ນ້ຳ​ດື່ມ​ໄອ​ເດັຍ​ລີ ​ຜະ­ລິດນ້ຳ­ຫວານ​ກິ່ນ​ໜາກ​ໄມ້ ເຈາະ​ຕະ­ຫຼາດ​ເຄື່ອງ​ດື່ມ

ໂຮງ­ງານນ້ຳດື່ມໄອເດັຍລີ ລານທຽນທີ່ເນັ້ນຮູບແບບຊື້ງ່າຍຂາຍງ່າຍກຳ­ໄລງາມ ເປີດໄອເດັຍສ້າງ­ສັນຜະ­ລິດນ້ຳ­ຫວານກິ່ນໝາກໄມ້ຕຸກຂະ­ໜາດ 200 ML ຈຳ­ນວນ 5 ລົດຊາດ ໃນລາ­ຄາພັນກີບຕໍ່ຕຸກ ເຈາະຕະ­ຫຼາດເຄື່ອງດື່ມ, ທັງນີ້ ກໍເພື່ອຕອບສະ­ໜອງຄວາມຮຽກ­ຮ້ອງຕ້ອງ­ການຂອງຜູ້ບໍ­ລິ­ໂພກດ້ານເຄື່ອງດື່ມ ໂດຍສະ­ເພາະເດັກ­ນ້ອຍ.

ທ່ານ ສັນ­ຕິໄຊ  ສະນິດນາ ຜູ້ຈັດ­ການທົ່ວໄປ ໂຮງງານນ້ຳດື່ມໄອເດັຍລີ ລານທຽນ ໃຫ້ສຳ­ພາດຫວ່າງ ບໍ່ດົນມານີ້ຮູ້ວ່າ: ໂຮງ­ງານນ້ຳດື່ມ ໄອເດັຍລີ ສ້າງ­ຕັ້ງຂຶ້ນຢູ່ບ້ານໄຜ່ລ້ອມ ເມືອງໄຊທາ­ນີ ນະ­ຄອນ­ຫຼວງ ວຽງຈັນໃນວັນທີ 1 ສິງ­ຫາ 2007 ມາຮອດປະ­ຈຸບັນມີອາ­ຍຸໄດ້ 10 ປີ, ໂດຍ ເປັນການລົງ­ທຶນຮ່ວມກັນລະ­ຫວ່າງນັກທຸ­ລະກິດລາວ ແລະນັກ­ທຸ­ລະ­ກິດຈີນ ໃນຮູບແບບການລົງ­ທຶນວິສາຫະກິດ (ໂດຍນັກ­ທຸ­ລະ­ກິດລາວ ຖືຮຸ້ນ 30% ແລະນັກທຸ­ລະກິດຈີນ ຖືຮຸ້ນ 70%) ຊຶ່ງໄດ້ຕໍ່ຍອດເອົານ້ຳທຳມະດາທີ່ຄຸນນະພາບດີມາແປຮູບເປັນນ້ຳດື່ມທີ່ສະ­ອາດ, ຖືກ­ຕ້ອງຕາມຫຼັກສຸຂະອະ­ນາ­ໄມ ແລະຜ່ານການຮັບ­ຮອງຈາກກົມອາ­ຫານ ແລະຢາ (ອຢ).

