ຣ໊ອດ​ເຈີ ພາ ເຊລ​ຕິກ ຄວ້າ​ແຊັມ​ລີກ​ໄວ​ສຸດ​ໃນ​ຮອບ 88 ປີ

ເຊລ​ຕິກ ທີມ​ເກັ່ງ​ຈາກ​ເມືອງ​ກລາ​ສ​ໂກ ປະ­ເທດ​ສະ​ກ໋ອດ​ແລນ ຄວ້າ​ແຊັມ ສະ​ກ໊ອດ​ຕິ​ຊ ພຣີ​ເມຍ​ລີກ ປະ­ຈຳ​ລະ­ດູ​ການ 2016 – 2017 ໄດ້​ແລ້ວ​ຫຼັງ​ຈາກ​ທີ່​ບຸກ​ໄປ​ຖະ​ຫຼົ່ມ ຮາດ ອ໊ອຟ ມິດ​ໂລ​ທຽນ 5 – 0 ເຮັດ​ໃຫ້​ຄະ­ແນນ​ຂາດ​ລອຍ​ເປັນ​ທີ່​ຮຽບ​ຮ້ອຍ ແລະ ເປັນ​ການ​ຄວ້າ​ແຊັມ​ໃນ​ລີກ​ສະ​ກ໋ອດ​ແລນ ໄດ້​ໄວ​ທີ່​ສຸດ​ໃນ​ຮອບ 88 ປີ​ອີກ​ດ້ວຍ.

ເຊລ​ຕິກ ພາຍ​ໃຕ້​ການ​ນຳ​ທີມ​ຂອງ    ເບຣນ​ແດນ ຣ໊ອດ​ເຈີ ລົງ​ສະ­ໜາມ​ໃນ​ລີກ​ສູງ​ສຸດ​ຂອງ​ສະ​ກ໋ອດ​ແລນ 30 ນັດ ຊະ­ນະ 28 ນັດ ສະ­ເໝີ 2 ນັດ ເກັບ​ໄດ້ 68 ຄະ­ແນນ, ຂະ­ນະ​ທີ່​ລູກ​ໄດ້​ເສຍ​ຍິງ​ໄປ 81 ປະ­ຕູ ທີ່​ເປັນ​ປະ­ຕູ​ສູງ​ສຸດ​ໃນ​ລີກ ແລະ ເສຍ​ປະ­ຕູ​ພຽງ 18 ປະ­ຕູ ໜ້ອຍ​ສຸດ​ໃນ​ລີກ ສົ່ງ​ຜົນ​ໃຫ້​ຄວ້າ​ແຊັມ​ໄປ​ຢ່າງ​ແນ່­ນອນ​ແລ້ວ ເນື່ອງ​ຈາກ​ອັນ​ດັບ 2 ຢ່າງ ອະ​ເບີ​ດີນ ມີ​ພຽງ 61 ຄະ­ແນນ ຕໍ່­ໃຫ້​ຊະ­ນະ​ລວດ​ທຸກ​ເກມ​ທີ່​ເຫຼືອ​ກໍ່​ບໍ່​ມີ​ທາງ​ໄລ່​ທັນ ເຊິ່ງ ເຊລ​ຕິກ ເປັນ​ທີມ​ທີ່​ຄວ້າ​ແຊັມ​ລີກ​ໄດ້​ໄວ​ທີ່​ສຸດ​ໃນ​ປະ­ຫວັດ­ສາດ​ຂອງ​ລີກ​ສະ​ກ໋ອດ​ແລນ ໃນ​ຮອບ 88 ປີ ທັງ​ທີ່​ເຫຼືອ​ອີກ 8 ນັດ​ໃຫ້​ລົງ​ແຂ່ງ­ຂັນ.

ຈາກ​ຜົນ​ດັ່ງ­ກ່າວ​ເຮັດ​ໃຫ້ ເຊລ​ຕິກ ຄວ້າ​ແຊັມ​ລີກ​ໄປ​ເຖິງ 48 ລະ­ດູ​ການ​ແລ້ວ ແລະ ເປັນ​ສະ­ຖິ­ຕິ​ສູງ​ສຸດ​ໃນ​ປະ­ຫວັດ­ສາດ​ຂອງ​ວົງ​ການ​ບານ­ເຕະ​ລີກ​ຂອງ​ປະ­ເທດ​ສະ​ກ໋ອດ​ແລນ ແລະ ເປັນ​ການ​ຄວ້າ​ແຊັມ​ລີກ 6 ສະ­ໄໝ​ຕິດ­ຕໍ່​ກັນ​ອີກ​ດ້ວຍ ໂດຍ      ເຊລ​ຕິກ ຈະ​ໄດ້​ສິດ​ໄປ​ແຂ່ງ­ຂັນ​ບານ­ເຕະ ຢູ​ຟາ ແຊັມ​ປ້ຽນ​ລີກ ຮອບ​ເພລ​ອ໊ອຟ ຮອບ 2 ໃນ​ລະ­ດູ​ການ​ໜ້າ​ທັນ­ທີ.

ຫຼັງ​ພາ​ທີມ​ຄວ້າ​ແຊັມ​ຮຽບ​ຮ້ອຍ ຣ໊ອດ​ເຈີ ອະ­ດີດ​ຜູ້​ຈັດ­ການ​ທີມ​ຂອງ ລີ​ເວີ​ພູ​ລ ເປີດ­ເຜີຍ​ວ່າ: “ ໜ້າ­ທີ່​ຂອງ​ຂ້ອຍ​ຄື​ມາ​ເຮັດ​ວຽກ​ກັບ ເຊລ​ຕິກ ແລະ ຄວ້າ​ແຊັມ​ໃຫ້​ສວຍ​ງາມ​ທີ່​ສຸດ​ເທົ່າ​ທີ່​ຈະ​ເປັນ​ໄປ​ໄດ້ ເຊິ່ງ​ພວກ​ເຮົາ​ມີ​ຟອມ​ການ​ຫຼິ້ນ​ທີ່​ໂດດ​ເດັ່ນ​ຕະ­ຫຼອດ​ທັງ​ລະ­ດູ​ການ, ແຕ່​ນີ້​ເປັນ​ພຽງ​ຈຸດ​ເລີ່ມ​ຕົ້ນ​ເທົ່າ​ນັ້ນ ແລະ ເລື່ອງ​ທີ່​ໜ້າ​ຕື່ນ­ເຕັ້ນ​ຄື​ທີມ​ນີ້​ຍັງ​ພັດ­ທະ­ນາ​ໄປ​ໄດ້​ອີກ​ໄກ ”.

 

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.