ທີ​ວີ​ອາ ລາວ ເນັ້ນ​ສ້າງ​ບ້ານ​ຈັດ​ສັນ​ໃນ​ເຂດ​ພັດ­ທະ­ນາ

ປະ­ຈຸ​ບັນ ­ທຸ​ລະ​ກິດ​ດ້ານ​ອະ​ສັງ​ຫາລິ​ມະ​ຊັບ ກຳ­ລັງ​ເກີດ​ຂຶ້ນ​ຫຼາຍ​ບໍ່​ວ່າ​ຈະເປັນ​ການ​ແບ່ງ​ຂາຍ​ສິດ​ນຳ​ໃຊ້​ທີ່​ດິນ, ການ​ສ້າງ​ເປັນ​ບ້ານ​ຈັດ​ສັນ​ທີ່​ມີ​ທັງ​ເຮືອນ​ພ້ອມ​ທີ່​ດິນ, ແຕ່​ໂດຍ​ລວມ​ແລ້ວ​ລ້ວນ​ມີ​ລາ­ຄາ​ແພງ, ດັ່ງ­ນັ້ນ ເພື່ອ​ຕອບ​ໂຈດ​ລູກຄ້າ​ທຸກ​ລະ­ດັບ​ທີ່​ຢາກ​ມີ​ດິນ ແລະ​ເຮືອນເປັນ​ຂອງ​ຕົນ​ເອງ, ທາງ​ບໍ­ລິ­ສັດ​ທີ​ວີ​ອາລາວ ອິນ​ເຕີ​ເນ​ເຊີນ​ນໍ ຈຳ­ກັດ ຈິ່ງ​ໄດ້ສ້າງ​ໂຄງ​ການ­ບ້ານ​ຈັດ​ສັນ​ຂຶ້ນ​ພະ­ຍາຍາມ​ໃຫ້​ໄດ້​ລາ­ຄາ​ສົມ​ເຫດ​ສົມ​ຜົນ ແລະ ຢູ່​ໃນ​ເຂດ​ພັດ­ທະ­ນາ.

ທ່ານ ອະ­ພິ​ສັກ ພາ­ລະ​ວິ​ໃສ ກຳ​ມະການ​ຜູ້​ຈັດ­ການ​ບໍ­ລິ­ສັດທີ​ວີ​ອາ ລາວ ອິນ​ເຕີ​ເນ​ເຊີນ​ນໍ ຈຳ­ກັດ (TVR Lao International Co.,Ltd) ໃຫ້​ສຳ­ພາດວ່າ: ທີ​ວີ​ອາ ລາວອິນ​ເຕີ​ເນ​ເຊີນ​ນໍ ຈຳ­ກັດ ເປັນ​ບໍ­ລິ­ສັດ​ທີ່​ດຳ­ເນີນ​ທຸ­ລະ​ກິດ​ດ້ານອະ­ສັງ­ຫາ­ລິ­ມະ​ຊັບທີ່​ເນັ້ນ​ໃນ​ການ​ສ້າງເຮືອນ ແລະ​ສ້າງ​ບ້ານ​ຈັດ​ສັນ​ທີ່​ໄດ້​ຄຸນ​ນະພາບ​ຕາມ​ມາດ­ຕະ­ຖານ​ສາ­ກົນ ໂດຍ​ຍືດໝັ້ນ​ການ​ອຳ­ນວຍ​ຄວາມ​ສະ­ດວກ​ໃນເລື່ອງ​ໄຟ­ຟ້າ, ນ້ຳ​ປະ­ປາ, ຕິດ​ແຄມ​ທາງ ໃຫຍ່ ແລະ​ລາ­ຄາ​ສົມ​ເຫດ​ສົມ​ຜົນ​ເທົ່າ​ທີ່ ຄົນ​ທົ່ວ​ໄປ​ສາ­ມາດ​ຈັບ­ຈອງ​ໄດ້, ຊຶ່ງ​ໃນ ປະ­ຈຸ​ບັນ ທາງ​ບໍ­ລິ­ສັດ ພວມ​ດຳ­ເນີນ​ໂຄງການ​ທຳ​ອິດ ເພື່ອ​ເປັນ​ທາງ​ເລືອກ​ໃຫ້​ກັບລູກ​ຄ້າ ກໍ​ຄື​ໂຄງ​ການ­ບ້ານ​ຈັດ​ສັນ​ແດນ ຮັກ 1 ເຮືອນ​ພ້ອມ​ທີ່​ດິນ 300 ຕາ​ແມັດ ລາ­ຄາ​ເລີ່ມ​ຕົ້ນ 2,99 ລ້ານ​ບາດ, ແບບເຮືອນ​ພັກ​ອາ­ໄສ 2 ຊັ້ນ 3 ຫ້ອງ​ນອນ 3 ຫ້ອງ​ນ້ຳ​ບ່ອນ​ຈອດ​ລົດ​ໄດ້ 2 ຄັນ ຂະ­ໜາດ​ດິນ​ກວ້າງ​ປະ­ມານ 15 ແມັດ ເລິກ 20 ແມັດ ເນື້ອ­ທີ່​ໃຊ້​ສອຍ 160 ຕາ​ແມັດ ແບບ​ເຮືອນ​ແຕ່​ລະ​ຫຼັງ​ງາມ​ມີ​ເອ­ກະ­ລັກ,  ຊັ້ນ​ລຸ່ມ​ເປັນ​ຫ້ອງ​ໂລ່ງ​ມີ​ຫ້ອງ​ຮັບ­ແຂກ​ໂຕະ​ອາ­ຫານ​ຫ້ອງ​ຄົວ, ຫ້ອງ​ນ້ຳ, ສ່ວນ​ສະ­ຖານ­ທີ່​ແມ່ນ​ຕັ້ງ​ຢູ່​ຫຼັກ 24 ຫ່າງ​ຈາກ 4 ແຍກ​ດອນ​ໜູນ​ປະ­ມານ 12 ກິ­ໂລ­ແມັດ  ຂຶ້ນ​ກັບ​ບ້ານ​ໄຜ່​ລ້ອມ​ນະ­ຄອນ­ຫຼວງ​ວຽງ​ຈັນ ກົງ­ກັນ­ຂ້າມ​ກັບ​ສຸ ສານ​ປະ­ຕິ­ວັດ.

