ນາ­ຍົກ​ອອກ​ຄຳ​ສັ່ງ​ຂຶ້ນ​ບັນ­ຊີ​ເຕົ້າ­ໂຮມ​ຊັບ​ສິນ​ທີ່​ສານ​ຕັດ­ສິນຮິບ​ເປັນ​ຂອງ​ລັດ ຜູ້​ໃດ​ຍັກ​ຍອກ​ຖືກ​ລົງ­ໂທດ

ເພື່ອ​ເພີ່ມ​ທະ­ວີ​ການ​ກວດ­ກາ​ການ ຈັດ​ຕັ້ງ​ປະ­ຕິ­ບັດ​ກົດ­ໝາຍ, ລະ­ບຽບ​ການໃຫ້​ມີ​ຄວາມ​ສັກ­ສິດ​ແນ­ໃສ່​ໃນ​ການ​ຄຸ້ມຄອງ​ຊັບ​ສິນ​ປະ­ເພດ​ເງິນ, ຄຳ, ວັດ­ຖຸ​ມີ­ຄ່າອື່ນໆລວມ​ທັງ​ພາ­ຫະ­ນະ ແລະ​ອຸ­ປະ­ກອນຕ່າງໆ​ທີ່​ສານ​ຕັດ­ສິນ​ຮິບ​ເປັນ​ຂອງ​ລັດໃຫ້​ມາ​ຂຶ້ນ​ທະ­ບຽນ, ຂຶ້ນ​ບັນ­ຊີ​ຄຸ້ມ​ຄອງລວມ​ສູນ, ແບ່ງ­ປັນ​ນຳ​ໃຊ້ ແລະ​ຂາຍ​ຊັບສິນ​ດັ່ງ­ກ່າວ ເພື່ອ​ເອົາ​ເງິນ​ເຂົ້າ​ງົບ­ປະ­ມານຂອງ​ລັດ, ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ​ໄດ້​ອອກ​ຄຳ​ສັ່ງ ​ວ່າ​ດ້ວຍ​ການ​ຂຶ້ນບັນ­ຊີ​ເຕົ້າ­ໂຮມ​ຊັບ​ສິນ​ທີ່​ສານ​ຕັດ­ສິນ​ຮິບເປັນ​ຂອງ​ລັດ.

ຄຳ​ສັ່ງ ດັ່ງ­ກ່າວ ແມ່ນ​ສະ­ບັບ​ເລກ​ທີ 07/ນຍ ລົງ​ວັນ​ທີ 5 ເມ­ສາ 2017 ເຊັນໂດຍ​ທ່ານ ທອງ​ລຸນ ສີ​ສຸ​ລິດ ນາ­ຍົກ​ລັດຖະ​ມົນ­ຕີ ຊຶ່ງ​ມີ​ເນື້ອ​ໃນ​ໃຫ້​ອົງ​ການ­ຈັດ­ຕັ້ງປະ­ຕິ­ບັດ​ຄຳ​ຕັດ­ສິນ​ຂອງ​ສານ​ສົ່ງ​ບັນ­ຊີ ແລະ​ ຂໍ້​ມູນ​ທັງ​ໝົດ​ກ່ຽວ​ກັບ​ຊັບ​ສິນ​ທີ່​ຖືກຮິບ​ເປັນ​ຂອງ​ລັດ​ທີ່­ຢູ່​ໃນ​ຄວາມ​ຮັບ​ຜິດຊອບ​ຂອງ​ຕົນ​ໃຫ້​ຂະ­ແໜງ­ການ​ເງິນ ເພື່ອຂຶ້ນ​ບັນ­ຊີ ແລະ​ຈົດ​ທະ­ບຽນ​ເປັນ​ຊັບ​ສິນຂອງ​ລັດ​ໂດຍ​ປະ­ກອບ​ແບບ​ຟອມ​ຕາມ​ຂະ­ແໜງ­ການ​ເງິນ.

