ່ມພະນັກງານ ເປັນ 330 ຄົນ ມີກໍາລັງການຜະລິດສ່ວນ ເທິງຂອງເກີບປະມານ 20 ພັນຄູ່ຕໍ່ອາທິດ.

ໃນປີດຽວກັນບໍລິສັດ CKL ໄດ້ມີການຂະຫຍາຍຖານການຜະລິດດ້ວຍການຕັ້ງໂຮງງານຜະລິດເກີບສໍາເລັດຮູບໃນ ສປປ ລາວ ຂຶ້ນອີກແຫ່ງທີ່ບ້ານດົງຄໍາຊ້າງ ເມືອງຫາດຊາຍຟອງ ນະຄອນຫຼວງວຽງຈັນ ໂດຍມີກໍາລັງການຜະລິດເກີບ ສໍາເລັດຮູບອາທິດລະ 8 ພັນຄູ່ ແລະຂະນະນີ້ຢູ່ໃນລະຫວ່າງການເພີ່ມກໍາລັງການຜະລິດ ໂດຍມີເປົ້າໝາຍທີ່ 20 ພັນຄູ່ຕໍ່ອາທິດ ສໍາລັບໂຮງງານແຫ່ງນີ້.

ປະຈຸບັນໂຮງງານທັງສອງແຫ່ງຂອງ ບໍລິສັດພວກເຮົາມີພະນັກງານທີ່ເປັນ ແຮງງານຊາວລາວທັງໝົດ 595 ຄົນ, ມີກໍາລັງການຜະລິດເກີບສໍາເລັດຮູບ 8,5 ພັນຄູ່ຕໍ່ອາທິດ, ຊິ້ນສ່ວນໜັງໜ້າເກີບອີກ 24 ພັນຄູ່ຕໍ່ອາທິດ, ໂດຍເກີບສໍາເລັດຮູບ ທີ່ຜະລິດຄືຍີ້ຫໍ້ Dr.MarTens ທີ່ບໍລິ ສັດ ໄດ້ຜະລິດທັງໝົດລະບົບ ແລະມີການຈ້ຳກາສັນຍາລັກໃນເກີບວ່າ Made in LAO ໂດຍມີຕະຫຼາດຫຼັກຢູ່ກຸ່ມປະເທດຢູໂຣບ.

ທ່ານປະທານກໍາມະການບໍລິສັດ CKL ຍັງໃຫ້ຮູ້ອີກວ່າ: ບໍລິສັດລວມທັງພະນັກງານຊາວລາວທຸກຄົນມີຄວາມພາກພູມໃຈທີ່ເປັນຜູ້ຜະລິດເກີບ Dr.Mar Tens Made in Lao ຊຶ່ງເປັນຜະລິດຕະພັນທີ່ມີຊື່ສຽງລະດັບໂລກ, ໃນຕໍ່ໜ້າ ທາງບໍລິສັດແມ່ນຈະສືບຕໍ່ນໍາເອົາສິນຄ້າ ຍີ່ຫໍ້ທີ່ມີຊື່ສຽງມາຜະລິດຢູ່ລາວຕື່ມອີກ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.