ທະນາຄານໂລກປ່ອຍ​ກູ້​​ໃຫ້ມຽນມາ 100 ລ້ານ​ໂດ​ລາ​

ທະນາຄານ​ໂລກ (​World Bank) ອັດ​ນຸມັດ​ສິນ​ເຊື່ອ​ດອກ​ເບ້ຍ​ຕໍ່າ 100 ລ້ານ​ໂດ​ລາ​ສະຫະລັດ​ໃຫ້​​ແກ່​ລັດຖະບານ​ມຽນມາ ​ເພື່ອ​ສະໜັບ​ສະ​ໜູນ​ໂຄງການ​ພັດທະນາ​ລະບົບ​ທຸ​ກຳ​ຂອງ​ສະ​ຖາ​ບັນ​ການ​ເງິນ​ໃນ​ມຽນມາ​ໃຫ້​ທັນ​ສະ​ໄໝ​ຂຶ້ນ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ຄະນະ​ຜູ້​ແທນ​ຂອງ​ທະນາຄານ​ໂລກ ​ແລະ ກະຊວງ​ການ​ເງິນ​ຂອງ​ມຽນມາ​ລົງ​ນາມ​ຮ່ວມ​ກັນ​ໃນ​ຂໍ້​ຕົກລົງ​ຄວາມ​ຮ່ວມ​ມື​ດ້ານ​ການ​ເງິນ​ມູນ​ຄ່າ 100 ລ້ານ​ໂດ​ລາ​ ໃນ​ຮູບ​ແບບ​ຂອງ​ສິນ​ເຊື່ອ​ດອກ​ເບ້ຍ​ຕໍ່າ 0,75% ຈາກ​ເວິລ​ແບ​ງ ​ເພື່ອ​ສະໜັບສະໜູນ​ໂຄງການ​ພັດທະນາ​ຂະ​ແໜງ​ການ​ເງິນຂອງ​ມຽນມາ​ທີ່​ລວມທັງ​ການ​ປະຕິ​ຮູບ​ລະບົບ​ທຸລະ​ກຳ​ຂອງ​ສະ​ຖາ​ບັນ​ການ​ເງິນ​ໃຫ້​ມີ​ສະຖຽນ​ລະ​ພາບ ​ແລະ ປະສິດທິພາບ​ຫຼາຍ​ຂຶ້ນ ພ້ອມ​ຍັງ​ເປັນ​ການ​ຍົກ​ລະດັບ​ຄວາມ​ຮ່ວມ​ມື​ກັບ​ຂະ​ແໜ່​ງທຸລະ​ກິດ​ຂະໜາດ​ນ້ອຍ (​ເອສ​ເອັມອີ) ຊຶ່ງ​ເວິລ​ແບ​ງ​ເຊື່ອ​ວ່າ ຈະ​ເປັນ​ກົນ​ໄກ​ສຳຄັນ​ໃນ​ການ​ຂັບ​ເຄື່ອນລະບົບ​ເສດຖະກິດ​ຂອງ​ມຽນມາ​ໃນ​ອະ​ນະ​ຄົດ.

ທັງ​ນີ້ ​ທະນາຄານໂລກຄາດ​ຄະ​ເນ​ທ່າ​ອຽງ​ການ​ເຕີບ​ໂຕ​ທາງ​ເສດຖະກິດ​ຂອງ​ມຽນມາ​ໃນ​ໄລຍະ​ກາງ​ເອົາ​ໄວ້​ຢູ່​ທີ່ 7,1% ​ໂດຍ​ອຸ​ທົກ​ກະ​ໄພ​ໃນ​ປີ 2015 ຍັງ​ສົ່ງ​ຜົນ​ກະທົບ​​ຕໍ່​ການ​ຟື້ນ​ຕົວ​ຂອງ​ຂະ​ແໜງກະສິກຳ​ທີ່​ຍັງ​ເປັນ​ອາຊີບ​ຕົ້ນຕໍ​ຂອງ​ປະຊາຊົນ​ສ່ວນ​ໃຫຍ່​ໃນ​ປະ​ເທດ ​ເຖິງ​ແມ່ນ​ວ່າ​ອັດຕາ​ຄວາມທຸກ​ຍາກ​ຂອງ​ມຽນມາ​ຫຼຸດ​ລົງ​ໃນ​ປີ 2009-2010 ​ແລະ 2015 ​ແຕ່​ຍັງ​ມີ​ສັນຍານ​ບົ່ງ​ຊີ້​ວ່າ ພາວະ​ຄວາມທຸກ​ຍາກ​ໃນ​ມຽນມາ​ຈະ​ເປັນ​ສະຖານະ​ການ​ທີ່​ແກ່ຍາວ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.