ລັດ­ຖະ­ບານ​ມີ​ລາຍ​ຮັບ​ຈາກ​ເຂດ​ເສດ­ຖະ­ກິດ​ພິ­ເສດ​ແລ້ວ​ຮ້ອຍ​ກວ່າ​ຕື້​ກີບ

ເຂດ​ເສດ­ຖະ­ກິດ​ພິ­ເສດ ແລະ​ເຂດ​ເສດ­ຖະ­ກິດ​ສະ­ເພາະ​ໃນ​ຂອບ​ເຂດ​ທົ່ວ​ປະ­ເທດ​ໃນ​ຂະ­ນະ​ນີ້​ມີ​ທັງ​ໝົດ 12 ແຂວງ​ສາ­ມາດ​ສ້າງ​ລາຍ​ຮັບ​ແກ່​ລັດ­ຖະ­ບານ​ແລ້ວ 128 ຕື້​ກວ່າ​ກີບ ຫຼື ປະ­ມານ 16 ລ້ານ​ກວ່າ​ໂດ​ລາ​ສະ­ຫະ­ລັດ​ຈາກ​ຈຳ­ນວນ 3 ຮ້ອຍ​ກວ່າ​ບໍ­ລິ­ສັດ​ເຂົ້າ​ລົງ­ທຶນ​ພ້ອມ​ສ້າງ​ວຽກ​ເຮັດ​ງານ​ທຳ​ໄດ້​ຫຼາຍ​ເຖິງ 15 ພັນ​ກວ່າ​ຕຳ­ແໜ່ງ.

ກອງ​ປະ­ຊຸມ​ປຶກ­ສາ​ຫາ­ລື​ໃສ່​ຮ່າງໄດ້​ຈັດ​ດຳ­ລັດ​ວ່າ​ດ້ວຍ​ເຂດ​ເສດ­ຖະ­ກິດ​ພິດ​ເສດ (ຂສພ) ແລະ​ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ­ຈັດ­ຕັ້ງ ແລະ​ເຄື່ອນ​ໄຫວ​ຂອງ​ຄະ­ນະ​ຄຸ້ມ​ຄອງ ຂພສ ໄດ້​ຈັດ​ຂຶ້ນ​ໃນ​ວັນ​ທີ 6 ເມ­ສາ 2017 ທີ່​ຫ້ອງ­ການ​ສົ່ງ­ເສີມ ແລະ​ຄຸ້ມ​ຄອງ​ເຂດ​ເສດ­ຖະ­ກິດ​ບຶງ​ທາດ­ຫຼວງ​ນະ­ຄອນ­ຫຼວງ​ວຽງ​ຈັນ ໂດຍ​ການ​ເປັນ​ປະ­ທານ​ຂອງ​ທ່ານ ຄຳ​ລຽນ ພົນ​ເສ­ນາ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ​ການ​ລົງ­ທຶນ.

ທ່ານ ຄຳ​ລຽນ ພົນ​ເສ­ນາ ກ່າວ​ວ່າ: ເຂດ​ເສດ­ຖະ­ກິດ​ໄດ້​ຖືກ​ສ້າງ­ຕັ້ງ​ຂຶ້ນ​ໃນ​ປີ 2002 ໂດຍ​ແມ່ນ​ເຂດ​ເສດ­ຖະ­ກິດ​ພິ­ເສດ​ສະ­ຫວັນ-ເຊ​ໂນ​ເປັນ​ເຂດ​ທຳ​ອິດ ເພື່ອ​ທົດ ລອງ​ການ­ຈັດ­ຕັ້ງ​ປະ­ຕິ­ບັດ, ຈາກ​ນັ້ນ​ກໍ​ໄດ້​ມີ​ການ​ຂະ­ຫຍາຍ­ຕົວ​ເປັນ​ກ້າວໆ​ມາ​ຈົນ​ເຖິງ​ປະ­ຈຸ​ບັນ ຂສພ ມີ​ທັງ​ໝົດ 12 ເຂດ​ໃນ​ຂອບ​ເຂດ​ທົ່ວ​ປະ­ເທດ, ໄດ້​ນຳ​ໃຊ້​ເນື້ອ­ທີ່​ຕາມ​ສັນ­ຍາ​ສຳ​ປະ­ທານ​ຈຳ­ນວນ 19.612 ເຮັກ­ຕາ, ມີ​ການ​ລົງ­ທຶນ​ຕົວ​ຈິງ​ແລ້ວ 1,6 ຕື້​ກວ່າ​ໂດ​ລາ, ໃນ​ນີ້​ເປັນ​ການ​ລົງ­ທຶນ​ຂອງ​ລັດ­ຖະ­ບານ 24 ລ້ານ​ກວ່າ ໂດ​ລາ, ຜູ້​ພັດ­ທະ­ນາ 1,27 ຕື້​ກວ່າ​ໂດ​ລາ ແລະ​ຜູ້​ລົງ­ທຶນ​ລາຍ​ຍ່ອຍ 349 ລ້ານ​ກວ່າ​ໂດ​ລາ, ມີ​ບໍ­ລິ­ສັດ​ທັງ​ພາຍ​ໃນ ແລະ​ຕ່າງ­ປະ­ເທດ​ເຂົ້າ​ມາ​ລົງ­ທຶນ 318 ບໍ­ລິ­ສັດ ແລະ​ຫ້າງ​ຮ້ານ​ຈຳ­ນວນ​ໜຶ່ງ​ຊຶ່ງ​ເປັນ​ຂອງ​ພາກ​ເອ­ກະ​ຊົນ​ພາຍ​ໃນ 57 ບໍ­ລິ­ສັດ ແລະ​ຕ່າງ­ປະ­ເທດ 239 ບໍ­ລິ­ສັດ, ສ່ວນ​ພາຍ​ໃນ​ຮ່ວມ​ກັບ​ຕ່າງ­ປະ­ເທດ ແມ່ນ​ມີ 22 ບໍ­ລິ­ສັດ.

