ນ້ຳ​ປະ­ປາ​ຈຳ­ປາ​ສັກ ຮັບ­ປະ­ກັນ​ສະ­ໜອງ​ນ້ຳພຽງ­ພໍ​ໄລ­ຍະ​ປີ​ໃໝ່​ລາວ

ລັດ​ວິ​ສາ​ຫະ​ກິດ​ນ້ຳ​ປະ­ປາ​ແຂວງຈຳ­ປາ​ສັກມີ​ຄວາມ​ກຽມ­ພ້ອມ ແລະ​ຮັບປະ­ກັນ​ນ້ຳ​ປະ­ປາ​ໃຫ້​ແກ່​ການ​ສະ­ເຫຼີມສະ­ຫຼອງ​ບຸນ­ປີ­ໃໝ່​ລາວ​ປີ​ນີ້​ໃຫ້​ໄດ້​ຢ່າງ ພຽງ­ພໍ​ພ້ອມ​ທັງ​ຮຽກ­ຮ້ອງ​ໃຫ້​ຜູ້​ຊົມ­ໃຊ້ຈົ່ງ​ມີ​ສະ­ຕິ​ໃນ​ການ​ເປີດ​ປິດ ແລະ​ການ​ນຳໃຊ້​ຢ່າງ​ປະ­ຢັດ​ເພື່ອ​ເຮັດ​ໃຫ້​ຫຼຸດ​ຄ່າ​ໃຊ້ຈ່າຍ​ຂອງ​ທ່ານ​ເອງ.

ທ່ານ ໄກ່​ຄຳ ສຸ­ວັນ­ນະ​ເມ​ທີ ຜູ້​ອຳ­ນວຍການ​ລັດ​ວິ​ສາ​ຫະ​ກິດ​ນ້ຳ​ປະ­ປາ ແຂວງ​ຈຳ­ປາ​ສັກ ໄດ້​ໃຫ້ສຳ­ພາດ​ຕໍ່​ສື່​ປະ­ຈຳ​ທ້ອງ­ຖິ່ນ​ກ່ຽວ​ກັບ​ການ​ກະ­ກຽມ​ນ້ຳ​ໃຫ້­ການ​ສະ­ເຫຼີມ​ສະຫຼອງ​ບຸນ­ປີ­ໃໝ່​ລາວ​ປະ­ຈຳ​ປີ​ທີ່​ຈະ​ມາ ເຖິງ​ນີ້​ວ່າ: ບຸນ­ປີ­ໃໝ່​ລາວ​ແມ່ນ​ບຸນ​ປະ­ຈຳປີ​ຂອງ​ຊາດ​ລາວ​ທີ່​ໄດ້​ມີ​ການ​ປະ­ຕິ­ບັດກັນ​ມາ​ແຕ່​ບູ­ຮານ​ນະ​ການ, ເພື່ອ​ຕ້ອນຮັບ​ວັນ​ດັ່ງ­ກ່າວ​ລັດ​ວິ​ສາ​ຫະ​ກິດ​ນ້ຳ​ປະ­ປາ​ແຂວງ​ຈຳ­ປາ​ສັກ ກໍ​ໄດ້​ມີ​ການ​ກະກຽມ​ຄວາມ​ພ້ອມ​ຮອບ­ດ້ານ​ໃນ​ການ​ຜະລິດ ແລະ​ການ​ສະ­ໜອງ​ນ້ຳ​ປະ­ປາ​ໃຫ້ພຽງ­ພໍ​ຕະ­ຫຼອດ​ການ​ສະ­ເຫຼີມ­ສະ­ຫຼອງບຸນ­ປີ­ໃໝ່, ໃນ​ນັ້ນ​ ພວກ​ເຮົາ​ໄດ້​ກຽມ​ຄວາມພ້ອມ​ດ້ານ​ໂຮງ­ງານ​ຜະ­ລິດ​ນ້ຳ​ປະ­ປາ​ຫຼັກ 2 ບ້ານ​ໂພນ​ສະ­ຫວັນ, ຊຶ່ງ​ມີ​ກຳ­ລັງ​ການຜະ­ລິດ 7.500 ແມັດ​ກ້ອນ​ຕໍ່​ວັນ, ໃຫ້​ດຳ­ເນີນ​ການ​ຜະ­ລິດ​ໄດ້​ຕະ­ຫຼອດ 24 ຊົ່ວໂມງ, ເພື່ອ​ສາ­ມາດ​ຮັບ­ປະ­ກັນ​ໃນ​ການ ຊົມ­ໃຊ້​ນ້ຳ­ຂອງ​ສັງ­ຄົມ, ນອກ​ນີ້​ຍັງ​ໄດ້​ມີການ​ຮ່ວມ​ມື​ກັບ​ໂຮງ­ງານ​ເອ­ກະ​ຊົນ​ທີ່ຜະ­ລິດ​ສະ­ໜອງ​ນ້ຳ​ໃຫ້, ຊຶ່ງ​ໂຮງ­ງານ​ດັ່ງກ່າວ​ມີ​ກຳ­ລັງ​ການ​ຜະ­ລິດ 20 ພັນ​ແມັດກ້ອນ​ຕໍ່​ວັນ, ລວມ​ກັນ​ແລ້ວ​ສາ­ມາດ​ສະໜອງ​ໄດ້ 35 ພັນ ແມັດ​ກ້ອນ​ຕໍ່​ວັນ ຊຶ່ງທຽບ­ໃສ່​ຄວາມ​ຕ້ອງ­ການ​ໃຊ້​ນ້ຳ​ແມ່ນເຫັນ​ວ່າ​ມີ​ຄວາມ​ພຽງ­ພໍ.

