ຊຽງຂວາງ ບູລະນະຖໍ້າການນໍາບ້ານຕ້າຍ ກາຍເປັນແຫຼ່ງທ່ອງທ່ຽວປະຫວັດສາດ

ລັດ­ຖະ­ບານ​ກໍ່​ຄື​ອຳ­ນາດ​ການ​ປົກຄອງ​ແຂວງ​ຊຽງ​ຂວາງ​ຈະ​ໃຊ້​ງົບ 4 ຮ້ອຍ​ລ້ານ​ກີບ ເພື່ອ​ບູ­ລະ­ນະ​ຖ້ຳ​ອາ​ນຸສອນ​ສະ­ຖານ​ການ​ນຳ​ປະ­ຕິ­ວັດ​ຢູ່​ເຂດ​ບ້ານ​ຕ້າຍ ເມືອງ​ແປກ​ໃຫ້​ກາຍ­ເປັນ​ແຫຼ່ງ ທ່ອງ​ທ່ຽວ​ປະ­ຫວັດ­ສາດ ຊຶ່ງ​ຂະ­ນະ​ນີ້​ກຳ­ລັງ​ຂຸ້ນ­ຂ້ຽວ​ປະ­ຕິ­ບັດ​ງານ​ຄາດ​ວ່າ​ຈະ​ໃຫ້​ສຳ­ເລັດ​ພາຍ​ໃນ 4 ເດືອນ ໂດຍ​ແມ່ນ ບໍ­ລິ­ສັດ​ແຈງ​ຫົງ​ກໍ່­ສ້າງ​ເຄ­ຫາ ແລະ​ຂົວ​ທາງ​ເປັນ​ຜູ້​ດຳ­ເນີນ​ງານ.

ຕາມ​ແຫຼ່ງ​ຂ່າວ​ຈາກ​ແຂວງ​ຊຽງຂວາງ​ແຈ້ງ​ໃຫ້​ຮູ້​ວ່າ: ເມື່ອ​ວັນ​ທີ 16 ເມສາ​ຜ່ານ​ມາ ທ່ານ ສົມ​ກົດ ມັງ​ໜໍ່​ເມກ ເຈົ້າ­ແຂວງ​ຊຽງ​ຂວາງ ພ້ອມ​ດ້ວຍ​ຄະ­ນະ​ໄດ້​ລົງ​ກວດ­ກາ​ການ​ບູ­ລະ­ນະ​ຖ້ຳ​ອາ​ນຸ​ສອນ​ສະ­ຖານ​ບ້ານ​ຕ້າຍ ເມືອງ​ແປກ ຊຶ່ງ​ການ​ບູ­ລະ­ນະ​ນີ້​ແມ່ນ​ໄດ້​ດຳ­ເນີນ​ມາ​ໄດ້ 1 ເດືອນ ແລ້ວ​ໂດຍ​ບໍ­ລິ­ສັດ​ແຈງ​ຫົງ​ກໍ່­ສ້າງ​ເຄ­ຫາ ແລະ​ຂົວ​ທາງ​ຈຳ­ກັດ ເປັນ​ຜູ້​ດຳ­ເນີນ​ງານຄາດ​ວ່າ​ອີກ 4 ເດືອນ​ຈະ​ສຳ­ເລັດ.

ການ​ບູ­ລະ­ນະ​ໃນ​ຄັ້ງ​ນີ້​ເປັນ​ຄັ້ງ​ທີ 1 ມີ ພຽງ​ຖ້ຳ​ດຽວ​ທີ່​ບູ­ລະ­ນະ ໂດຍ​ທະ­ລຸ​ທາງ​ເຂົ້າ 1 ກິ­ໂລ­ເມັດ, ປັບ​ເດີ່ນ​ຈອດ​ລົດ, ປັບ­ປຸງ​ຖ້ຳ ໂດຍ​ລວມ​ມູນ​ຄ່າ 4 ຮ້ອຍ​ລ້ານ​ກີບ ຖ້ຳ​ແຫ່ງ​ນີ້​ຖື​ທີ່​ເປັນ​ເຂດ​ອາ​ນຸ​ສອນ​ສະ­ຖານ ຊຶ່ງ​ເຄີຍ​ເປັນ​ສະ­ຖານ­ທີ່​ໝັ້ນ​ຂອງ​ການ​ປະ­ຕິ­ວັດ ໂດຍ​ການ​ນຳ­ພາ​ຊີ້​ນຳ​ຂອງ​ສູນ​ກາງ​ພັກ​ປະ­ຊາ­ຊົນ​ລາວ​ກໍ່​ຄືພັກ​ປະ­ຊາ­ຊົນ​ປະ­ຕິ­ວັດ​ລາວ​ໃນ​ປະ­ຈຸ​ບັນ ເພື່ອ​ດຳ­ເນີນ​ສົງ­ຄາມ​ຂອງ​ປະ­ຊາ­ຊົນ​ບັນ­ດາ­ເຜົ່າ​ຢູ່​ແຂວງ​ຊຽງ​ຂວາງ​ຕ້ານ​ຈັກ­ກະ­ພັດ​ລ່າ​ເມືອງ​ຂຶ້ນ.

