ບຸນປີໃໝ່ລາວປີນີ້ ພັກຍາວ 5 ວັນ

ບຸນປີໃໝ່ລາວປະຈຳປີ ພສ 2560 ທີ່ຈະໝູນວຽງມາເຖິງນີ້ເປັນໂອກາດ ໜຶ່ງທີ່ສຳຄັນທີ່ສືບຕໍ່ເສີມຂະຫຍາຍມູນ ເຊື້ອຮີດຄອງປະເພນີອັນດີງາມ ແລະຄວາມສາມັກຄີເປັນປຶກແຜ່ນຂອງຊາດ ທີ່ມີມາແຕ່ດົນນານແລ້ວເປັນປາງບຸນໃຫຍ່ປະຈຳຊາດ ຊຶ່ງຫຼາຍຄົນຖືເອົາໂອກາດນີ້ກັບຄືນບ້ານເກີດເພື່ອສົມມາພໍ່ແມ່ ອວຍພອນເຊິ່ງກັນ ແລະກັນຈັດຕັ້ງສະເຫຼີມສະຫຼອງນຳກັນ ຊຶ່ງປີນີ້ລັດຖະບານມີກຳນົດໃຫ້ພັກຍາວແຕ່ວັນທີ 13 ແລະວັນທີ 17 ລວມ 5 ມື້ເຕັມ.

ອີງຕາມມາດຕາ 55 ຂອງກົດໝາຍວ່າດ້ວຍແຮງງານສະບັບເລກທີ 43/ສພຊ ລົງວັນທີ 24 ທັນວາ 2013 ກ່ຽວກັບວັນພັກທາງລັດຖະການ, ຕາມການຊີ້ນຳ ແລະຕົກລົງໃນກອງປະຊຸມລັດຖະບານສະໄໝສາມັນປະຈຳ ເດືອນມີນາ 2017 ຫ້ອງວ່າການສຳນັກງານນາຍົກລັດຖະມົນຕີໄດ້ແຈ້ງ ໃຫ້ຮູ້ວ່າ: ການສະເຫຼີມສະຫຼອງວັນບຸນ ປີໃໝ່ລາວປະຈຳປີ ພສ 2560 ທີ່ຈະໝູນວຽງມາເຖິງນີ້ເປັນໂອກາດໜຶ່ງທີ່ ສຳຄັນໃນການສືບຕໍ່ເສີມຂະຫຍາຍມູນເຊື້ອຮີດຄອງປະເພນີອັນດີງາມ ແລະຄວາມສາມັກຄີເປັນປຶກແຜ່ນຂອງຊາດ ທີ່ມີມາແຕ່ດົນນານແລ້ວເປັນບຸນໃຫຍ່ ປະຈຳຊາດທີ່ປວງຊົນລາວທັງຊາດຖືເອົາໂອກາດນີ້ອວຍພອນເຊິ່ງກັນ ແລະກັນຈັດຕັ້ງສະເຫຼີມສະຫຼອງດ້ວຍ ບັນຍາກາດເບີກບານມ່ວນຊື່ນຖືກຕ້ອງ ຕາມຮີດຄອງປະເພນີ ແລະວັດທະນະທຳຂອງຊາດ ຕິດພັນກັບການສົ່ງເສີມ ການທ່ອງທ່ຽວ ແລະບົນຈິດໃຈປະຢັດ ມັດທະຍັດ.

ສຳລັບໃນປີໃໝ່ລາວແມ່ນຖືກວັນທີ 14,15 ແລະ 16 ເມສາ ກົງກັບວັນສຸກ, ວັນເສົາ ແລະອາທິດ ຊຶ່ງເປັນມື້ພັກວັນ ລັດຖະການສະນັ້ນຈິ່ງຕົກລົງເຫັນດີກຳນົດເອົາວັນທີ 13 ແລະວັນທີ 17 ເມສາ 2017 ກົງກັບວັນພະຫັດ ແລະວັນຈັນ ເປັນວັນພັກຊົດເຊີຍ.

