ຍທຂ ສະຫວັນນະເຂດ ຈະສຸມປັບປຸງເສັ້ນທາງ

ພະແນກໂຍທາທິການ ແລະຂົນສົ່ງແຂວງສະຫວັນນະເຂດ ໃນຕະຫຼອດໄລຍະຜ່ານມາໄດ້ເນັ້ນໜັກໃສ່ການກໍ່ສ້າງພື້ນຖານໂຄງລ່າງລະບົບເສັ້ນທາງເປັນບຸລິມະສິດຫຼັກ ຊຶ່ງເຫັນວ່າເສັ້ນທາງເຊື່ອມຕໍ່ມີຄວາມສະດວກຂຶ້ນ ແຕ່ໃນເວລາດຽວກັນຂອດການບຳລຸງຮັກສາ ແລະປັບປຸງເສັ້ນທາງເກົ່າທີ່ໃຊ້ແລ້ວຍັງຂາດການຄຸ້ມຄອງດູແລ ສະນັ້ນ ປີນີ້ຈິ່ງຍົກສູງຂອດການເບິ່ງແຍງປົວແປງບັນດາສາຍທາງເປັນໜ້າວຽກທີ່ສຳຄັນມາເປັນອັນດັບໜຶ່ງ.

ທ່ານ ປະສົງສິນ ຈະເລີນສຸກ ຫົວໜ້າພະແນກໂຍທາທິການ ແລະຂົນສົ່ງແຂວງສະຫວັນນະເຂດ ໃຫ້ສຳພາດເມື່ອບໍ່ດົນ ມານີ້ວ່າ: ສະຫວັນນະເຂດໄດ້ວາງແຜນ ວິໄສທັດຮອດປີ 2030 ແລະຍຸດທະສາດການພັດທະນາໄລຍະ 10 ປີ (2016-2025), ແຜນພັດທະນາ 5 ປີ (2016-2020) ແລະທິດທາງແຜນການໃນປີ 2017, ໂດຍອີງຕາມ 4 ແຜນວຽກຂອງກະຊວງວາງອອກໃນປີນີ້ແຂວງແມ່ນສຸມໃສ່ພັດທະນາພື້ນຖານໂຄງລ່າງ ແລະຍົກ ລະດັບພື້ນຖານໂຄງລ່າງທີ່ມີຢູ່ແລ້ວໃຫ້ໃຊ້ໄດ້ປົກກະຕິ, ພ້ອມທັງປັບໃຫ້ສາມາດເຊື່ອມໂຍງກັບສາກົນ ໂດຍສະເພາະວຽກຄຸ້ມຄອງນຳໃຊ້ເຂົ້າໃນພື້ນຖານໂຄງລ່າງໃຫ້ມີຄວາມສອດຄ່ອງກັບລະບຽບກົດໝາຍທີ່ມີແລ້ວໃຫ້ມັນຮັດກຸມຕື່ມເປັນຕົ້ນແມ່ນວຽກການກໍ່ສ້າງ, ການປະຕິບັດແຜນການການເງິນ, ການຄຸ້ມຄອງການນຳໃຊ້ ຊຶ່ງຈຳຕ້ອງໄດ້ປຸກລະດົມໃຫ້ທຸກພາກສ່ວນມີສ່ວນຮ່ວມນຳກັນ, ທັງນີ້ກໍເພາະວ່າໄລຍະຜ່ານມາທາງ ແຂວງມີແຕ່ແຜນການກໍ່ສ້າງ ແຕ່ແຜນການບຳລຸງຮັກສາການຄຸ້ມຄອງຍັງເຮັດ ບໍ່ໄດ້ດີເທົ່າທີ່ຄວນ, ສະນັ້ນ 2017 ນີ້ ແຂວງສະຫວັນນະເຂດແມ່ນຈະລະດົມ ທຸກພາກສ່ວນທັງພາກລັດ ແລະພາກທຸລະກິດໃຫ້ມີສ່ວນຮ່ວມໃນການປົກປັກຮັກສາເສັ້ນທາງຫຼວງຮ່ວມກັນ.

