ປະ­ດັບ​ຫຼຽນ​ໄຊ​ແຮງ​ງານ​ຜູ້​ມີ​ຜົນ­ງານ​ເດັ່ນ ຮັບ​ໃຊ້​ກອງ​ປະ­ຊຸມ​ອາ​ຊຽນ

ເພື່ອ​ເປັນ​ການ​ຍ້ອງ­ຍໍ​ຊົມ­ເຊີຍ​ແກ່​ຜູ້​ທີ່​ມີ​ຜົນ­ງານ​ດີ­ເດັ່ນ​ປະ­ກອບ­ສ່ວນ​ຊ່ວຍ​ໃຫ້­ການ​ເປັນ​ປະ­ທານ​ອາ​ຊຽນ ແລະ​ເປັນ ເຈົ້າ­ພາບ​ກອງ​ປະ­ຊຸມ​ສຸດ​ຍອດ​ອາ​ຊຽນ​ຄັ້ງ​ທີ 28-29 ແລະ​ບັນ­ດາ​ກອງ​ປະ­ຊຸມ​ສຸດ​ຍອດ​ທີ່​ກ່ຽວ­ຂ້ອງ​ຂອງ ສປປ ລາວ ໃນ​ປີ 2016 ສຳ­ເລັດ​ຢ່າງ​ຈົບ­ງາມ, ວັນ​ທີ 5 ເມ­ສາ 2017 ທີ່​ສູນ​ການ​ຮ່ວມ​ມື​ສາ­ກົນ ແລະ​ການ​ຝຶກ​ອົບ­ຮົມ, ນະ­ຄອນ­ຫຼວງ​ວຽງ​ຈັນ, ກະ­ຊວງ​ການ​ຕ່າງ­ປະ­ເທດ​ຮ່ວມ​ກັບ​ກະ­ຊວງ​ພາຍ​ໃນ​ຈັດ​ພິ­ທີ​ສະ­ຫຼຸບ, ຍ້ອງ­ຍໍ​ຊົມ­ເຊີຍ​ຜົນ​ສຳ ເລັດ​ດັ່ງ­ກ່າວ ແລະ​ປະ­ດັບ​ຫຼຽນ​ໄຊ​ແຮງ​ງານ​ຂຶ້ນ, ໂດຍ​ໃຫ້​ກຽດ​ເປັນ​ປະ­ທານ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ​ລັດ ຖະ​ມົນ­ຕີ, ມີ​ບັນ­ດາ​ລັດ­ຖະ­ມົນ­ຕີ, ຮອງ​ລັດ­ຖະ­ມົນ­ຕີ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ໂອ­ກາດ​ນີ້ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ຂຶ້ນ​ສະ­ຫຼຸບ​ລາຍ​ງານ​ການ​ເປັນ​ປະ­ທານ​ອາ​ຊຽນ​ຂອງ ສປປ ລາວ ໃນ​ປີ 2016 ກໍ​ຄື​ການ​ເປັນ​ເຈົ້າ­ພາບ ແລະ​ປະ­ທານ​ກອງ​ປະ­ຊຸມ​ສຸດ​ຍອດ​ອາ​ຊຽນ​ຄັ້ງ​ທີ 28 ແລະ 29 ແລະ​ບັນ­ດາ​ກອງ​ປະ­ຊຸມ​ສຸດ​ຍອດ​ທີ່​ກ່ຽວ­ຂ້ອງ ຊຶ່ງ​ໄດ້​ຕີ​ລາ­ຄາ​ວ່າ​ມີ​ຜົນ­ສຳ­ເລັດ​ຢ່າງ​ຈົບ­ງາມ ແລະ​ຮອບ­ດ້ານ​ທັງ​ທາງ​ດ້ານ​ເນື້ອ​ໃນ, ການ­ຈັດ­ຕັ້ງ-ພິ­ທີ­ການ, ດ້ານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ, ການ­ເມືອງ, ເສດ­ຖະ­ກິດ ແລະ​ວັດ­ທະ­ນະ­ທຳ-ສັງ­ຄົມ, ທ່ານ​ຍັງ​ຊີ້ ໃຫ້​ເຫັນ​ວ່າ​ບັນ­ດາ​ຜົນ­ສຳ­ເລັດ​ທີ່​ຍາດ​ມາ ໄດ້​ທັງ​ໝົດ​ນີ້ ສ່ວນ​ໜຶ່ງ​ແມ່ນ​ຍ້ອນ​ພວກ​ເຮົາ​ໄດ້​ຮັບ​ການ​ຮ່ວມ​ມື, ການ​ສະ­ໜັບ­ສະ­ໜູນ ແລະ​ການ​ຊ່ວຍ­ເຫຼືອ​ຈາກ​ບັນ­ດາ​ປະ ເທດ​ສະ­ມາ­ຊິກ​ອາ​ຊຽນ, ຄູ່​ເຈລະ­ຈາ​ກໍ​ຄື​ຄູ່​ຮ່ວມ​ມື​ພາຍ​ນອກ, ປະ­ເທດ​ເພື່ອນ​ມິດ ແລະ​ອົງ​ການ­ຈັດ­ຕັ້ງ​ພາກ​ພື້ນ ແລະ​ສາ ກົນ, ແຕ່​ອັນ​ສຳ­ຄັນ​ທີ່​ສຸດ​ແມ່ນ​ຍ້ອນ​ການ ຊີ້​ນຳໆ​ພາ​ຢ່າງ​ໃກ້­ຊິດ ແລະ​ທັນ​ການ​ຂອງ​ພັກ-ລັດ ໂດຍ​ສະ­ເພາະ​ແມ່ນ​ກົມ​ການ­ເມືອງ​ສູນ​ກາງ​ພັກ ແລະ​ຄວາມ​ປຸ້ມ­ລຸມ​ສາ­ມັກ­ຄີ, ຄວາມ​ເສຍ­ສະ­ຫຼະ, ນ້ຳ­ໃຈ​ຮັບ­ຜິດ­ຊອບ​ສູງ​ຂອງ​ບັນ­ດາ​ຄະ­ນະ​ອາ​ນຸ​ກຳ ມະ​ການ ກໍ​ຄື​ພະ­ນັກ­ງານ, ທະ­ຫານ, ຕຳ­ຫຼວດ ລວມ​ໄປ​ເຖິງ​ນັກ­ທຸ­ລະ­ກິດ, ປວງ​ຊົນ​ລາວ​ທີ່​ໄດ້​ຕັ້ງ­ໜ້າ​ປະ­ກອບ­ສ່ວນ​ຢ່າງ ຫ້າວ­ຫັນ​ຕາມ​ພາ­ລະ​ໜ້າ­ທີ່​ຂອງ​ຕົນ ແລະ​ຮ່ວມ​ແຮງ​ຮ່ວມ​ໃຈ​ກັນ​ເປັນ​ເຈົ້າ­ພາບ​ທີ່​ດີ​ອັນ​ໄດ້​ເຮັດ​ໃຫ້​ປະ­ສົບ​ຜົນ­ສຳ­ເລັດ​ຢ່າງ ຈົບ­ງາມ​ໃນ​ທຸກ​ດ້ານ​ຄື​ດັ່ງ­ກ່າວ, ດ້ວຍ​ເຫດ​ນີ້​ພັກ ແລະ​ລັດ­ຖະ­ບານ ຈິ່ງ​ສະ­ແດງ​ຄວາມ​ຂອບ­ໃຈ​ຢ່າງ​ຈິງ​ໃຈ ແລະ​ຍ້ອງ­ຍໍ​ຊົມ­ເຊີຍ​ຕໍ່​ການ​ປະ­ກອບ­ສ່ວນ​ທີ່​ສຳ­ຄັນ ຂອງ​ທຸກ​ພາກ­ສ່ວນ.

ໂອ­ກາດ​ດັ່ງ­ກ່າວ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ໃຫ້​ກຽດ​ຂຶ້ນ​ປະ­ດັບ​ຫຼຽນ​ໄຊ​ແຮງ​ງານ​ຊັ້ນ II ແລະ​ຊັ້ນ III, ສ່ວນ​ທ່ານ​ລັດ­ຖະ­ມົນ­ຕີ​ກະ­ຊວງ ການ​ຕ່າງ­ປະ­ເທດ​ກໍ​ໄດ້​ໃຫ້​ກຽດ​ປະ­ດັບ​ຫຼຽນ​ໄຊ​ແຮງ​ງານ ແລະ​ມອບ​ໃບ​ຍ້ອງ­ຍໍ​ລັດ­ຖະ­ບານ​ໃຫ້​ແກ່​ບັນ­ດາ​ຜູ້​ທີ່​ມີ​ຜົນ­ງານ​ດີ­ເດັ່ນ​ປະ­ກອບ­ສ່ວນ​ຊ່ວຍ​ໃຫ້­ການ​ເປັນ​ປະ­ທານ​ອາ​ຊຽນ ແລະ​ເປັນ​ເຈົ້າ­ພາບ​ກອງ​ປະ­ຊຸມ​ສຸດ​ຍອດ​ອາ​ຊຽນ​ຄັ້ງ​ທີ 28-29 ແລະ​ບັນ­ດາ​ກອງ​ປະ­ຊຸມ​ສຸດ​ຍອດ​ທີ່​ກ່ຽວ­ຂ້ອງ​ຂອງ ສປປ ລາວ ໃນ​ປີ 2016 ໄດ້​ຮັບ​ຜົນ­ສຳ­ເລັດ​ຢ່າງ​ຈົບ­ງາມ ແລະ​ຮອບ­ດ້ານ.

