ຜູ້ນຳ​ຫວຽດນາມ​ຊີ້​ບັນຫາ​ເສດຖະກິດ​ປະ​ເທດ

ທ່ານ ຫງວຽນ ຊວນ​ຟຸກ ນາຍົກລັດຖະມົນຕີຂອງຫວຽດນາມ ​ເປີດ​ເຜີຍ​ວ່າ ​ເສດຖະກິດ​ຂອງ​ປະ​ເທດ​ກຳລັງ​ປະ​ເຊີນ​ກັບ​ສິ່ງ​ທ້າ​ທາຍ​ຫຼາຍ​ດ້ານ ​ໂດຍ​ສະ​ເພາະຕົວ​ເລກ​ລວມຍອດ​ຜະລິ​ຕະພັນ​ພາຍ​ໃນ (ຈີ​ດີ​ພີ) ທີ່​ຂະຫຍາຍຕົວ​ຕໍ່າ​ສຸດ​ຢູ່​ທີ່ 5,1% ​ໃນ​ໄຕ​ມາດ​ທຳ​ອິດ​ຂອງ​ປີ​ນີ້ ​ເຊັ່ນ​ດຽວ​ກັບ​ການ​ລົງທຶນ​ພາກ​ລັດ​ທີ່​ຕໍ່າ​ກວ່າ​ເມື່ອ​ປຽບທຽບ​ກັບ​ໄລຍະ​ດຽວ​ກັນ​ຂອງ​ປີ​ທີ່​ຜ່ານ​ມາ ຜູ້ນຳ​ຫວຽດນາມ​ຮຽກຮ້ອງ​ໃຫ້​ບັນ​ດາ​ລັດຖະມົນຕີ​ຮັກສາ​ອັດຕາ​ການ​ຂະຫຍາຍຕົວ​ທາງ​ເສດຖະກິດ​ເອົາ​ໄວ້​ໃຫ້​ໄດ້ລວມທັງ​ຄວບ​ຄຸມ​ອັດຕາ​ເງິນ​ເຟີ້.

ສຳນັກ​ຂ່າວສານ​ຫວຽດນາມ​ລາຍ​ງານ​ວ່າ ທ່ານ​ຮອງ​ລັດ​ຖະ​ມົນ​ຕີ ດາວກວາງ​ທູ ຂອງ​ຫວຽດນາມກ່າວ​ວ່າ: “ໃນ​ໄຕ​ມາດ 1 ສະ​ພາບ​ແວດ​ລ້ອມ​ດ້ານ​ເສດ​ຖະ​ກິດ​ມະ​ຫາ​ພາກ​ສືບ​ຕໍ່​ມີ​ຄວາມ​ເປັນ​ປົກ​ກະ​ຕິ, ບັນ​ດາ​ຄວາມ​ດຸ່ນ​ດ່ຽງ​ໃຫ​ຍ່​ຂອງ​ພື້ນ​ຖານ​ເສດ​ຖະ​ກິດ​ສືບ​ຕໍ່​ໄດ້​ຮັບ​ປະ​ກັນ, ພິ​ເສດ​ແມ່ນ​ຄວາມ​ດຸ່ນ​ດ່ຽງກ່ຽວ​ກັບ​ການ​ເງິນ​ງົບ​ປະ​ມານ. ເຖິງວ່າ ​ລະ​ດັບ​ສະ​ເລ່ຍ​ຂອງໄພ​ເງິນ​ເຟີ້ຍັງ​ສູງກວ່າ​ລະ​ດັບ​​ໂດຍສະ​ພາ​ແຫ່ງ​ຊາດ​ກຳ​ນົດ​ກໍ​ຕາມ ແຕ່​ໄພ​ເງິນ​ເຟີ້​ໃນ​ໄຕ​ມາດ 1 ​ຕົ້ນ​ຕໍ​ແມ່ນ​ຍ້ອນ​ຄວາມ​ເປັນ​ເຈົ້າ​ການ​ໃນ​ການ​ເພີ່ມ​ລາ​ຄາບໍ​ລິ​ການ​ສາ​ທາ​ລະ​ນະ​ສຸກ ແລະ ການ​ສຶກ​ສາ​ໃນ​ເດືອນ 3.”

“ພວກ​​ເຮົາ​ຕ້ອງ​ຍູ້​ແຮງ​ການ​ພັດ​ທະ​ນາ​ບັນ​ດາ​ຂົງ​ເຂດ​ອື່ນ​ຄື: ພັດ​ທະ​ນາ​ການ​ຜະ​ລິດ​ອຸດ​ສາ​ຫະ​ກຳ, ອຸດ​ສາ​ຫະ​ກຳ​ຫ​ນູນ​ຊ່ວຍ, ຍູ້​ແຮງ​ການ​ພັດ​ທະ​ນາ​ກະ​ສິ​ກຳ​ເຕັກ​ໂນ​ໂລ​ຊີ​ຂັ້ນສູງ, ລັດ​ຖະ​ບານ ພວມ​ປະ​ຕິ​ບັດ​ຢ່າງ​ຂ້ຽວ​ຂາດ​ໃນ​ກາ​ນ​ແກ້​ໄຂ​ຫນີ້​ເສຍ, ແກ້​ໄຂ​​ເລື່ອງບັນ​ດາ​ທະ​ນາ​ຄານ​ອ່ອນ​ດ້ອຍ. ລັດ​ຖະ​ບານ​ໄດ້​ສ້າງ​ຕັ້ງ​ຄະ​ນະ​​ຮັບ​ຜິດ​ຊອບ​ການສ້າງ​ໂຄ​ງ​ປະ​ກອບ​ລະ​ບົບ​ທະ​ນາ​ຄານ​ຄືນ​ໃຫມ່. ໃນ​ໄລ​ຍະ​ປະ​ຈຸ​ບັນ, ຕ້ອງ​ເອົາ​ໃຈ​ໃສ່​ທີ່​ສຸດ​ເຖິງ​ການ​ພັດ​ທະ​ນາ​ເສດ​ຖະ​ກິດ​ພາກ​ເອ​ກະ​ຊົນ ເພາະ​ວ່າ ເສດ​ຖະ​ກິດ​ພາກ​ເອ​ກະ​ຊົນ​ແມ່ນ​ກຳ​ລັງ​ຫ​ນູນ​ຂອງ​ພື້ນ​ຖານ​ເສດ​ຖະ​ກິດ.”

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.