ພາຍຸລະດູຮ້ອນພັດເຂົ້າເມືອງໂພນທອງ ເສຍຫາຍ 1 ຕື້ກວ່າກີບ

ຕອນແລງຂອງວັນທີ 17 ມີນາ ຜ່ານມານີ້ພາຍຸລະດູຮ້ອນໄດ້ພັດເຂົ້າເມືອງໂພນທອງ ແຂວງຫຼວງພະບາງ ໄດ້ສ້າງຄວາມເສຍຫາຍໜັກໃຫ້ແກ່ສໍານັກງານ ຫ້ອງການຂອງເມືອງລວມເຖິງບ້ານເຮືອນຂອງພໍ່ແມ່ປະຊາຊົນຮ້າຍແຮງກວ່ານັ້ນ ຍັງມີຜູ້ໄດ້ຮັບບາດເຈັບ 7 ຄົນ, ສາຫັດ 2 ຄົນ ລວມມູນຄ່າເສຍຫາຍເບື້ອງຕົ້ນປະມານ 1 ຕື້ກວ່າກີບ.

ຕາມລາຍງານຂ່າວຈາກເມືອງໂພນທອງຕໍ່ທີມຂ່າວສັງຄົມປະຈໍາແຂວງຫລວງພະບາງໃນຕອນແລງຂອງວັນທີ 21 ມີນານີ້ວ່າ: ໃນຕອນແລງຂອງ ວັນທີ 17 ມີນາຜ່ານມານີ້ເກີດມີຝົນຕົກໜັກ, ລົມແຮງ ແລະໝາກເຫັບຕົກພັດເຂົ້າເຂດເທສະບານເມືອງໂພນທອງ ເຮັດໃຫ້ສໍານັກງານຫ້ອງ, ເສັ້ນທາງ, ບ້ານເຮືອນ, ຊັບສິນ ແລະຜົນລະປູກພໍ່ແມ່ປະຊາຊົນເສຍຫາຍໜັກ ໃນນັ້ນທີ່ໄດ້ຮັບຜົນກະທົບໜັກມີ 6 ບ້ານຄື: ບ້ານກາງ, ປາກອື່ມ, ວັງຊຽງ, ວັງປ່ານ, ປຸ່ງບໍ່ ແລະບ້ານໂດນ ແລະມີຜູ້ໄດ້ຮັບບາດເຈັບ 7 ຄົນ, ສາຫັດ 2 ຄົນ.

ຂໍ້ມູນເບື້ອງຕົ້ນຈາກໜ່ວຍງານເຈົ້າໜ້າທີ່ຂອງເມືອງໂພນທອງທີ່ໄດ້ລົງຕິດຕາມກວດກາປະເມີນຄວາມເສຍຫາຍປະມານ 1,2 ຕື້ກວ່າກີບ. ສະນັ້ນບັນດາຫົວໜ່ວຍທຸລະກິດ, ຫ້າງຮ້ານຕະຫຼອດຮອດພາກສ່ວນຕ່າງໆທີ່ມີນໍ້າໃຈຢາກແບ່ງປັນ, ແບ່ງເບົາຄວາມທຸກຊ່ວຍເຫຼືອປະຊາຊົນເມືອງໂພນທອງທີ່ໄດ້ຮັບຜົນກະທົບຈາກໄພທໍາມະຊາດຄັ້ງນີ້ກໍສາມາດເຂົ້າໄປພົວພັນນໍາພາກສ່ວນທີ່ກ່ຽວຂ້ອງຂອງເມືອງໂພນທອງໄດ້.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.