ທະນາຄານ​ເອ​ໄອ​ໄອ​ບີ​ຮັບ​ສຳມະ​ຊິກ​ໃໝ່ 13 ປະ​ເທດ

ທະ​ນາຄາ​ນການ​ລົງທຶນ​ໂຄງ​ສ້າງ​ພື້ນຖານ​ອາຊີ (​ເອ​ໄອ​ໄອ​ບີ) ທີ່​ຈີນ​ເປັນ​ຜູ້​ສະໜັບສະໜູນ​ຕົ້ນຕໍ​ເປີດ​ເຜີຍ​ເລື່ອງ​ການ​ຮັບ​ເອົາ​ສະມາຊິກ​ໃໝ່ 13 ປະ​ເທດ ​ເຮັດ​ໃຫ້​ຍອດ​ສະມາ​ຊິກ​ທົ່ວ​ໂລກ​ເພີ່ມ​ເປັນ 70 ປະ​ເທດ.

ສຳນັກຂ່າວ​ຕ່າງປະ​ເທດ​ລາຍ​ງານ​ວ່າ: ທະ​ນາຄາ​ນການ​ລົງທຶນ​ໂຄງ​ສ້າງ​ພື້ນຖານ​ອາຊີ (​ເອ​ໄອ​ໄອ​ບີ) ​ເປີດ​ເຜີຍ​ໃນ​ທ້າຍ​ອາທິດ​ທີ່​ຜ່ານ​ມາ​ວ່າ ຄະນະ​ກຳມະການ​ບໍລິຫານ​ອະນຸມັດ​ຮັບຮອງ​ສະມາຊິກ​ໃໝ່ 13 ປະ​ເທດ ລວມມີ: ຈີນຮົງ​ກົງ, ກາ​ນາ​ດາ, ​ເວ​ເນ​ຊູ​ເອລາ, ອັບ​ກາ​ນິດ​ສະຖານ, ອຽກລັງ, ຮົງ​ກາຣີ, ​ແບນ​ຊິກ, ​ເປຣູ, ​ເອທີ​ໂອ​ປີ ​ແລະ ຊູ​ດັງ ​ໂດຍ​ຈະ​ເຂົ້າ​ເປັນ​ສະມາຊິກ​ຢ່າງ​ເປັນ​ທາງ​ການ​ຫຼັງ​ຈາກ​ເຮັດ​ການ​ຈ່າຍ​ເງິນ​ມັດ​ຈຳ​ຮອບ​ທຳ​ອິດ ​ແລະ ບັນລຸ​ເງື່ອນ​ໄຂ​ຂະ​ບວນການ​ພາຍ​ໃນ​ຕາມ​ທີ່​ທະນາຄານ​ກຳນົດ ​ໂດຍ​ຈະ​ເຮັດ​ໃຫ້​ມີ​ສະມາຊິກ​ທັງ​ໝົດ70 ປະ​ເທດ.​ເອ​ໄອ​​ໄອ​ບີ ມີ​ສຳນັກງານ​ໃຫຍ່​ຕັ້ງ​ຢູ່​ນະຄອນຫຼວງ​ປັກ​ກິ່ງ​ມີ​ເງິນ​ທຶນ​ຢູ່​ທີ່ 100 ຕື້​ໂດ​ລາ​ສະຫະລັດ ​ເລີ່​ມ​ເປີດ​ດຳ​ເນີນ​ການ​ຕົ້ນ​ປີ​ທີ່​ຜ່ານ​ມາ ທ່ານ ຈິນ ຫຼີ່​ວິນ ຜູ້ອຳນວຍການ​ເອ​ໄອ​ໄອ​ບີ​ກ່າວ​ວ່າ ກຸ່ມ​ສະມາຊິກ​ຂະຫຍາຍຕົວ​ຢ່າງ​ວ່ອງ​ໄວ ຄະນະ​ບໍລິຫານ​ກຽມ​ພິຈາລະນາ​ຜູ້​ສະໝັກໃໝ່​ເພີ່ມ​ຕື່ມ​ອີກ​ໃນ​ທ້າຍ​ປີ​ນີ້.

ຢ່າງ​ໃດ​ກໍ​ຕາມ ນັກວິ​ເຄາະ​ກັງວົນ​ວ່າ ​ເອ​ໄອ​ໄອ​ບີ ຈະ​ຫຼຸດ​ລະດັບ​ມາດຕະຖານ​ສຳລັບ​ໂຄງການ​ຕ່າງໆ ຊຶ່ງ​ຈະ​ກາ​ຍ​ເປັນ​ບ່ອນ​ທຳລາຍ​ລັກ​ການ​ດ້ານ​ສັງຄົມ, ສິ່ງ​ແວດ​ລ້ອມ ​ແລະ ຄວາມ​ຍືນ​ຍົງ​ທາງ​ດ້ານ​ເສດຖະກິດ ທັງ​ນີ້ ອາ​ເມ​ລິ​ກາ ​ແລະ ຍີ່ປຸ່ນ​ຊຶ່ງ​ເປັນ​ປະ​ເທດ​ເສດຖະກິດ​ໃຫຍ່​ສຸດ ​ແລະ ​ໃຫຍ່​ເປັນອັນ​ດັບ 3 ຂອງ​ໂລກ ສະ​ແດງ​ທ່າ​ທີ່​ຈະ​ແຈ້ງວ່າ​ຈະ​ບໍ່​ເຂົ້າ​ຮ່ວມ​ເປັນ​ສະມາຊິກ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.