ປີ​ໃໝ່​ລາວ​ປີ​ນີ້ ຢູ່​ຫາດ​ດອນ​ຈັນ​ຈະ​ເກັບ​ປີ້​ເຂົ້າ​ຊົມ 10 ພັນ​ກີບ

ປີ 2016 ຜ່ານ​ມາ ຫຼາຍ​ຄົນ​ຄົງ​ໄດ້​ໄປ​ສຳ­ຜັດ​ກັບ​ສະ­ຖານ­ທີ່​ເຂດ​ຫາດ​ຊາຍ​ດອນ​ຈັນ ເຊິ່ງ​ມີ​ຫຼາຍ​ກິດ­ຈະ­ກຳ​ຫຼາຍ​ຢ່າງ​ຕັ້ງ­ແຕ່​ງານ​ປະ­ຕິ­ມາ​ກຳ​ຊາຍ, ງານ​ປະ​ກວດ​ນາງ​ສາວ​ຊີ​ເອັນ​ພີ, ງານ​ວາງ­ສະ­ແດງ​ສິນ­ຄ້າ, ຄອນ­ເສີດ​ນັກ​ຮ້ອງ​ທີ່​ມີ​ຊື່​ສຽງ​ຈາກ​ປະ­ເທດ​ເພື່ອນ​ບ້ານ ແລະ ກິດ­ຈະ­ກຳ​ອື່ນ​ທີ່​ປິດ​ອ້ອມ​ຕະ­ຫຼອດ​ເທດ­ສະ­ການ​ປີ​ໃໝ່​ປີ­ຜ່ານ­ມາ ຕົກ​ມາ​ປີ​ນີ້​ກໍ່​ເຊັ່ນ​ກັນ​ທັງ ບໍ­ລິ­ສັດ ຊີ​ເອັນ​ພີ ຜູ້​ຮັບ​ເໝົາ​ຈັດ​ແຈງ​ສະ­ຖານ­ທີ່​ເຂດ​ຫາດ​ດອນ​ຈັນ​ໃນ​ເນື້ອ­ທີ່​ລວງ​ຍາວ​ປະ­ມານ 500 ແມັດ​ໃຫ້​ກາຍ­ເປັນ​ສະ­ຖານ­ທີ່​ຈັດ​ກິດ­ຈະ­ກຳ​ຕ່າງໆ​ໃນ​ມື້​ງານ​ທີ 13 ຫາ 16 ເມ­ສາ ທີ່​ຈະ​ເຖິງ​ນີ້.

ສຳ­ລັບ​ການ​ກໍ່­ສ້າງ​ຕົກ­ແຕ່ງ​ມາ​ຮອດ​ປັດ­ຈຸ­ບັນ​ສຳ­ເລັດ​ແລ້ວ​ປະ­ມານ 50% ສ່ວນ​ກິດ­ຈະ­ກຳ​ຕະ­ຫຼອດ​ງານ​ຈະ​ເນັ້ນ​ປະ­ເພດ​ການ​ແຂ່ງ­ຂັນ​ກີ­ລາ​ປະ­ເພດ​ພື້ນ​ບ້ານ​ເປັນ​ຫຼັກ ໂດຍ​ທາງ​ບໍ­ລິ­ສັດ​ຈັດ​ເງິນ​ລາ­ງວັນ​ຊະ­ນະ​ເລີດ​ໄວ​ທີ່ 5 ລ້ານ​ກີບ.

ພ້ອມ​ນີ້, ຍັງ​ໄດ້​ເນັ້ນ​ການ​ຕົກ­ແຕ່ງ​ສະ­ຖານ­ທີ່​ແບບ​ຊົງ​ລາວ ເຊິ່ງ​ແຕກ​ຕ່າງ​ຈາກ​ປີ­ຜ່ານ­ມາ​ທີ່​ໄດ້​ມີ​ການ​ສ້າງ​ງານ​ສີ­ມື​ປະ­ຕິ­ມາ​ກຳ​ຊາຍ​ຂຶ້ນ ເຊິ່ງ​ໄດ້​ສ້າງ​ແຮງ​ຈູງ​ໃຈ​ໃຫ້​ກັບ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ໄດ້​ເຂົ້າ​ຊົມ​ເປັນ​ຈຳ​ຫຼາຍ​ແສນ​ຄົນ ສ່ວນ​ປີ​ນີ້​ຈຸດ­ປະ­ສົງ​ຫຼັກ​ແມ່ນ​ຈະ​ເນັ້ນ​ສົ່ງ­ເສີມ​ຮີດ­ຄອງ​ປະ­ເພ­ນີ​ລາວ​ໃຫ້​ສັງ­ຄົມ​ລາວ ແລະ ຊາວ​ຕ່າງ​ຊາດ​ໄດ້​ເຫັນ​ຄວາມ​ອຸ­ດົມ​ຮັ່ງ­ມີ​ທາງ​ດ້ານ​ປະ­ເພ­ນີ​ລາວ.

