ປທສ ຮ່ວມໄມໂຄຣຊອບ ສ້າງຄວາມເຂັ້ມແຂງຫັນສູ່ດີຈີຕອນ

ເນື່ອງ​ຈາ​ກວ່າ​ພາກ​ລັດ ເຫັນ​ໄດ້​ຄວາມ​ສຳ­ຄັນ​ຂອງ​ການ​ບໍ­ລິ­ຫານ​ລັດ ເພື່ອ​ຫັນ​ໄປ​ສູ່​ລະ­ບົບ​ທີ່​ທັນ​ສະ­ໄໝ​ຫຼາຍ​ຂຶ້ນ, ໃນ​ວັນ​ທີ 8 ທັນ­ວາ 2016 ທີ່​ນະ­ຄອນ­ຫຼວງ​ວຽງ​ຈັນ, ກະ­ຊວງ​ໄປ­ສະ­ນີ, ໂທລະ​ຄົມ­ມະ­ນາ­ຄົມ ແລະ​ການ​ສື່­ສານ (ປທສ) ໄດ້​ຮ່ວມ​ກັບ​ບໍ­ລິ­ສັດ​ໄມ​ໂຄຣ​ຊອບ (Microsoft) ຈັດ​ງານ​ສຳ​ມະ​ນາ​ກ່ຽວ​ກັບ ແນວ­ທາງ​ການ​ບໍ­ລິ­ຫານ​ລັດ ພາຍ​ໃຕ້​ຫົວ­ຂໍ້​ສ້າງ​ຄວາມ​ເຂັ້ມ­ແຂງ​ໃນ​ການ​ບໍ­ລິ­ຫານ​ລັດ ໂດຍ​ມີ​ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ ປທສ, ທ່ານ​ນາງ ມິ​ເຊວ ຊີມ​ມອນ ຜູ້­ອຳ­ນວຍ­ການ​ຝ່າຍ​ການ​ຕະ­ຫຼາດ, ບໍ­ລິ­ສັດ​ໄມ​ໂຄຣ​ຊອບ​ເຂດ​ອາ­ຊີ​ຕາ­ເວັນ​ອອກ​ສ່ຽງ​ໃຕ້ ແລະ​ທ່ານ ວິ ເວກ ປຸ​ທຸ​ໂຄດ ຜູ້­ອຳ­ນວຍ­ການ​ຝ່າຍ​ລັດ ບໍ­ລິ­ສັດ​ໄມ​ໂຄຣ​ຊອບ ເຂດ​ອາ­ຊີ​ປາ​ຊີ​ຟິກ, ພ້ອມ​ນັ້ນ ຍັງ​ມີ​ພາກ​ລັດ­ຖະ­ບານ, ເອ­ກະ​ຊົນ​ທັງ​ພາຍ​ໃນ ແລະ​ຕ່າງ­ປະ­ເທດ​ເຂົ້າ​ຮ່ວມ.

ທ່ານ ທັນ​ສະ­ໄໝ ກົມ​ມະ​ສິດ ໄດ້​ກ່າວ​ວ່າ: ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ແຕ່​ປີ 2016-2020, ພັກ-ລັດ​ເຮົາ​ໄດ້​ວາງ​ຄາດ­ໝາຍ​ຫັນ​ການ​ບໍ­ລິ­ຫານ​ລັດ​ໃຫ້​ເປັນ​ເອ​ເລັກ​ໂຕຣ​ນິກ​ທີ່​ທັນ​ສະ­ໄໝ ແລະ​ຍືນ​ຍົງ, ພ້ອມ​ທັງ​ສ້າງ​ເງື່ອນ­ໄຂ​ໃນ​ການ​ເຊື່ອມ​ໂຍງ​ເສດ­ຖະ­ກິດ​ກັບ​ພາກ​ພື້ນ ແລະ​ສາ­ກົນ​ກະ­ຊວງ ປທສ ຈຶ່ງ​ໄດ້​ຮ່ວມ​ກັບ​ບໍ­ລິ­ສັດ Microsoft ຈັດ​ງານ​ສຳ​ມະ​ນາGovernment Solutions ຄັ້ງ​ນີ້ ເພື່ອ​ເປັນ​ເວ­ທີ​ແລກ­ປ່ຽນ​ຄວາມ​ຮູ້, ປະ­ສົບ​ການ ແລະ​ທິດ​ທາງ​ໃນ​ການ​ພັດ­ທະ­ນາ, ການ​ຄຸ້ມ​ຄອງ​ບໍ­ລິ­ຫານ​ລັດ​ແບບ​ເອ​ເລັກ ໂຕຣ​ນິກ​ຂອງ​ບັນ­ດາ​ອົງ​ກອນ​ລັດ ແລະ​ພາກ​ທຸ­ລະ​ກິດ, ໃນ​ກອງ​ປະ­ຊຸມ​ສຳ​ມະ​ນາ​ເທື່ອ​ນີ້ ຜູ້​ເຂົ້າ​ຮ່ວມ​ໄດ້​ປຶກ­ສາ​ຫາ­ລື​ເຖິງ​ບັນ­ດາ​ກາ­ລະ​ໂອ­ກາດ ແລະ​ສີ່ງ​ທ້າ​ທາຍ​ຂອງ​ຍຸກ​ເສດ­ຖະ­ກິດ​ດິ​ຈິ​ຕອນ​ສຳ­ລັບ​ປະ­ເທດ​ທີ່​ກຳ­ລັງ​ພັດ­ທະ­ນາ, ພ້ອມ​ກັບ​ທາງ​ເລືອກ​ໃນ​ການ​ຄຸ້ມ​ຄອງ​ບໍ­ລິ­ຫານ​ລັດ​ດ້ວຍ​ເອ​ເລັກ​ໂຕ​ນິກ, ການ​ປູກ​ຈິດ​ສຳ­ນຶກ ແລະ​ການ​ຫັນ​ເປັນ​ລັດ​ທີ່​ທັນ​ສະ­ໄໝ ໂດຍ​ຈະ​ລວມ​ມີ​ນະ­ໂຍ­ບາຍ, ຄວາມ​ພ້ອມ​ທາງ​ດ້ານ​ພື້ນ­ຖານ​ໂຄງ​ລ່າງ ແລະ​ການ​ບໍ­ລິ­ການ. ທັງ​ນີ້​ຖານ​ດຽວ​ກັນ​ສາ­ມາດ​ນຳ​ໃຊ້​ຮ່ວມ​ກັນ ແນ­ໃສ່​ເພີ່ມ​ປະ­ສິດ­ທິ­ພາບ​ໃນ​ການ​ຄຸ້ມ​ຄອງ​ບໍ­ລິ­ຫານ, ຮັບ­ປະ­ກັນ​ດ້ານ​ຄວາມ​ປອດ​ໄພ ແລະ​ອຳ­ນວຍ​ຄວາມ​ສະ­ດວກ​ດ້ານ​ການ​ບໍ­ລິ­ການ​ໃຫ້​ແກ່​ປະ­ຊາ­ຊົນ​ໃນ​ການ​ເຂົ້າ​ເຖິງ​ຂໍ້​ມູນ, ຫຼຸດ​ຂັ້ນ​ຕອນ ແລະ​ຂະ​ບວນ​ການ​ໃນ​ການ​ດຳ­ເນີນ​ງານ, ສ້າງ​ສະ­ພາບ​ແວດ​ລ້ອມ​ທີ່​ອຳ­ນວຍ​ຄວາມ​ສະ­ດວກ​ໃຫ້​ພາກ​ທຸ­ລະ​ກິດ, ເສດ­ຖະ­ກິດ ແລະ​ອຸດ­ສາ­ຫະ­ກຳ ໂດຍ​ໃຫ້​ລັດ​ເປັນ​ຂົວ​ຕໍ່​ການ​ເຊື່ອມ​ໂຍງ.

