ບໍ­ລິ­ການ​ ຍູ້​ເສດ­ຖະ­ກິດລາວ​ຂະ­ຫຍາຍ­ຕົວ​​

ທະ­ນາ­ຄານ​ພັດ­ທະ­ນາ​ອາ­ຊີ (ເອ​ດີ​ບີ) ໄດ້​ຄາດ​ວ່າ​ເສດ­ຖະ­ກິດ​ຂອງ ສປປ ລາວ​ຈະ​ສືບ­ຕໍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ​ໃນ​ປີ 2017 ແລະ​ປີ 2018 ໃນ​ລະ­ດັບ 6,9% ແລະ 7% ຂະ­ນະ​ທີ່​ຂະ­ແໜງ­ການ​ບໍ­ລິ­ການ​ເປັນ​ຂະ­ແໜງ​ຫຼັກ​ໃນ​ການ​ຍູ້​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ, ຮອງ​ລົງ​ມາ​ແມ່ນ​ໄຟ­ຟ້າ ແລະ​ຂະ­ແໜງ​ກະ­ສິ­ກຳ.

ທ່ານ ຢາ​ຊຸ​ຊິ ເນ​ກິ​ຊິ ຜູ້­ຕາງ­ໜ້າ​ສຳ­ນັກ­ງານ​ທະ­ນາ­ຄານ​ພັດ­ທະ­ນາ​ອາ­ຊີ​ປະ­ຈຳ​ລາວກ່າວ​ໃນ​ກອງ​ປະ­ຊຸມ​ເຜີຍ­ແຜ່​ບົດ​ລາຍ​ງານ​ການ​ຄາດ​ຄະ­ເນ​ການ​ພັດ­ທະ­ນາ​ຂອງ​ອາ­ຊີ​ປະ­ຈຳ​ປີ 2017 ວ່າ: ເຖິງ​ວ່າ​ຈະ​ມີ​ຂໍ້​ຈຳ­ກັດ​ທາງ​ດ້ານ​ງົບ­ປະ­ມານ ແລະ​ຄວາມ​ຕ້ອງ­ການ​ແຮ່​ທາດ​ໃນ​ທົ່ວໂລກ​ຫຼຸດ​ລົງ​ໃນ​ຊຸມ​ປີ­ຜ່ານ­ມາ, ແຕ່ ສປປ ລາວ ຍັງ​ເປັນ​ປະ­ເທດ​ໜຶ່ງ​ທີ່​ມີ​ການ​ຂະ­ຫຍາຍ­ຕົວ​ທາງ​ດ້ານ​ເສດ ຖະ​ກິດ​ທີ່​ເຂັ້ມ­ແຂງ​ຢູ່​ໃນ​ພາກ​ພື້ນ ຊຶ່ງ​ອັດ­ຕາ​ການ​ຂະ­ຫຍາຍ­ຕົວ​ສະ­ເລ່ຍ​ສູງ​ກວ່າ 7% ໃນ​ທົດ​ສະ​ວັດ​ທີ່​ຜ່ານ​ມາ, ຄາດ​ວ່າ​ຈະ​ສາ­ມາດ​ບັນ­ລຸ​ໄດ້ 6,9% ໃນ​ປີ 2017 ແລະ 7% ໃນ​ປີ 2018 ເພີ່ມ​ຂຶ້ນ​ຈາກ 6,8% ໃນ​ປີ 2016 ໃນ​ນັ້ນ​ຂະ­ແໜງ­ການ ບໍ­ລິ­ການ​ເປັນ​ຂະ­ແໜງ­ການ​ທີ່​ມີ​ການ ຂະ­ຫຍາຍ­ຕົວ​ທີ່​ເຂັ້ມ­ແຂງ​ກວ່າ​ໝູ່​ສະ­ເລ່ຍ 9% ເນື່ອງ​ຈາກ​ການ​ຂະ­ຫຍາຍ­ຕົວ​ຂອງ​ພາກ​ຂາຍ­ຍົກ-ຂາຍ­ຍ່ອຍ​ໂຮງ­ແຮມ ແລະ​ຮ້ານ​ອາ­ຫານ, ການ​ບໍ­ລິ­ການ​ດ້ານ​ການ​ເງິນ ແລະ​ໂທລະ​ຄົມ­ມະ­ນາ­ຄົມ, ສ່ວນ​ຂະ­ແໜງ​ອຸດ­ສາ­ຫະ­ກຳ​ຍັງ​ຮັກ­ສາ​ການ​ຂະ ຫຍາຍ​ຕົວ​ຄົງ​ທີ່ 8% ເຖິງ ແມ່ນ​ວ່າ​ຜົນ​ຜະ­ລິດ​ຈາກ​ການ​ຂຸດ​ຄົ້ນ​ບໍ່​ແຮ່​ໄດ້​ມີ​ການ​ຫຼຸດ​ລົງ​ແຕ່​ຂະ­ແໜງ­ການ​ນີ້​ເພີ່ມ​ຂຶ້ນ​ຈາກ​ຜົນຜະ­ລິດ​ກະ­ແສ​ໄຟ­ຟ້າ​ສຳ­ລັບ​ການ​ຂະ­ຫຍາຍຕົວ​ຂອງ​ຂະ­ແໜງ​ກະ­ສິ­ກຳ​ໄດ້​ເພີ່ມ​ຂຶ້ນ​ຈາກ 2% ໃນ​ປີ 2015 ມາ​ເປັນ 2,5% ໃນ​ປີ 2016.

