ນາ​ດາລບໍ່​ມີລາຍ​ຊື່​ເດ​ວິສຄັບ​ແອັດ​ສະ​ປາຍ

ທີ​ມ​ເທັນ​ນິສ​ເດ​ວິສ ຄັບ​ແອັດ​ສະ​ປາຍ​ຕ້ອງ​ຕົກ​ຕະລຶງ​ຫຼັງ​ບໍ່​ໃສ່​ຊື່ ຣາ​ຟາ​ເອລ ນາ​ດາລ ​ເອົາ​ໄວ້​ໃນ​ທີ​ມຊຸດ​ກຽມ​ລົງ​​ແຂ່ງກັບ​ເຊີ​ເບຍຮອບ​ກ່ອນ​ຮອງ​ຊະນະ​​ເລີດອາທິດ​ໜ້າ.

ຄອນ​ຊິ​ຕາ ມາຕິ​ເນ​ຊ ຫົວໜ້າ​ທີ​ມ​ເທັນ​ນິສ​ເດ​ວິສ ຄັບ​ແອັດ​ສະ​ປາຍ ​ເປີດ​ເຜີຍ​ລາຍ​ຊື່​ນັກ​ກີລາ​ເທັນ​ນິສ​ແອັດ​ສະ​ປາຍ​ຊຸດ​ທີ່​ລົງ​ແຂ່ງ​ກັບ​ເຊີ​ເບຍ ​ໃນ​ຮອບ​ກ່ອນ​ຮອງ​ຊະນະ​ເລີດ ກຸ່ມ​ເວິລກຣຸບ ທີ່​ເບ​ລ​ເກຣດ ​ໃນ​ອາທິດ​ໜ້າ​ອອກ​ມາ​ຮຽບຮ້ອຍ​ແລ້ວ ປາກົດ​ວ່າ ບໍ່​ມີ​ລາຍ​ຊື່​ຂອງຣາຟາ​ເອລ ນາ​ດາລ ອະດີ​ນັກ​ເທັນ​ນິສມື 1 ຂອງ​ໂລກ.

ມາຕິ​ເນ​ຊ ບໍ່​ໄດ້​ເປີ​ດ​ເຜີຍ​ເຫດຜົນ​ທີ່​ເຮັດ​ໃຫ້​ນາ​ດາລບໍ່​ໄດ້​ຢູ່​ໃນ​ທີ​ມຊຸດ​ນີ້​ແຕ່​ຢ່າງ​ໃດ ​ໂດຍ​ນອກຈາກ ຣາຟາ ​ແລ້ວ ​ແອັດ​ສະ​ປາຍ​ກໍ​ຍັງ​ບໍ່​ມີ ​ໂຣ​ເບ​ໂຕ ​ເບາ​ຕິ​ສຕາ ອາ​ກຸດ ນັກ​ເທັນ​ນິສມື 18 ຂອງ​ໂລກ​ເຊັ່ນ​ກັນ​ເຮັດ​ໃຫ້ ປາ​ໂບລ ​ກາ​ເຣ​ໂນ ບຸ​ສຕາ ນັກ​ເທັນ​ນິສມື 19 ຂອງ​ໂລກ​ກາຍ​ເປັນ​ມື​ວາງ​ສູງ​ສຸດ​ທີ່​ເຫຼືອ​ຢູ່​ໃນ​ທີ​ມ ຂະນະ​ທີ່​ສະມາຊິກ​ອີກ 3 ຄົນ​ທີ່​ເຫຼືອ​ເປັນ ອັລ​ເບີ​ດ ຣາມອສ-ບິ​ໂນ​ລາສ, ມາ​ເຊ​ລ ກຣາ​ໂນ​ເຢສ ​ແລະ ມາກ ​ໂລ​ເປ​ຊ.

ທັງ​ນີ້ ​ແອັດ​ສະ​ປາຍ ຈະ​ລົງ​​ແຂ່ງ​ພົບ​ກັບ​ເຊີ​ເບຍ​ເທິງ​ພື້ນ​ຮາດ​ຄອສລະຫວ່າງ​ວັນ​ທີ 7-9 ​ເມສາ​ນີ້ ​ໂດຍ​ຫາ​ເອົາ​ຊະນະ​ໄດ້​ສຳ​ເລັດ​ພວກ​ເຂົາ​ກໍ​ຈະຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຊະນະ​ເລີດ​ໄດ້​ເປັນ​ຄັ້ງ​ທຳ​ອິດ​ນັບ​ຕັ້ງ​ແຕ່​ປີ 2012 ​ເປັນ​ຕົ້ນ​ມາ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.