ພະ​ແນກ ວຕ ລົງ​ກວດ​ທຽບ​ມາດ­ຖານ​ໝໍ້­ນັບ­ໄຟ ແລະ ​ນ້ຳ​ປະ­ປາ ຢູ່​ເມືອງ​ທ່າ​ແຕງ

ໃນ​ວັນ​ທີ 25 ເມ­ສາ 2017 ນີ້, ທ່ານ ນົງ​ວິ­ຊຽນ ສຸ­ວັນ​ນາ ຫົວ­ໜ້າ​ຂະ­ແໜງ​ຊັບ​ສິນ​ທາງ​ປັນ­ຍາ ແລະ​ວັດ­ແທກ ພະ​ແນກ​ວິ­ທະ­ຍາ­ສາດ ແລະ​ເຕັກ​ໂນ​ໂລ​ຊີ (ວຕ) ແຂວງ​ເຊ​ກອງ ພ້ອມ​ດ້ວຍ​ຄະ­ນະ​ຮ່ວມ​ກັບ​ຫ້ອງ­ການ ວຕ ເມືອງ​ທ່າ​ແຕງ ໄດ້​ສົມ­ທົບ​ກັບ​ລັດ​ວິ​ສາ​ຫະ​ກິດ​ໄຟ­ຟ້າ ແລະ​ລັດ​ວິ​ສາ​ຫະ​ກິດ​ນ້ຳ​ປະ­ປາ ສາ­ຂາ​ແຂວງ​ເຊ​ກອງ ໄດ້​ລົງ​ເຄື່ອນ​ໄຫວ​ຕິດ­ຕາມ​ກວດ­ກາ, ກວດ​ທຽບ​ໝໍ້­ນັບ­ໄຟ​ຟ້າ ແລະ​ໝໍ້ ແທກ​ນ້ຳ​ປະ­ປາ​ໃນ​ຈຳ­ນວນ 53 ບ້ານ ບ້ານ​ທົ່ວ​ເມືອງ​ທ່າ​ແຕງ.

ທ່ານ ນົງ​ວິ­ຊຽນ ສຸ­ວັນ​ນາ ກ່າວ​ວ່າ: ການ​ລົງ​ເຄື່ອນ​ໄຫວ​ຕິດ­ຕາມ​ກວດ­ກາ, ກວດ​ທຽບ​ໝໍ້​ນັບ​ກະ­ແສ​ໄຟ­ຟ້າ ແລະ​ໝໍ້​ແທກ​ນ້ຳ​ປະ­ປາ​ໃນ​ຈຳ­ນວນ 53 ບ້ານ ບ້ານ​ທົ່ວ​ເມືອງ​ທ່າ​ແຕງ ໃນ​ຄັ້ງ​ນີ້ ແມ່ນ​ເປັນ​ການ​ກວດ​ທຽບ​ລະ­ບົບ​ປົກ­ກະ­ຕິ​ປະ­ຈຳ​ປີ ແລະ​ວິ­ທີ​ການ​ກວດ​ທຽບ​ແມ່ນ​ປະ­ຕິ­ບັດ​ຕາມ​ລະ­ບຽບ​ຂອງ​ກະ­ຊວງ​ວິ­ທະ­ຍາ­ສາດ ແລະ​ເຕັກ​ໂນ​ໂລ​ຊີ, ກົມ​ມາດ­ຕະ­ຖານ ແລະ​ການ​ວັດ­ແທກ, ຊຶ່ງ​ໃນ​ທົ່ວ ເມືອງ​ທ່າ​ແຕງ​ມີ​ໝໍ້​ນັບ​ກະ­ແສ​ໄຟ­ຟ້າ​ທັງ​ໝົດ 5.969 ໜ່ວຍ ແລະ​ມີ​ໝໍ້​ແທກ​ນ້ຳ​ປະ­ປາ​ຈຳ­ນວນ 1.810 ໜ່ວຍ, ທັງ​ນີ້ ກໍ່​ເພື່ອ​ໃຫ້​ມີ​ຄວາມ​ລະ­ອຽດ​ຊັດ​ເຈນ ແລະ​ຖືກ­ຕ້ອງ​ຕາມ​ມາດ­ຕະ­ຖານ ແນ­ໃສ່​ການ​ປົກ​ປ້ອງ​ສິດ­ຜົນ­ປະ­ໂຫຍດ, ຊັບ​ສິນ​ຂອງ ຜູ້​ຊົມ­ໃຊ້ ແລະ​ຜູ້​ບໍ­ລິ­ການ​ບໍ່​ໃຫ້​ມີ​ການ​ເອົາ​ລັດ​ເອົາ​ປຽບ​ກັນ.

ທານ​ຫົວ­ໜ້າ​ຂະ­ແໜງ​ຊັບ​ສິນ​ທາງ​ປັນ­ຍາ ແລະ​ວັດ­ແທກ​ກ່າວ​ຕື່ມ​ວ່າ: ຜ່ານ​ການ​ຕິດ­ຕາມ​ກວດ­ກາ ແລະ​ກວດ​ທຽບຕົວ​ຈິງ​ເຫັນ​ວ່າ: ບັນ­ດາ​ໝໍ້​ນັບ​ກະ­ແສ​ໄຟ­ຟ້າ ແລະ​ໝໍ້​ແທກ​ນ້ຳ​ປະ­ປາ​ທີ່​ຕິດ​ຕັ້ງ​ຕາມ​ສຳ­ນັກ­ງານ​ອົງ­ການ​ຕ່າງໆ ແລະ​ທີ່­ຢູ່​ອາ­ໄສ​ຂອງ​ພໍ່​ແມ່​ປະ­ຊາ­ຊົນ​ບໍ່​ມີ​ການ​ຂາດ​ເຄື່ອນ ແລະ​ຖືກ­ຕ້ອງ​ຕາມ​ເຕັກ­ນິກ​ທຸກ​ຢ່າງ​ອັນ​ໄດ້​ເຮັດ​ໃຫ້​ພະ­ນັກ­ງານ, ທະ­ຫານ, ຕຳ­ຫຼວດ​ຕະ­ຫຼອດ​ຮອດ​ພໍ່​ແມ່​ປະ­ຊາ­ຊົນ ມີ​ຄວາມ​ເຊື່ອ​ໝັ້ນ ແລະ​ໝັ້ນ​ໃຈ​ຕໍ່​ການ​ໃຫ້​ບໍ­ລິ­ການ​ຂອງ​ຂະ­ແໜງ­ການ​ກ່ຽວ­ຂ້ອງ​ເປັນ​ຢ່າງ​ດີ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.