ປູ​ເປ້ ຄວ້າ​ແຊັມ​ຍິງ​ດ່ຽວ 12 ປີ ເທັນ​ນິ​ສ​ພັດ­ທະ­ນາ​ສີ­ມື ຄັ້ງ​ທີ 1

ນາງ ອາລີຍາ ວົງດາລາ ຫຼື ປູເປ້ ນັກເທັນນິສຍິງດ່ຽວຮຸ່ນອາຍຸບໍ່ເກີນ 12 ປີ ມື 1 ຂອງ ສປປ ລາວ ຈາກສະໂມສອນເທັນນິສນະຄອນຫຼວງ ສ້າງຜົນງານໄດ້ໂດດເດັ່ນ ບໍ່ວ່າຈະເປັນທັງພາຍໃນ ແລະ ຕ່າງປະເທດ, ຫຼ້າສຸດສາມາດເອົາຊະນະ ນາງ ທິບພະສອນ ປານສີວົງໄຊ ຫຼື “ ມ້ອນ ” 2 – 0 ເຊັດ ໃນຮອບຊີງຊະນະເລີດເມື່ອວັນທີ 26 ມີນາ ທີ່ຜ່ານມາ ຄວ້າແຊັມການແຂ່ງຂັນເທັນນິສເຍົາວະຊົນເພື່ອພັດທະນາສີມື ຄັ້ງທີ 1 ສ້າງຂະບວນການຄຳນັບຮັບຕ້ອນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 62 ປີ.

ສະຫະພັນເທັນນິສແຫ່ງຊາດລາວ ໄດ້ຈັດການແຂ່ງຂັນເທັນນິສເຍົາວະຊົນເພື່ອພັດທະນາສີມື ຄັ້ງທີ 1 ລະຫວ່າງວັນທີ 25 – 26 ມີນາຜ່ານມາ ທີ່ສະໜາມເທັນນິສເຈົ້າອານຸວົງ ນະຄອນຫຼວງວຽງຈັນ ເພື່ອສ້າງຂະບວນການຄຳນັບຮັບຕ້ອນວັນສຳຄັນຕ່າງໆຂອງຊາດ ໂດຍສະເພາະວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ ( 22 ມີນາ 1955 – 22 ມີນາ 2017 ) ທີ່ໝູນວຽນມາບັນຈົບຄົບຮອບອີກວາລະໜຶ່ງໃຫ້ມີບັນຍາກາດຟົດຟື້ນມ່ວນຊື່ນ ແລະ ມີຄວາມໝາຍສຳຄັນຍິ່ງຂຶ້ນໃນທົ່ວພັກ – ທົ່ວລັດ ແລະ ທົ່ວປວງຊົນລາວທັງຊາດ ກໍ່ຄືປະຊາຊົນຊາວນະຄອນຫຼວງວຽງຈັນ.

ໂດຍໃຫ້ກຽດເຂົ້າຮ່ວມ ແລະ ມອບລາງວັນໂດຍ ທ່ານ ດາວວອນ ພະຈັນທະວົງ ປະທານສະຫະພັນເທັນນິສແຫ່ງຊາດລາວ ພ້ອມດ້ວຍຄະນະຮັບຜິດຊອບຈັດການແຂ່ງຂັນ, ຄະນະນຳ, ຄູຝຶກ, ນັກກີລາ ແລະ ແຂກທີ່ຖືກເຊີນ ເຊິ່ງການແຂ່ງຂັນເທັນນິສໃນຄັ້ງນີ້ມີການຊີງໄຊທັງໝົດ 6 ຮຸ່ນ ປະກອບດ້ວຍຮຸ່ນມືໃໝ່, ຊາຍດ່ຽວອາຍຸບໍ່ເກີນ 8 ປີ, ຍິງດ່ຽວອາຍຸບໍ່ເກີນ 10 ປີ, ຊາຍດ່ຽວອາຍຸບໍ່ເກີນ 10 ປີ, ຊາຍດ່ຽວອາຍຸບໍ່ເກີນ 12 ປີ ແລະ ຍິງດ່ຽວອາຍຸບໍ່ເກີນ 12 ປີ.