ໃນແຜນພັດທະນາພື້ນຖານໂຄງລ່າງປີ 2017 ແຂວງໄດ້ສຸມໃສ່ຍົກລະດັບພື້ນຖານໂຄງລ່າງທີ່ມີແລ້ວໃຫ້ສາມາດເຊື່ອມຈອດເຊື່ອມໂຍງໃນລະດັບພາກພື້ນ ແລະສາກົນນັ້ນ, ເພາະວ່າບັນຫານີ້ເປັນບັນຫາທຳອິດທີ່ລັດຖະບານສຸມໃສ່ເພື່ອການຍົກລະດັບເສັ້ນທາງທີ່ມີຢູ່ແລ້ວເຊັ່ນ: ເສັ້ນທາງເລກ 9, ທາງເລກທີ 13 ແລະທາງເລກທີ 11, ເສັ້ນທາງ 1F, 1G, ທີ່ສາມາດເຊື່ອມໂຍງກັບອະນຸພາກພື້ນ, ທັງເປັນເສັ້ນເຊື່ອມໂຍງກັບບັນດາລຸ່ມປະເທດແມ່ນ້ຳຂອງ, ປະຈຸບັນເລັ່ງໃສ່ປັບປຸງເສັ້ນທາງເລກ 9, ຊຶ່ງເປັນເສັ້ນທາງອີເວັກເຊື່ອມຈອດນັບຈາກທະເລດານັງປະເທດຫວຽດນາມຈົນຮອດປະເທດມຽນມາ ແລະຄາດວ່າເດືອນພຶດສະພາ 2017 ນີ້ຈະໃຫ້ສຳເລັດ ໂດຍນຳໃຊ້ທຶນບ້ວງຂອງລັດຖະບານ.

ທ່ານຫົວໜ້າພະແນກໂຍທາທິການ ແລະຂົນສົ່ງກ່າວວ່າ: ດ້ານການຈັດສັນຜັງເມືອງມາຮອດປະຈຸບັນແມ່ນໄດ້ສຳ ເລັດການອອກແບບ ເພື່ອຈະໄດ້ຍົກລະດັບເທສະບານເມືອງໄກສອນເປັນນະຄອນໄກສອນໃນອະນາຄົດ ໃນນັ້ນ ປະກອບມີເຂດສີຂຽວ, ໂຊນເມືອງເກົ່າແກ່, ເມືອງພັດທະນາໃໝ່ ແລະເຂດສຳນັກງານອົງການ ຊຶ່ງແມ່ນທຶນຂອງທະນາຄານພັດທະນາອາຊີ (ADB) ເພື່ອຈັດຕັ້ງປະຕິບັດລະບົບຕາໜ່າງເສັ້ນທາງ ແລະສວນສາທາລະນະຢູ່ຫ້ອງວ່າການ ແຂວງໃຫ້ມີໃບໜ້າໃໝ່ ໂດຍຈະສ້າງໃຫ້ມີສະຖານທີ່ທ່ອງທ່ຽວ, ບ່ອນອອກກຳລັງກາຍ, ບ່ອນນຳໃຊ້ອິນເຕີເນັດ ແລະອື່ນໆ.

ສຳລັບການພັດທະນາລະບົບພື້ນຖານໂຄງລ່າງທີ່ຕິດພັນກັບການຊຸກຍູ້ວຽກງານການຜະລິດກະສິກຳ ຫຼື ວຽກ ງານການທ່ອງທ່ຽວ, ທາງພະແນກໂຍທາທິການ ແລະຂົນສົ່ງແຂວງກໍໄດ້ຮັບການຊີ້ນຳຈາກອຳນາດການປົກຄອງ ແຂວງ ເພື່ອສຸມໃສ່ແກ້ໄຂບັນຫາຕາໜ່າງເສັ້ນທາງໃຫ້ເຊື່ອມຈອດ ແລະໄປຮອດໄປເຖິງເທສະບານເມືອງຂອງ 15 ຕົວເມືອງ, ສຸມໃສ່ພັດທະນາເສັ້ນທາງໃຫ້ໄປຮອດໄປເຖິງເຂດຈຸດສຸມຂອງການຜະລິດເປັນສິນຄ້າ ແລະບັນດາແຫຼ່ງທ່ອງທ່ຽວທີ່ເປັນປັດໄຈຫຼັກຂອງການສ້າງລາຍຮັບໃຫ້ແກ່ພໍ່ແມ່ປະຊາຊົນກໍຄືລາຍຮັບຂອງແຂວງເຊັ່ນ: ພັດທະນາເສັ້ນທາງເຂົ້າຫາແຫຼ່ງທ່ອງທ່ຽວວັດພະທາດໂພ່ນ, ສ່ວນພະທາດອີງຮັງທາງແຂວງມີແຜນຈະປະຕິບັດໃນປີນີ້ແມ່ນເສີມຂະຫຍາຍທາງຈາກ 2 ເລນ ເປັນ 4 ເລນ ໃຫ້ເຊື່ອມຈອດຖະໜົນໄກສອນ ແລະແຫຼ່ງທ່ອງທ່ຽວສວນລີງ ຢູ່ເມືອງຈຳພອນ ຄາດວ່າຈະໄດ້ມອບ-ຮັບໃນເດືອນທັນວາຂອງປີນີ້.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.