ທ່ານ ນາງ ມິ​ເຊວ ຊິມ​ມອນ ໄດ້​ກ່າວ​ວ່າ: ນອກ­ຈາກ​ການ​ເຂົ້າ​ເຖິງ​ເຄື່ອງ­ມື​ທີ່​ເໝາະ​ສົມ, ເຮົາ​ຍັງ​ຕ້ອງ​ຮູ້​ວິ­ທີ​ການ​ໃນ​ການ​ນຳ​ໃຊ້​ຢ່າງ​ຖືກ­ຕ້ອງ ແລະ​ສິ່ງ​ສຳ­ຄັນ​ໃນ​ການ​ພັດ­ທະ­ນາ​ປະ­ເທດ​ລາວ​ໃນ­ຕໍ່­ໜ້າ​ແມ່ນ​ການ​ເພີ່ມ​ຄວາມ​ຮູ້​ຄວາມ​ສາ­ມາດ​ດ້ານ​ໄອ​ຊີ​ທີ​ໃຫ້​ແກ່​ປະ­ຊາ­ຊົນ, ຊຶ່ງ​ປະ­ຈຸ​ບັນ ພວກ​ເຮົາ​ກຳ­ລັງ​ເຮັດ​ວຽກ​ຮ່ວມ​ກັບ​ລັດ­ຖະ­ບານ ເພື່ອ​ສ້າງ​ບັນ­ດາ​ໂປຣ​ແກຣມ ແລະ​ແຜນ​ງານ​ສົ່ງ­ເສີມ​ຄວາມ​ຮູ້​ດ້ານ​ຕ່າງໆ ແລະ​ຊ່ວຍ​ສະ­ໜັບ­ສະ­ໜູນ​ໂຄງ­ການ​ການ​ສຶກ​ສາ​ດ້ວຍ​ການ​ນຳ​ໃຊ້​ຊັບ­ພະ­ຍາ­ກອນ​ທີ່​ເໝາະ​ສົມ ເພື່ອ​ເພີ່ມ​ທັກ​ສະ ແລະ​ຄວາມ​ຮູ້​ດ້ານ​ວິ­ທະ­ຍາ­ສາດ, ເຕັກ​ໂນ​ໂລ​ຊີ, ວິ­ສະ­ວະ­ກຳ ແລະ​ຄະ­ນິດ­ສາດ (STEM) ໃຫ້​ແກ່​ເຍົາ­ວະ​ຊົນ ແລະ​ໄວ​ໜຸ່ມ​ຢູ່​ທ້ອງ­ຖິ່ນ​ໃຫ້​ເຂົາ­ເຈົ້າ​ສາ­ມາດ​ປະ­ກອບ​ອາ­ຊີບ​ໃນ​ອະ­ນາ­ຄົດ​ສາ­ມາດ​ໃນ​ການ​ແຂ່ງ­ຂັນ​ທາງ​ທຸ­ລະ​ກິດ, ການ​ຜະ­ລິດ ແລະ​ການ​ບໍ­ລິ­ຫານ​ທີ່​ທັນ​ສະ­ໄໝ ໂດຍ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ເໝາະ​ສົມ ແລະ​ຮັບ­ປະ­ກັນ​ຄວາມ​ປອດ​ໄພ.

ທີ່ມາ: ເສດຖະກິດ-ສັງຄົມ

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.