ນາ­ຍົກສົ່ງ­ເສີມ​ເມືອງ​ຊະ­ນະ​ຄາມເຮັດ​ກະ­ສິ­ກຳ​ປອດ​ສານ­ພິດ

ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ​ພ້ອມ​ດ້ວຍ​ຄະ­ນະ​ຈາກ​ສູນກາງ ແລະ​ການ​ນຳ​ແຂວງ​ວຽງ​ຈັນ​ໄດ້ ເຄື່ອນ​ໄຫວ​ຢ້ຽມ­ຢາມ ແລະ​ໂອ້​ລົມ​ຕໍ່​ພະນັກ​ງານ-ລັດ­ຖະ­ກອນ, ທະ­ຫານ, ຕຳຫຼວດ ແລະ​ຄອບ­ຄົວ​ຕົວ​ແບບ​ເມືອງ​ຊະ­ນະຄາມ, ແຂວງ​ວຽງ​ຈັນ​ຕອນ​ບ່າຍ​ວັນ​ທີ 13 ມີ­ນາ 2017 ນີ້ ໂດຍ​ລວມ​ທ່ານ​ສະ­ໜັບ­ສະ­ໜູນ​ການ​ເຮັດ​ກະ­ສິ­ກຳ​ປອດ​ສານພິດ​ຂອງ​ປະ­ຊາ­ຊົນ ໂດຍ​ເນັ້ນ​ວ່າ​ເປັນຕົ້ນ​ທຶນ​ໄລ­ຍະ​ຍາວ ແລະ​ເປັນ​ທ່າ­ແຮງ​ສົ່ງ­ເສີມ​ການ​ສ້າງ​ລາຍ​ຮັບ​ທີ່​ຍາວ​ນານ.

ການ​ລົງ​ຢ້ຽມ­ຢາມ​ເມືອງ​ຊະ­ນະ​ຄາມ​ຄັ້ງ​ນີ້ ​ກ່ອນ​ອື່ນຄະ­ນະ​ຂອງ​ທ່ານ​ນາ­ຍົກລັດ­ຖະ­ມົນ­ຕີ​ໄດ້​ຮັບ​ຟັງ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ​ຈາກ​ທ່ານ ສະ­ໝານ ວິ­ເສດ​ຍະ​ພົງ ເຈົ້າ­ເມືອງໆ​ຊະ­ນະ​ຄາມ ຊຶ່ງ​ໃຫ້​ຮູ້​ວ່າ: ທົ່ວ​ເມືອງ​ສືບ­ຕໍ່​ມີ​ສະ­ຖຽນລະ​ພາບ​ທາງ​ດ້ານ​ການ­ເມືອງ, ສັງ­ຄົມ​ມີຄວາມ​ສະ­ຫງົບ ແລະ​ມີ​ຄວາມ​ເປັນ​ລະບຽບ​ຮຽບ​ຮ້ອຍ​ດີ, ເສດ­ຖະ­ກິດ​ຂະ­ຫຍາຍຕົວ​ບໍ່​ຫຼຸດ 8% ລາຍ​ຮັບ​ສະ­ເລ່ຍ​ໃສ່​ຫົວຄົນ​ບັນ­ລຸ 13 ລ້ານ​ກວ່າ​ກີບ​ຕໍ່​ຄົນ​ຕໍ່​ປີ ສະເລ່ຍ​ເຂົ້າ­ເປືອກ​ໃສ່​ຫົວ​ຄົນ​ໄດ້ 1.058 ກິ​ໂລ­ກະ​ລາມ​ຕໍ່​ຄົນ​ຕໍ່​ປີ, ປີ 2016 ສາມາດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ໄດ້ 4,74 ຕື້​ກີບ​ເທົ່າ​ກັບ 110,45%, ທົ່ວເມືອງ​ໄດ້​ນຳ​ໃຊ້​ໄຟ­ຟ້າ​ແລ້ວ 100%, ມີຄອບ­ຄົວ​ພັດ­ທະ­ນາ​ກວມ 99%, ບ້ານ​ພັດ ທະ​ນາ​ກວມ 70,5% ບ້ານ​ວັດ­ທະ­ນະ­ທຳ 94% ບ້ານ​ສາ​ທາ​ລະນະ​ສຸກ 100% ບ້ານ​ປອດ​ຄະ­ດີ 97% ອັນ​ພົ້ນ​ເດັ່ນ​ແມ່ນ​ມີ​ສິນ­ຄ້າ​ໜຶ່ງ​ເມືອງ​ໜຶ່ງຜະ­ລິດ​ຕະ​ພັນ (ODOP) ຈຳ­ນວນ​ຫຼວງຫຼາຍ.