ຈາກ​ການ​ໃຫ້​ສຳ­ພາດ​ຂອງ ທ່ານ ນາງ ຈັນ​ນະ­ພາ ວົງ​ສະ​ມໍ​ຣະ​ພູມ ປະ­ທານ​ກຸ່ມ​ບໍ­ລິ­ສັດ ຊີ​ເອັນ​ພີ ( CNP ) ຂາ​ເຂົ້າ – ຂາ​ອອກ ຈຳ­ກັດ ໃຫ້​ສຳ­ພາດ​ວ່າ: ສຳ­ລັບ​ເຂດ​ທີ່​ທາງ​ບໍ­ລິ­ສັດ​ຈັດ​ສັນ​ມີ​ເນື້ອ­ທີ່​ລວງ​ຍາວ​ປະ­ມານ 500 ແມັດ​ລຽບ​ຕາມ​ແຄມ​ນ້ຳ­ຂອງ ເຊິ່ງ​ຈະ​ໄດ້​ຈັດ​ສັນ​ເປັນ​ແຕ່​ລະ​ຈຸດ (A,B,C,D..) ຈະ​ມີ​ໂຊນ ວີ​ໄອ​ພີ ແບບ​ຄອບ­ຄົວ, ໂຊນ​ຖ່າຍ­ຮູບ, ໂຊນ​ອາ­ຫານ, ໂຊນ​ບັນ­ເທີງ, ໂຊນ​ກີ­ລາ ແລະ ຊວນ​ຫຼິ້ນ​ນ້ຳ ເຫຼົ່າ​ນີ້​ເປັນ­ຕົ້ນ. ໃນ​ນີ້, ຈະ​ມີ​ກິດ­ຈະ­ກຳ ເຊັ່ນ: ຕົບ​ພະ­ທາດ​ຊາຍ, ຕີ­ໄກ່, ມວຍ​ນ້ຳ, ກະ­ຕໍ້​ຫາດ​ຊາຍ ແລະ ກີ­ລາ​ພື້ນ​ບ້ານ​ອີກ​ຫຼາຍ​ຢ່າງ ເຊິ່ງ​ແຕ່​ລະ​ປະ­ເພດ​ກີ­ລາ​ທາງ​ບໍ­ລິ­ສັດ​ໄດ້​ວາງ­ເງິນ​ລາ­ງວັນ​ຊະ­ນະ​ເລີດ​ໄວ້​ທີ່ 5 ລ້ານ​ກີບ.

ທ່ານ​ຍັງ​ໃຫ້​ຮູ້​ຕື່ມ​ວ່າ: ເພື່ອ​ຮ່ວມ​ເປັນ​ການ​ຮ່ວມ​ແຮງ​ຮ່ວມ​ໃຈ​ກັນ​ໃນ​ການ​ຊຸກ­ຍູ້​ສົ່ງ­ເສີມ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ລາວ​ເຮົາ​ເຊີນ­ຊວນ​ປະ­ຊາ­ຊົນ​ລາວ ໂດຍ​ສະ­ເພາະ​ຊາວ​ນະ­ຄອນ­ຫຼວງ ເຂົ້າ​ໄປ​ຮ່ວມ​ທ່ຽວ​ຊົມ​ກິດ­ຈະ­ການ​ໃນ​ງານ​ດັ່ງ­ກ່າວ​ຕະ­ຫຼອດ​ໄລ­ຍະ​ປີ​ໃໝ່​ລາວ​ນີ້​ສ່ວນ​ປີ້​ເຂົ້າ​ຊົມ​ແມ່ນ 10 ພັນ​ກີບ​ເທົ່າ​ນັ້ນ.

ຂ່າວ: ເສດຖະກິດ-ການຄ້າ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.