ທ່ານ​ຮອງ​ນາ­ຍົກ​ເຄື່ອນ​ໄຫວ​ຊຸກ­ຍູ້ໂຄງ­ການ​ໄຟ­ຟ້ານ້ຳ​ອູ 6-7

ເນື່ອງ​ໃນ​ໂອ­ກາດ​ເດີນ­ທາງ​ມາເຄື່ອນ​ໄຫວ ແລະ​ຢ້ຽມ­ຢາມ​ແຂວງ​ຜົ້ງສາ­ລີ ໃນ​ວັນ​ທີ 11 ເມ­ສາ 2017 ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ​ລັດ​ຖະມົນ­ຕີ​ພ້ອມ​ດ້ວຍ​ຄະ­ນະ​ກໍ ໄດ້​ໄປ​ຢ້ຽມ­ຢາມ ແລະ​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການເຂື່ອນ​ໄຟ­ຟ້າ​ນ້ຳ­ຕົກ ນ້ຳ​ອູ-6 ແລະ ນ້ຳ ອູ-7 ທີ່​ເມືອງ ແລະ​ແຂວງ​ຜົ້ງ​ສາ­ລີ ຊຶ່ງ​ມີ ທ່ານ ຄຳ​ເຈນ ວົງ​ໂພ​ສີ ເຈົ້າ­ແຂວງໆ​ຜົ້ງສາ­ລີ​ພ້ອມ​ດ້ວຍ​ຄະ­ນະ​ນຳ​ແຂວງ ແລະ ຄະ­ນະ​ຮັບ­ຜິດ­ຊອບ​ໂຄງ­ການ​ໃຫ້­ການຕ້ອນ­ຮັບ.

ໃນ​ການ​ໄປ​ຢ້ຽມ­ຢາມ​ຄັ້ງ​ນີ້​ກໍ​ໄດ້​ຮັບຟັງ​ການ​ລາຍ​ງານ​ກ່ຽວ​ກັບ​ການ­ຈັດ­ຕັ້ງ ປະ­ຕິ­ບັດ ແລະ​ວຽກ​ງານ​ຈຸດ​ສຸມ ຂອງ ໂຄງ­ການ​ເຂື່ອນ​ໄຟ­ຟ້າ​ນ້ຳ­ຕົກນ້ຳ​ອູ-6 ແລະ​ນ້ຳ​ອູ-7 ຊຶ່ງ​ເປັນ 2 ເຂື່ອນ​ທີ່​ນອນ​ຢູ່​ໃນ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ຕາມ​ສາຍ​ນ້ຳ​ອູ ແລະ​ເປັນ​ເຂື່ອນ​ລະ­ບົບ​ຂັ້ນ­ໄດ ໂດຍ​ເປັນ​ການ​ລົງ­ທຶນ​ຮ່ວມ​ລະ­ຫວ່າງບໍ­ລິ­ສັດ ຊິ​ໂນ​ໄຮ​ໂດຣ ແຫ່ງ ສປ ຈີນ ຖື 85% ກັບ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ຖື 15% ໃນ​ຮູບ​ແບບ​ກໍ່­ສ້າງ, ດຳ­ເນີນ​ງານ ແລະ​ມອບ​ໂອນ​ຄືນ​ໃຫ້​ລັດ­ຖະ­ບານ (BOT) ໃນ​ໄລ­ຍະ​ສຳ​ປະ­ທານ 29 ປີ ນັບ​ຈາກ​ມື້​ຂາຍ​ໄຟ­ຟ້າ​ເປັນ​ທາງ​ການ.