ແນວໃດກໍຕາມ ບຸນປີໃໝ່ລາວແມ່ນ ມອບໃຫ້ກະຊວງອຸສາຫະກຳ ແລະການຄ້າ, ກະຊວງກະສິກຳ ແລະປ່າໄມ້ ນະ ຄອນຫຼວງວຽງຈັນ ແລະບັນດາແຂວງ ໃນຂອບເຂດທົ່ວປະເທດເອົາໃຈໃສ່ຊີ້ນຳການຜະລິດສະບຽງອາຫານການ ສະໜອງເຄື່ອງອຸປະໂພກ ແລະບໍລິໂພກໃຫ້ພຽງພໍກັບຄວາມຕ້ອງການຂອງສັງຄົມ ລວມທັງາການຕິດຕາມກວດກາ ແລະຄຸ້ມຄອງລາຄາສິນຄ້າໃນທ້ອງຕະຫຼາດເພື່ອບໍ່ໃຫ້ມີການສວຍໂອກາດຂຶ້ນລາຄາສິນຄ້າ ແລະສະບຽງອາຫານ ໂດຍບໍ່ມີເຫດຜົນ.

ບັນດາກະຊວງອົງການຈັດຕັ້ງທຽບເທົ່າກະຊວງ ແລະທ້ອງຖິ່ນໃນຂອບເຂດ ທົ່ວປະເທດເອົາໃຈໃສ່ຊີ້ນຳໃນການຮັກສາຄວາມສະຫງົບປອດໄພ ແລະຄວາມເປັນລະບຽບຮຽບຮ້ອຍສັງຄົມໂດຍໃຫ້ມີການຮັກສາຄວາມສະຫງົບປອດໄພ ແລະຄວາມເປັນລະບຽບຮຽບຮ້ອຍໃນສັງຄົມໂດຍແບ່ງຄວາມຮັບຜິດຊອບໃນການຕິດຕາມກວດກາເວນຍາມ ແລະປະຈຳການຄັກແນ່ເພື່ອປ້ອງກັນສຳນັກງານອົງການຕະຫຼອດໄລຍະຫຼິ້ນບຸນປີໃໝ່ລາວ ແລະໃຫ້ສາມາດປະສານງານໄດ້ຢ່າງເປັນປົກກະຕິ.

ໃຫ້ກະຊວງປ້ອງກັນຄວາມສະຫງົບສົມທົບກະຊວງໂຍທາທິການ ແລະຂົນສົ່ງ, ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ ລວມທ້ອງຖິ່ນເພື່ອຈັດສັນ ແລະອຳນວຍຄວາມສະດວກໃນການສັນຈອນໄປມາໃຫ້ມີຄວາມປອດໄພ ແລະໃຫ້ເພີ່ມທະວີການໂຄສະນາເພື່ອສ້າງຈິດສຳນຶກໃຫ້ພົນລະເມືອງໃນທົ່ວສັງຄົມເຄົາລົບກົດລະບຽບຈະລາຈອນ ເພື່ອປ້ອງກັນການເກີດອຸບັດເຫດ.

ໃຫ້ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ), ພະແນກ ຖວທ ບັນດາແຂວງໃນຂອບເຂດທົ່ວປະເທດເພີ່ມທະວີໂຄສະນາ ແລະປະຊາສຳພັນໃຫ້ປະຊາຊົນໃນທົ່ວສັງຄົມໄດ້ຮັບຮູ້ ແລະເຂົ້າໃຈກ່ຽວກັບການສະຫຼອງບຸນປີໃໝ່ປະຈຳຊາດໃຫ້ຖືກຕ້ອງ ແລະສອດຄ່ອງກັບວັດທະນະທຳຮີດຄອງປະເພນີ ອັນດີງາມຂອງຊາດ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.