ບໍ່​ຮັບ​ປະ­ທານ​ອາ­ຫານ​ເຊົ້າ​ສ່ຽງ​ຫຼາຍ​ພະ­ຍາດ

ພຶດ­ຕິ​ກຳ​ບໍ່​ຮັບ​ປະ­ທານ​ອາ­ຫານ​ເຊົ້າ​ເປັນ​ສາ­ເຫດ​ຂອງ​ບັນ­ຫາ​ສຸ­ຂະ­ພາບ​ເຊັ່ນ ພະ­ຍາດ​ເບົາ­ຫວານ ໄຂ­ມັນ​ສະ​ສົມ ພະ­ຍາດ​ຄວາມ­ດັນ­ເລືອດ­ສູງ ແລະ​ປະ­ລິ­ມານ​ໄຂ­ມັນ​ໃນ​ເລືອດ​ຜິດ​ປົກ­ກະ­ຕິ ທັງ​ນີ້ ຄື​ປັດ​ໄຈ​ສ່ຽງ​ຂອງ​ພະ­ຍາດ­ຫົວ­ໃຈ ແລະ​ຫຼອດ​ເລືອດ ເພື່ອ​ປ້ອງ​ກັນ​ບັນ­ຫາ​ດັ່ງ­ກ່າວ​ນັ້ນ ນັກ­ວິ­ຊາ­ການ​ໄດ້​ແນະ­ນຳ​ໃຫ້​ປັບ​ປ່ຽນ​ຮູບ​ແບບ​ການ​ໃຊ້​ຊີ­ວິດ​ປະ­ຈຳ​ວັນ ໂດຍ​ສະ­ເພາະ​ການ​ຮັບ​ປະ­ທານ​ອາ­ຫານ ຊຶ່ງ​ບໍ່​ໄດ້​ໝາຍ ເຖິງ​ເລື່ອງ​ຄຸນ­ຄ່າ​ທາງ​ດ້ານ​ໂພ­ຊະ​ນາ​ການ​ຂອງ​ອາ­ຫານ​ພຽງ​ຢ່າງ​ດຽວ​ທີ່​ມີ​ຄວາມ​ສຳ­ຄັນ ແຕ່​ລວມ​ເຖິງ ຊ່ວງ​ເວ­ລາ​ທີ່​ຮັບ​ປະ­ທານ​ອາ­ຫານ ເປັນ­ຕົ້ນ​ແມ່ນ​ການ​ຮັບ​ປະ­ທານ​ອາ­ຫານ​ຄາບ​ທຳ​ອິດ​ຂອງ​ມື້​ຫຼັງ​ຈາກ​ຕື່ນ​ນອນ ຊຶ່ງ​ເປັນ​ພາ­ວະ​ທີ່​ຮ່າງ­ກາຍ​ຢູ່​ໃນ​ຊ່ວງ​ອົດ​ອາ­ຫານ​ມາ​ເປັນ​ເວ­ລາ​ດົນ ແລະ​ການ​ອອກ­ກຳ­ລັງ​ກາຍ​ທີ່​ເໝາະ​ສົມ​ຢ່າງ​ສະ​ໝ່ຳ​ສະ­ເໝີ.

ຜົນ​ການ​ສຶກ​ສາ​ຈຳ­ນວນ​ຫຼາຍ​ໄດ້​ລາຍ​ງານ​ຜົນ​ຮັບ​ທີ່​ກົງ​ກັນ​ວ່າ ການ​ຮັບ​ປະ­ທານ​ອາ­ຫານ​ຄາບ ເຊົ້າ​ມີ​ຜົນ​ຕໍ່​ການ​ຫຼຸດ​ລະ­ດັບ​ນ້ຳ­ຕານ​ໃນ​ເລືອດ ແລະ​ຮໍ​ໂມນ​ທີ່​ຄວບ​ຄຸມ​ຄວາມ​ຫິວ ຄວາມ​ຢາກ​ອາ­ຫານ ຊ່ວຍ​ຮັກ­ສາ​ສົມ​ດຸນ​ໃນ​ການ​ຮັບ​ປະ­ທານ​ອາ­ຫານ ຫຼື ຄວບ​ຄຸມ​ບໍ່​ໃຫ້​ຮັບ​ປະ­ທານ​ອາ­ຫານ​ເກີນ​ຄວາມ​ຈຳ ເປັນ​ທີ່​ຮ່າງ­ກາຍ​ຕ້ອງ­ການ ພ້ອມ​ນີ້ ການ​ສຶກ​ສາ​ຂອງ​ສະ­ມາ­ຄົມ​ພະ­ຍາດ­ຫົວ­ໃຈ​ແຫ່ງ​ສະ­ຫະ­ລັດ​ອາ​ເມ​ຣິ​ກາ​ກໍ​ແນະ­ນຳ​ວ່າ ການ​ຮັບ​ປະ­ທານ​ອາ­ຫານ​ພະ­ລັງ­ງານ​ສູງ​ໃນ​ຕອນ​ເຊົ້າ​ມີ​ທ່າ​ອຽງ​ທີ່​ກໍ່­ໃຫ້­ເກີດ​ປະ­ໂຫຍດ ໃນ​ການ​ປ້ອງ​ກັນ​ພະ­ຍາດ­ຫົວ­ໃຈ ເບົາ­ຫວານ ແລະ​ຄວາມ­ດັນ­ເລືອດ­ສູງ.