ໃນ​ນັ້ນ ເຂື່ອນ​ໄຟ­ຟ້າ​ນ້ຳ​ອູ 6 ແມ່ນມີ​ກຳ­ລັງ​ຕິດ​ຕັ້ງ 180 ເມັກ​ກາ​ວັດ, ສາ ມາດ​ຜະ­ລິດ​ພະ­ລັງ­ງານ​ໄຟ­ຟ້າ​ໄດ້ 739 ກິ​ກະ​ວັດ​ໂມງ​ຕໍ່​ປີ ຊຶ່ງ​ສຳ­ເລັດ​ການ​ກໍ່­ສ້າງ ແລະ​ຂາຍ​ໄຟ­ຟ້າມາ​ແຕ່​ທ້າຍ​ປີ 2016  ມູນ​ຄ່າ​ການ​ກໍ່­ສ້າງ 380 ກວ່າ​ລ້ານ​ໂດ ລາ​ສະ­ຫະ­ລັດ. ສ່ວນ​ເຂື່ອນ​ໄຟ­ຟ້າ​ນ້ຳ​ອູ7 ມີ​ກຳ­ລັງ​ຕິດ​ຕັ້ງ 210 ເມັກ​ກາ​ວັດ. ປະຈຸ​ບັນ ພວມ​ດຳ­ເນີນ​ການ​ກໍ່­ສ້າງ​ໄດ້​ປະ ມານ 10 ກວ່າ​ສ່ວນ​ຮ້ອຍ, ໃນ​ທ້າຍ​ປີ  2017 ຈະ​ໄດ້​ມີ​ການ​ອວ່າຍ​ນ້ຳ​ເພື່ອ​ດຳເນີນ​ການ​ກໍ່­ສ້າງ​ໂຕ​ເຂື່ອນ ແລະ​ຄາດ​ວ່າ ຈະ​ສຳ­ເລັດ ແລະ​ຂາຍ​ໄຟ­ຟ້າ​ໄດ້​ໃນ​ປີ 2020 ນີ້ ຊຶ່ງ​ບັນ­ດາ​ເຂື່ອນ​ນ້ຳ​ອູ​ເຫຼົ່າ​ນີ້ລັດ­ຖະ­ບານ​ລາວ​ໄດ້​ໃຫ້​ຄວາມ​ສຳ­ຄັນ ເພື່ອ​ຕອບ​ສະ­ໜອງ​ໄຟ­ຟ້າ​ໃຫ້​ແກ່​ບັນ­ດາ ແຂວງ​ພາກ​ເໜືອ​ຂອງ​ລາວ​ອັນ​ເປັນ​ການ​ປະ­ກອບ­ສ່ວນ ແລະ​ຍົກ​ລະ­ດັບ​ຊີ­ວິດ​ການ​ເປັນ​ຢູ່​ຂອງ​ພໍ່​ແມ່​ປະ­ຊາ­ຊົນ​ໃຫ້​ດີ​ຂຶ້ນ​ເທື່ອ​ລະ​ກ້າວ.

ນອກ­ຈາກ​ນີ້, ທ່ານ​ຮອງ​ນາ­ຍົກ​ລັດ ຖະ​ມົນ­ຕີ ແລະ​ຄະ­ນະ​ຍັງ​ໄດ້​ຮັບ​ຟັງ​ວຽກງານ​ການ​ຍົກ­ຍ້າຍ​ຈັດ​ສັນ ແລະ​ຄຸ້ມ​ຄອງສິ່ງ­ແວ­ດລ້ອມ ໂດຍ​ສະ­ເພາະ​ກໍ​ແມ່ນ​ວຽກ ງານ​ການ​ຍົກ­ຍ້າຍ​ຈັດ​ສັນ​ທີ່­ຢູ່​ອາ­ໄສ ແລະ​ອາ­ຊີບ​ໝັ້ນ​ທ່ຽງ​ຂອງ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ, ການ​ຊົດ​ເຊີຍ, ການ​ສຸມ​ໃສ່​ແກ້​ບັນ­ຫາ ສິ່ງ​ເສດ​ເຫຼືອ ແລະ​ການ​ບຳ­ບັດ​ນ້ຳ​ເປື້ອນ ໃນ​ໄລ­ຍະ​ການ​ກໍ່­ສ້າງ​ຂອງ​ໂຄງ­ການ, ການ​ອະ­ນາ­ໄມ​ໜ້າ​ເຂື່ອນ ແລະ​ສືບ­ຕໍ່​ສຸມໃສ່​ຊອກ​ຫາ​ອາ­ຊີບ​ທີ່​ຍືນ​ຍົງ​ໃຫ້​ແກ່​ຄອບຄົວ​ທີ່​ຖືກ​ຜົນ​ກະ­ທົບ.

