ດິນ 49,63% ຂອງເນື້ອທີ່ທົ່ວປະເທດຖືກເຊົ່າ ແລະສຳປະທານ 1,7 ພັນໂຄງການ

  ປະຈຸບັນ ສປປ ລາວ ມີໂຄງການເຊົ່າ-ສໍາປະທານທີ່ດິນທັງໝົດ 1.758 ໂຄງການ ມີເນື້ອທີ່ອະນຸມັດທັງໝົດ 11,75 ລ້ານເຮັກຕາກວມເອົາ 49,63%   ຂອງເນື້ອທີ່ທົ່ວປະເທດໃນນັ້ນມີພຽງ 721 ໂຄງການທີ່ມີສັນຍາເຊົ່າ ຫຼືສໍາປະທານ ແລະອີກ 1.037 ໂຄງການແມ່ນບໍ່ມີສັນຍາ,ນອກນີ້ຍັງມີ 438 ໂຄງການທີ່ຈັບຈອງດິນບໍ່ພັດທະນາ, ບໍ່ມີການເຄື່ອນໄຫວຊຶ່ງລັດເຫັນຄວນຍົກເລີກສັນຍາ.

 ໃນວາລະມື້ທຳອິດຂອງກອງປະຊຸມສະພາແຫ່ງຊາດ ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ກ່າວລາຍງານບາງຕອນວ່າ: ສະເພາະການແກ້ໄຂບັນຫາທີ່ດິນຂອງລັດຖະບານໃນໄລຍະ 4 ເດືອນ ຕົ້ນປີ 2019 ນີ້, ແມ່ນໄດ້ດໍາເນີນໄປດ້ວຍຄວາມຄືບໜ້າດີໂດຍໄດ້ມີການປັບປຸງຮ່າງແຜນແມ່ບົດຈັດສັນທີ່ດິນແຫ່ງ ຊາດ, ການກະກຽມຈັດສັນທີ່ດິນຢູ່ 5 ແຂວງເປົ້າໝາຍຄື: ຫຼວງນໍ້າທາ, ບໍ່ແກ້ວ, ບໍລິຄໍາໄຊ, ເຊກອງ ແລະ ແຂວງອັດຕະປື; ໄດ້ສໍາເລັດການພັດທະນາຄຸ້ມ ຄອງທີ່ດິນໃຫ້ມີຄວາມທັນສະໄໝສາມາດຕິດຕາມກວດກາຄືນບັນດາຂໍ້ມູນການເຊົ່າ-ສໍາປະທານທີ່ດິນທົ່ວປະເທດ; ນອກຈາກນັ້ນທ່ານນາຍົກລັດຖະມົນຕີໄດ້ກ່າວວ່າຕື່ມວ່າ: ໃນຕໍ່ໜ້າທຸກການເຊົ່າ-ສໍາປະທານທີ່ດິນແມ່ນໃຫ້ກະຊວງຊັບພະຍາກອນທໍາມະຊາດ ແລະສິ່ງແວດລ້ອມສໍາຫຼວດວັດແທກ, ອອກແຜນທີ່ດິນລັດ ແລະຫັນເອົາເຂົ້າລະບົບທັນສະໄໝເພື່ອເປັນບ່ອນອີງໃຫ້ກະຊວງການເງິນເກັບລາຍຮັບທັນກັບສະພາບການ.