ພ້ອມ​ນີ້ ການ​ສຶກ​ສາ​ຂອງ Irina Uzhova ແລະ​ຄະ­ນະ ຊຶ່ງ​ຖືກ​ຕີ​ພິມ​ລົງ​ໃນ​ວາ­ລະ­ສານ Journal of the American college of Cardiology ເມື່ອ​ປີ 2017 ໂດຍ​ໄດ້​ສຶກ​ສາ​ເຖິງ​ຄວາມ ສຳ­ຄັນ​ຂອງ​ການ​ຮັບ​ປະ­ທານ​ອາ­ຫານ​ເຊົ້າ​ກັບ​ການ​ເກີດ​ພະ­ຍາດ​ຫຼອດ​ເລືອດ​ແດງ​ແຂງ​ໃນ​ກຸ່ມ​ປະ­ຊາ ກອນ 4.052 ຄົນ ພົບ​ວ່າ ໃນ​ກຸ່ມ​ປະ­ຊາ­ຊົນ​ທີ່​ຮັບ​ປະ­ທານ​ອາ­ຫານ​ເຊົ້າ​ທີ່​ມີ​ພະ­ລັງ­ງານ​ສູງ​ກວ່າ 20% ຂອງ​ພະ­ລັງ­ງານ​ທີ່​ຄວນ​ໄດ້​ຮັບ​ຕະ­ຫຼອດ​ວັນ ຫຼື ຫຼາຍ​ກວ່າ 400 ກິ​ໂລ​ແຄ​ລໍ​ຣີ ໄດ້​ຮັບ​ປະ­ລິ­ມານ​ໃຍ​ອາ ຫານ  ປະ­ລິ­ມານ​ຜັກ ແລະ​ໝາກ​ໄມ້​ຫຼາຍ​ກວ່າ ຂະ­ນະ​ທີ່​ການ​ໄດ້​ຮັບ​ປະ­ລິ­ມານ​ນ້ຳ­ຕານ ໄຂ­ມັນ ແລະ​ເຄື່ອງ​ດື່ມ​ແອ​ລ​ກໍ​ຮອລ​ກໍ​ໜ້ອຍ​ກວ່າ ເມື່ອ​ທຽບ​ກັບ​ກຸ່ມ​ທີ່​ຮັບ​ປະ­ທານ​ອາ­ຫານ​ເຊົ້າ​ພະ­ລັງ­ງານ​ຕ່ຳ ແລະ​ກຸ່ມ​ທີ່​ບໍ່​ໄດ້​ຮັບ​ປະ­ທານ​ເລີຍ.

ດັ່ງ­ນັ້ນ ເຖິງ​ແມ່ນ​ວ່າ​ໃນ​ເວ­ລາ​ຕອນ​ເຊົ້າ​ແມ່ນ​ຈະ​ເປັນ​ຊ່ວງ​ເວ­ລາ​ທີ່​ເລັ່ງ​ດ່ວນ​ສຳ­ລັບ​ຫຼາຍໆ​ຄົນ ແລະ​ອາດ​ກາຍ­ເປັນ​ເຫດ­ຜົນ​ຂອງ​ການ​ປະ­ຕິ­ເສດ​ອາ­ຫານ​ເຊົ້າ ແຕ່​ເມື່ອ​ຮູ້​ເຖິງ​ຄວາມ​ສຳ­ຄັນ​ດັ່ງ​ທີ່​ຍົກ​ມາ ຂ້າງ​ເທິງ​ນັ້ນ­ແລ້ວ ກໍ​ຄວນ​ຫັນ​ມາ​ຮັບ​ປະ­ທານ​ອາ­ຫານ​ເຊົ້າ​ເຊັ່ນ ເຂົ້າ​ສຸກ​ຄຸນ​ນະ​ພາບ​ດີ ໄຂ່​ຕົ້ມ ຊີ້ນ​ສັດ ປຸງ​ສຸກ ຫຼື ອາດ​ຈະ​ເປັນ​ແຊນ​ວິ​ຊ ເຂົ້າ­ໜົມ​ປັງ​ທັນ​ຍະ​ພືດ​ກັບ​ນ້ຳ­ໝາກ​ໄມ້​ສົດ ຫຼື ນົມ ໂດຍ​ການ​ຮັບ​ປະ­ທານ​ອາ­ຫານ​ເຊົ້າ​ນອກ­ຈາກ​ຈະ​ຊ່ວຍ​ເລື່ອງ​ການ​ຄວບ​ຄຸມ​ປະ­ລິ­ມານ​ອາ­ຫານ​ລະ­ຫວ່າງ​ວັນ​ແລ້ວ ຍັງ ຖື​ເປັນ​ອາ­ຫານ​ບຳ­ລຸງ​ສະ­ໝອງ​ອີກ​ດ້ວຍ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.