ນາ­ຍົກ​ຊີ້​ແຈງ​ການ​ສຳ​ປະ­ທານທີ່​ດິນ ແລະ ​ຕົວ​ເລກ​ລັດ­ຖະ­ກອນ

ຜ່ານ​ການ​ລາຍ​ງານ​ຂອງ​ລັດ­ຖະ­ບານ​ໃນ​ມື້​ຜ່ານ​ມາ ເຮັດ​ໃຫ້​ບັນ­ດາ​ສະ­ມາ­ຊິກສະ­ພາ (ສສຊ) ມີ​ຄວາມ​ເປັນ​ຫ່ວງ ແລະ​ຕ້ອງ­ການ​ໃຫ້​ລັດ­ຖະ­ບານ​ຊີ້​ແຈງ​ວິ­ທີ​ແກ້​ໄຂ ແລະ​ມາດ​ຕະ​ການ­ຈັດ­ຕັ້ງ​ປະ­ຕິ­ບັດ​ຕໍ່​ກັບ​ບັນ­ຫາ​ທີ່​ເກີດ​ຂຶ້ນ ອັນ​ເປັນ​ປະ­ເດັນ​ທີ່​ຮ້ອນ​ແຮງ ໃນ​ສັງ­ຄົມ​ກໍ່​ຄື​ໃນ​ເຂດ​ທ້ອງ­ຖິ່ນ ໂດຍ​ສະ­ເພາະ​ແມ່ນ: ການ​ໃຫ້​ສຳ​ປະ­ທານ​ທີ່​ດິນ, ການຊົດ​ເຊີຍ​ຕໍ່​ຜູ້​ທີ່​ໄດ້​ຮັບ​ຜົນ​ກະ­ທົບ​ຈາກ​ບັນ­ດາ​ໂຄງ­ການ​ລົງ­ທຶນ ແລະ​ບັນ­ຫາ​ການ​ຈັດ​ສັນ​ຕົວ​ເລກ​ລັດ​ຖະກອນ​ຂອງ​ປະ­ເທດ​ເຮົາ​ຕໍ່​ປະ­ຊາ­ຊົນ​ໃຫ້ເຂົ້າ­ໃຈ.

