ບຸນປີໃໝ່ ຄົນລາວຄວນເຮັດຫຍັງແນ່?

ເມື່ອຫວນຄືນການປະຕິບັດຮີດຄອງເກົ່າບູຮານລາວ ທີ່ເຄີຍນຳພາປະຕິບັດໃນປາງບຸນປີໃໝ່ ນັ້ນ ຍ່ອມມີຫຼາຍປະການທີ່ພວກເຮົາຄວນປະຕິບັດສືບທອດເພື່ອບໍ່ເປັນການລະຮີດລະຄອງ ໂດຍສະເພາະເຖົ້າແກ່ລຸງຕາ ແລະພະສົງສາມະເນນ ທີ່ນຳພາຊາວບ້ານປະຕິບັດ ເພາະບຸນປາງນີ້ຖືໃນຮີດ 12 ຄອງ 14 ທີ່ຄົນລາວປະຕິບັດສືບ ທອດກັນມາທຸກປີບໍ່ໄດ້ຂາດ.

ຖ້າເບິ່ງຕາມປະຕິທິນລາວບູຮານສະບັບວັດໂພນເພົາ ແຂວງຫຼວງພະບາງ ປີ 2017 ເອີ້ນວ່າປີລະກາ (ພາສາລາວບູຮານເອີ້ນກັນວ່າ ປີ ເມິງເຮົ້າ) ວັນສັງຂານລ່ວງກົງກັບວັນສຸກ (ມື້ຮວງມົດ) ແຮມ 3 ຄໍ່າ ກົງກັບວັນທີ 14 ເມສາ, ເວລາ 3 ໂມງ 12 ນາທີ ວັນເນົາກົງກັບວັນເສົາແຮມ 4 ຄໍ່າເດືອນ 5 ຖືກວັນທີ 15 ເມສາ, ວັນສັງຂານຂຶ້ນຖືກມື້ວັນອາທິດກົງກັບ ວັນທີ 16 ເມສາ ເວລາ 6 ໂມງ 45 ນາທີ ການຄິດໄລ່ຕາມຫຼັກການບູຮານລາວປີນີ້ບອກວ່າ: ນາກຫຼິ້ນນ້ຳ 7 ໂຕ, ບັນດານໃຫ້ຝົນຕົກ 300 ຫ່າ, ຕົກລົງມາພາຍໃນຈັກກະວານ 120 ຫ່າ, ຕົກລົງປ່າຫິມະພານ 90 ຫ່າ, ຕົກໃນມະຫາສະໝຸດ 60 ຫ່າ, ຕົກໃນໂລກມະນຸດ 30 ຫ່າ, ຕາມການຄາດເດົາ ໃນປະຕິທິນບູຮານບອກວ່າຝົນຕົ້ນປີ ຈະໜ້ອຍ, ປາຍປີຈະຫຼາຍເຮັດໃຫ້ ນາດອນ ແລະນາລຸ່ມມີເຂົ້າຂຽວງາມດີ ສຳລັບປີນີ້ໄມ້ທີ່ເປັນພະຍາໄດ້ແກ່ໄມ້ຈວງຈັນ.

ປະເພນີທີ່ຄວນສືບທອດໃນປາງບຸນປີໃໝ່ນີ້ຄື ການຫົດສົງພະພຸດທະຮູບ ຊຶ່ງປະຊາຊົນພ້ອມດ້ວຍ ພະສົງໄດ້ຕັ້ງໃຈເອົາຂັນດອກໄມ້ທູບທຽນ, ນ້ຳຫອມຕັ້ງໄວ້ແລ້ວ ກ່າວຄຳບູຊາ ດອກໄມ້ທູບທຽນ, ປ່າວສັກເຄເທວະດາ ອະທິຖານ ຂໍຫົດສົງໃຫ້ຟ້າຝົນຕົກເປັນປົກກະຕິ ຝ່າຍຊາວບ້ານອາດອາໄສບຸນປີ ໃໝ່ນີ້ເຮັດບຸນອຸທິດຫາຍາດພີ່ນ້ອງ ຜູ້ລ່ວງລັບ ແລະພາກັນທາສີອະນາໄມທາດດູກບັນພະບຸລຸດ ເປັນການສະແດງອອກເຊິ່ງຄວາມກະຕັນຍູ, ພໍ່ແມ່ຜູ້ປົກຄອງພາລູກຫຼານ ນຳເອົານ້ຳຫອມໄປຫົດສົງຂໍພອນຜູ້ໃຫຍ່ (ເຖົ້າແກ່) ເປັນທີ່ເຄົາລົບຂອງສັງຄົມ, ໃນປາງບຸນປີໃໝ່ນີ້ ຄົນລາວເຮົາຍັງນິຍົມເຮັດພະທາດຊາຍເພື່ອຖວາຍບູຊາພຸດທະຄຸນ ແລະສັງຄະຄຸນ ເມື່ອກ່ອນຖ້າເຖິງບຸນປີໃໝ່ຄົນລາວມັກນິຍົມປ່ອຍສັດເປັນການສະແດງອອກເຖິງ ແນວຄິດຈິດໃຈໃນການສ້າງບຸນກຸສົນ.

ບຸນປີໃໝ່ລາວຍັງພົວພັນ ເຖິງນິທານ ທ້າວ ທຳມະບານ ກຸມມານ ທີ່ກ່ຽວຂ້ອງກັບ 3​ ລາສີ ອັນເປັນ ວິຖີຊີວິດຂອງມະນຸດຄື ຕອນເຊົ້າມະນຸດເຮົາລາສີຢູ່ໜ້າຕື່ນເຊົ້າຈິ່ງ ອາບນ້ຳລ້າງໜ້າ, ຕົກມາຕອນທ່ຽງ ລາສີຢູ່ເອິກ (ຫົວໃຈ) ອາກາດຮ້ອນເຮັດໃຫ້ອາລົມຄົນບໍ່ດີຕ້ອງໄດ້ເອົານ້ຳເຢັນລູບໄວ້ ນີ້ເປັນປິດສະໜາທຳທີ່ສອນຄົນໃຫ້ຮູ້ຈັກ ທຳໃຈໃຫ້ສະຫງົບເຢືອກເຢັນ, ຕອນແລງ ລາສີຢູ່ຕີນກ່ອນນອນ ເພິ່ນສອນໃຫ້ລ້າງຕີນ ເພື່ອຄວາມສະອາດ ບຸນປີໃໝ່ລາວເຮົານີ້ ຖ້າເບິ່ງໃຫ້ເລິກ ແລະໄຂປິດສະໜາໄດ້ ກໍຈະເກີດປັນຍາ ນັ້ນແມ່ນເວົ້າເລື່ອງຮີດຄອງສ່ວນການປະຕິບັດ ຕົວຈິງໃນສັງຄົມນັ້ນກໍຕ້ອງພ້ອມກັນປະຕິບັດຕາມແຈ້ງການຂອງ ອຳນາດການປົກຄອງ ຊຶ່ງໃນແຕ່ ລະປີມີອອກມາເປັນປະຈຳຕັ້ງແຕ່ ຂັ້ນລັດຖະບານ ແຂວງນະຄອນ, ເມືອງ ແລະບ້ານເປັນຕົ້ນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.