ການ​ແບ່ງ­ປັນ​ການ​ນຳ​ໃຊ້ ແລະ​ການຂາຍ​ອອກ​ຊັບ​ສິນ​ທີ່​ຮິບ​ໂຮມ​ມາ​ເປັນ​ຂອງລັດ​ໃຫ້​ປະ­ຕິ­ບັດ​ຄື: ຊັບ​ສິນ​ທີ່​ບໍ່​ມີ​ສ່ວນ​ພົວ­ພັນກັບ​ຢາ​ເສບ​ຕິດ​ເມື່ອ​ຂຶ້ນ​ທະ­ບຽນ ແລະ​ຈົດເຂົ້າ​ໃນ​ບັນ­ຊີ​ຊັບ​ສິນ​ຂອງ​ລັດ​ຢ່າງ​ຖືກ­ຕ້ອງແລ້ວ​ແມ່ນ​ມອບ​ໃຫ້​ຂະ­ແໜງ­ການ​ເງິນ​ແຕ່​ລະຂັ້ນ​ນຳ​ສະ­ເໜີ​ລາຍ​ງານ​ຂັ້ນ​ເທິງ​ຂອງ​ຕົນ​ເພື່ອຕົກ­ລົງ​ແບ່ງ­ປັນ​ການ​ນຳ​ໃຊ້ ຫຼື ຂາຍ​ຊັບ​ສິນ​ຂອງລັດ​ເພື່ອ​ມອບ​ເງິນ​ເຂົ້າ​ງົບ­ປະ­ມານ, ມອບ​ໃຫ້​ອົງການ­ຈັດ­ຕັ້ງ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ​ລາຍງານ ແລະ​ສະ­ໜອງ​ຂໍ້​ມູນ​ໃຫ້​ຂະ­ແໜງ­ການ​ເງິນ ພາຍ​ໃນ 7  ວັນ​ນັບ​ແຕ່​ມື້​ບັນ­ທຶກ​ການ­ຈັດ­ຕັ້ງ​ປະ­ຕິບັດ​ຄຳ​ຕັດ­ສິນ​ຂອງ​ສານ, ຊັບ​ສິນ​ທຸກ​ປະ­ເພດ​ລວມທັງ​ເງິນ​ທີ່​ພົວ­ພັນ​ກັບ​ຢາ​ເສບ​ຕິດ.

ເມື່ອ​ຂຶ້ນ​ທະ­ບຽນ ແລະ​ຂຶ້ນ​ບັນ­ຊີ​ຊັບ​ສິນຂອງ​ລັດ​ຖືກ­ຕ້ອງ​ແລ້ວ​ໃຫ້​ຂະ­ແໜງ­ການເງິນ​ນຳ​ສະ­ເໜີ​ລາຍ​ງານ​ຂັ້ນ​ເທິງ​ພິ​ຈາລະ​ນາ​ແບ່ງ­ປັນ​ການ​ຄຸ້ມ​ຄອງ, ນຳ​ໃຊ້ ແລະ​ຂາຍ​ອອກ, ເງິນ​ທີ່​ໄດ້​ຈາກ​ການ​ປະ ມູນ​ຂາຍ​ຊັບ​ສິນ​ດັ່ງ­ກ່າວ​ແມ່ນ​ໃຫ້​ມອບເຂົ້າ​ກອງ​ທຶນ​ຄວບ​ຄຸມ​ສະ­ກັດ​ກັ້ນ ແລະ ຕ້ານ​ຢາ​ເສບ​ຕິດ 70%, ສ່ວນ 30% ມອບເຂົ້າ​ງົບ­ປະ­ມານ​ຂອງ​ລັດ​ຕາມ​ມາດ­ຕາ 50 ຂອງ​ກົດ­ໝາຍ​ວ່າ​ດ້ວຍ​ຢາ​ເສບ​ຕິດ ແລະ​ມາດ­ຕາ 6 ຂອງ​ກອງ​ທຶນ​ຄວບຄຸມ​ສະ­ກັດ​ກັ້ນ ແລະ​ຕ້ານ​ຢາ​ເສບ​ຕິດ.