ຜ່ານການ­ຈຳ­ໜ່າຍໃນໄລ­ຍະຜ່ານມາ ເຫັນວ່າ ນ້ຳດື່ມໄອເດັຍລີ ແມ່ນໄດ້ຮັບ ຄວາມສົນ­ໃຈຈາກບັນ­ດາລູກຄ້າຫຼາຍພໍສົມ­ຄວນ, ໂດຍສະ­ເພາະແມ່ນລະ­ດູຮ້ອນ ຄວາມຕ້ອງ­ການຂອງຕະ­ຫຼາດແມ່ນມີ ຈຳ­ນວນເພີ່ມຂຶ້ນເກືອບເທົ່າຕົວ ໃນໄລ­ຍະ ດັ່ງ­ກ່າວພວກເຮົາກໍ່ໄດ້ເລັ່ງຜະ­ລິດທັງເວັນ  ແລະຄືນແຕ່ກໍຍັງບໍ່ພຽງ­ພໍກັບຄວາມຕ້ອງ­ການຂອງຜູ້ບໍ­ລິ­ໂພກ, ເພາະກຳ­ລັງ ການຜະ­ລິດ ພວກເຮົາໃນມື້­ໜຶ່ງແມ່ນໄດ້ພຽງ 1 ພັນແກັດເທົ່ານັ້ນ, ຢ່າງ­ໃດກໍຕາມ ໂຮງ­ງານພວກເຮົາມີແຜນຈະຂະ­ຫຍາຍ ເຄື່ອງຈັກໃນການເພີ່ມກຳ­ລັງການຜະ­ລິດ ຂຶ້ນຕື່ມເພື່ອໃຫ້ຖ່ວງທັນກັບຄວາມຕ້ອງ ການຂອງຕະ­ຫຼາດ ແລະສິ່ງທີ່ເປັນຈຸດເດັ່ນຂອງຜະ­ລິດຕະພັນນ້ຳດື່ມຂອງໂຮງງານເຮົາແມ່ນມີຫຼາຍຂະ­ໜາດແຕກຕ່າງກັນຄື: ຂະ­ໜາດ 20 ລິດ, ຂະ­ໜາດ 1.500 ມິລີລິດ, ຂະ­ໜາດ 600 ມິລີ ລິດ, ຂະ­ໜາດ 350 ມິລີລິດ ແລະ 250 ມິລີລິດ ອັນເປັນທາງເລືອກທີ່ຫຼາກຫຼາຍແກ່ກຸ່ມລູກຄ້າ.

ທ່ານ  ສັນ­ຕິໄຊ  ສະນິດນາ ໃຫ້ຮູ້ອີກວ່າ: ເພື່ອເປັນການຮັບມື ແລະຫັນ­ປ່ຽນກົນ­ລະ­ຍຸດດ້ານການຕະ­ຫຼາດໃນຍຸກເຊື່ອມໂຍງນີ້ ປະ­ຈຸບັນທາງໂຮງ­ງານນ້ຳດື່ມພວກເຮົາໄດ້ເປີດແນວຄວາມຄິດຜະ­ລິດນ້ຳ­ຫວານກິ່ນໝາກໄມ້ອອກມາຈຳ­ໜ່າຍຕື່ມອີກໃນລະ­ຫວ່າງເດືອນເມ­ສາ 2016 ເປັນ­ຕົ້ນມາ ໂດຍມີທັງໝົດ 5 ລົດຊາດ ຫຼື 5 ສີດ້ວຍກັນຄື: ລົດຊາດໝາກ­ກ້ຽງ, ໝາກແຄນຕະລູບ, ໝາກນັດ, ໝາກອາງຸ່ນ ແລະລົດຊາດໝາກສະຕໍເບີຣີ, ໃນປະ­ລິ­ມານດຽວກັນກໍຄື 200 ມິລີລິດ (ML) ໃນລາ­ຄາ 1.000 ກີບຕໍ່ຕຸກ, ເພື່ອ ຫວັງບຸກຕະ­ຫຼາດເຄື່ອງດື່ມໃນ ສປປ ລາວ ໂດຍອີງ­ໃສ່ທ່າ­ແຮງທີ່ໄດ້ປຽບຄື ເນັ້ນທີ່ລາ­ຄາຖືກ ແລະຄຸນນະພາບດີ.