ຕໍ່​ກັບ​ບັນ­ຫາ​ດັ່ງ­ກ່າວ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີແຫ່ງ ສປປ ລາວ ໄດ້​ຊີ້​ແຈງ​ຕໍ່​ທີ່​ປະ­ຊຸມ​ຂອງ​ສະ­ພາແຫ່ງ​ຊາດ​ໃນ​ວັນ​ທີ 27 ເມ­ສາ​ຜ່ານ​ມາວ່າ: ບັນ­ຫາ​ການ​ສຳ​ປະ­ທານ​ທີ່​ດິນ​ໃຫ້ ແກ່​ບໍ­ລິ­ສັດ​ລົງ­ທຶນ​ພາຍ​ໃນ ແລະ​ຕ່າງ​ປະເທດ​ທີ່​ລັດ­ຖະ­ບານ ຫຼື ແຂວງ​ໄດ້​ອະ­ນຸ­ມັດ ປະ­ຈຸ​ບັນ​ມີ​ຫຼາຍ​ບໍ­ລິ­ສັດ​ໄດ້​ຮັບ​ອະ­ນຸ­ຍາດ, ສຳ​ປະ­ທານ​ແຕ່​ບໍ່​ປະ­ຕິ­ບັດ​ຕາມ​ລະ­ບຽບ​ກົດ­ໝາຍ, ລະ­ບຽບ​ການ​ທີ່​ກ່ຽວ­ຂ້ອງ, ສັນ­ຍາ​ສຳ​ປະ­ທານ ແລະ​ອື່ນໆ ການ​ບຸກເບີກ​ເນື້ອ­ທີ່​ບໍ່​ໄດ້​ຮັບ​ອະ­ນຸ­ມັດ​ກໍ່​ມີ, ກວມເອົາ​ດິນ​ຂອງ​ປະ­ຊາ­ຊົນ, ການ​ພັດ­ທະ­ນາບໍ່​ໄປ​ຕາມ​ກຳ­ນົດ​ເວ­ລາ ແລະ​ເງື່ອນ­ໄຂ ຂອງ​ສັນ­ຍາ​ສຳ​ປະ­ທານ​ອື່ນໆ ບັນ­ຫາແບບ​ນີ້​ແມ່ນ​ມີ​ມາ​ແຕ່​ດົນ, ລັດ­ຖະ­ບານ​ຊຸດ ຜ່ານໆ​ມາ​ກໍ​ໄດ້​ພະ­ຍາ­ຍາມ​ແກ້​ໄຂ ແຕ່​ຍັງຫຼາຍ​ອັນ​ທີ່​ຈະ​ຕ້ອງ​ໄດ້​ສືບ­ຕໍ່​ແກ້, ສະ­ເພາະລັດ­ຖະ­ບານ​ຊຸດ​ນີ້​ໄດ້​ນຳ​ເອົາ​ບັນ­ຫາ​ທີ່ດີ​ຂຶ້ນ​ເພື່ອ​ສຶກ​ສາ​ຄົ້ນ­ຄວ້າ​ຫາ​ການ​ປະ­ຕິ­ບັດ​ກົດ­ໝາຍ​ທີ່​ດິນ​ຊອກ​ໃຫ້​ເຫັນ​ຈຸດ​ດີ, ຈຸດ​ອ່ອນ ແລະ​ຂໍ້​ບົກ​ຜ່ອງ ຊຶ່ງ​ເຫັນ​ວ່າ​ມີ ຫຼາຍ​ຂໍ້​ຈຸດ​ອ່ອນ, ບັນ­ຫາ​ທີ່​ຟົດ​ຮ້ອນ​ກໍ່​ຄື: ແຂວງ​ອະ­ນຸ­ຍາດ​ໃຫ້​ສຳ​ປະ­ທານ​ກາຍກຳ­ນົດ, ສ່ວນ​ນັກ­ທຸ­ລະ­ກິດ​ສຳ​ປະ­ທານທີ່​ດິນ​ໃນ​ບາງ​ໂຄງ­ການ ແຕ່​ບໍ່​ພັດ­ທະ­ນາຕາມ​ສັນ­ຍາ ແລະ​ບໍ່​ເຄົາ­ລົບ​ການ­ຈັດ­ຕັ້ງທ້ອງ­ຖິ່ນ ຊຶ່ງ​ຕໍ່​ໄປ​ນີ້​ໂຄງ­ການ​ສຳ​ປະທານ​ທີ່​ດິນ​ບໍ່​ວ່າ​ຈະ​ຢູ່​ໃນ​ຂັ້ນ​ໃດ​ກໍ່​ຕາມ ຕ້ອງ​ມີ​ການ­ຈັດ­ຕັ້ງ​ທ້ອງ­ຖິ່ນ​ເຂົ້າ​ຮ່ວມ​ນຳ ແລະ​ມອບ​ສິດ​ໃຫ້​ທ້ອງ­ຖິ່ນ​ມີ​ຄວາມ​ຮັບຜິດ​ຊອບ​ສູງ​ຕໍ່​ບັນ­ຫາ​ນີ້.