ນອກ​ນີ້​ໃຫ້​ຂະ­ແໜງ­ການ​ເງິນ​ແຕ່​ລະຂັ້ນ​ຂຶ້ນ​ບັນ­ຊີ ແລະ​ຈົດ​ທະ­ບຽນ​ຊັບ​ສິນ​ທຸກປະ­ເພດ​ຊັບ​ສິນ​ທີ່​ຖືກ­ຕ້ອງ​ຮິບ​ເປັນ​ຂອງ ລັດ​ເປັນ­ຕົ້ນ​ອະ­ສັງ­ຫາ­ລິ­ມະ​ຊັບ, ສັງ​ຫາ​ລິ ມະ​ຊັບ, ເງິນ, ທຶນ, ອຸ­ປະ­ກອນ  ແລະ​ວັດ­ຖຸມີຄ່າ​ທີ່​ບໍ່​ພົວ­ພັນ​ກັບ​ຄະ­ດີ​ຢາ​ເສບ​ຕິດ ພ້ອມທັງ​ລາຍ​ງານ​ໃຫ້​ອຳ­ນາດ​ການ​ປົກ­ຄອງທ້ອງ­ຖິ່ນ ແລະ​ລັດ­ຖະ­ບານ ເພື່ອ​ພິ​ຈາ­ລະນາ​ແບ່ງ­ປັນ​ການ​ນຳ​ໃຊ້ ຫຼື ຂາຍ​ຊັບ​ສິນຂອງ​ລັດ​ຕາມ​ຄວາມ​ເໝາະ​ສົມ ເພື່ອ​ມອບ ເງິນ​ເຂົ້າ​ງົບ­ປະ­ມານ​ຢ່າງ​ລວມ​ສູນ, ຖ້າ​ຊັບ​ສິນ​ທີ່​ຮິບ​ເປັນ​ເງິນ­ສົດ​ແມ່ນ​ໃຫ້​ມອບ​ເຂົ້າ​ງົບ­ປະ­ມານ​ໂດຍ​ກົງ ໂດຍ​ຜ່ານ​ການ ສັ່ງ​ມອບ​ຂອງ​ຂະ­ແໜງ­ການ​ເງິນ (ກົມ​ຄຸ້ມຄອງ​ຊັບ​ສິນ​ຂອງ​ລັດ, ຫ້ອງ­ການ​ຄຸ້ມຄອງ​ຊັບ​ສິນ​ຂອງ​ລັດປະ­ຈຳນະ­ຄອນຫຼວງ, ແຂວງ ແລະ​ໜ່ວຍ​ງານ​ຄຸ້ມ​ຄອງຊັບ​ສິນ​ຂອງ​ລັດ​ປະ­ຈຳ­ເມືອງ).

