ມຊ ປະທະ ລາວ​ໂຕ​ໂຢ​ຕ້າ ວັນ​ເສົາ​ນີ້

ມຊ ເອ​ັຟ​ຊີ ພ້ອມ​ແລ້ວ​ທີ່​ຈະ​ສູ້​ກັບ​ທຸກ​ທີມ​ໃນ ລາວ​ພຣີ​ເມຍ​ລີກ 2017 ໂດຍ​ສະ­ເພາະ​ນັດ​ວັນ​ເສົາ ທີ 1 ເມ­ສາ ນີ້ ເປັນ​ການ​ຕ້ອນ­ຮັບ​ການ​ມາ​ຢາມ​ຂອງ ລາວ​ໂຕ​ໂຢ​ຕ້າ ເອ​ັຟ​ຊີ ທີ່​ສະ­ໜາມ​ກີ­ລາ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ລາວ, ຂະ­ນະ​ທີ່ ດີ​ເຄ ເອ​ັຟ​ຊີ ຫວັງ​ໃຊ້​ເກມ​ໃນ​ບ້ານ​ເກັບ​ຄະ­ແນນ​ຈາກ ສະ­ຫວັນ ຢູ​ໄນ​ເຕັດ ໃຫ້​ໄດ້ ເຖິງ​ວ່າ​ຈະ​ເປັນ​ງານ​ຢາກ​ກໍ່​ຕາມ.

ເມື່ອ​ວັນ​ທີ 29 ມີ­ນາ ທີ່​ຜ່ານ​ມາ ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ​ຖະ­ແຫຼງ​ຂ່າວ​ເປີດ​ການ​ແຂ່ງ­ຂັນ ລາວ​ພຣີ​ເມຍ​ລີກ 2017 ຢ່າງ​ເປັນ​ທາງ​ການ ແລະ ຈະ​ເລີ່ມ​ແຂ່ງ­ຂັນ​ນັດ​ທຳ​ອິດ​ໃນ​ວັນ​ທີ 1 ເມ­ສາ ນີ້ ເຊິ່ງ​ມີ​ການ​ຊີງ​ໄຊ 2 ຄູ່ ໂດຍ​ຄູ່​ເອກ ມຊ ເອ​ັຟ​ຊີ ຕ້ອນ­ຮັບ​ການ​ມາ​ຢາມ​ຂອງ ລາວ​ໂຕ​ໂຢ​ຕ້າ ເອ​ັຟ​ຊີ ໃນ​ເວ­ລາ 17:00 ໂມງ ທີ່​ສະ­ໜາມ​ກີ­ລາ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ລາວ, ຂະ­ນະ​ທີ່​ໃນ​ວາ­ລະ​ດັ່ງ­ກ່າວ​ໄດ້​ມີ​ການ​ຖະ­ແຫຼງ​ຂ່າວ​ຄວາມ​ພ້ອມ​ກ່ອນ​ການ​ແຂ່ງ­ຂັນ ໂດຍ ທ່ານ ໃຈ​ລາ­ສີ ຍໍ​ພັນ​ໄຊ.

ຜູ້​ຈັດ­ການ​ທີມ​ຂອງ ມຊ ເອ​ັຟ​ຊີ ກ່າວ​ວ່າ: “ ຈາກ​ການ​ຝຶກ​ຊ້ອມ​ມາ​ຕັ້ງ­ແຕ່​ຕົ້ນ​ປີ ແລະ ປີ​ນີ້ ມຊ ຖື​ວ່າ​ຜ່າ­ຕັດ​ທີມ​ໃໝ່​ເລີຍ ເພາະ​ນັກ​ເຕະ​ຕົວ​ຫຼັກ​ໂດຍ​ສະ­ເພາະ​ກອງ​ໜ້າ​ຊາວ​ຕ່າງ​ຊາດ​ໄດ້​ຍ້າຍ​ອອກ​ຈາກ​ທີມ​ໄປ ແລະ ຫັນ​ມາ​ໃຫ້​ໂອ­ກາດ​ນັກ​ສຶກ​ສາ​ໃນ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ລາວ ໄດ້​ມີ​ສ່ວນ​ຮ່ວມ​ຫຼາຍ​ຂຶ້ນ , ມາ​ຮອດ​ປັດ­ຈຸ­ບັນ​ພວກ​ເຮົາ​ພ້ອມ​ເຕັມ­ທີ່ ແລະ ພວກ​ເຮົາ​ເຊື່ອ​ວ່າ​ຈາກ​ສັກ­ກະ​ຍະ​ພາບ​ຂອງ​ທີມ​ຕອນ​ນີ້​ສາ­ມາດ​ຕໍ່­ກອນ​ໄດ້​ທຸກ​ທີມ ແລະ ແນ່­ນອນ​ວ່າ​ວັນ​ເສົາ​ນີ້​ເປັນ​ນັດ​ທີ່​ມ່ວນ​ແນ່­ນອນ, ໃນ​ນັດ​ທີ່​ຈະ​ພົບ​ກັບ ລາວ​ໂຕ​ໂຢ​ຕ້າ ເອ​ັຟ​ຊີ.