ພ້ອມ​ດຽວ​ກັນ​ນີ້ ທ່ານ ທອງ​ລຸນ ສີ​ສຸ​ລິດ ຍັງ​ໄດ້​ມີ​ຄຳ​ເຫັນ ແລະ​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ຂອງ ສປປ ລາວ ໃນ​ການ​ເປັນ​ເຈົ້າ­ພາບ ແລະ​ປະ­ທານ​ອາ​ຊຽນ​ໃນ ປີ 2016, ຊຶ່ງ​ເປັນ​ການ​ຍົກ​ສູງ​ພາ­ລະ​ບົດ­ບາດ​ຂອງ​ປະ­ເທດ​ລາວ​ໃນ​ເວ­ທີ​ພາກ​ພື້ນ ແລະ​ສາ­ກົນ​ໃຫ້​ສູງ​ເດັ່ນ​ຂຶ້ນ, ນອກ​ນີ້ ທ່ານ​ນາ­ຍົກ​ຍັງ​ໄດ້​ຊຸກ­ຍູ້​ໃຫ້​ພາກ­ສ່ວນ​ທີ່​ກ່ຽວ ຂ້ອງ​ພ້ອມ​ກັນ​ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ຜົນ­ສຳ­ເລັດ​ຂອງ​ກອງ​ປະ­ຊຸມ​ດັ່ງ­ກ່າວ ລວມ​ທັງ​ຜົນ​ຂອງ​ການ​ຕົກ­ລົງ​ສອງ​ຝ່າຍ​ໃຫ້​ເປັນ​ຮູບ​ປະ​ທຳ ເພື່ອ​ນຳ​ຜົນ​ປະ­ໂຫຍດ​ອັນ​ສູງ​ສຸດ​ຕົວ​ຈິງ​ມາ­ສູ່​ປະ­ເທດ​ເຮົາ, ຕອນ​ທ້າຍ​ພິ­ທີ​ທ່ານ​ນາ­ຍົກ­ລັດ­ຖະ­ມົນ­ຕີ ໂດຍ​ຕາງ­ໜ້າ​ພັກ ແລະ​ລັດ­ຖະ­ບານ​ຍັງ ໄດ້​ສະ­ແດງ​ຄວາມ​ຂອບ­ໃຈ​ຢ່າງ​ຈິງ​ໃຈ ແລະ​ຍ້ອງ­ຍໍ​ຊົມ­ເຊີຍ​ທຸກ​ທ່ານ​ທີ່​ໄດ້​ຕັ້ງ­ໜ້າ​ປະ­ກອບ­ສ່ວນ​ຢ່າງ​ຫ້າວ­ຫັນ​ຕາມ​ພາ­ລະ​ໜ້າ­ທີ່​ຂອງ​ຕົນ​ອັນ​ເຮັດ​ໃຫ້­ການ​ເປັນ​ເຈົ້າ­ພາບ ແລະ​ປະ­ທານ​ອາ​ຊຽນ ຂອງ ສປປ ລາວ ໃນ​ປີ 2016 ໄດ້​ຮັບ​ຜົນ­ສຳ­ເລັດ​ຢ່າງ​ຈົບ­ງາມ.

ສຳ­ລັບ ບັນ­ດາ​ບົດ­ຮຽນ​ໃນ​ການ​ເປັນ​ປະ­ທານ​ອາ​ຊຽນ​ໃນ​ປີ 2016 ເປັນ​ພື້ນ­ຖານ​ອັນ​ສຳ­ຄັນ​ແກ່ ສປປ ລາວ ເພື່ອ​ກະ­ກຽມ​ໃຫ້​ແກ່​ການ​ເປັນ​ປະ­ທານ​ອາ​ຊຽນ​ຄັ້ງ​ທີ 3 ໃນ​ປີ 2024 ກໍ​ຄື ການ​ເປັນ​ປະ­ທານ​ກອງ​ປະ­ຊຸມ​ພາກ​ພື້ນ ແລະ​ສາ­ກົນ​ອື່ນໆ ໄດ້​ຮັບ​ຜົນ­ສຳ­ເລັດ​ທີ່​ຍິ່ງ​ໃຫຍ່​ກວ່າ​ເກົ່າ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.