ຊຶ່ງ​ຊັບ​ສິນ​ປະ­ເພດ​ທີ່​ດິນ​ສິ່ງ​ກໍ່­ສ້າງໃຫ້​ຂຶ້ນ​ທະ­ບຽນ​ກ່ອນ​ແລ້ວ​ຈຶ່ງ​ນຳ​ສະ­ເໜີ ລາຍ​ງານ​ຂັ້ນ​ເທິງ​ພິ­ຈາ­ລະ­ນາ​ກ່ຽວ​ກັບ ການ​ໃຫ້​ເຊົ່າ, ສຳ​ປະ­ທານ ເພື່ອ​ເກັບ​ລາຍຮັບ​ເຂົ້າ​ງົບ­ປະ­ມານ ຫຼື ນຳ​ໃຊ້​ເຂົ້າ​ໃນ ວຽກ​ງານ​ລວມ​ຂອງ​ລັດ, ຊັບ​ສິນ​ໃນ​ປະ ເພດ​ນີ້​ບໍ່​ອະ­ນຸ­ຍາດ​ໃຫ້​ມອບ​ສິດ​ນຳ​ໃຊ້​ໃຫ້​ແກ່​ບຸກ­ຄົນ​ເດັດ­ຂາດ, ຖ້າ​ບໍ່​ໄດ້​ຮັບ​ການເຫັນ​ດີ​ຈາກ​ລັດ­ຖະ­ບານ, ປະ­ເພດ​ພາ­ຫະນະ, ກົນ​ຈັກ, ວັດ­ຖຸ​ອຸ­ປະ­ກອນ​ທີ່​ສາ­ມາດ ນຳ​ໃຊ້​ໄດ້​ໃຫ້​ຄົ້ນ­ຄວ້າ​ພິ­ຈາ­ລະ­ນາ​ແບ່ງ ໃຫ້​ຂະ­ແໜງ­ການ​ທີ່​ຂາດ­ເຂີນ ແລະ​ມີຄວາມ​ຈຳ­ເປັນ​ກ່ອນ ແຕ່​ໃຫ້​ຕັດ​ງົບ​ປະມານ​ຮ່ວງ​ຊື້​ໃໝ່​ຂອງ​ຂະ­ແໜງ­ການ​ນັ້ນ ລົງ, ສຳ­ລັບ​ປະ­ເພດ​ວັດ­ຖຸ​ອຸ­ປະ­ກອນ​ທີ່​ຕິດ ພັນ​ກັບ​ການ​ນຳ​ໃຊ້​ວຽກ​ງານ​ວິ­ຊາ​ການ ໂດຍ ກົງ ເປັນ­ຕົ້ນ​ເຄື່ອງ­ມື​ທາງ​ການ​ແພດ, ອາ­ວຸດ​ເສີກ ແລະ​ສານ​ເຄ​ມີ ຊຶ່ງ​ບໍ່​ສາ­ມາດ ແບ່ງ­ປັນ​ໃຫ້​ຂະ­ແໜງ­ການ​ອື່ນ​ນຳ​ໃຊ້​ໄດ້ ແມ່ນ​ຕ້ອງ​ມອບ​ເຂົ້າ​ຂະ­ແໜງ­ການ​ກ່ຽວ ຂ້ອງ​ຄຸ້ມ​ຄອງ ແລະ​ນຳ​ໃຊ້​ຕໍ່​ໄປ​ສ່ວນ​ປະ ເພດ​ວັດ­ຖຸ​ມີ­ຄ່າ​ໃຫ້​ຈັດ​ຕັ້ງ​ດຳ­ເນີນ​ການຕີ​ລາ­ຄາ​ມູນ​ຄ່າ​ຊັບ​ສິນ​ດັ່ງ­ກ່າວ​ແລ້ວ​ເປີດ​ການ​ປະ­ມູນ​ຂາຍ​ເພື່ອ​ມອບ​ເງິນ​ເຂົ້າ​ງົບປະ­ມານ​ທັງ​ໝົດ.

ທັງ​ນີ້​ບຸກ­ຄົນ, ນິ­ຕິ­ບຸກ­ຄົນ ແລະ​ການ­ຈັດ­ຕັ້ງ​ຫາກ​ໄດ້​ຍັກ​ຍອກ​ເອົາ​ເງິນ​ຄ່າ​ປັບ​ໃໝ ແລະ​ຊັບ​ສິນ​ທີ່ສານ​ຮິບ​ເປັນ​ຂອງ​ລັດ ໄປ​ຄຸ້ມ​ຄອງ ແລະ​ນຳ​ໃຊ້ ໂດຍ​ບໍ່​ໄດ້​ຮັບ​ອະ­ນຸ­ຍາດ​ຢ່າງ​ຖືກ­ຕ້ອງ​ຕາມ​ທີ່​ໄດ້​ລະ­ບຸ  ໄວ້​ໃນ​ຄຳ​ສັ່ງ​ສະ­ບັບ​ນີ້​ຈະ​ໄດ້​ເກັບ​ຄືນ, ຖ້າຫາກ​ຊັບ​ສິນ​ດັ່ງ­ກ່າວ​ຫາກ​ມີ​ການ​ນຳ​ໃຊ້ ເຂົ້າ​ໃນ​ການ​ກະ­ທຳ​ຜິດ ຫຼື ໄດ້​ຮັບ​ຄວາມເສຍ​ຫາຍ​ຜູ້­ກ່ຽວ​ຕ້ອງ​ໄດ້​ຮັບ­ຜິດ­ຊອບ​ສ້ອມ­ແປງ, ໃຊ້​ແທນ​ຄ່າ​ເສຍ​ຫາຍ​ຄືນ​ໃຫ້​ລັດ ຫຼື ປັບ​ໃໝ ແລະ​ລົງ­ໂທດ​ຕາມ​ລະ­ບຽບກົດ­ໝາຍ.

ໂດຍ: ສະ­ເຫຼີມ​ໄຊ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.