ໂດຍຮຸ່ນທີ່ໜ້າສົນໃຈຕ້ອງຍົກໃຫ້ປະເພດຍິງດ່ຽວອາຍຸບໍ່ເກີນ 12 ປີ ມີນັກກີລາເຂົ້າຮ່ວມຊີງໄຊພຽງ 2 ຄົນ ( ເບີ 1 ແລະ ເບີ 2 ຂອງນັກເທັນນິສເຍົາວະຊົນລາວ ) ຄື: ນາງ ອາລີຍາ ວົງດາລາ ຫຼື ປູເປ້ ຈາກສະໂມສອນເທັນນິສນະຄອນຫຼວງ ພົບກັບ ນາງ ທິບພະສອນ ປານສີວົງໄຊ ຫຼື ມ້ອນ ໂດຍແຂ່ງຂັນພຽງແມັດດຽວ, ຖ້າຫາກໃຜເປັນຝ່າຍຊະນະກໍ່ຈະໄດ້ແຊັມໄປຄອງທັນທີ.

ຜ່ານການແຂ່ງຂັນໃນເຊັດທຳອິດຜົນປະກົດວ່າ ປູເປ້ ຫຼິ້ນໄດ້ດີກວ່າເອົາຊະນະ ມ້ອນ ໄປຂາດລອຍໄປກ່ອນ 6 – 1 ຄະແນນ ແລະ ໃນເຊັດທີ 2 ກໍ່ຍັງເປັນ ປູເປ້ ທີ່ອາໄສປະສົບການ ແລະ ສີມືທີ່ເໜືອກວ່າໄລ່ເອົາຊະນະໄປໄດ້ 6 – 3 ຄະແນນ ເຮັດໃຫ້ ປູເປ້ ເປັນຝ່າຍຊະນະ ມ້ອນ ໄປໄດ້ແບບສະບາຍ 2 – 0 ເຊັດ ຄວ້າແຊັມລາຍການນີ້ໄປຄອງໄດ້ຕາມ ຄວາມຄາດໝາຍ. ຢ່າງໃດກໍ່ຕາມ, ສຳລັບລາຍການຕໍ່ໄປຂອງ ປູເປ້ ແມ່ນຈະເດີນທາງໄປຮ່ວມແຂ່ງຂັນເທັນນິສລາຍການ TOP 10/12 Bressuire ທີ່ປະເທດຝຣັ່ງ ລະ ຫວ່າງວັນທີ 8 – 27 ເມສາ 2017 ແລະ ລາຍການ VILAS CUP U12 ທີ່ປະເທດແອັດສະປາຍ.

ສ່ວນຊະນະເລີດຮຸ່ນມືໃໝ່ເປັນຂອງ ນາງ ອານຸລັກ ແລະ ຮອງຊະນະເລີດເປັນຂອງ ນາງ ມີນາມາຍ; ດ່ຽວຊາຍອາຍຸບໍ່ເກີນ 8 ປີ ຊະນະເລີດເປັນຂອງ ທ້າວ ໄຊສະຫວັນ, ຮອງຊະນະເລີດເປັນຂອງ ທ້າວ ອາຄົມແສງ ແລະ ອັນດັບ 3 ເປັນຂອງ ທ້າວ ອານົນ; ດ່ຽວຍິງອາຍຸບໍ່ເກີນ 10 ປີ ຊະນະເລີດເປັນຂອງ ນາງ ຈິນທິດາ, ຮອງຊະນະເລີດເປັນຂອງ ນາງ ທິລະດາ ແລະ ອັນດັບ 3 ເປັນຂອງ ນາງ ອານຸລັກ; ຮຸ່ນດ່ຽວຊາຍອາຍຸບໍ່ເກີນ 10 ປີ ຊະນະເລີດເປັນຂອງ ທ້າວ ອາຄົມສິນ, ຮອງຊະນະເລີດເປັນຂອງ ທ້ວ ສານຸຄົມ ແລະ ອັນດັບ 3 ເປັນຂອງ ທ້າວ ໄຊສະຫວັນ; ດ່ຽວຊາຍອາຍຸບໍ່ເກີນ 12 ປີ ຊະນະເລີດເປັນຂອງ ທ້າວ ເພັດນະສອນ, ຮອງຊະນະເລີດເປັນຂອງ ທ້າວ ສົມພອນ ແລະ ອັນດັບ 3 ເປັນຂອງ ທ້າວ ເດວິດ.

ຂ່າວ: ເສດຖະກິດ-ການຄ້າ

 

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.