ສຳ­ລັບ​ຄຸນ​ນະ​ພາບ​ໃນ​ການ​ຜະ­ລິດແມ່ນ​ປະ­ຕິ­ບັດ​ຕາມ​ຫຼັກ­ການ​ຜະ­ລິດ​ນ້ຳປະ­ປາ​ຕາມ​ຂໍ້​ກຳ­ນົດ​ຂອງ​ກະ­ຊວງ​ສາ​ທາລະ­ນະ​ສຸກ, ຮັບ­ປະ­ກັນ​ສະ­ກັດ​ກັ້ນ​ໃນ 23  ທາດ ແລະ​ມີ​ທິມ​ງານ​ນ້ຳ​ສະ­ອາດ​ປອດໄພ, ຊຶ່ງ​ແຕ່ງ­ຕັ້ງ​ຂື້ນ​ຈາກ​ການ​ຮ່ວມ​ມືຂອງ​ກົມ​ນ້ຳ​ປະ­ປາ ແລະ​ກະ­ຊວງ​ສາ​ທາລະ­ນະ​ສຸກ, ຈະ​ໄດ້​ມີ​ການ​ບໍ­ລິ­ການ​ເຂດຊຸ່ມ​ເຢັນ​ຕາມ​ການ​ກຳ­ນົດ​ຂອງ​ເມືອງປາກ​ເຊ, ໜ່ວຍ​ບໍ­ລິ­ການ​ສຸກ​ເສີນ 24 ຊົ່ວ­ໂມງ ແລະ​ສູນ​ຮັບ​ໂທລະ­ສັບ 031 212 514 ຕະ­ຫຼອດ 24 ຊົ່ວ­ໂມງ, ພ້ອມ​ດຽວກັນ​ນີ້ ​ຜູ້­ອຳ­ນວຍ­ການ​ຍັງ​ໄດ້​ຮຽກ­ຮ້ອງ ເຖິງ​ຜູ້​ຊົມ­ໃຊ້​ນ້ຳ​ຢ່າງ​ປະ­ຢັດ, ມີ​ສະ­ຕິ​ໃນການ​ປິດ​ເປີດ​ນ້ຳ​ທັງ​ນີ້​ກໍ່​ເພື່ອ​ເຮັດ​ໃຫ້​ຫຼຸດ­ຜ່ອນ​ຄ່າ​ໃຊ້​ຈ່າຍ​ຂອງ​ຕົວ​ທ່ານ​ເອງ.

ໂດຍ:  ໂພ­ທິ​ຣາ​ຊ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.