ໃນ​ນັ້ນ ຂະ­ແໜງ­ການ​ບໍ­ລິ­ການ​ກວມ​ເອົາ 40%, ອຸດ­ສາ­ຫະ­ກຳ 32% ແລະ​ການ​ຄ້າ 28%, ພ້ອມ​ທັງ​ສາ­ມາດ​ສ້າງ​ວຽກ​ເຮັດ​ງານ​ທຳ​ໄດ້ 15.544 ຄົນ ແລະ​ໄດ້​ມອບ​ລາຍ​ຮັບ​ເຂົ້າ​ງົບ­ປະ­ມານ​ແລ້ວ 16 ລ້ານ​ກວ່າ​ໂດ​ລາ ຊຶ່ງ​ຄາດ​ວ່າ​ຕົວ​ເລກດັ່ງ­ກ່າວ​ຈະ​ເພີ່ມ​ຂຶ້ນ​ຫຼາຍ​ເທົ່າ​ຕົວ​ໃນ​ອະ­ນາ­ຄົດ​ອັນ​ໃກ້​ນີ້ ເພາະ­ວ່າ​ບັນ­ດາ​ໂຮງ​ຈັກ​ໂຮງ­ງານ​ຕ່າງໆ​ທີ່​ເຂົ້າ​ມາ​ລົງ­ທຶນ​ຢູ່​ພາຍ​ໃນ​ເຂດ​ໄດ້​ສຳ­ເລັດ​ການ​ກໍ່­ສ້າງ ແລະ​ເລີ່ມ​ດຳ­ເນີນ​ກິດ­ຈະ­ການ​ຂອງ​ຕົນ​ແລ້ວ.

ຂະ­ນະ​ທີ່​ກອງ​ປະ­ຊຸມ​ໃນ​ຄັ້ງ​ນີ້​ທ່ານຮອງ​ລັດ­ຖະ­ມົນ­ຕີ​ກ່າວ​ວ່າ​ຈະ​ໄດ້​ສຸມ​ໃສ່​ເນື້ອ​ໃນ​ຕົ້ນ­ຕໍ​ຂອງ 3 ພາກ ຄື: ການ​ສ້າງ­ຕັ້ງ ແລະ​ການ​ລົງ­ທຶນ​ໃນ​ເຂດ​ເສດ­ຖະ­ກິດ​ພິ­ເສດ, ນະ­ໂຍ­ບາຍ​ສົ່ງ­ເສີມ​ການ​ລົງ­ທຶນ ແລະ​ກົງ­ຈັກ​ການ­ຈັດ­ຕັ້ງ, ສ່ວນ​ຮ່າງ​ຂໍ້​ຕົກ­ລົງ​ແມ່ນ​ເນັ້ນ​ໃສ່​ຄົ້ນ­ຄວ້າ​ພິ­ຈາ­ລະ­ນາ​ກ່ຽວ​ກັບ​ໜ້າ­ທີ່ ແລະ​ຂອບ​ເຂດ​ສິດ​ຂອງ​ຄະ­ນະ​ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.