ຊີ​ກາ ມີ​ໂອ­ກາດ​ແຜ່​ກະ­ຈາຍ​ໃນ​ລະ­ດັບ​ຕໍ່າ

   ວັນ​ທີ 19 ເດືອນ​ກຸມ­ພາ 2016 ທີ່​ຜ່ານ​ມາ​ກົມ​ຄວບ​ຄຸມ­ພະ​ຍາດ​ຕິດ­ຕໍ່​ກະ­ຊວງ​ສາ­ທາ­ລະ­ນະ​ສຸກ ແລະ​ສະຖາ​ບັນ​ປັດ​ສະ​ເຕີ ສປປ ລາວ ໄດ້​ແຈ້ງ​ໃຫ້​ຊາບ​ວ່າ ​ຜົນ​ການສຶກ​ສາ​ແຕ່​ປີ 2012-2015 ໄດ້​ກວດ​ຕົວ­ຢ່າງ​ເລືອດ​ທີ່​ເກັບຈາກ​ຄົນ​ເຈັບ​ທີ່​ມີ​ອາ­ການ​ຄ້າຍ­ຄື​ກັບ​ພະ­ຍາດ​ໄຂ້­ຍຸງ​ລາຍ​ຫຼາຍ​ກວ່າ 1.300 ຕົວ­ຢ່າງ, ໃນ​ນັ້ນ ໄດ້​ກວດ​ເພີ່ມ​ເຕີມ​ຫາ​ເຊື້ອ​ຈຸ​ລະ​ໂລກ​ອື່ນໆ ແລະ​ພົບ 19 ຄົນ ທີ່​ຕິດ­ເຊື້ອ​ຈຸ​ລະ​ໂລກ​ຊີກາ​ຢູ່​ນະ­ຄອນ­ຫຼວງ​ວຽງ​ຈັນ. ນອກ­ຈາກ​ນັ້ນ ໃນ​ຕົ້ນ​ປີ 2016ກໍ​ໄດ້​ສືບ­ຕໍ່​ກວດ​ແຕ່​ບໍ່​ພົບ​ເຊື້ອ​ຈຸ​ລະ​ໂລກ​ຊີ​ກາ​ດັ່ງ­ກ່າວ ອີງ​ຕາມ​ຂໍ້​ມູນ​ທີ່​ມີ​ຢູ່​ໃນ​ປະຈຸ​ບັນ ຈິ່ງ​ໄດ້​ມີ​ການ​ປະ​ເມີນ​ຄວາມ​ສ່ຽງ ແລະ ເຫັນ​ວ່າ ສປປ ລາວ ມີ​ໂອ­ກາດ​ຕ່ຳທີ່​ມີ​ຈະ​ການ​ເກີດ​ແຜ່​ກະ­ຈາຍ​ຂອງ​ເຊື້ອ​ຈຸ​ລະ​ໂລກ​ຊີ​ກາ​ຢູ່​ໃນ ສປປ ລາວ.

   ທ່ານ ດຣ. ບຸນ​ຫຼາຍ ພົມ​ມະ​ສັກ ຫົວໜ້າ​ກົມ​ຄວບ​ຄຸມ­ພະ​ຍາດ​ຕິດ­ຕໍ່ ແລະ​ຜູ້​ປະສານ​ງານ​ແຫ່ງ​ຊາດ​ຂອງ​ກົດ​ລະ­ບຽບ​ສາກົນ ດ້ານ​ສາ­ທາ­ລະ­ນະ​ສຸກ​ກ່າວ​ວ່າ: “ເຖິງແມ່ນ​ວ່າ​ຜົນ​ການ​ປະ​ເມີນ​ຄວາມ​ສ່ຽງຮ່ວມ​ກັນ​ລະ­ຫວ່າງ​ອົງ­ການ​ອະ­ນາ­ໄມໂລກ ແລະ​ກະ­ຊວງ​ສາ­ທາ­ລະ­ນະ​ສຸກ ເຫັນວ່າ​ມີ​ຄວາມ​ສ່ຽງ​ຕ່ຳ​ກໍ​ຕາມ, ລັດ­ຖະ­ບານເຮົາ​ແມ່ນ​ມີ​ຄວາມ​ຕື່ນ​ຕົວ​ສູງ ແລະ​ໄດ້​ເຊີນຄູ່​ຮ່ວມ​ງານ​ດ້ານ​ວິ­ຊາ​ການ​ທຸກ​ພາກ­ສ່ວນທີ່​ເຮັດ​ວຽກ​ໃນ ສປປ ລາວ ເພື່ອ​ຕິດ­ຕາມສະ­ພາບ​ການ ແລະ​ສະ­ກັດ​ກັ້ນ ແລະ​ວາງມາດ​ຕະ­ການ​ຕອບ​ໂຕ້”.

