ນ້ຳຕົກຕາດນ້ຳດີ

ເມືອງຫຼວງນໍ້າທາເປັນ ເມືອງທີ່ອຸດົມສົມບູນໄປດ້ວຍປູລິຍະນິສະຖານ, ວັດຖຸບູຮານອັນເກົ່າແກ່, ຮ່ອງຮອຍທາງດ້ານປະຫວັດສາດ ແລະວັດທະນະທຳການນັບຖືຮີດຄອງປະເພນີທີ່ໄດ້ສະແດງໃຫ້ເຫັນເຖິງປະຫວັດຄວາມເປັນມາຂອງເມືອງຫຼວງນໍ້າທາເຮັດໃຫ້ນັກທ່ອງທ່ຽວທັງພາຍໃນ ແລະຕ່າງປະເທດມີຄວາມສົນໃຈ ແລະເຂົ້າມາທ່ຽວຊົມເພື່ອສຶກສາຫາຄວາມຮູ້ທາງດ້ານປະຫວັດສາດ ແລະວັດທະນະທຳ.

ນອກຈາກນີ້ແລ້ວ, ເມືອງຫຼວງນໍ້າທາຍັງໄດ້ມີຕາດ ແລະຖໍ້າຢູ່ຫຼາຍແຫ່ງທີ່ມີຄວາມສຳຄັນ ແລະໜ້າສົນໃຈຫຼາຍເໝາະສົມໃຫ້ແກ່ການ ທ່ອງທ່ຽວ, ນັ້ນກໍຄືນໍ້າຕົກຕາດນໍ້າດີທີ່ເປັນແຫຼ່ງທ່ອງທ່ຽວແຫ່ງໜຶ່ງທີ່ມີຊື່ສຽງຂອງແຂວງຫຼວງນໍ້າທາ.

ນໍ້າຕົກຕາດນ້ຳດີຕັ້ງຢູ່ເຂດບ້ານນາດີຫ່າງຈາກຕົວເມືອງຫຼວງນໍ້າທາໄປປະມານ 7 ກິໂລແມັດ, ເປັນສະຖານທີ່ທ່ອງທ່ຽວທີ່ມີຊື່ສຽງ ແຫ່ງໜຶ່ງຂອງແຂວງຫຼວງນໍ້າທາ ໂດຍຖືກຄົ້ນພົບໃນປີ ຄສ 1995 ແລະມາຮອດໄລຍະໜຶ່ງກໍໄດ້ມີການ ພັດທະນາຕື່ມອີກເພື່ອອຳນວຍຄວາມສະດວກໃຫ້ແຂກຕ່າງດ້າວທ້າວຕ່າງແດນສາມາດເຂົ້າໄປທ່ຽວຊົມໄດ້ເປັນຕົ້ນແມ່ນໄດ້ສ້າງເສັ້ນທາງເຂົ້າຕາດ, ສ້າງສາລາພັກຜ່ອນ, ຫ້ອງນໍ້າ, ລານຖ່າຍຮູບ ແລະຮ້ານຈຳໜ່າຍຜະລິດຕະພັນຫັດຖະກຳຂອງຊາວບ້ານທີ່ມີຫຼາກຫຼາຍຊະນິດ.

ນໍ້າຕົກຕາດນໍ້າດີເປັນແຫຼ່ງນໍ້າທຳມະຊາດທີ່ໄຫຼລົງມາຈາກໜ່ວຍພູທີ່ສູງຊັນ, ເປັນນໍ້າທີ່ໄສສະອາດເຢັນດີຍາມໄດ້ລົງໄປນັ່ງອາບ ແລະ ຫຼິ້ນນໍ້າຢູ່ບໍລິເວນໃຕ້ກ້ອງນໍ້າຕົກຕາດອັນແສນສວຍງາມເຫຼືອເກີນ, ຍິນສຽງນໍ້າໄຫຼຕົກລົງຈາກເນີນພູສຽງດັງທາດໆປະສານກັບສຽງນົກຮ້ອງກ້ອງກັງວານຢູ່ຕາມຕີນພູເລາະລຽບປ່າດົງຫຼວງທີ່ຂຽວງາມອຸ່ມທຸ່ມໜ້າອອນຊອນແທ້ໆຍາມແລງເຫັນແສງພະອາທິດໄກ້ຈະລັບຂອບຟ້າພາໃຫ້ຈິດໃຈເພີດເພີນໄປກັບທີວທັດທຳມະຊາດທີ່ມີອາກາດປອດປົ່ງສົ່ງກິ່ນຫອມຫວນຂອງດອກເຜິ້ງຈາກສາຍລົມເຢັນພັດນໍາມາສົມກັບຄໍາຊ່າລືແທ້ໆວ່ານໍ້າຕົກຕາດນໍ້າດີເປັນແຫຼ່ງທ່ອງທ່ຽວແບບທຳມະຊາດທີ່ແສນສວຍງາມອີກແຫ່ງໜຶ່ງທີ່ຂຶ້ນກັບເມືອງຫຼວງນໍ້າທາ.

ຖ້າຫາກທ່ານໄດ້ໄປແຂວງຫຼວງນໍ້າທາຢ່າລືມໄປທ່ຽວຊົມນໍ້າຕົກຕາດນໍ້າດີເພື່ອຈະໄດ້ສໍາຜັດກັບແຫຼ່ງນໍ້າທໍາມະຊາດທີ່ຕົກລົງຈາກພູຜາສູງຊັນອັນແສນສວຍງາມທີ່ເປັນນໍ້າສົດໄສໄຫຼເຢັນ ນອກຈາກນັ້ນ, ທ່ານສາມາດເລາະລຽບ ແລະທ່ຽວຊົມທຸກຂອບເຂດບໍລິເວນນໍ້າຕົກຕາດພ້ອມທັງມີຮ້ານອາຫານຄອຍຮັບໃຊ້ບໍລິການທ່ານ ໂດຍມີສາລາພັກໃຈໄວ້ໃຫ້ທ່ານໃນຍາມພັກຜ່ອນຢ່ອນໃຈ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.