ທະນາຄານໂລກສະໜັບສະໜູນລາວຕື່ມ 425 ຕື້ກວ່າກີບ ຟື້ນຟູໄພພິບັດ

ສະພາບໍລິຫານຂອງທະນາຄານໂລກໄດ້ອະນຸມັດເງິນຈຳນວນ 50 ລ້ານໂດລາ ປະມານ 425 ຕື້ກວ່າກີບ ຈາກກອງທືນພິເສດເພື່ອຊ່ວຍເຫຼືອເຫດການທີ່ເປັນວິກິດການເພີ່ມໃສ່ 2 ໂຄງການ ທີ່ກຳລັງໃຫ້ການຊ່ວຍເຫຼືອລາວໃນການພັດທະນາພື້ນຖານໂຄງລ່າງໃຫ້ມີຄວາມຄົງທົນ ແລະ ສາມາດຮັບມືກັບການປ່ຽນແປງຂອງສະພາບດິນຟ້າອາກາດໃນເຂດທີ່ຖືກກະທົບຈາກໄພນ້ຳຖ້ວມ.

ທ່ານ ບຸນຈັນ ສິນທະວົງ, ລັດຖະມົນຕີກະຊວງໂຍທາທິການ ແລະ ຂົນສົ່ງກ່າວວ່າ: “ທຸກພາກຂອງລາວໄດ້ຮັບຜົນກະທົບຢ່າງໜັກໜ່ວງຈາກໄພນ້ຳຖ້ວມໃນ ປີກາຍນີ້ຊຶ່ງໄດ້ເຮັດໃຫ້ມີການສູນເສຍຊີວິດ, ຊັບສິນ, ມີຜົນກະທົບຕໍ່ການດຳລົງຊີວິດ ແລະສ້າງຄວາມເສຍຫາຍຢ່າງຫຼວງຫຼາຍຕໍ່ພື້ນຖານໂຄງລ່າງຂອງລັດ,” ທ່ານ ບຸນຈັນ ສິນທະວົງ, ຍັງໄດ້ກ່າວຕື່ມວ່າ: “ການຟຶ້ນຟູຄວາມເສຍຫາຍຈາກໄພພິບັດ ແລະການກໍ່ສ້າງຄືນໃໝ່ແມ່ນຕ້ອງການທືນຫລາຍກວ່າ 520 ລ້ານໂດລາ. ການສະໜັບສະໜູນດ້ານການເງິນເພີ່ມຈາກທະນາຄານໂລກນີ້ຈະຊ່ວຍໃນການຟື້ນຟູບັນດາເສັ້ນທາງທີ່ຖືກເປ່ເພ ແລະການປັບປຸງຕາຝັ່ງຕາມລຳແມ່ນ້ຳເພື່ອປ້ອງກັນນ້ຳຖ້ວມໃຫ້ມີຄວາມທົນທານກວ່າເກົ່າ. ”

ຝົນຕົກໜັກແບບຜິດປົກກະຕິໃນລະດູຝົນປີ 2018 ໄດ້ສ້າງຄວາມເສຍຫາຍ ແລະສົ່ງຜົນກະທົບຕໍ່ປະຊາຊົນຫລາຍກວ່າ 616,000 ຄົນ ແລະ ມີຜູ້ເສຍຊີວິດ 56 ຄົນ. ພາຍຸເຂດຮ້ອນໃນເດືອນກໍລະກົດທີ່ມີຊື່ວ່າພາຍຸເຊິນຕິນ ແລະ ພະຍຸເບບິນກາໃນເດືອນສິງຫາໄດ້ພາໃຫ້ເກີດນ້ຳຖ້ວມໃນຫຼາຍພື້ນທີ່ໃນທົ່ວປະ ເທດ. ພາກໃຕ້ຂອງລາວຍັງໄດ້ຮັບຜົນກະທົບຕື່ມອີກຍ້ອນເຂື່ອນໄຟຟ້າເຊປຽນ-ເຊນ້ຳນ້ອຍເພພັງໃນເດືອນກໍລະກົດ. ການປະເມີນຜົນຄວາມຕ້ອງການຫຼັງໄພພິບັດທີ່ນຳພາໂດຍລັດຖະບານໄດ້ປະເມີນມູນຄ່າຂອງຄວາມເສຍຫາຍຄວາມສູນເສຍທາງດ້ານເສດຖະກິດ,ຄວາມຕ້ອງການໃນການຟື້ນຟູຄືນໃໝ່ ແລະຜົນກະທົບລວມຕໍ່ເສດຖະກິດຂອງ ສປປ ລາວ. ຄວາມຕ້ອງການລວມທັງໝົດເພື່ອການຟື້ນຟູຄືນຈາກໄພພິບັດໄດ້ຖືກປະເມີນເປັນມູນຄ່າປະມານ 520.4 ລ້າ ນໂດລາ.

