ຜົນກອງປະຊຸມລັດຖະບານສະໄໝສາມັນປະຈຳເດືອນມີນາ

ກອງປະຊຸມລັດຖະບານສະໄໝສາມັນປະຈຳເດືອນມີນາ ໄດ້ໄຂຂຶ້ນໃນວັນທີ 15 ແລະປິດລົງໃນວັນທີ 16 ມີນາ 2017 ທີ່ສຳນັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະສະມາຊິກລັດຖະບານ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.

ກອງປະຊຸມລັດຖະບານຄັ້ງນີ້ ໄດ້ພ້ອມກັນສຸມໃສ່ປຶກສາຫາລື ແລະຕົກລົງຮັບຮອງເອົາເອກະສານສຳຄັນຈຳນວນໜຶ່ງຄື: ບົດລາຍງານສະພາບການຈັດຕັ້ງປະຕິບັດແຜນການ ແລະລາຍຮັບ-ລາຍຈ່າຍງົບປະມານ; ບົດລາຍງານກ່ຽວກັບການຈັດຕັ້ງປະຕິບັດການປະມູນຊື້-ຂາຍໄມ້, ການສົ່ງອອກໄມ້ ແລະບັນດາໂຮງງານປຸງແຕ່ງໄມ້; ບົດລາຍງານກ່ຽວກັບການດຳເນີນທຸລະກິດຈຳນວນໜຶ່ງທີ່ບໍ່ສອດ ຄ່ອງກັບກົດໝາຍ, ລະບຽບການຂອງລັດ; ຮ່າງກົດໝາຍວ່າດ້ວຍໄຟຟ້າ ສະບັບປັບປຸງ; ຮ່າງຄຳສັ່ງຂອງທ່ານນາຍົກ ລັດຖະມົນຕີວ່າດ້ວຍການຄຸ້ມຄອງຮ້ານບັນເທີງ ແລະຮ້ານຂາຍເຫຼົ້າ-ເບຍທີ່ຢູ່ໃກ້ກັບສະຖານການສຶກສາ, ໂຮງໝໍ, ສະຖານທີ່ສາສະໜາ ແລະສະຖານທີ່ສຳຄັນຕ່າງໆ; ຮ່າງດຳລັດວ່າດ້ວຍການຈັດຕັ້ງ ແລະການເຄື່ອນໄຫວຂອງຄະນະກຳມະ ການຂົນສົ່ງແຫ່ງຊາດ ສະບັບປັບປຸງ; ຮ່າງດຳລັດວ່າດວຍການຈັດຕັ້ງ ແລະການເຄື່ອນໄຫວຂອງດ່ານສາກົນທາງ ບົກ ແລະຮ່າງຂໍ້ຕົກລົງວ່າດ້ວຍມາດຕະ ຖານເຕັກນິກຂອງດ່ານສາກົນທາງບົກ; ຮ່າງດຳລັດວ່າດ້ວຍການປົກປ້ອງເງິນ ຝາກ; ຮ່າງຂໍ້ຕົກລົງວ່າດ້ວຍການຈັດຕັ້ງ ແລະການເຄື່ອນໄຫວຂອງຄະນະກຳມະ ການສົ່ງເສີມ ແລະຄຸ້ມຄອງການລົງທຶນ ແລະຂໍ້ຕົກລົງວ່າດ້ວຍການຈັດຕັ້ງ ແລະການເຄື່ອນໄຫວຂອງຫ້ອງການບໍລິການ ລົງທຶນປະຕູດຽວຂັ້ນສູນກາງ ແລະຂັ້ນແຂວງ.

ໂດຍລວມແລ້ວເຫັນວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານໃນຕົ້ນປີ 2017 ນີ້ ເຖິງວ່າຈະປະສົບກັບຄວາມຫຍຸ້ງຍາກຫຼາຍຢ່າງ ແຕ່ກໍສາມາດບັນລຸຜົນສຳເລັດທີ່ໜ້າຊື່ນຊົມ, ເຮັດໃຫ້ປະເທດຊາດສືບຕໍ່ມີສະຖຽນລະພາບການເມືອງຢ່າງໝັ້ນຄົງ, ສັງຄົມມີຄວາມສະຫງົບ ແລະຄວາມເປັນລະບຽບຮຽບຮ້ອຍ, ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ທາງດ້ານວັດຖຸ ແລະຈິດໃຈຂອງປະຊາຊົນບັນດາເຜົ່າດີຂຶ້ນເປັນລຳດັບ.

ໃນເດືອນເມສາຈະມີຫຼາຍເຫດການ ແລະວຽກງານທີ່ສຳຄັນເປັນຕົ້ນແມ່ນກອງປະຊຸມສູນກາງຄົບຄະນະຂອງຄະນະບໍລິຫານງານສູນກາງພັກຄັ້ງທີ 4 (ສະໄໝທີ x), ບຸນປະເພນີລາວ, ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ແລະວຽກງານອື່ນໆທີ່ໄດ້ກຳນົດຢູ່ໃນວຽກຈຸດສຸມປະຈຳປີຂອງ ລັດຖະບານແລ້ວເນື່ອງຈາກວຽກທີ່ຕ້ອງ ປະຕິບັດມີຫຼາຍ ເພື່ອເຮັດໃຫ້ການເຄື່ອນໄຫວຂອງລັດຖະບານດຳເນີນໄປຢ່າງມີປະສິດທິຜົນ.

ທ່ານນາຍົກລັດຖະມົນຕີ ຈິ່ງໄດ້ຊີ້ນຳໃຫ້ສະມາຊິກລັດຖະບານ ຈົ່ງນຳເອົາເນື້ອໃນຈິດໃຈທີ່ໄດ້ຕົກລົງເປັນເອກະພາບໃນກອງປະຊຸມຄັ້ງນີ້ໄປຈັດຜັນຂະຫຍາຍໃຫ້ເກີດມີໝາກຫຜົນສຳເລັດ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.