ໃນ​ໂອ­ກາດ​ດັ່ງ­ກ່າວ, ທ່ານ ທອງ​ລຸນ ສີ​ສຸ​ລິດ ໄດ້​ໃຫ້​ກຽດ​ໂອ້​ລົມ​ຕໍ່​ຜູ້​ເຂົ້າ​ຮ່ວມ ໃນ​ນັ້ນ​ທ່ານ​ໄດ້​ຍົກ​ໃຫ້​ເຫັນ​ສະ­ພາບ​ການພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດທີ່​ພົ້ນ​ເດັ່ນ, ຊົມ­ເຊີຍ​ຕໍ່​ຜົນ­ສຳ­ເລັດ​ທີ່​ອຳນາດ​ການ​ປົກ­ຄອງ ແລະ​ປະ­ຊາ­ຊົນ​ບັນດາ​ເຜົ່າ​ຊາວ​ເມືອງ​ຊະ­ນະ​ຄາມ​ສາ­ມາດຍາດ​ມາ​ໄດ້​ໃນ​ໄລ­ຍະ​ທີ່​ຜ່ານ​ມາ​ພ້ອມ​ທັງ ຍົກ​ໃຫ້​ເຫັນ​ເງື່ອນ­ໄຂ​ທ່າ­ແຮງ, ສິ່ງ​ຫຼໍ່​ແຫຼມ-ບັນ­ຫາ​ສິ່ງ​ທ້າ​ທາຍ, ຂໍ້​ຈຳ­ກັດ, ປະ­ຫວັດມູນ­ເຊື້ອ ແລະ​ການ​ເຕີບ​ໃຫຍ່​ຂະ­ຫຍາຍຕົວ​ຂອງ​ເມືອງ​ຊະ­ນະ​ຄາມ ​ໂດຍ​ສະ­ເພາະໄລ­ຍະ 20 ປີ​ທີ່​ຜ່ານ​ມາ​ອັນ​ສຳ­ຄັນ ທ່ານໄດ້​ມີ​ຄຳ​ເຫັນ​ເນັ້ນ​ໜັກ​ໃຫ້­ການ​ນຳ​ຂອງ​ເມືອງ​ເອົາ­ໃຈ­ໃສ່​ຕື່ມ​ບາງ​ດ້ານ​ເປັນ­ຕົ້ນ ສ້າງ​ເງື່ອນ­ໄຂ ແລະ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ດຳ­ລົງ​ຊີ­ວິດ​ກໍ​ຄື ການຜະ­ລິດ, ການ​ຄ້າ­ຂາຍ​ຂອງ​ປະ­ຊາ­ຊົນ​ບົນພື້ນ­ຖານ​ຕາມ​ລະ­ບຽບ​ກົດ­ໝາຍ, ບໍ່​ເອົາປຽບ ແລະ​ມີ​ນ້ຳ­ໃຈ​ບໍ­ລິ­ການ​ຮັບ​ໃຊ້​ປະ­ຊາ­ຊົນ​ຢ່າງ​ແທ້​ຈິງ​ເດັດ­ຂາດ ແລະ​ເຂັ້ມ​ງວດຕໍ່​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ນິ­ຕິ​ກຳ​ທີ່​ລັດຖະ​ບານ​ວາງ​ອອກ​ແລະ​ພວມ​ເປັນ​ບັນ­ຫາ ພົ້ນ​ເດັ່ນ​ເປັນ­ຕົ້ນ​ບັນ­ຫາ​ໄມ້, ແຮງ​ງານ, ບັນ­ຫາ​ຢາ​ເສບ​ຕິດ…; ສົ່ງ­ເສີມ​ການ​ປູກພືດ​ປອດ​ສານ­ພິດ​ໂດຍ​ໝູນ​ໃຊ້​ທ່າ­ແຮງທາງ​ທຳ​ມະ​ຊາດ​ເຂົ້າ​ໃນ​ການ​ຜະ­ລິດ (ບໍ່ໃຫ້​ນຳ​ໃຊ້​ສານ​ເຄ​ມີ) ທັງ​ນີ້ ກໍ່​ເພື່ອ​ເຮັດໃຫ້​ສິ່ງ­ແວ­ດລ້ອມ​ສະ­ອາດ​ປະ­ຊາ­ຊົນ​ມີ​ສຸ ຂະ​ພາບ​ແຂງ­ແຮງ​ແລະ​ກາຍ­ເປັນ​ຕົ້ນ​ທຶນ​ທີ່​ຍືນ​ຍາວ​ໃຫ້​ທຸກ​ຄົນ​ເປັນ​ເຈົ້າ​ການ​ຊ່ວຍເຈົ້າ​ໜ້າ­ທີ່​ຕ້ານ ແລະ​ສະ­ກັດ​ກັ້ນ​ປາ­ກົດການ​ຫຍໍ້­ທໍ້​ຕ່າງໆ​ທີ່​ເກີດ​ຂຶ້ນ​ໃນ​ຂອບ​ເຂດ​ເມືອງ​ຂອງ​ຕົນ​ໃຫ້​ນັບ​ມື້​ໝົດ​ໄປ​ເປັນ​ກ້າວໆ.

ພາຍ­ຫຼັງ​ການ​ໂອ້​ລົມ ທ່ານ​ນາ­ຍົກ​ລັດຖະ​ມົນ­ຕີ​ພ້ອມ​ຄະ­ນະ​ຍັງ​ໄດ້​ໄປ​ຢ້ຽມ­ຢາມ ໂຮງ­ໝໍ​ເມືອງ​ຊະ­ນະ​ຄາມ, ໂຮງ­ສີ​ໝາກເດືອຍ​ຢາງ​ຢ່າງກຸ່ມ​ຕົວ​ແບບ​ໃນ​ການ​ປຸງແຕ່ງ​ກ້ວຍ​ອົບ​ເນີຍ-ອົບ​ແດດ ກວານ​ໝາກຂາມ​ຫວານ ແລະ​ກ້າ​ເບ້ຍ​ໄມ້​ຂາຍ​ທີ່​ບ້ານປາກ​ມີ້​ຕື່ມ​ອີກ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.