ທຫລ ຝາກ​ເຕືອນ​ປະ­ຊາ­ຊົນມີ​ສະ­ຕິ​ກ່ອນ​ຝາກ​ເງິນ​ດອກ​ເບ້ຍ​ສູງ

ເນື່ອງ​ຈາກ​ໃນ​ໄລ­ຍະ​ຜ່ານ​ມາ​ໄດ້​ມີ​ປາ­ກົດ​ການ­ເຄື່ອນ­ໄຫວ​ລະ­ດົມ​ທຶນ​ຈາກສັງ­ຄົມ​ຢ່າງ​ຜິດ​ກົດ­ໝາຍ ຊຶ່ງ​ບໍ່​ໄດ້​ຮັບ​ອະນຸ​ຍາດ​ຈາກ​ຂະ­ແໜງ­ການ​ທີ່​ມີ​ສິດ​ອຳ­ນາດ​ກ່ຽວ­ຂ້ອງ ໂດຍ​ດຳເນີນ​ດ້ວຍ​ຫຼາຍ​ຮູບ​ການ​ເຊັ່ນ: ຮັບ​ຝາກ​ເງິນ ຫຼື ຮູບ​ການ​ລົງ­ທຶນດ້ວຍ​ຜົນ​ຕອບ​ແທນ​ທີ່​ຈູງ​ໃຈ​ໃຫ້​ຜົນ​ຕອບ​ແທນ​ສູງ​ເກີນ​ຈິງ ດັ່ງທຸກ​ວັນ​ນີ້ ມີ​ສອງ​ບໍ­ລິ­ສັດ​ກຳ­ລັງ​ຟົດ​ເດືອດ​ຕໍ່​ກັບ​ບັນ­ຫາ​ດັ່ງ­ກ່າວຫ້ອງ­ການ​ທະ­ນາ­ຄານ​ແຫ່ງ ສປປ ລາວ ຈິ່ງ​ໄດ້​ຝາກ​ເຕືອນ​ພໍ່​ແມ່ປະ­ຊາ­ຊົນ​ເພີ່ມ​ສະ­ຕິ​ລະ­ວັງ​ຕົວ​ໃນ​ການ​ນຳ​ໃຊ້​ບໍ­ລິ­ການ​ຝາກ​ເງິນ ແລະ​ຮ່ວມ​ລົງ­ທຶນ ທັງ​ນີ້ ກໍ​ເພື່ອ​ຫຼີກ­ເວັ້ນ​ຜົນ​ເສຍ​ຫາຍ​ທີ່​ອາດ​ຈະເກີດ​ຂຶ້ນ​ຕໍ່​ທ່ານ.

ຫ້ອງ­ການ​ທະ­ນາ­ຄານ​ແຫ່ງ ສປປ ລາວ ໄດ້​ອອກ​ແຈ້ງ​ການ ສະ­ບັບ​ເລກ​ທີ 202/ຫກ ນະ­ຄອນ­ຫຼວງ​ວຽງ​ຈັນ, ວັນ​ທີ 30 ມີ­ນາ 2017 ໃຫ້​ຮູ້​ວ່າ: ໃນ​ໄລ­ຍະ​ຜ່ານ​ມາ​ໄດ້​ມີ​ປາ­ກົດ­ການບຸກ­ຄົນ, ນິ­ຕິ­ບຸກ­ຄົນ​ຈຳ­ນວນ​ໜຶ່ງ​ເຄື່ອນ​ໄຫວ​ລະ­ດົມ​ທຶນ​ຈາກສັງ­ຄົມ​ຢ່າງ​ຜິດ​ກົດ­ໝາຍ ເນື່ອງ​ຈາກ​ບໍ່​ໄດ້​ຮັບ​ອະ­ນຸ­ຍາດ​ລະດົມ​ທຶນ​ຈາກ​ສັງ­ຄົມ​ຈາກ​ຂະ­ແໜງ­ການ​ທີ່​ມີ​ສິດ​ອຳ­ນາດ​ກ່ຽວຂ້ອງ ການ­ເຄື່ອນ­ໄຫວ​ລະ­ດົມ​ທຶນ​ດັ່ງ­ກ່າວ​ໄດ້​ດຳ­ເນີນ​ດ້ວຍຫຼາຍ​ຮູບ​ການ​ເປັນ­ຕົ້ນ​ພາຍ​ໃຕ້​ຮູບ​ການ​ເງິນ​ຝາກ ຫຼື ຮູບ​ການລົງ­ທຶນ​ຮ່ວມ​ໄດ້­ຜົນ​ຕອບ​ແທນ​ທີ່​ຈູງ​ໃຈ​ສູງ​ເກີນ​ຄວາມ​ເປັນຈິງ, ຈາກ​ການ­ເຄື່ອນ­ໄຫວ​ດັ່ງ­ກ່າວ ຊຶ່ງ​ອາດ​ພາ­ໃຫ້​ເກີດ​ຜົນເສຍ​ຫາຍ​ຕໍ່​ຊັບ​ສິນ, ເງິນ​ຄຳ​ປະ­ຊາ­ຊົນ​ຜູ້​ຫຼົງ​ເຊື່ອ ແລະ​ສ້າງຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ໃນ​ສັງ­ຄົມ ສະ­ນັ້ນ ເພື່ອ​ສະກັດ​ກັ້ນ​ການ­ເຄື່ອນ­ໄຫວ​ລະ­ດົມ​ທຶນ​ທີ່​ບໍ່​ຖືກ­ຕ້ອງ​ຕາມ​ລະ­ບຽບກົດ­ໝາຍ ແລະ​ຫຼີກ­ເວັ້ນ​ຜົນ​ເສຍ​ຫາຍ​ທີ່​ອາດ​ຈະ​ເກີດ​ຂຶ້ນ​ຕໍ່ທ່ານ,  ຫ້ອງ­ການ​ທະ­ນາ­ຄານ​ແຫ່ງ ສປປ ລາວ ຈິ່ງ​ຂໍ​ແຈ້ງມາ​ຍັງ​ບັນ­ດາ​ທ່ານ​ໃຫ້​ມີ​ສະ­ຕິ​ລະ­ວັງ​ຕົວ​ໃນ​ບາງ​ບັນ­ຫາ​ດັ່ງ​ຄື: ຈົ່ງ​ມີ​ສະ­ຕິ​ຕໍ່​ການ​ຝາກ​ເງິນ, ການ​ບໍ­ລິ­ການ​ຊຳ­ລະ, ການ​ຮ່ວມຮຸ້ນ (ລົງ­ທຶນ) ແລະ​ອື່ນໆ ໂດຍ​ກວດ​ສອບ​ຄວາມ​ຖືກ­ຕ້ອງວ່າ​ໄດ້​ຮັບ​ອະ­ນຸ­ຍາດ​ຈາກ​ຂະ­ແໜງ­ການ​ທີ່​ມີ​ສິດ​ອຳ­ນາດ​ກ່ຽວຂ້ອງ​ຢ່າງ​ຖືກ­ຕ້ອງ ແລະ​ຄົບ​ຖ້ວນ ຫຼື ບໍ່, ຖ້າ​ພົບ​ເຫັນ​ກໍ­ລະ­ນີສົງ­ໄສ ຫຼື ເຫັນ​ວ່າ​ເປັນ​ການ­ເຄື່ອນ­ໄຫວ​ລະ­ດົມ​ທຶນ​ທີ່​ບໍ່​ຖືກ­ຕ້ອງ​ຕາມ​ກົດ­ໝາຍ​ທ່ານສາ­ມາດ​ໂທ​ສອບ​ຖາມ ຫຼື ແຈ້ງ​ຕໍ່​ກົມ​ກ່ຽວຂ້ອງ​ຂອງ​ທະ­ນາ­ຄານ​ແຫ່ງ ສປປ ລາວ ຕາມ​ເບີ​ໂທ 021 265 713-715 ຫຼື 021 265 607.

