ຜ້າຍ້ອມສີທຳມະຊາດສິນຄ້າໂອດັອບ ຍົມມະລາດ

ທ່ານ ຄໍາແພງ ເລື່ອງຄໍາມາ ຫົວໜ້າຫ້ອງການອຸດສາຫະກໍາ ແລະການຄ້າ ເມືອງຍົມມະລາດ ແຂວງຄຳມ່ວນ ໄດ້ກ່າວໃຫ້ຮູ້ບໍ່ດົນມານີ້ວ່າ: ສໍາລັບເມືອງຍົມມະລາດແມ່ນເປັນ ເມືອງໜຶ່ງທີ່ໄດ້ກໍານົດເອົາຜ້າຍ້ອມສີທໍາມະຊາດເປັນສິນ ຄ້າໜຶ່ງເມືອງໜຶ່ງຜະລິດຕະພັນ ODOP ຊຶ່ງໃນປີ 2007 ແມ່ນໄດ້ມີການລິເລີ່ມສ້າງຕັ້ງກຸ່ມໂດຍໄດ້ຮັບການສະໜັບສະໜູນຈາກບໍລິສັດໄຟຟ້ານ້ຳເທີນ 2 ໃນວົງເງິນ 10 ລ້ານ ກີບ ໃນເບື້ອງຕົ້ນເຊິ່ງປະກອບມີ 10 ຄອບຄົວເຊັ່ນ: ການໄປທັດສະນະສຶກສາ, ການໄປແລກປ່ຽນບົດຮຽນແຫ່ງຕ່າງໆ ໂດຍມີວິຊາການສະເພາະດ້ານຂອງໂຄງການໄດ້ເຂົ້າມາຊ່ວຍຫຼັງຈາກນັ້ນກໍໄດ້ຂະຫຍາຍສະມາຊິກອອກຈາກ 10 ຄອບຄົວ ມາເປັນ 18 ຄອບຄົວ ໃນການຕໍ່າແຜ່ນຜ້າແມ່ນນໍາໃຊ້ການຍ້ອມສີແບບທໍາມະຊາດຕາມລວດລາຍຕ່າງໆ.

ສໍາລັບດ້ານການຕະຫຼາດຂອງກຸ່ມດັ່ງກ່າວໃນໄລຍະຜ່ານມາແມ່ນຜະລິດຂຶ້ນມາເພື່ອວາງສະແດງ ຫຼື ຈໍາໜ່າຍເວລາມີເທສະການຕ່າງໆເຊັ່ນ: ງານບຸນ ອອກພັນສາ, ບຸນພະທາດສີໂຄດຕະບອງ… ດ້ານການຜະລິດຂອງກຸ່ມສະເລ່ຍປີໜຶ່ງສາມາດຜະລິດໄດ້ 2.160 ແມັດ ຖ້າສະເລ່ຍໃສ່ຫົວຄົນໜຶ່ງໄດ້ປະມານ 120 ແມັດ, ສະເລ່ຍລາຍຮັບຂອງກຸ່ມໄດ້ປະມານ 12-15 ລ້ານກີບຕໍ່ປີ.

ພ້ອມນັ້ນທາງພາກລັດໂດຍສະເພາະພະແນກອຸດສາຫະກໍາ ແລະ ການຄ້າກໍໄດ້ມີການຊຸກຍູ້ສົ່ງເສີມໃນການເຊີນເຂົ້າຮ່ວມໃນງານວາງສະແດງສິນຄ້າຕ່າງໆ ເພື່ອໃຫ້ກຸ່ມດັ່ງກ່າວໄດ້ມີຄວາມກະຕືລືລົ້ນຢາກເຮັດ ແລະລາຍຮັບເຂົ້າສູ່ຄອບຄົວຕົກມາຮອດວັນທີ 25 ຕຸລາ 2015 ສິນຄ້າດັ່ງກ່າວກໍໄດ້ຖືກຮັບຮອງເປັນສິນຄ້າ ODOP ໂດຍໄດ້ປະກາດຢູ່ພະ ແນກອຸດສາຫະກໍາ ແລະການຄ້າແຂວງ.

ສໍາລັບໃນໄລຍະການວາງສະແດງສິນຄ້າຢູ່ງານບຸນພຣະທາດສີໂຄດຕະບອງປີນີ້ເຫັນວ່າສິນຄ້າຂອງກຸ່ມແມ່ນສາມາດສ້າງລາຍຮັບໄດ້ເຖິງ 50% ຂອງຈໍານວນສິນທີ່ນໍາມາຂາຍທັງໝົດ.

ທ່ານ ຄໍາແພງ ໄດ້ກ່າວຕື່ມວ່າ: ສໍາລັບທິດທາງແຜນການຕໍ່ໜ້າທາງພາກລັດຂອງພວກເຮົາແມ່ນຈະໄດ້ສືບຕໍ່ໃຫ້ການຊຸກຍູ້ປັບປຸງຫຼາຍຢ່າງໃນການຜະລິດ, ໃນການນໍາພາເຂົາເຈົ້າໄປທັດສະ ນະສຶກສາແລກປ່ຽນບົດຮຽນ, ປະສົບ ການທັງພາຍໃນ ແລະຕ່າງປະເທດເພື່ອມາປັບປຸງ ຫຼື ພັດທະນາສິນຄ້າຂອງຕົນເອງໃຫ້ມີຄຸນນະພາບ, ການສະໜັບສະໜູນດ້ານຂອດການຕະຫຼາດໃຫ້ມີຄວາມໝັ້ນຄົງກ້າວໄປເຖິງການສ້າງເຂັ້ມ ແຂງດ້ວຍຕົນເອງ ແລະກຸ້ມຕົນເອງໄດ້ໃນອະນາຄົດ.

ໂດຍ: ແດງສະຫວັດ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.