ນອກ​ນີ້​ ການ​ຂາດ​ດຸນ​ບັນ­ຊີ​ແມ່ນ​ດີ​ຂຶ້ນ​ເລັກ​ນ້ອຍ​ຈາກ 16,8% ຂອງ​ຈີ​ດີ​ພີ ໃນ​ປີ 2015 ມາ​ເປັນ 14,1% ໃນ​ປີ 2016 ແຕ່​ຄາດ​ວ່າ​ຈະ​ເພີ່ມ​ຂຶ້ນ​ເຖິງ 19% ໃນ​ປີ​ນີ້ ແລະ 20% ໃນ​ປີ​ຖັດ​ໄປ​ຍ້ອນ​ຈະ​ມີ​ການ​ນຳ​ເຂົ້າ​ອຸ­ປະ­ກອນ​ກໍ່­ສ້າງ ແລະ​ເຄື່ອງ​ກົນ​ຈັກ​ຈຳ­ນວນ​ຫຼາຍ​ໃນ​ໂຄງ­ການ​ກໍ່­ສ້າງທາງ​ລົດ­ໄຟ​ລາວ-ຈີນ, ຂະ­ນະ​ດຽວ​ກັນຄັງ​ສຳ­ຮອງ​ເງິນ­ຕາ​ຕ່າງ­ປະ­ເທດ​ຄາດ​ຈະ​ມີ​ການ​ປັບ​ຕົວ​ຂຶ້ນ​ເລັກ​ນ້ອຍ​ໃນ​ມໍ່ໆ​ນີ້, ສ່ວນ​ທາງ​ດ້ານ​ອັດ­ຕາ​ເງິນ​ເຟີ້​ມີ​ແນວ​ໂນ້ມ​ທີ່​ຈະ​ເພີ່ມ​ຂຶ້ນ​ຈາກ 1,6% ໃນ​ປີ 2016 ເພີ່ມ​ຂຶ້ນ​ປະ­ມານ 2,5% ໃນ​ປີ 2017 ແລະ 3% ໃນ​ປີ 2018.

ທ່ານ ຢາ​ຊຸ​ຊິ ເນ​ກິ​ຊິ ກ່າວ​ຕື່ມ​ວ່າ: ເຖິງ​ແມ່ນ​ວ່າ­ການ​ຂະ­ຫຍາຍ­ຕົວ​ທາງ​ເສດ­ຖະ­ກິດ​ຂອງ ສປປ ລາວ ຈະ​ເພີ່ມ​ຂຶ້ນ ແຕ່​ວ່າ​ອັດ­ຕາ​ການ​ຫຼຸດ​ລົງ​ຂອງ​ຄວາມ­ທຸກ​ຍາກ​ຍັງ​ບໍ່​ໄດ້​ສັດ­ສ່ວນ​ກັບ​ການ​ຂະ­ຫຍາຍ­ຕົວ​ທາງເສດ­ຖະ­ກິດ, ການ​ກະ­ຈາຍ​ແຫຼ່ງ​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ​ໄປ​ສູ່​ການ​ຜະ­ລິດ ແລະ​ການ​ບໍ­ລິ­ການ​ທີ່​ໃຊ້​ແຮງ​ງານ​ຫຼາຍ​ຂຶ້ນ ຊຶ່ງ​ຖື​ວ່າ​ເປັນ​ກຸນ­ແຈ​ສຳ­ຄັນ​ທີ່​ເຮັດ​ໃຫ້­ການ​ຂະ­ຫຍາຍ­ຕົວ​ທົ່ວ​ເຖິງ.

ກອງ​ປະ­ຊຸມ​ເຜີຍ­ແຜ່​ບົດ​ລາຍ​ງານ​ການ​ຄາດ​ຄະ­ເນ​ການ​ພັດ­ທະ­ນາ​ຂອງ​ອາ­ຊີ​ປະ­ຈຳ​ປີ 2017 ໄດ້​ຈັດ​ຂຶ້ນ​ໃນ​ວັນ​ທີ 6 ເມ­ສາ​ຜ່ານ​ມາ​ໂດຍ​ມີ​ທ່ານ ຢາ​ຊຸ​ຊິ ເນ​ກິ​ຊິ ຜູ້­ຕາງ­ໜ້າ​ທະ­ນາ­ຄານ​ພັດ­ທະ­ນາ​ອາ­ຊີ​ປະ­ຈຳ ສປປ ລາວ, ມີ​ບັນ­ດາ​ພາກ­ສ່ວນ​ທີ່​ກ່ຽວ­ຂ້ອງ​ພ້ອມ​ດ້ວຍ​ບັນ­ດາ​ສື່​ມວນ​ຊົນ​ເຂົ້າ​ຮ່ວມ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.