ນາຍົກໂອ້ລົມຫລາຍບັນຫາຕໍ່ກອງປະຊຸມຫລວງ ສຄອ

ກອງ​ປະ­ຊຸມ​ຫຼວງ​ສະ­ພາ​ການ​ຄ້າ ແລະ​ອຸດ­ສາ­ຫະ­ກຳ (ສຄອ) ແຫ່ງ​ຊາດ​ລາວ​ຄັ້ງ​ທີ VII ໄດ້​ເປີດ​ຂຶ້ນ​ໃນ​ວັນ​ທີ 9 ທັນ­ວາ 2016 ທີ່​ຫໍ​ປະ­ຊຸມ​ແຫ່ງ​ຊາດ​ນະ­ຄອນ­ຫຼວງ​ວຽງ​ຈັນ, ໂດຍ​ການ​ເປັນ​ປະ­ທານ​ຮ່ວມ ຂອງ​ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ​ການ​ຄ້າ, ທ່ານ ອຸ​ເດດ ສຸ­ວັນ­ນະ​ວົງ ປະ­ທານ ສຄອ ແຫ່ງ​ຊາດ​ລາວ ແລະ​ທ່ານ ກິດ­ສະ­ໜາ ວົງ​ໄຊ ປະ­ທານ​ກິດ​ຕິ​ມະ​ສັກ ສຄອ ແຫ່ງ​ຊາດ​ລາວ, ມີ​ຜູ້­ຕາງ­ໜ້າ​ຈາກ​ພາກ​ລັດ ແລະ​ພາກ​ທຸ­ລະ​ກິດ​ເຂົ້າ​ຮ່ວມ​ຫຼາຍ​ກວ່າ 400 ທ່ານ.

ຈຸດ­ປະ­ສົງ​ຂອງ​ກອງ​ປະ­ຊຸມ​ຄັ້ງ​ນີ້​ແມ່ນ ເພື່ອ​ສະ­ຫຼຸບ​ຜົນ­ງານ​ການ­ເຄື່ອນ­ໄຫວ​ວຽກ​ງານ ສຄອ ແຫ່ງ​ຊາດ​ລາວ ແຕ່​ປີ 2013-2010 ສະ­ຫຼຸບ​ວຽກ​ງານ​ການ​ເງິນ, ວາງ​ທິດ ທາງ​ແຜນ­ການ­ເຄື່ອນ­ໄຫວ ສຄອ ຕໍ່­ໜ້າ 2017-2019, ປ່ອນ​ບັດ​ເລືອກ​ຕັ້ງ​ຄະ­ນະ​ບໍ­ລິ­ການ​ງານ​ຊຸດ​ທີ VII ແລະ​ຄະ­ນະ​ບໍ­ລິ­ຫານ​ງານ​ຊຸດ​ໃໝ່ ນອກ​ນີ້​ກອງ​ປະ­ຊຸມ​ໄດ້​ຮັບ­ຮອງ​ເອົາ​ແຜນ ການ​ຂອງ​ປີ (2017-2019) ເພື່ອ​ສ້າງ​ຄວາມ​ເຂັ້ມ­ແຂງ​ໃຫ້​ພາກ​ທຸ​ຸ​ລະ​ກິດ​ລາວ ໂດຍ​ເນັ້ນ​ໃສ່ 8 ຈຸດ​ສຸມ​ໃຫຍ່.

ໂອ­ກາດ​ນີ້ ຍັງ​ໄດ້​ມີ​ການ​ປ່ອນ​ບັດ​ເລືອກ​ຕັ້ງ​ເອົາ​ຄະ­ນະ​ບໍ­ລິ­ຫານ​ງານ​ຊຸດ​ໃໝ່ (ຊຸດ​ທີ VII) ທີ່​ຈະ​ບໍ­ລິ­ຫານ ສຄອ ແຫ່ງ​ຊາດ​ລາວ​ໄລ­ຍະ 3 ປີ ແຕ່​ປີ 2017-2019 ຊຶ່ງ​ທ່ານ ອຸ​ເດດ ສຸ­ວັນ­ນະ​ວົງ ເປັນ​ປະ­ທານ​ອີກ​ໜຶ່ງ​ສະ­ໄໝ, ເລືອກ​ເອົາ​ທ່ານ ດາວ​ວອນ ພະ­ຈັນ​ທະ​ວົງ ເປັນ​ຮອງ​ປະ­ທານ​ຜູ້​ປະ­ຈຳ­ການ ແລະ​ນາຍ​ຄັງ ສຄອ ແລະ​ເລືອກ​ເອົາ​ອີກ 5 ທ່ານ​ເປັນ​ຮອງ​ປະ­ທານ.