ທ່ານ​ກ່າວ​ຕື່ມ​ວ່າ: ສ່ວນ​ບັນ­ຫາ​ການທົດ​ແທນ​ຄ່າ​ເສຍ​ຫາຍ​ຕໍ່​ຜູ້​ທີ່​ໄດ້​ຮັບ​ຜົນ​ກະທົບ​ຈາກ​ໂຄງ­ການ​ຕ່າງໆທີ່​ລັດ­ຖະ­ບານອະ­ນຸ­ຍາດ​ແມ່ນ​ຫຼີກ​ລຽງ​ບໍ່​ໄດ້​ຄວາມຫຍຸ້ງ­ຍາກ​ໃນ​ການ​ຈ່າຍ​ຄ່າ​ຊົດ​ເຊີຍ​ເພາະບໍ່​ສາ­ມາດ​ປະ­ຕິ­ບັດ​ໃຫ້​ໄດ້​ຕາມ­ໃຈ​ປະຊາຊົນ​ທຸກ​ຄົນ ແຕ່​ຖ້າ​ຢາກ​ມີ​ການ​ພັດ­ທະ­ນາ ຕ້ອງ​ພ້ອມ​ເສຍ­ສະ­ຫຼະພັກ​ລັດ​ເອງ​ກໍ່​ໃຫ້ວາງ​ລະ­ບຽບ​ຫຼັກ­ການ, ວາງ​ນະ­ໂຍ­ບາຍໃຫ້​ຮັດ­ກຸມ, ຕ້ອງ​ໃຫ້​ທ້ອງ­ຖິ່ນ​ເປັນ​ເຈົ້າ ແລະ​ປະ­ຊາ­ຊົນ​ເຂົ້າ​ຮ່ວມ.

ສ່ວນ​ບັນ­ຫາ​ກ່ຽວ​ກັບ​ຕົວ​ເລກ​ພະ­ນັກ­ງານ​ລັດ­ຖະ­ກອນ ທ່ານ​ນາ­ຍົກ​ກ່າວ​ວ່າ: ສະ­ຖິ­ຕິ​ລັດ­ຖະ­ກອນ​ຂອງ​ລາວ ຖ້າ​ທຽບກັບ​ປະ­ເທດ​ອື່ນ​ແມ່ນ​ສູງ​ສົມ­ຄວນ, ຖ້າ​ແຕ່ລະ​ປີ​ເຮົາ​ໃຫ້​ໂກ​ຕາ​ລັດ­ຖະ­ກອນ​ຫຼາຍ ກວ່າ​ຈຳ­ນວນ​ລັດ­ຖະ­ກອນ​ທີ່​ອອກ​ໄປ​ຈະເພີ່ມ​ຂຶ້ນ​ທຸກໆ​ປີ ຈົນ​ບໍ່​ສາ­ມາດ​ຈັດ​ສັນເງິນ­ເດືອນ​ໃຫ້ ຫຼື ວ່າ​ລັດ­ຖະ­ກອນ​ຫຼາຍເກີນ​ຈາກ​ອັດ­ຕາ​ສ່ວນ​ຂອງ​ພົນ­ລະ­ເມືອງ ຫຼື ຂອງ​ວຽກ​ງານ​ຈະ​ກາຍ­ເປັນ​ການ​ເກື້ອກູນ​ກັນ​ຕະ­ຫຼອດ​ໄປ ແລະ​ຄົນ​ຈະ​ບໍ່​ເຂົ້າ​ສູ່ການ​ຜະ­ລິດ, ບໍ່​ເຂົ້າ​ສູ່​ພາກ​ຄຸນ​ນະ​ພາບ, ດັ່ງ­ນັ້ນ; ກະ­ຊວງ​ພາຍ​ໃນ​ຕ້ອງ​ຄົ້ນ­ຄວ້າ, ວິ­ໄຈ​ຢ່າງ​ມີ​ວິ­ທີ, ວິ­ທະ­ຍາ​ໃນ​ການ​ຈັດ​ສັນບຸກ​ຄະ­ລາ​ກອນ​ໃຫ້​ພໍ­ດີ​ກັບ​ຕຳ­ແໜ່ງ​ທີ່​ມີ​ຄວາມ​ຈຳ­ເປັນ, ສ້າງ​ກົນ​ໄກ​ຄຸ້ມ​ຄອງ ຫຼື ຈັດ​ສັນ​ລັດ­ຖະ­ກອນ​ເຂົ້າ​ເຮັດ​ວຽກ​ຕ້ອງບົນ​ພື້ນ­ຖານ​ວິ­ທະ­ຍາ­ສາດ​ຂອງ​ການ​ຄຸ້ມຄອງ-ການ​ປົກ­ຄອງ.

ຂ່່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.