ຖານ​ທີ່​ໝັ້ນ​ແຫ່ງ​ນີ້​ສ້າງ­ຕັ້ງ​ຂຶ້ນ​ເມື່ອ​ປີ 1961 ພາຍ­ຫຼັງ​ທີ່​ກຳ­ລັງ​ປະ­ຕິ­ວັດ​ໄດ້​ປົດ​ປ່ອຍ​ເຂດ​ທົ່ງ​ໄຫ​ຫີນ​ໃນ​ວັນ​ທີ 1 ມັງ­ກອນ 1961 ໃນ​ເຂດ​ນີ້​ມີ​ສຳ­ນັກ­ງານ, ອົງ­ການ​ຊ່ວຍ​ວຽກ​ຂອງ​ສູນ​ກາງ​ພັກ​ຈຳ­ນວນ​ໜຶ່ງສະ­ຖານ­ທີ່​ເຮັດ​ວຽກ​ຂອງ​ບັນ­ດາ​ທ່ານ​ຜູ້ ນຳ​ປະ­ຕິ­ວັດ​ຄື: ທ່ານ ໜູ​ຮັກ ພູມ​ສະ­ຫວັນ, ທ່ານ ພູ­ມີ ວົງ​ວິ­ຈິດ, ທ່ານ ຄຳ​ໄຕ ສີ​ພັນ​ດອນ, ທ່ານ ພູນ ສີ​ປະ­ເສີດ, ທ່ານ ສະ­ໝານ ວິ​ຍະ​ເກດ, ທ່ານ ສິງ­ກະ­ໂປ ຈຸນ​ລະ​ມາ​ນີ ແລະ​ທ່ານ​ຜູ້­ນຳ​ອື່ນໆ.

ດ້ວຍ​ຄວາມ​ສຳ­ຄັນ​ຂອງ​ສະ­ຖານ­ທີ່​ໝັ້ນ ປະ­ຕິ­ວັດ​ບ້ານ​ຕ້າຍ ດັ່ງ­ນັ້ນ ສູນ​ກາງ, ຄະ­ນະ​ພັກ​ອຳ­ນາດ​ການ​ປົກ­ຄອງ ແລະ​ປະ­ຊາ­ຊົນ​ບັນ­ດາ­ເຜົ່າ​ຊາວ​ຊຽງ​ຂວາງ ໄດ້​ຕົກ­ລົງ​ຟື້ນ​ຟູ ສ້າງ​ເປັນ​ອາ​ນຸ​ສອນ​ສະ­ຖານ​ປະ­ຫວັດ­ສາດ​ປະ­ຕິ­ວັດ ເພື່ອ​ສະ­ແດງ​ຄວາມ​ກະ­ຕັນ­ຍູ​ຮູ້​ບຸນ­ຄຸນ ກໍ່​ຄື​ສຶກ​ສາ​ຮ່ຳ­ຮຽນ​ເອົາ​ແນວ​ຄວາມ​ຄິດ​ແບບ­ຢ່າງ​ຂອງ​ຜູ້­ນຳ​ປະ­ຕິ­ວັດ​ທີ່​ໄດ້​ອຸ­ທິດ​ເຫື່ອ­ແຮງ​ສະ­ຕິ​ປັນ­ຍາ​ຄວາມ​ເສຍ­ສະ­ຫຼະ​ຢ່າງ​ບໍ່​ມີ​ຂອບ​ເຂດ​ເພື່ອ​ໄຊ­ຊະ­ນະ​ຂອງ​ການ​ປະ­ຕິ­ວັດ​ເຂດ​ອາ​ນຸ​ສອນ​ສະ­ຖານ​ແຫ່ງ​ນີ້​ຈະ​ກາຍເປັນ​ແຫຼ່ງ​ທ່ອງ​ທຽວ​ປະ­ຫວັດ­ສາດ​ອີກ​ແຫ່ງ​ໜຶ່ງ​ຂອງ​ແຂວງ​ຊຽງ​ຂວາງ.

ຂ່າວ: ເສດຖະກິດ-ສັງຄົມ

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.