ມັນ­ຕົ້ນ​ສິນ­ຄ້າ​ປາຍ​ແຫຼມ​ເມືອງ​ເລົ່າ​ງາມ​ ​ປ່ຽນ​ຊີ­ວິດການ​ເປັນ​ຢູ່​ປະ­ຊາ­ຊົນ​ດີ​ຂຶ້ນ​ເທື່ອ​ລະ​ກ້າວ

ຊາວ​ເມືອງ​ເລົ່າ​ງາມ​ແຂວງ​ສາ­ລະວັນ​ເກືອບ 100 ບ້ານ ໄດ້​ພາ­ກັນ​ສຸມ​ໃສ່ແກ່​ການ​ປູກ​ມັນ­ຕົ້ນ​ເປັນ​ສິນ­ຄ້າ ເພື່ອ​ສົ່ງອອກ​ເຮັດ​ໃຫ້​ໃນ​ເວ­ລາ​ນີ້​ພຶດ​ດັ່ງ­ກ່າວ​ໄດ້ກາຍ­ເປັນ​ສິນ­ຄ້າ​ຫຼັກ​ໃນ​ການ​ສ້າງ​ລາຍຮັບ​ໃຫ້​ກັບ​ຄອບ­ຄົວ ດ້ານ​ຫົວ­ໜ້າ​ຫ້ອງການ​ອຸດ­ສາ­ຫະ­ກຳ ແລະ​ການ​ຄ້າ​ເມືອງຍອມ­ຮັບ​ມັນ­ຕົ້ນ​ເປັນ​ສິນ­ຄ້າ​ປາຍ​ແຫຼມ​ທີ່ສາ­ມາດ​ເຮັດ​ໃຫ້​ປະ­ຊາ­ຊົນ​ພາຍ​ໃນ​ເມືອງສາ­ມາດ​ມືນ​ຕາ​ອ້າ​ປາກ​ໄດ້.

ເມືອງ​ເລົ່າ​ງາມ​ແຂວງ​ສາ­ລະ​ວັນ​ຖືເປັນ​ອີກ​ເມືອງ​ໜຶ່ງ​ທີ່​ໜ້າ​ສົນ­ໃຈ​ຂອງ​ບັນດາ​ນັກ​ລົງ­ທຶນ​ທັງ​ພາຍ​ໃນ ແລະ​ຕ່າງ​ປະເທດ ຊຶ່ງ​ໃນ​ໄລ­ຍະ 3-4 ປີ­ຜ່ານ­ມາ, ໄດ້​ມີການ​ສົ່ງ​ເສີມ​ປະຊາຊົນ​ປູກ​ພືດ​ເປັນ​ສິນຄ້າ ໂດຍ​ສະ­ເພາະ​ແມ່ນ​ມັນ­ຕົ້ນ​ເນື່ອງ​ຈາກເປັນ​ເຂດ​ທີ່​ມີ​ອາ­ກາດ​ທີ່​ດີ ແລະ​ດິນ​ເໝາະສົມ​ສຳ­ລັບ​ການ​ຜະ­ລິດ​ປະ­ຈຸ​ບັນ​ປະ­ຊາ­ຊົນຈຳ­ນວນ 97 ບ້ານ​ໃນ​ທົ່ວ​ເມືອງ​ຖື​ເອົາການ​ປູກ​ມັນ­ຕົ້ນ​ເປັນ​ພຶດ​ເສດ­ຖະ­ກິດ ເພື່ອ​ສ້າງ​ລາຍ​ຮັບ​ໃຫ້​ກັບ​ຄອບ­ຄົວ​ໃນ​ແຕ່​ລະ​ປີ​ໄດ້​ເປັນ​ຈຳ­ນວນ​ຫຼວງ­ຫຼາຍ ໂດຍ​ມີ​ພື້ນ​ທີ່​ປູກ​ປະ­ມານ 8 ພັນ​ກວ່າ​ເຮັກ­ຕາ ແລະ​ມີ​ຈຸດ​ເກັບ​ຊື້ 10 ແຫ່ງ.

ທ່ານ ອິນ​ແກ້ວ ຈັນ­ທະ​ລາ ຫົວ­ໜ້າ​ຫ້ອງ­ການ​ອຸດ­ສາ­ຫະ­ກຳ ແລະ​ການ​ຄ້າ ເມືອງ​ເລົ່າ​ງາມ ແຂວງ​ສາ­ລະ​ວັນ​ໃຫ້​ຮູ້​ເຖິງ​ແຜນ­ການຈັດ​ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ ໂດຍ​ສະ­ເພາະ​ແມ່ນ​ຂະ­ແໜງ­ການ​ຄ້າ ຊຶ່ງ​ໃນ​ປີ 2016 ຜ່ານ​ມາ​ມີ​ປະຊາ​ຊົນ​ຫຼາຍ​ກວ່າ 70 ພັນ​ຄົນ​ໃນ​ຈຳ­ນວນ 97 ໝູ່ ບ້ານ​ຖື​ເອົາ​ການ​ປູກ​ມັນ­ຕົ້ນ​ເປັນ​ອາ­ຊີບ​ຕົ້ນ­ຕໍ,ເນື່ອງ​ຈາກ​ໄລ­ຍະ​ຜ່ານ​ມາ​ມີ​ຫຼາຍ​ບໍ­ລິ­ສັດລົງ­ທຶນ​ສົ່ງ­ເສີມ​ປະ­ຊາ­ຊົນ​ປູກ ແລະ​ເກັບ​ຊື້, ຄຽງ​ຄູ່​ກັນ​ນັ້ນ​ຄວາມ​ຕ້ອງ­ການ​ຂອງ​ຕະຫຼາດ​ແມ່ນ​ມີ​ສູງ​ຂຶ້ນ, ໃນ​ທຸກ​ປີ​ຈິ່ງ​ເຮັດ​ໃຫ້ມີ​ການ​ຂະ­ຫຍາຍ​ເນື້ອ­ທີ່​ເພີ່ມ​ຂຶ້ນ​ທຸກ​ປີ ຊຶ່ງສາ­ມາດ​ເວົ້າ​ໄດ້​ວ່າ​ມັນ­ຕົ້ນ​ເປັນ​ສິນ­ຄ້າປາຍ​ແຫຼມ​ຂອງ​ເມືອງ​ກວມ​ເອົາ​ອັດ­ຕາສ່ວນ 70% ຂອງ​ສິນ­ຄ້າ​ສົ່ງ​ອອກ​ເມືອງເລົ່າ​ງາມ​ໄປ​ຍັງ​ປະ­ເທດເພື່ອນ​ບ້ານ ໂດຍສະ­ເພາະ​ແມ່ນ​ປະ­ເທດ​ໄທ​ທີ່​ເປັນ​ຕະ­ຫຼາດຮອງ​ຮັບ​ອັນ​ສຳ­ຄັນ.