ສ່ວນ ທ່ານ ສອນ​ນະ­ລິນ ນ້ອຍ​ດາ­ລາ ຜູ້​ບໍ­ລິ­ຫານ​ສະ­ໂມ­ສອນ ລາວ​ໂຕ​ໂຢ​ຕ້າ ເອ​ັຟ​ຊີ ກ່າວ​ວ່າ: ສຳ­ລັບ ລາວ​ໂຕ​ໂຢ​ຕ້າ ເອ​ັຟ​ຊີ ໄດ້​ເກັບ​ຕົວ​ຝຶກ​ຊ້ອມ​ມາ​ຕັ້ງ­ແຕ່​ເດືອນ​ທັນ­ວາ 2016 ຫຼັງ​ຈາກ​ລຸຍ​ການ​ແຂ່ງ­ຂັນ ເອ​ເອ​ັຟ​ຊີ ຄັບ ທີ່​ຜ່ານ​ມາ​ຈົນ​ມາ​ຮອດ​ປັດ­ຈຸ­ບັນ​ແມ່ນ​ມີ​ຄວາມ​ພ້ອມ 100% ແລະ ພວກ​ເຮົາ​ຕັ້ງ​ເປົ້າ​ໄວ້​ຄື​ການ​ຕິດ 1 ໃນ 2 ຂອງ​ຕາ­ຕະ­ລາງ​ຄະ­ແນນ​ລວມ​ປີ​ນີ້ ເຊິ່ງ​ນັກ​ເຕະ​ຊຸດ​ນີ້​ພວກ​ເຮົາ​ໃຊ້​ນັກ​ເຕະ​ເຍົາ­ວະ​ຊົນ​ລຸ້ນ ຢູ 17 ແລະ ຢູ 19 ເຂົ້າ​ມາ​ຈຳ­ນວນ​ໜຶ່ງ, ສ່ວນ​ການ​ໄປ​ຢາມ ມຊ ເອ​ັຟ​ຊີ ຄັ້ງ​ນີ້​ບໍ່​ແມ່ນ​ງານ​ງ່າຍ ເພາະ​ປີ​ກາຍ​ນີ້​ເຄີຍ​ບຸກ​ໄປ​ເສຍ​ໃຫ້​ກັບ ມຊ ເອ​ັຟ​ຊີ.

ຂະ­ນະ​ທີ່​ອີກ​ຄູ່​ໜຶ່ງ​ຈະ​ແຂ່ງ­ຂັນ​ໃນ​ວັນ ແລະ ເວ­ລາ​ດຽວ​ກັນ​ລະ­ຫວ່າງ ດີ​ເຄ ເອ​ັຟ​ຊີ ຈະ​ເປີດ​ບ້ານ​ຕ້ອນ­ຮັບ​ການ​ມາ​ຢາມ​ຂອງ ສະ­ຫວັນ ຢູ​ໄນ​ເຕັດ ທີ່​ສະ­ໜາມ​ເຈົ້າ​ອາ​ນຸ​ວົງ ໂດຍ ທ່ານ ສາຍ­ສະ­ຫວາດ ບຸບ­ຜາ​ນະ­ຄອນ ຜູ້​ຈັດ­ການ​ທີມ​ຂອງ​ເຈົ້າ​ບ້ານ​ເປີດ­ເຜີຍ​ສັ້ນໆ​ວ່າ: “ ດີ​ເຄ ໃນ​ນາມ​ນ້ອງ​ໃໝ່​ຈະ​ພົບ​ກັບ ສະ­ຫວັນ ຢູ​ໄນ​ເຕັດ ທີ່​ເປັນ​ທີມ​ເກົ່າ​ໃນ​ວັນ​ເສົາ​ນີ້​ທີ່​ຖື​ວ່າ​ມີ​ຄວາມ​ທ້າ​ທາຍ​ແຕ່​ກໍ່​ຈະ​ເຮັດ​ໃຫ້​ດີ​ທີ່​ສຸດ ເພາະ​ນັດ​ທຳ​ອິດ​ນີ້​ພວກ​ເຮົາ​ຈະ​ໄດ້​ແຂ່ງ­ຂັນ​ໃນ​ບ້ານ ແລະ ຈະ​ເຕັມ­ທີ່​ເພື່ອ​ຍາດ​ໄຊ­ຊະ­ນະ ”.

ດ້ານ ທ່ານ ເອ­ກະ​ພົບ ໂພ­ທິ​ໄສ ຫົວ­ໜ້າ​ຄູ​ຝຶກ ສະ­ຫວັນ ຢູ​ໄນ​ເຕັດ ກ່າວ​ວ່າ: ສຳ­ລັບສະ­ຫວັນ ຢູ​ໄນ​ເຕັດ ໃນ​ຖາ­ນະ​ທີ່​ເປັນ​ທີມ​ຢາມ​ແນ່­ນອນ​ຕ້ອງ​ກຽມ​ຄວາມ​ພ້ອມ​ເລື່ອງ​ນັກ​ເຕະ ແລະ ວາງ​ແຜນ​ດີໆ ເຊິ່ງ​ນັດ​ນີ້​ຂໍ​ມີ​ແຕ້ມ​ກັບ​ບ້ານ​ກໍ່​ພໍ­ໃຈ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.