ນັກທຸລະກິດຂອນແກ່ນ ສົນໃຈການລົງທຶນໃນລາວ

ວັນທີ 17 ມີນາຜ່ານມາ ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ ໄດ້ມີກອງປະຊຸມຮ່ວມປຶກສາຫາລື ແລກປ່ຽນສຶກສາຂໍ້ມູນທາງດ້ານການຄ້າ ແລະການລົງທຶນໃນລາວ ລະຫວ່າງນັກທຸລະກິດກຸ່ມບໍລິສັດພົງສະຫວັນ ແລະຄະນະຜູ້ແທນນັກທຸລະກິດຈັງຫວັດຂອນແກ່ນ ປະເທດໄທ ພາຍໃຕ້ການເປັນປະທານຮ່ວມຂອງທ່ານ ສົມບູນ ພົງສະ ຫວັນ ປະທານຂາຮຸ້ນໃຫຍ່ກຸ່ມບໍລິສັດພົງ ສະຫວັນ ທ່ານ ເຂັມຊາດ ສົມໃຈວົງ ປະທານຫໍການຄ້າຈັງຫວັດຂອນແກ່ນ, ມີນັກທຸລະກິດກຸ່ມບໍລິສັດພົງສະຫວັນ ພ້ອມດ້ວຍບັນດານັກທຸລະກິດຈາກຂະແໜງການຕ່າງໆຝ່າຍໄທເຂົ້າຮ່ວມເກືອບ 60 ຄົນ.

ໂອກາດນີ້ ທ່ານ ເທດລະຄອນ ດວງສົນທິ ຮອງປະທານຜູ້ປະຈໍາການກຸ່ມບໍລິສັດພົງສະຫວັນ ກ່າວວ່າ:ຈຸດປະສົງກອງ ປະຊຸມຄັ້ງນີ້ ເພື່ອສຶກສາຂໍ້ມູນກ່ອນການມາລົງທຶນໃນລາວ ໂດຍສະເພາະທາງດ້ານການຄ້າ ແລະອຸດສາຫະກໍາລະຫວ່າງກຸ່ມບໍລິສັດພົງສະຫວັນ ກັບຈັງຫວັດຂອນແກ່ນ ຊຶ່ງເຊື່ອວ່າກອງປະຊຸມຄັ້ງນີ້ຈະເປັນຂີດໝາຍສໍາຄັນອັນໜຶ່ງທີ່ຈະເຮັດໃຫ້ ຫົວໜ່ວຍທຸລະກິດຂອງສອງປະເທດ ກ້າວໜ້າໄປອີກລະດັບໜຶ່ງ.

ຂະນະທີ່ກ່ອນໜ້ານີ້ຄະນະຜູ້ແທນກຸ່ມບໍລິສັດພົງສະຫວັນກໍໄດ້ໄປຢ້ຽມຢາມ ແລະເຮັດວຽກຈັງຫວັດຂອນແກ່ນ ຊຶ່ງໄດ້ຮັບການຕ້ອນຮັບຢ່າງອົບອຸ່ນ ແລະກໍໄດ້ນໍາພາເຮັດວຽກຢ່າງເອົາຈິງເອົາຈັງ, ຜ່ານການພົບປະຫາລືແລກປ່ຽນບົດຮຽນນໍາກັນໃນຄັ້ງນີ້ຈະເປັນຮູບປະທຳກ້າວໄປສູ່ຄວາມສຳເລັດຫຼາຍຂຶ້ນໃນອະນາຄົດ.

ໂອກາດດຽວກັນຄະນະຜູ້ແທນນັກທຸລະກິດຂອນແກ່ນຍັງໄດ້ຮັບຟັງລາຍງານກ່ຽວກັບຂໍ້ມູນຂອງກຸ່ມບໍລິສັດພົງສະຫວັນ ແລະຂໍ້ມູນທາງດ້ານການເຮັດທຸລະກິດການຄ້າ ແລະການລົງທຶນໃນລາວ, ໂດຍທົ່ວປະເທດລາວລວມມີປະຊາກອນທັງໝົດເກືອບ 7 ລ້ານຄົນ, ມີລາຍໄດ້ຕໍ່ ຫົວຄົນສະເລ່ຍປະມານ 1,3 ພັນໂດລາສະຫະລັດ ຕໍ່ຄົນຕໍ່ປີດ້ານການຂະຫຍາຍຕົວຂອງເສດຖະກິດໃນປີ 2010-2015 ແມ່ນຢູ່ໃນລະດັບ 7,4-8% ຂະແໜງການເຕີບໂຕທີ່ສຸດແມ່ນຂະແໜງອຸດສະຫະກໍາຕໍ່ມາແມ່ນດ້ານການບໍລິການ ແລະກະສິກໍາ, ການຂະຫຍາຍຕົວຂອງຂະແໜງກະສິກໍາສ່ວນຫຼາຍແມ່ນການປູກຝັງລ້ຽງສັດ ແລະການປະມົງ, ສໍາລັບຂະແໜງອຸດສະຫະກໍາແຕ່ປີ 2010-2015 ເປັນຕົ້ນມາ ການກໍ່ສ້າງແມ່ນຈະກວມເອົາຫຼາຍກວ່າໝູ່, ຮອງລົງມາແມ່ນອຸດສະຫະກໍາບໍ່ແຮ່ ແລະຂຸດຄົ້ນ, ຕໍ່ມາແມ່ນອຸດສະຫະກໍາໄຟຟ້າ ແລະນໍ້າປະປາ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.