ນອກ​ນີ້ ທ່ານ​ສາ­ມາດ​ເຂົ້າ​ເບີ່ງ​ຂໍ້​ມູນ​ການ​ອະ­ນຸ­ຍາດ​ສ້າງ­ຕັ້ງ​ທະ­ນາ­ຄານ​ທຸ­ລະ​ກິດ ແລະ​ສະ​ຖາ​ບັນ​ການ​ເງີນ​ຈຸ​ລະ​ພາກ ໄດ້​ໃນ​ເວັບ​ໄຊ​ຂອງ​ທະ­ນາ­ຄານ​ແຫ່ງ ສປປ ລາວ ລະ­ອຽດ​ຄື: ສຳ­ລັບ​ທະ­ນາ­ຄານ​ທຸ­ລະກິດ​ແມ່ນ http: www.bol.gov.la/Otherbanks/Bank 2016.htm, ສຳ­ລັບ​ສະ​ຖາ​ບັນ​ການ​ເງິນ​ແມ່ນ http: www.bol.gov.la/laoweb/microfinancelao5.html.

ໃນ​ແຈ້ງ​ການ​ຍັງ​ຂໍ​ໃຫ້​ອຳ­ນາດ​ການປົກ­ຄອງ​ທ້ອງ­ຖິ່ນ​ປະ­ສານ​ສະ­ໜອງ​ຂໍ້ມູນ​ໃຫ້​ທະ­ນາ­ຄານ​ແຫ່ງ ສປປ ລາວ ຊາບ ໃນ​ກໍ­ລະ­ນີ​ຫາກ​ພົບ​ເຫັນ​ສະ​ຖາ​ບັນ​ການເງິນທີ່​ບໍ່​ໄດ້​ຮັບ​ອະ­ນຸ­ຍາດ​ຈາກ​ທະ​ນາຄານ​ແຫ່ງ ສປປ ລາວ ເຄື່ອນ​ໄຫວ​ຢູ່​ໃນທ້ອງ­ຖິ່ນ​ທີ່​ຕົນ​ເອງ​ຮັບ­ຜິດ­ຊອບ ໃຫ້​ມີ​ສະຕິ​ຕໍ່​ການ­ເຄື່ອນ­ໄຫວ​ລະ­ດົມ​ທຶນ​ຢ່າງ​ຜິດກົດ­ໝາຍດັ່ງ​ທີ່​ກ່າວ​ມາ​ຂ້າງ​ເທິງ​ ເພື່ອ​ຫຼີກເວັ້ນ​ການ​ສູນ​ເສຍ​ຊັບ​ສິນ​ເງິນ​ຄຳ ເພື່ອພ້ອມ​ກັນ​ຕ້ານ ແລະ​ສະ­ກັດ​ກັ້ນ​ປາ­ກົດການ​ຫຍໍ້­ທໍ້​ດັ່ງ­ກ່າວ​ບໍ່​ໃຫ້​ເກີດ​ຂຶ້ນ​ໃນ​ສັງຄົມ​ລາວ ໂດຍ​ສະ­ເພາະ​ສະ­ກັດ​ກັ້ນ​ບໍ່​ໃຫ້ປະ­ຊາ­ຊົນ​ຕ້ອງ​ຕົກ​ເປັນ​ເຫຍື່ອ​ຂອງ​ພວກ​ຄົນ​ທີ່​ບໍ່​ຫວັງ​ດີ.

ໂດຍ: ໂອ​ຫຼົດ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.