ທ່ານ ນິໂກລາ ພອນທາຣາ, ຫົວໜ້າຫ້ອງການທະນາຄານໂລກປະຈຳ ສປປ ລາວໄດ້ກ່າວວ່າ: “ກອງທຶນຕອບໂຕ້ວິກິດການຂອງ IDA ແມ່ນກອງທຶນພິ ເສດອັນໜຶ່ງສ້າງຂື້ນມາເພືຶ່ອຊ່ວຍເຫຼືອບັນດາປະເທດທີ່ຖືກເຄາະຮ້າຍຈາກໄພພິບັດຢ່າງຮ້າຍແຮງ,” ທ່ານຍັງກ່າວຕື່ມວ່າ: “ມູນຄ່າຄວາມເສຍຫາຍ ແລະ ຄວ າມສູນເສຍທາງດ້ານເສດຖະກິດເນື່ອງຈາກໄພນ້ຳຖ້ວມປີກາຍນີ້ແມ່ນສູງຫລາຍທີ່ສຸດທຽບໃສ່ມູນຄ່າເສຍຫາຍໃນປີຜ່ານມາລວມທັງພາຍຸໄຮມາ ແລະພາຍຸນົກເຕັນໃນປີ 2011, ແລະ ພາຍຸໄຊໂຄລນເກດສະນາ ໃນປີ 2009. ການສະໜັບສະໜູນດ້ານການເງິນເພີ່ມເຕີມນີ້ຈະສາມາດຊ່ວຍຟື້ນຟູໃຫ້ພື້ນຖານໂຄງລ່າງທີ່ຖືກເສຍຫາຍ ແລະໃຫ້ມີຄວາມທົນທານຫລາຍຂຶ້ນຕໍ່ໄພພິບັດໃນອະນາຄົດ.”

ໂຄງການຂະແໜງຂົວ-ທາງ II ຂອງລາວ ຈະໄດ້ຮັບທຶນເພີ່ມເຕີມ 25 ລ້ານໂດລາ ເພື່ອໃຊ້ເຂົ້າໃນການສ້ອມແປງບັນດາເສັ້ນທາງທີ່ເປ່ເພຊຶ່ງຈັດຕັ້ງປະຕິບັດໂດຍກົມຂົວທາງ. ບັນດາຊ່ວງທາງທີ່ສຳຄັນຂອງເສັ້ນທາງຫລວງແຫ່ງຊາດເລກທີ 13 ໃຕ້ ຈະໄດ້ຖືກຟື້ນຟູຄືນໃໝ່ເພື່ອໃຫ້ມີຄວາມທົນທານຕໍ່ສະພາບດິນຟ້າອາກາດ ແລະ ຮັບການບຳລຸງຮັກສາທີ່ມີປະສິດທິພາບຫຼາຍກວ່າເກົ່າໂດຍການນໍາໃຊ້ສັນຍາມອບເໝົາ ແລະ ການຊຳລະແມ່ນອີ່ງໃສ່ຄຸນນະພາບຂອງເສັ້ນທາງ ແລະ ຄວາມສາມາດໃນການບໍລິການນຳໃຊ້ຂອງມັນການປັບປຸງເສັ້ນທາງຈະແນໃສ່ການຫລຸດຜ່ອນຜົນກະທົບທີ່ເພີ່ມຂຶ້ນຈາກການປ່ຽນແປງດິນຟ້າອາກາດໂດຍເອົາໃຈໃສ່ເປັນພິເສດໃນການອອກແບບເສັ້ນທາງ, ເປັນຕົ້ນແມ່ນການປັບປຸງ ແລະຍົກລະດັບຊ່ວງທາງໃນເຂດທີ່ມີຄວາມສ່ຽງຕໍ່ນ້ຳຖ້ວມ, ປັບປຸງລະບົບລະບາຍນ້ຳຝົນ ແລະການປູກພືດພັນເພື່ອປ້ອງກັນການເຊາະເຈື່ອນ, ການປັບປຸງທໍ່ລະບາຍນ້ຳຂ້າມທາງ ແລະໜ້າທາງຈຸດເຂົ້າຂົວ.

ຂ່າວ:​ ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.