ທ່ານ​ໃຫ້​ຮູ້​ຕຶ່ມ​ວ່າ: ໃນ​ແຕ່​ລະ​ປີ​ບັນ​ຍາກາດ​ການ​ຊື້-ຂາຍ​ມັນ­ຕົ້ນ​ຈະ​ເລີ່ມ​ມີຄວາມ​ຄຶກ­ຄັກ​ເລີ່ມ​ແຕ່​ເດືອນ​ຕຸ­ລາ​ຂອງ​ປີຜ່ານ​ມາ​ຈົນ​ເຖິງ​ເດືອນ​ເມ­ສາ​ຂອງ​ປີ​ຖັດໄປ ຊຶ່ງ​ມີ​ທັງ​ມັນ​ດິບ ແລະ​ມັນ​ແຫ້ງ​ທີ່​ປະຊາ​ຊົນ​ຂົນ​ມາ​ຂາຍ​ໃຫ້​ກັບ​ບໍ­ລິ­ສັດ​ທີ່​ເກັບຊື້, ສະ­ເລ່ຍ​ມັນ​ທີ່​ຂາຍ​ໃຫ້​ກັບ​ບໍ­ລິ­ສັດ​ເກັບຊື້​ໃນ​ແຕ່​ລະ​ມື້​ປະ­ມານ 20 ຄັນ​ລົດ​ຮຸນ​ໄດ ຫຼື ປະ­ມານ 50 ໂຕນ​ຕໍ່​ມື້ ຊຶ່ງ​ລວມ​ຍອດການ​ສົ່ງ​ອອກ​ມັນ­ຕົ້ນ​ຂອງ​ເມືອງ​ໃນ​ປີ 2016 ມີ​ພຽງ​ແຕ່ 1 ແສນ​ກວ່າ​ໂຕນ​ເທົ່າ​ນັ້ນ, ແຕ່​ຄາດ​ວ່າ​ໃນ​ປີ 2017 ນີ້

ອາດ​ຈະ​ໄດ້​ສູງ​ເຖິງ 3 ແສນ​ກວ່າ​ໂຕນ, ທັງ​ນີ້ ​ກໍ່​ຍ້ອນ​ຫຼາຍ​ປັດ​ໄຈ ແລະ​ສິ່ງ​ໜຶ່ງ​ທີ່ເຫັນ​ໄດ້​ຊັດ​ເຈນ​ກໍ​ຄື​ຈຳ­ນວນ​ບໍ­ລິ­ສັດ​ທີ່​ຮັບຊື້​ເພີ່ມ​ຂຶ້ນ, ຈາກ​ເມື່ອ​ກ່ອນ​ມີ​ພຽງ​ແຕ່ 2-3 ບໍ­ລິ­ສັດ​ມາ​ຮອດ​ປະ­ຈຸ​ບັນ​ມີ​ເຖິງ 10 ບໍລິ​ສັດ​ທີ່​ຮັບ​ເກັບ​ຊື້​ມັນ­ຕົ້ນ​ຈາກ​ປະ­ຊາ­ຊົນ.

ສຳລັບລາຄາມັນຕົ້ນໃນທ້າຍປີ 2016 ຜ່ານ​ມາ​ມັນ­ຕົ້ນ​ມີ​ລາ­ຄາ​ມັນ​ແຫ້ງ 800 ກີບ​ຕໍ່​ກິ​ໂລ, ປະ­ຈຸ​ບັນ​ເພີ່ມ​ຂຶ້ນ​ເປັນ 850 ກີບ​ຕໍ່​ກິ​ໂລ ແລະ​ມັນ​ດິບ​ເມື່ອ​ກ່ອນ 320 ກີບ​ຕໍ່​ກິ​ໂລ​ເປັນ 350 ກິບ​ຕໍ່​ກິ​ໂລ ຊຶ່ງ​ເຮັດ​ໃຫ້​ປະ­ຊາ­ຊົນ​ມີ​ລາຍ​ຮັບ​ໄດ້​ຢ່າງເປັນ​ກອບ​ເປັນ​ກຳ​ເຮັດ​ໃຫ້​ຊິ­ວິດ​ການ​ເປັນຢູ່​ຂອງ​ເຂົາ­ເຈົ້າ​ດີ​ຂຶ້ນ​ເທື່ອ​ລະ​ກ້າວ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.