ຕາດ​ກວາງ­ຊີ​ ປີ​ນີ້​ມີ​ລາຍ​ໄດ້​ທະ­ລຸ​ແລ້ວ​ຕື້​ກວ່າ​ກີບ

ນ້ຳ­ຕົກ­ຕາດ​ກວາງ­ຊີ​ແຫຼ່ງ​ທ່ອງ​ທ່ຽວ​ທາງ​ທຳ​ມະ​ຊາດ​ອີກ​ແຫ່ງ​ໜຶ່ງ​ທີ່​ມີ​ຊື່​ສຽງ​ໂດ່ງ​ດັງ​ໄປ​ທົ່ວ​ທຸກ​ມຸມ​ໂລກ​ກາຍ­ເປັນ​ທີ່​ຮູ້­ຈັກ​ຂອງ​ນັກ​ທ່ອງ​ທ່ຽວ​ ຊຶ່ງ​ພຽງ 3 ເດືອນ​ຕົ້ນ​ປີ 2017 ນີ້​ສາ­ມາດ​ເກັບ​ລາຍ​ຮັບ​ໄດ້​ສູງ​ເຖິງ 1 ຕື້​ກວ່າ​ກີບ.

ທ່ານ ສີ​ສຸ­ພັນ ສີ­ສະ​ຫວັດ ຮອງ​ຫົວໜ້າ​ພະ­ແນກ­ການ​ເງິນ​ແຂວງ​ຫຼວງ​ພະ​ບາງ​ໄດ້​ລາຍ​ງານ​ຕໍ່​ທີມ​ຂ່າວ​ພວກ​ເຮົາ​ຫວ່າງ​ບໍ່​ດົນ​ນີ້​ວ່າ: ແຫຼ່ງ​ທ່ອງທ່ຽວ​ທຳ​ມະ​ຊາດ​ຕາດ​ກວາງ­ຊີ​ນັບ​ເປັນ​ສະ­ຖານ­ທີ່​ທ່ອງ​ທ່ຽວ​ສຳ­ຄັນ​ຂອງ​ແຂວງ​ຫຼວງ​ພະ​ບາງ ຜ່ານ​ການ​ເກັບ​ລາຍ​ຮັບ​ຜ່ານ​ບາ​ໂຄດ​ທີ່​ທາງ​ພະ­ແນກ­ການ​ເງີນ​ແຂວງ​ໄດ້​ສະ­ຫຼຸບ​ສະ­ເພາະ​ແຫຼ່ງ​ທ່ອງ​ທ່ຽວ​ດັ່ງ­ກ່າວ ເລີ່ມ​ແຕ່​ວັນ​ທີ 1 ມັງ­ກອນ​ຫາ​ວັນ​ທີ 14 ມີ­ນາ 2017 ນີ້ ສາ­ມາດ​ເກັບ​ລາຍ​ຮັບ​ໄດ້ຈາກ​ນັກ​ທ່ອງ​ທ່ຽວ​ທີ່​ເຂົ້າ​ຊົມ​ມີ​ທັງ​ໝົດ 1.025 ລ້ານ​ກີບ.

ທ່ານ​ຍັງ​ກ່າວ​ຕື່ມ​ວ່າ ເມື່ອ​ສົມ​ທຽບໃສ່​ເວ­ລາ​ຂາຍ​ປີ້ ແລະ​ການ​ໃຊ້​ບາ​ໂຄດ​ນີ້ ຈະ​ເຫັນ​ໄດ້​ລາຍ​ຮັບ​ແຕກ​ຕ່າງ​ກັນ​ຫຼາຍ ແລະ​ມີ​ຄວາມ​ສະ­ດວກ​ຫຼາຍ​ຂຶ້ນ​ໃນ​ການ ສະ­ຫຼຸບ​ແຕ່​ລະ​ມື້ ​ສະ­ນັ້ນ​ ທາງ​ພະ​ແນກ​ຍັງມີ​ແຜນ​ຈະ​ຂະ­ຫຍາຍ​ຕິດ​ຕັ້ງ​ລະ­ບົບ​ບາ​ໂຄດ​ໃສ່​ບັນ­ດາ​ແຫຼ່ງ​ທ່ອງ​ທ່ຽວ​ທີ່​ຂື້ນ​ກັບ​ລັດ​ຄຸ້ມ​ຄອງ​ຕື່ມ​ອີກ ເພື່ອ​ຄວາມ​ສະ­ດວກ​ໃນ​ການ​ຄຸ້ມ​ຄອງ​ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ລັດ.

ປະ­ຈຸ​ບັນ ແຂວງ​ຫຼວງ​ພະ​ບາງ ມີ​ແຫຼ່ງທ່ອງ​ທ່ຽວ​ທັງ​ໝົດ 228 ແຫ່ງ, ໃນ​ນັ້ນ ມີ​ແຫຼ່ງ​ທ່ອງ​ທ່ຽວ​ທາງ​ດ້ານ​ທຳ​ມະ​ຊາດ 108 ແຫ່ງ, ວັດ­ທະ­ນະ­ທຳ 86 ແຫ່ງ ແລະ​ປະ­ຫວັດ­ສາດ 34 ແຫ່ງ ແລະ​ອຳນາດ​ການ​ປົກ­ຄອງ​ແຂວງ​ຫຼວງ​ພະ​ບາງ ໄດ້​ກຳ­ນົດ ແລະ​ຄັດ​ເລືອກ​ເອົາ​ແຫຼ່ງ​ທ່ອງ​ທ່ຽວ​ທີ່​ເປັນ​ບູ​ລິ​ມະ​ສິດ​ສຳ­ຄັນ​ຈຳ­ນວນ 20 ແຫ່ງ ພ້ອມ​ດຽວ​ກັນ​ນັ້ນ ກໍ​ໄດ້​ມີ​ການ​ປັບ­ປຸງ​ບັນ­ດາ​ແຫຼ່ງ​ທ່ອງ​ທ່ຽວ​ຫຼາຍ​ແຫ່ງ​ເປັນ­ຕົ້ນ​ແມ່ນ​ບ່ອນ​ພັກ​ເຊົາ, ບ່ອນ​ທ່ຽວ​ຊົມ​ຂອງ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ​ຕ່າງ­ປະ­ເທດໃຫ້​ມີ​ຄວາມ​ສະ­ດວກ​ສະ­ບາຍ ແລະ​ມີ​ຄວາມ​ຈົບ­ງາມ​ລວມ​ເຖິງ​ຢູ່ ເຂດ​ທີ I ຂອງ​ມໍ­ລະ­ດົກ ກໍ​ໄດ້​ຮັບ​ການ ປັບ­ປຸງ​ປົວ­ແປງ​ໃຫ້​ມີ​ຄວາມ​ຈົບ­ງາມ​ດີຂຶ້ນ​ເທື່ອ​ລະ​ກ້າວ.

ໂດຍ: ສີ​ສຸ­ວັນ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.