  ຢ່າງໃດກໍຕາມ ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະສິ່ງແວດລ້ອມໄດ້ລາຍງານຕໍ່ກອງປະຊຸມສະພາແຫ່ງຊາດວ່າ: ໃນທົ່ວປະເທດມີໂຄງການເຊົ່າ-ສໍາປະທານທີ່ດິນທັງ ໝົດ 1.758 ໂຄງການ ມີເນື້ອທີ່ອະນຸມັດ ທັງໝົດ 11,75 ລ້ານເຮັກຕາ ກວມເອົາ 49,63% ຂອງເນື້ອທີ່ທົ່ວປະເທດໃນນີ້ໂຄງການຊອກຄົ້ນ-ສໍາຫຼວດແຮ່ທາດມີ 237 ໂຄງການມີເນື້ອທີ່ 10,73 ລ້ານ ເຮັກຕາກວມເອົາ 91% ຂອງເນື້ອທີ່ອະນຸມັດທັງໝົດ ແລະໂຄງການທີ່ອະນຸມັດໃຫ້ຈັດຕັ້ງປະຕິບັດທີ່ບໍ່ລວມເອົາເນື້ອທີ່ການຊອກຄົ້ນ-ສໍາຫຼວດແຮ່ທາດມີ 1.521 ໂຄງການມີເນື້ອທີ່ 1,01 ລ້ານເຮັກຕາ ເທົ່າກັບ 4% ຂອງເນື້ອທີ່ອະນຸມັດ, ແຕ່ວ່າເນື້ອທີ່ນໍາໃຊ້ຕົວຈິງມີພຽງ 549,248 ເຮັກຕາ ເທົ່າກັບ 54% ຂອງເນື້ອທີ່ອະນຸມັດທັງໝົດ.

 ທ່ານ ສົມມາດ ພົນເສນາ ກ່າວຕື່ມອີກວ່າ: ສໍາລັບໂຄງການເຊົ່າ-ສໍາປະທານທີ່ດິນຈໍານວນ 1.758 ໂຄງການແມ່ນເປັນໂຄງການເຊົ່າ 173 ໂຄງການ, ໂຄງການສໍາປະທານ 1.569 ໂຄງການ ແລະສັນຍາການຜະລິດແບບ 1+4 ຈໍາ ນວນ 16 ໂຄງການ ໃນນັ້ນ ມີຈໍານວນ 721 ໂຄງການ (ບໍ່ລວມເອົາໂຄງການ ເຂື່ອນໄຟຟ້ານໍ້າຕົກເນື່ອງຈາກຂໍ້ມູນບໍ່ຄົບຖ້ວນ) ມີສັນຍາເຊົ່າ ຫຼື ສໍາປະທານ (ກະສິກໍາ 181 ໂຄງການ, ປູກໄມ້ມີ 188 ໂຄງການ ແລະ ບໍ່ແຮ່ 352 ໂຄງ ການ). ສໍາລັບໂຄງການທີ່ບໍ່ມີສັນຍາສໍາປະທານມີສັນຍາເຊົ່າ ຫຼື ສໍາປະທານຈໍານວນ 1.037 ໂຄງການແມ່ນຈະລົງກວດລະອຽດ. ນອກນີ້ຍັງມີໂຄງການທີ່ບໍ່ ໄດ້ເຄື່ອນໄຫວເລີຍຢຸດເຊົາກ່ອນໝົດສັນຍາ ແລະປະລະບໍ່ເອົາໃຈໃສ່ຈໍານວນ 438 ໂຄງການລວມເນື້ອທີ່ 240,189 ເຮັກຕາ. ຊຶ່ງນີ້ລັດຖະບານໄດ້ແຕ່ງຕັ້ງ ຄະນະສະເພາະກິດໂດຍແມ່ນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເປັນຜູ້ຊີ້ນໍາເພື່ອຈໍາກັດ ແລະ ແກ້ໄຂບັນດາໂຄງການທີ່ບໍ່ມີຄວາມຄືບໜ້າ, ຈັບຈອງເນື້ອທີ່ດິນຖ່ວງດຶງເວລາ, ບໍ່ປະຕິບັດພັນທະ, ມີຜົນກະທົບຕໍ່ສິ່ງແວດລ້ອມ ແລະບໍ່ດໍາເນີນຕາມສັນຍາ, ຊຶ່ງເຫັນຄວນພິຈາລະນາຍົກເລີກສັນຍາ.

ພາບ ແລະ ຂ່າວໂດຍ: ໜັງສືພິມເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.