ຈຸດສຳ­ຄັນຄືທາງໂຮງ­ງານພວກເຮົາ ສາ­ມາດຜະ­ລິດກະ­ຕຸກເອງ, ໂດຍເອົາວັດ ຖຸດິບເມັດຢ່າງແລ້ວນຳມາຫຼອມເປັນຫຼອດຫຼັງຈາກນັ້ນ­ແລ້ວຄ່ອຍເປົ່າເປັນຕຸກ, ໃນການຜະ­ລິດນ້ຳ­ຫວານນັ້ນແມ່ນໄດ້ນຳເອົານ້ຳດື່ມມາຕໍ່ຍອດໃນການປະ­ສົມ, ຊຶ່ງສ່ວນປະ­ສົມໂດຍປະ­ມານປະ­ກອບມີ: ຫົວເຊື້ອເຂັ້ມຄົ້ນຂອງນ້ຳ­ໝາກໄມ້ເພື່ອຈະໃຫ້ມັນເປັນນ້ຳ­ຫວານປະ­ມານ 25% ຕໍ່ຕຸກ, ນ້ຳ­ຕານ 10%, ກົດໝາກໜາວ 0,03%, ກົດອາເມລິກ 0,01%, ໃສ່ສີສັງເຄາະ, ແຕ່ງກິ່ນສັງເຄາະ ແລະໃຊ້ສານກັນບູດ, ຂະ­ນະທີ່ອາ­ຍຸໃນການເກັບມ້ຽນແມ່ນມີ ໄລ­ຍະ 1 ປີ ຕາມທີ່ກົມອາ­ຫານ ແລະ ຢາກຳ­ນົດ.

ແນວ­ໃດກໍຕາມ ຜ່ານການທົດລອງຕະ­ຫຼາດພາຍໃນນະ­ຄອນ­ຫຼວງວຽງຈັນ ແລະ ແຂວງວຽງຈັນທີ່ເປັນລູກຄ້າເກົ່າ ຫຼື ຕົວແທນຈຳ­ໜ່າຍນ້ຳດື່ມ ໃນໄລ­ຍະ 3 ເດືອນຜ່ານມາ ເຫັນໄດ້ວ່າຜະ­ລິດຕະພັນເຄື່ອງດື່ມດັ່ງ­ກ່າວແມ່ນໄດ້ຮັບການຕອບຮັບຈາກລູກຄ້າກໍຄືຜູ້ບໍ­ລິ­ໂພກດີພໍສົມຄວນ ທັງນີ້ກໍຍ້ອນວ່າເປັນຜະ­ລິດຕະພັນໃໝ່ມີມາດ­ຕະ­ຖານ, ລົດຊາດແຊບ, ລາຄາຖືກ, ສາ­ມາດດື່ມໄດ້ທັງເດັກ­ນ້ອຍ ແລະຜູ້ໃຫຍ່, ນອກນີ້ ຍັງເປັນສິນ­ຄ້າທີ່ໄດ້ຮັບ­ຮອງຈາກກົມອາ­ຫານ ແລະຢາ, ດ້ານມາດ­ຕະ­ຖານ ແລະຫຼັກອະ­ນາ­ໄມ, ອັນເຮັດໃຫ້ສິນ­ຄ້າພວກເຮົາບໍ່ສາ­ມາດຜະ­ລິດ ຫຼື ສະ­ໜອງໄດ້ຖ່ວງທັນກັບຄວາມຕ້ອງການຂອງຕະ­ຫຼາດ ເນື່ອງຈາກເຄື່ອງຈັກການຜະ­ລິດພວກເຮົາຍັງເປັນຂະ­ໜາດນ້ອຍ ແລະແຕ່ລະມື້ແມ່ນຜະ­ລິດໄດ້ 2 ພັນແພັກຕໍ່ມື້ (ແພັກລະ 24 ຕຸກ) ແລະ ສາ­ມາດຜະ­ລິດເທື່ອລະລົດຊາດ,  ແຕ່ຄາດວ່າເດືອນຕຸ­ລາຈະມາເຖິງນີ້ ກຳ­ລັງການຜະ­ລິດໜ້າຈະພຽງ­ພໍກັບຄວາມຮຽກ­ຮ້ອງ ຕ້ອງ­ການທີ່ມີບາດ­ກ້າວເພີ່ມຂຶ້ນນັບມື້.