ໂຄງ­ການ​ດັ່ງ­ກ່າວ​ແມ່ນ​ເລີ່ມ​ມາ​ໄດ້ 2 ເດືອນ, ໃນ​ເນື້ອ­ທີ່ 17.760 ຕາ​ແມັດ ເພື່ອ​ສ້າງ​ເຮືອນ​ຈຳ­ນວນ 30 ຫຼັງ­ຄາ ແລະ​ພິ­ເສດ​ຈຳ­ນວນ 5 ຫຼັງທຳ​ອິດ​ລາ ຄາ 2,79 ລ້ານ​ບາດ, ສ່ວນ​ໜ້າ​ວຽກ​ທີ່ ກຳ­ລັງ​ດຳ­ເນີນ​ຢູ່​ແມ່ນ​ການ​ບຸກ­ເບີກ​ເນື້ອທີ່​ເພື່ອ​ສ້າງ​ບ້ານ​ແບບ­ຢ່າງ​ໃຫ້​ລູກ​ຄ້າ​ໄດ້​ເບິ່ງ​ຈຳ­ນວນ 4 ຫຼັງ ແລະ​ຄາດ​ວ່າ​ຈະ​ໃຫ້ສຳ­ເລັດ​ພາຍ​ໃນ 3 ເດືອນ, ສ່ວນ​ວຽກໂດຍ​ລວມ​ຂອງ​ໂຄງ­ການ​ຄືບ​ໜ້າ​ແລ້ວ 20%, ໃນ​ນັ້ນ ປະ­ກອບ​ມີ​ອາ­ຄານ​ຫ້ອງການ​ການ​ຂາຍ, ຄາດ​ສຳ­ເລັດ​ພາຍ​ໃນເດືອນ​ນີ້.

ທ່ານ ອະ­ພິ​ສັກ ພາ­ລະ​ວິ​ໃສ ໃຫ້​ຮູ້​ອີກວ່າ: ໂຄງ​ການ­ບ້ານ​ຈັດ​ສັນ​ເປັນ​ໂຄງ­ການທຳ​ອິດ​ທີ່​ບໍ­ລິ­ສັດ​ຈັດ​ຕັ້ງ​ປະ­ຕິ­ບັດ ໂດຍ​ຈະເນັ້ນ​ໃນ​ການ​ສ້າງ​ເຮືອນ​ທີ່​ໄດ້​ມາດ­ຕະ­ຖານ ແລະ​ລາ­ຄາ​ສົມ​ເຫດ​ສົມ​ຜົນ, ທັງ​ຕິດ​ກັບ​ແຄມ​ທາງ​ໃຫຍ່ ແລະ​ມີ​ສິ່ງ​ອຳນວຍ​ຄວາມ​ສະ­ດວກ​ຄົບ​ຊຸດ, ດັ່ງ­ນັ້ນ ​ສັງຄົມ​ຈິ່ງ​ໃຫ້​ຄວາມ​ສົນ­ໃຈ​ສູງ​ກັບ​ໂຄງການ​ດັ່ງ­ກ່າວ​ນີ້ ພາຍ­ຫຼັງ​ໂຄ­ສະ­ນາ​ຜ່ານສື່​ອອນ​ລາຍ​ກໍ​ມີ​ຜູ້​ເຂົ້າ​ມາ​ຂໍ​ເບິ່ງ​ເຮືອນ​ຕົວແບບ ແລະ​ຄາດ​ວ່າ ພາຍ­ຫຼັງ​ການ​ສ້າງອາ­ຄານ​ແບບ­ຢ່າງ​ສຳ­ເລັດ​ຮັບ­ປະ­ກັນ​ວ່າ ບໍ­ລິ­ສັດ​ຈະ​ສາ­ມາດ​ຂາຍ​ໄດ້​ໝົດ, ພ້ອມກັນ​ນັ້ນ ເພື່ອ​ຕອບ​ສະ­ໜອງ​ໃຫ້​ພຽ​ພໍ​ກັບ​ຄວາມ​ຕ້ອງ­ການ​ຂອງ​ສັງ­ຄົມ, ທີ​ວີ​ອາລາວ ກໍ​ກຳ­ລັງ​ຈະ​ເລີ່ມ​ໂຄງ​ການ­ບ້ານ​ຈັດ​ສັນ​ໄລ­ຍະ 2 ແລະ 3 ຕໍ່​ໄປ​ອີກ.

ໂດຍ: ພິມ​ພອນ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.