ທອງ​​ແດງ​ປິດ​ບວກ​ ຄາດ​ການ ອີ​ຊີ​ບີ​ ຜ່ອນຄາຍ​ການ​ເງິນ​ເພີ່ມ

    ສັນຍາຊື້​ຂາຍທອງ​ແດງ​ຕະຫຼາດນິວຢອກ​ປິດ​ບວກ​ເມື່ອ​ຄືນ​ວັນ​ທີ 9 ຜ່ານ​ມາເນື່ອງຈາກ​​ໄດ້​ຮັບ​ແຮງໜຸນຈາກ​ຄາດ​ການ​ທີ່​ວ່າ: ທະນາຄານ​ກາງ​ເອີຣົບ ( ອີ​ຊີ​ບີ) ຈະ​ຜ່ອນຄາຍ​ນະ​ໂຍບາຍ​ການ​ເງິນ​ເພີ່ມ​ໃນ​ການ​ປະຊຸມ​ຂອງ​ວັນ​ທີ 10 ມີນາ​ ນອກຈາກ​ນີ້​ຕະຫຼາດຍັງ​ໄດ້​ຮັບ​ປັດ​ໃຈ​ບວກ​ຈາກ​ລາຄາ​ນໍ້າມັນ​ດິບ​ເບຣນທີ່​ເພີ່ມ​ຂຶ້ນ​ກວ່າ 3% ​ເມື່ອ​ຄືນ​ຂອງ​ວັນ​ທີ 9 ຜ່ານ​ມາ.

   ສັນຍາຊື້​ຂາຍທອງ​ແດງ​ຕະຫຼາດ COMEX (Commodity Exchange) ສົ່ງ​ມອບ​ເດືອນ​ພຶດສະພາ ປັບ​ຕົວ​ເພີ່ມ​ຂຶ້ນ 1,05 ​ເຊ​ນ ຫຼື 0,5% ປິດ​ທີ່ ​2,2325 ໂດ​ລາ​ສະຫະລັດ​ຕໍ່​ປອນ ນັກວິ​ເຄາະ​ຄາດ​ວ່າ: ອີ​ຊີ​ບີ ຈະ​ຜ່ອນຄາຍ​ນະ​ໂຍບາຍ​ເພີ່ມ​ຕື່ມ​ໃນ​ການ​ປະຊຸມ (10 ມີນາ)ໂດຍ​ເຮັດ​ການ​ເພີ່ມ​ວົງ​ເງິນ​ໃນ​ການ​ຊື້​ພັນທະບັດ​ຕາມ​ມາດ​ຕະການ​ຜ່ອນ ຄາຍ​ທາງ​ປະລິມານ (QE) ​ແລະ ຄາດ​ການ​ວ່າ: ອີ​ຊີ​ບີ ອາດ​ປັບຫຼຸດອັດຕາ​ດອກ​ເບ້ຍ​ເງິນ​ຝາກ​ສຳລັບ​ທະນາຄານ​ການ​ຄ້າ​ທີ່​ນຳ​ເງິນ​ຝາກ​ໄວ້​ທີ່ອີ​ຊີ​ບີ ຈາກ​ຂະນະ​ນີ້​ທີ່​ລະດັບ ​ -0.3% ໂດຍ​ທະນາຄານ​ການ​ຄ້າ​ຈະ​ເປັນ​ຝ່າຍ​ຈ່າຍ​ຄ່າ​ຝາກ​ແກ່: ອີ​ຊີ​ບີ ຫາກ​ມີ​ການ​ນຳ​ເງິນ​ສ່ວນ​ເກີນ​ມາ​ພັກ​ໄວ້​ທີ່​ອີ​ຊີ​ບີ , ມາດ​ຕະການ​ດັ່ງກ່າວ​ຂອງ​ອີ​ຊີ​ບີ​ມີ​ເປົ້າໝາຍທີ່​ຈະ​ກະ​ຕຸ້ນ​ໃຫ້​ທະນາຄານ​ການ​ຄ້າ​ນຳ​ເງິນ​ໄປ​ປ່ອຍ​ກູ້​ແກ່​ພາກ​ທຸລະ​ກິດ ​ແທນ​ທີ່​ຈະ​ນຳ​ມາ​ປະ​ໄວ້​ທີ່ ອີ​ຊີ​ບີ ​ແລະ ຫຼຸດການ​ອອມ​ຂອງ​ປະຊາຊົນ​ເພື່ອ​ໃຫ້​ມີ​ການ​ໃຊ້​ຈ່າຍຫຼາຍຂຶ້ນ ​ແລະ ກະ​ຕຸ້ນ​ເສດຖະກິດ​ໃຫ້ຫຼຸດພົ້ນ​ຈາກ​ພາວະ​ເງິນ​ຝືດ.

ນອກ​ຈາກ​ນີ້ ທອງ​ແດງ​ຍັງ​ໄດ້​ຮັບ​ປັດ​ໃຈບວກຫຼັງລາຄາ​ນໍ້າມັນດິບ​​ເບຣນເພີ່ມ​ຂຶ້ນ ​ເນື່ອງ​ຈາກ​ທອງ​ແດງ​ຊື້​ຂາຍ​ໃນ​ກະຕ່າ​ສິນຄ້າ​ຊຶ່ງ​ນໍ້າມັນ​ມີ​ອັດຕາ​ສ່ວນ​ຂະໜາດ​ໃຫຍ່​ທີ່​ສຸດ ດ້ວຍ​ເຫດ​ນີ້​ການ​ປັບ​ຕົວ​ຂຶ້ນ​ຂອງ​ລາຄາ​ນໍ້າມັນ​ຈຶ່ງ​ຊ່ວຍໜຸນ​ໃຫ້​ສິນຄ້າ​ປັບ​ຕົວ​ເພີ່ມ​ຂຶ້ນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.