ສຳ­ລັບທິດທາງແຜນ­ການໃນ­ຕໍ່­ໜ້າທາງໂຮງ­ງານຈະເລັ່ງຂະ­ຫຍາຍຖານການຜະ­ລິດນ້ຳດື່ມ ແລະເຄື່ອງດື່ມ­ນ້ຳ ຫວານໃຫ້ມີກຳ­ລັງການຜະ­ລິດເພີ່ມຂຶ້ນ ເພື່ອໃຫ້ສາ­ມາດສະ­ໜອງສິນ­ຄ້າໃຫ້ໄດ້ ທ່ວງທັນກັບຄວາມຕ້ອງ­ການຂອງຕະຫຼາດ, ພ້ອມນີ້ພວກເຮົາກໍ່ຍັງເລັ່ງຂະ ຫຍາຍຕະ­ຫຼາດໂດຍເນັ້ນໃສ່ແຕ່ລະສາ­ຂາຂອງເອັມພອຍມາກ  ແລະຮ້ານຄ້າໃນ ເຄືອປ້ຳ­ນ້ຳ­ມັນ ປຕທ ແລະຕົວແທນຈຳ­ໜ່າຍໃຫ້ໄດ້ທົ່ວທຸກແຂວງໃນຂອບເຂດທົ່ວປະ­ເທດ, ສະ­ເພາະແຜນໄລ­ຍະໃກ້ນີ້ ໂຮງ­ງານເຮົາມີແຜນຜະ­ລິດນ້ຳ­ໝາກ ຂາມຕື່ມອີກ ຊຶ່ງປະ­ຈຸບັນແມ່ນຢູ່ໃນຂັ້ນຕອນລໍ­ຖ້າການກວດ­ກາຜ່ານຂອງ ອຢ ແລ້ວຈະເລີ່ມລົງ­ມືຜະ­ລິດທັນ­ທີ.

ໂດຍການ­ຈຳ­ໜ່າຍສິນ­ຄ້າໃນປະ­ຈຸບັນນັ້ນ ແມ່ນຢູ່ຕາມຮ້ານຄ້າເອັມພອຍມາກ ແລະຮ້ານຄ້າໃນເຄືອປ້ຳ­ນ້ຳ­ມັນ ປຕທ, ນອກນີ້ຍັງມີຈຳ­ໜ່າຍຕາມຮ້ານຄ້າ­ຂາຍສົ່ງຕ່າງໆ, ຖ້າຖາມວ່າເປັນຫຍັງຄືຕັ້ງລາ­ຄາຕ່ຳແທ້ ຂໍຕອບເລີຍວ່າ, ຂະ­ນະທີ່ໃນຕອນທ້າຍ ທ່ານຜູ້ຈັດ­ການຍັງໄດ້ຝາກເຖິງພໍ່ແມ່ປະ­ຊາ­ຊົນລາວໃນຂອບເຂດທົ່ວປະ­ເທດຊ່ວຍອຸດໜູນຜະ­ລິດຕະພັນລາວ, ເພື່ອຊ່ວຍສົ່ງ­ເສີມຜະ­ລິດຕະພັນລາວກ້າວໄປສູ່ຜົນ­ສຳ­ເລັດ ແລະມີຊື່ສຽງ, ອັນເປັນທີ່ມາຂອງການສ້າງ­ສາພັດທະນາເສດ­ຖະ­ກິດ-ສັງ­ຄົມແຫ່ງຊາດ,  ເອົາເປັນວ່າ ທ່ານໃດທີ່ສົນ­ໃຈຜະ­ລິດຕະພັນ ທີ່ວ່ານີ້ກໍສາ­ມາດໄປຊື້ກັນໄດ້ຕາມຮ້ານຄ້າເອັມພອຍມາກ ແລະຮ້ານຄ້າໃນເຄືອ ປ້ຳ­ນ້ຳ­ມັນ ປຕທ, ນອກນີ້ຍັງມີຈຳ­ໜ່າຍຕາມຮ້ານຄ້າ­ຂາຍສົ່ງຕ່າງໆ ຫຼື ທ່ານໃດ ຫາກສົນ­ໃຈເປັນຕົວແທນຈຳ­ໜ່າຍກໍສາ­ມາດຕິດ­ຕໍ່ສອບຖາມຂໍ້ມູນເພີ່ມຕື່ມໄດ້ທີ່ເບີ­ໂທລະ­ສັບ: 021 760370 ຫຼື 020 96245623.

ຂ່າວ : ໂອຫຼົດ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.