ໂອ­ກາດ​ດຽວ​ກັນ​ນີ້ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ ກໍ​ໄດ້​ໃຫ້​ກຽດ​ເຂົ້າ​ຮ່ວມ ແລະ​ໄດ້​ໂອ້​ລົມ​ຕໍ່​ກອງ​ປະ­ຊຸມ​ດັ່ງ­ກ່າວ ໂດຍ​ທ່ານ​ໄດ້ ສະ­ເໜີ​ໃຫ້ ສຄອ ກໍ​ຄື ຄັນ​ພາກ​ທຸ­ລະ​ກິດ​ເອົາ­ໃຈ­ໃສ່​ຫຼາຍ​ບັນ­ຫາ​ສຳ­ຄັນ​ເປັນ­ຕົ້ນ: ກຳ​ແໜ້ນ​ແນວ­ທາງ​ນະ­ໂຍ­ບາຍ, ລະ­ບຽບ​ກົດ­ໝາຍ ແລະ​ເຄື່ອນ​ໄຫວ​ທຸ­ລະ​ກິດ​ໃຫ້​ຖືກ­ຕ້ອງ ແລະ​ສອດ­ຄ່ອງ​ກັບ​ແນວ­ທາງ​ນະ­ໂຍ­ບາຍ ແລະ​ລະ­ບຽບ​ກົດ­ໝາຍ​ດັ່ງ­ກ່າວ, ປະ­ກອບ­ສ່ວນ​ຄຳ​ຄິດ​ຄຳ​ເຫັນ​ໃນ​ການ​ປັບ­ປຸງ ແລະ​ສ້າງ​ໃໝ່​ບັນ­ດາ​ກົດ­ໝາຍ ແລະ​ນິ­ຕິ​ກຳ​ທີ່​ພົວ­ພັນ​ກັບ​ການ­ເຄື່ອນ­ໄຫວ​ທຸ­ລະ​ກິດ​ເພື່ອ​ໃຫ້​ແທດ­ເໝາະ​ກັບ​ຕົວ​ຈິງ, ເປັນ​ກົງ­ຈັກ​ຊ່ວຍ​ລັດ­ຖະ­ບານ​ໃນ​ການ​ຕິດ­ຕາມ​ຊຸກ­ຍູ້, ອຳ­ນວຍ​ຄວາມ​ສະ­ດວກ, ປະ­ສານ​ງານ ແລະ​ຊ່ວຍ­ເຫຼືອ​ພາກ​ທຸ­ລະ​ກິດ​ກໍ​ຄື​ບັນ­ດາ​ສະ­ມາ­ຄົມ​ທຸ­ລະ​ກິດ ແລະ​ສະ­ມາ­ຊິກ ສຄອ ໃນ​ການ­ເຄື່ອນ­ໄຫວ​ດຳ­ເນີນ​ທຸ­ລະ​ກິດ​ໃຫ້​ມີ​ປະ​ສິດ­ທິ​ຜົນ, ບຸກ​ທະ­ລຸ​ພັດ­ທະ­ນາ ແລະ​ຍົກ​ລະ­ດັບ​ຕົນ​ເອງ​ຢ່າງ­ຮອບ­ດ້ານ, ມີ​ຄວາມ​ສາ­ມັກ­ຄີ, ມີ​ການ​ແລກ­ປ່ຽນ​ບົດ­ຮຽນ​ຄວາມ​ຮູ້ ແລະ​ປະ­ສົບ​ການ, ມີ​ການ​ຮ່ວມ​ມື ແລະ​ຊ່ວຍ­ເຫຼືອ​ເຊິ່ງ​ກັນ ແລະ​ກັນ, ມີ​ການ​ຍ້ອງ­ຍໍ​ຊົມ­ເຊີຍ​ບຸກ­ຄົນ ແລະ​ຫົວ­ໜ່ວຍ​ທຸ­ລະ​ກິດ​ທີ່​ມີ​ຜົນ­ງານ ແລະ​ປະ­ກອບ­ສ່ວນ​ສຳ­ຄັນ​ຕໍ່​ສັງ­ຄົມ ເພື່ອ​ສ້າງ​ຕົວ​ແບບ ຜູ້​ປະ­ກອບ​ການ ຫຼື ນັກ­ທຸ­ລະ­ກິດ​ທີ່​ດີ​ໃຫ້​ສັງ­ຄົມ.

ທີ່ມາ: ເສດຖະກິດ-ສັງຄົມ

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.