ນ້ຳ​ປະ­ປາ​ຄາດ​ບໍ​ລິ​ມາດ​ໃຊ້​ນ້ຳ​ປີ​ໃໜ່ອາດເພີ່ມຂຶ້ນ 50% ຮຽກຮ້ອງປະຊາຊົນຈົ່ງປະຢັດ

ລັດວິສາຫະກິດນ້ຳປະປານະຄອນຫຼວງຖືເປັນໜ່ວຍງານໜຶ່ງທີ່ສຳຄັນໃນການບໍລິການນ້ຳໃຫ້ປະຊາຊົນໄດ້ຊົມໃຊ້ໃນຊີວິດປະຈຳວັນ ຊຶ່ງໄລຍະປີໃໝ່ລາວທີ່ຈະມາເຖິງນີ້ຄາດວ່າບໍລິມາດການຊົມໃຊ້ນ້ຳຈະເພີ່ມຂຶ້ນ 50% ຈາກປົກກະຕິທັງນີ້ໄດ້ຮຽກຮ້ອງໃຫ້ພໍ່ໍແມ່ປະຊາຊົນສະເຫຼີມສະຫຼອງດ້ວຍ ຄວາມມ່ວນຊື່ນປະຢັດມັດທະຍັດນ້ຳເພື່ອເປັນການຫຼຸດຜ່ອນບັນຫາການຂາດແຄນນ້ຳໃຊ້ຂອງຜູ້ຢູ່ເຂດເນີນສູງ ແລະຫຼຸດຄ່ານ້ຳທີ່ອາດແພງຂຶ້ນໃນຄົວເຮືອນ.

ທ່ານ ຄຳເຜີຍ  ວົງສາຄຳຜຸຍ ຜູ້ອຳນວຍ ການລັດວິສາຫະກິດນ້ຳປະປານະຄອນຫຼວງວຽງຈັນໃຫ້ສຳພາດຕໍ່ນັກຂ່າວເສດຖະກິດ-ສັງຄົມຮູ້ວ່າ: ນ້ຳຖືເປັນສິ່ງສຳຄັນທີ່ທຸກຄົນຕ້ອງໃຊ້ໃນຊີວິດປະຈຳວັນ ປະຈຸບັນ ການຜະລິດນ້ຳປະປາຢູ່ນະຄອນຫຼວງວຽງຈັນ ສາມາດຜະລິດນ້ຳໄດ້ທັງໝົດ 2,80 ແສນແມັດກ້ອນຕໍ່ວັນ ພາຍຫຼັງສຳເລັດການກໍ່ສ້າງນ້ຳປະປາດົງໝາກຄາຍ ຖ້າທຽບໃສ່ປີຜ່ານມາແມ່ນມີແຕ່ 1,80ຫ ແສນແມັດກ້ອນ ເພີ່ມຂຶ້ນ ປະມານແສນແມັດກ້ອນ.

ສຳລັບການຊົມໃຊ້ນ້ຳປະຈຸບັນແມ່ນ ໄດ້ແບ່ງອອກເປັນ 3 ປະເພດຜູ້ຊົມໃຊ້ ຄືຜູ້ຊົມໃຊ້ທີ່ລາຄາແຕກຕ່າງກັນໃນຄົວເຮືອນໃຊ້ນັບແຕ່ 1-10 ແມັດກ້ອນ 1.434 ກີບຕໍ່ແມັດກ້ອນ 11-50 ແມັດກ້ອນ 1.986 ກີບ 31-50 ແມັດກ້ອນ 2.538 ກີບ ໃຊ້ນ້ຳແຕ່ 51 ຂຶ້ນໄປ ແມ່ນລາຄາ 3.089 ກີບຕໍ່ແມັດກ້ອນ, ປະເພດອົງການລັດສະຖານທູດ ແລະ ອົງການຈັດຕັ້ງສາກົນ 2.538 ແລະພາກສ່ວນທຸລະກິດ-ການຄ້າ, ໂຮງແຮມ,  ຮ້ານອາຫານ ແລະໂຮງງານນ້ຳກ້ອນນ້ຳດື່ມ 3,089 ຊຶ່ງປີນີ້ແມ່ນໄດ້ເພີ່ມກົງເຕີເຂົ້າ 8 ພັນກົງເຕີທີ່ລູກຄ້າຊົມໃຊ້ນ້ຳ ເພີ່ມຖ້າທຽບໃສ່ປີຜ່ານມາຖືວ່າເພີ່ມຂຶ້ນ 20% ທີ່ມີທັງໝົດຂະນະນີ້ 1,20 ແສນກົງເຕີ.

ສຳລັບປີໃໝ່ທີ່ຈະມາເຖິງນີ້ ທ່ານຜູ້ອຳນວຍການເຫັນວ່າຈະມີການພັກຍາວ ແລະການຊົມໃຊ້ນ້ຳອາດຈະຫຼາຍຂຶ້ນແຕ່ລະປີປະມານ 40-50% ທັງນີ້ທາງລັດວິສາຫະກິດນ້ຳປະປານະຄອງຫຼວງ ແມ່ນໄດ້ກຽມຄວາມພ້ອມໂດຍຕັ້ງໜ່ວຍງານເພີ່ມກຳລັງເຂົ້າສະເພາະການປັບປຸງການແລນປົມນ້ຳໃນການຜະລິດ, ຕັ້ງໜ່ວຍເວຍາມໃນການສົ່ງອອກນ້ຳ, ແຕ່ງຕັ້ງວິຊາການຕິດຕາມທໍ່ນ້ຳແຕກ.

ປະຈຸບັນ ທົ່ວນະຄອນຫຼວງຍັງໄດ້ຊົມໃຊ້ນ້ຳບໍ່ທົ່ວເຖິງແຕ່ຄາດໝາຍແຜນພັດທະນາຮອດປີ 2020 ປະຊາຊົນຜູ້ທີ່ມີເງື່ອນໄຂອາດຈະຕ້ອງການຫຼາຍ ກວ່າ 3,8-4 ແສນແມັດກ້ອນຕໍ່ມື້, ສະໜອງນ້ຳໃຫ້ໄດ້ໃນພື້ນທີ່ບໍລິການຫຼາຍກວ່າ 95% ນຳໃຊ້ເຕັກໂນໂລຊີໃນການຄຸ້ມຄອງ SCADA ການຜະລິດ ແລະ ລະບົບສາຍທໍ່ສາມາດຈ່າຍເງິນຜ່ານ ລະບົບທີ່ທັນສະໄໝ ແລະຍຸດທະສາດຮອດປີ 2025 ອາດມີນ້ຳປະປາບໍລິການຢ່າງໜ້ອຍ 5 ແສນແມັດກ້ອນຕໍ່ມື້ ພ້ອມຈະຄຸ້ມຄອງຜະລິດ ແລະສາຍທໍ່ດ້ວຍເຕັກໂນໂລຊີທີ່ທັນສະໄໝປະຊາຊົນໃຊ້ນ້ຳ 100% ຂະນະທີ່ວິໄສທັດປີ 2030 ຈະສ້າງເປັນວິສາຫະກິດສະໜອງນ້ຳປະປາທີ່ມີຄຸນນະພາບ, ພຽງພໍ, ທົ່ວເຖິງ ແລະຢືນຍົງທາງດ້ານການດຳເນີນທຸລະກິດ.

ໂດຍ: ບຸນນິກ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.