ໂອ­ກາດ​ນີ້ ທ່ານ​ຮອງ​ນາ­ຍົກ​ລັດ​ຖະມົນ­ຕີ​ກໍ່​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ ສຳ­ເລັດ​ຂອງ​ການ­ຈັດ­ຕັ້ງ​ປະ­ຕິ­ບັດ​ໂຄງການ ຊຶ່ງ​ເປັນ​ການ​ປະ­ກອບ­ສ່ວນ​ອັນ ສຳ­ຄັນ​ເຂົ້າ​ໃນ​ການ​ພັດ­ທະ­ນາ​ເສດ​ຖະກິດ-ສັງ­ຄົມ ຂອງ​ປະ­ເທດ​ກໍ​ຄື​ຂອງ ແຂວງ​ຜົ້ງ​ສາ­ລີ ລວມ​ທັງ​ການ​ສ້າງ​ລາຍ ຮັບ ແລະ​ວຽກ​ເຮັດ​ງານ​ທຳ​ໃຫ້​ແກ່​ປະ­ຊາຊົນ​ລາວ​ບັນ­ດາ­ເຜົ່າ. ພ້ອມ​ນີ້, ທ່ານ ສອນ​ໄຊ ສີ​ພັນ​ດອນ ຍັງ​ໄດ້​ເນັ້ນ​ໃຫ້​ຜູ້ຮັບ­ຜິດ­ຊອບ​ໂຄງ­ການ​ຕ້ອງ​ໄດ້​ເອົາ­ໃຈໃສ່​ໂຄ­ສະ­ນາ​ເຜີຍ­ແຜ່​ໃຫ້​ປະ­ຊາ­ຊົນ​ເຫັນໄດ້​ຄວາມ​ສຳ­ຄັນ​ຂອງ​ການ​ພັດ­ທະ­ນາໂຄງ­ການ ແລະ​ເຂົ້າ​ຮ່ວມ​ສະ­ໜັບ​ສະໜູນ​ໂຄງ­ການ​ຢ່າງ​ເປັນ​ຂະ​ບວນ, ການ ຊົດ​ເຊີຍ​ກໍ​ຕ້ອງ​ປະ­ຕິ­ບັດ​ຕາມ​ຫຼັກ­ການລວມ​ສູນ​ເປັນ​ເອ­ກະ​ພາບ​ກັນ, ການ​ຈັດ ສັນ​ອາ­ຊີບ​ຕ້ອງ​ໄດ້​ສອດ­ຄ່ອງ​ກັບ​ການຜະ­ລິດ​ເປັນ​ສິນ­ຄ້າ, ໂຄງ­ການ​ຄ້ຳ­ປະ­ກັນສະ­ບຽງ​ອາ­ຫານ ແລະ​ຜະ­ລິດ​ສິນ­ຄ້າ​ສົ່ງອອກ​ໄປ ສປ ຈີນ, ສົມ­ທົບ​ກັບ​ໂຄງ­ການສຸມ​ໃສ່​ການ​ປູກ-ການ​ລ້ຽງທີ່​ແທດ­ເໝາະກັບ​ສະ­ພາບ​ຕົວ​ຈິງ​ຂອງ​ທ້ອງ­ຖິ່ນ ໂດຍສະ­ເພາະ​ອີງ­ໃສ່​ສິນ­ຄ້າ​ທີ່​ເປັນ­ຄວາມຕ້ອງ­ການ​ຂອງ​ຕະ­ຫຼາດ, ເອົາ­ໃຈ­ໃສ່​ເກັບກູ້​ໄມ້​ອອກ​ຈາກ​ເຂດ​ນ້ຳ​ຖ້ວມ​ຂອງ​ອ່າງ ເພື່ອ​ບໍ່​ໃຫ້​ມີ​ການ​ສູນ​ເສຍ​ຊັບ​ພະ­ຍາ ກອນ​ໄມ້ ແລະ​ຜົນ​ກະ­ທົບ​ຕໍ່​ສັດ​ນ້ຳ, ເອົາໃຈ​ໃສ່​ຕື່ມ​ໃນ​ການ​ສ້າງ​ແຜນ​ງານ​ພັດ ທະ​ນາ​ບໍ­ລິ­ເວນ​ອ່າງ​ນ້ຳ ທັງ​ທາງ​ດ້ານການ​ປະ­ມົງ, ການ​ລ້ຽງ​ປາ, ແຜນ​ງານນຳ​ໃຊ້​ນ້ຳ ເພື່ອ​ເຮັດ​ກະ­ສິ­ກຳ ແລະ​ແຜນງານ​ທ່ອງ​ທ່ຽວ​ພາຍ​ໃນ​ອ່າງ, ສົມ­ທົບກັນ​ປັບ­ປຸງ ແລະ​ກໍ່­ສ້າງ​ເສັ້ນ­ທາງ​ຄົມ​ມະນາ​ຄົມ​ຄືນ­ໃໝ່ ເພື່ອ​ພັດ­ທະ­ນາ​ບ້ານ​ທີ່​ໄດ້ຮັບ​ຜົນ​ກະ­ທົບ ແລະ​ອຳ­ນວຍ​ຄວາມ​ສະດວກ​ໃຫ້​ແກ່​ການ​ໄປ­ມາ­ຫາ­ສູ່​ຂອງ​ປະຊາ​ຊົນ, ເອົາ­ໃຈ­ໃສ່​ສ້າງ​ລະ­ບົບ​ການ​ພະຍາ​ກອນ​ອາ­ກາດ ແລະ​ການ​ບໍ­ລິ­ຫານຈັດ­ການ​ນ້ຳ ເພື່ອ​ຮັບ​ມື​ກັບ​ການ​ເກີດ​ໄພພິ­ບັດ​ໃນ​ແຕ່​ລະ​ປີ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.