ອົງ­ການ​ອະ­ນາ­ໄມ​ໂລກ ແລະ​ກົມ​ຄວບ​ຄຸມ­ພະ​ຍາດ​ຕິດ­ຕໍ່​ກະ­ຊວງ​ສາ​ທາ​ລະນະ​ສຸກ​ຮ່ວມ​ກັນ​ສ້າງ​ແຜນ​ງານ​ກະ­ກຽມຄວາມ​ພ້ອມ ແລະ​ຕອບ​ໂຕ້​ຕໍ່​ເຊື້ອ​ພະ­ຍາດ​ຊີກາ. ອີງ​ຕາມ ທ່ານ ດຣ. ຈູ​ລຽດ ຟລາຍ​ໂຊຄ໌, ຜູ້­ຕາງ­ໜ້າ​ອົງ­ການ​ອະ­ນາ­ໄມ​ໂລກປະ­ຈຳ ສປປ ລາວ ໄດ້​ກ່າວ​ວ່າ: “ອົງ­ການອະ­ນາ­ໄມ​ໂລກ​ເຮັດ​ວຽກ​ຮ່ວມ​ກັບ​ກະ­ຊວງ​ສາ­ທາ­ລະ­ນະ​ສຸກ ເພື່ອ​ເພີ່ມ​ທະ­ວີ​ການ​ເຝົ້າລະ­ວັງ​ເພື່ອ​ຄົ້ນ​ຫາ​ພະ­ຍາດ, ປັບ­ປຸງ​ຄວາມສາ­ມາດ​ທາງ​ຫ້ອງ​ວິ­ເຄາະ​ເພື່ອ​ກວດ​ຫາເຊື້ອ​ຈຸ​ລະ​ໂລກ​ໄດ້​ໄວ​ຂຶ້ນ, ໃຫ້​ຄຳ​ແນະ­ນຳ ໃນ​ການ​ປິ່ນ​ປົ່ວ, ສ້າງ​ຂໍ້­ຄວາມ​ເພື່ອ​ສື່­ສານ ແລະ​ວຽກ​ງານ​ຄວບ​ຄຸມ​ຍຸງ​ລາຍ​ທີ່​ເປັນພາ­ຫະ­ນະ​ນຳ​ເຊື້ອ​ພະ­ຍາດ ແລະ​ຂະ​ບວນການ​ອະ­ນາ­ໄມ​ໃນ​ຊຸມ​ຊົມ”.

ເຊື້ອ​ຈຸ​ລະ​ໂລກ​ຊີ​ກາ ແມ່ນ​ຕິດ­ເຊື້ອ​ໄດ້ໂດຍ​ການ​ກັດ​ຂອງ​ຍຸງ​ລາຍ (Aedes) ຊຶ່ງ​ເປັນ​ຍຸງ​ຊະ­ນິດ​ດຽວ​ກັນ​ທີ່​ແຜ່​ເຊື້ອ​ພະຍາດ​ໄຂ້­ຍຸງ​ລາຍ ແລະ​ຊີ​ກຸນ​ຄຸນ​ຢາ (chikungunya). ເຊື້ອ​ຈຸ​ລະ​ໂລກ​ຊີ​ກາ​ເຮັດ​ໃຫ້ມີ​ອາ­ການ​ເຈັບ​ປ່ວຍ​ແບບ​ເບົາ­ບາງ ໂດຍ​ມີອາ­ການ​ໄຂ້​ເລັກ​ນ້ອຍ, ມີ​ຜື່ນ​ຕາມ​ຜິວ­ໜັງ, ຕາ­ແດງ, ເຈັບ​ຫົວ ແລະ​ເຈັບ​ຂໍ່. ມີ​ພຽງ 1 ໃນ 4 ຄົນ ຂອງ​ຄົນ​ເຈັບ​ທີ່​ຕິດ­ເຊື້ອ​ຈຸ​ລະໂລກ​ຊີ​ກາ​ຈະ​ມີ​ອາ​ການ­ສະ­ແດງ​ອອກ, ການ​ເຈັບ​ປ່ວຍ​ແມ່ນ​ປະ­ມານ 4-7 ມື້.

ຄວາມ​ສ່ຽງ​ຂອງ​ການ​ຕິດ­ເຊື້ອ​ທາງເພດ​ສຳ­ພັນ, ຜູ້​ຊາຍ ແລະ​ແມ່­ຍິງ​ທຸກ​ຄົນ​ທີ່​ເດີນ­ທາງ​ກັບ​ຈາກ​ເຂດ​ທີ່​ມີ​ເຊື້ອ​ຈຸ​ລະໂລກ​ຊີ​ກາ​ຈໍ​ລະ​ຈອນ​ຢູ່ ໂດຍ​ສະ­ເພາະແມ່ນ​ແມ່­ຍິງ​ຖື­ພາ ແລະ​ສາ­ມີຄວນ​ປະ­ຕິ ບັດ​ການ​ມີ​ເພດ​ສຳ­ພັນ​ທີ່​ປອດ​ໄພ, ລວມທັງ​ການ​ໃຊ້​ຖົງ​ຢາງ​ອະ­ນາ­ໄມ​ຢ່າງ​ຖືກຕ້ອງ ແລະ​ໃຊ້​ເປັນ​ປະ­ຈຳ.

ໃນ​ລະ­ດັບ​ທົ່ວ​ໂລກ, ອົງ­ການ​ອະ​ນາໄມ​ໂລກ​ມີ​ການ​ປະ­ສານ​ງານ​ກັບ​ບັນ­ດາປະ­ເທດ​ທີ່​ມີ​ການ​ລາຍ​ງານ​ການ​ລະ­ບາດຂອງ​ເຊື້ອ​ຈຸ​ລະ​ໂລກ​ຊີ​ກາ ແລະ​ຄູ່​ຮ່ວມງານ​ອື່ນໆ ເພື່ອ​ສອບ​ສວນ ແລະ​ຕອບ​ໂຕ້ຕໍ່​ການ​ພົວ­ພັນ​ທີ່​ອາດ​ເກີດ​ຂຶ້ນ​ລະ­ຫວ່າງເຊື້ອ​ຈຸ​ລະ​ໂລກ​ຊີ​ກາ ແລະ​ເດັກ­ນ້ອຍ​ທີ່​ມີຫົວ​ນ້ອຍ​ມາ​ແຕ່​ກຳ­ເນີດ (Microcephaly) ຊຶ່ງ​ລວມ​ທັງ​ອາ­ການ​ສົນ​ອື່ນໆ​ທີ່ອາດ​ເກີດ​ຂຶ້ນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.